sitoo 23
23
1isi teochʉmi to poolo 'o cou to ngikai, yainca: <ma'o'oahngʉ, ina la'u hi'hioa ta cono h'oyunsova'u, yono tuhcu to hamo la acʉhʉ tʉs'ʉ ho cofkoya, ac'ʉhʉ maitan'e.> 2'o taisaisi 'anania mo smuhnu to soskuskunu ho t'oplikvi 'o sumsu to poolo. 3isi mi'usni to poolo ho yainca: <isic'o thomaesih'a ci tonghifa na suu, tesi patvovei to hamo! ho miko yusuhngu sica, manteko i'tohungu no hoolicu ho yʉsvʉta a'o, miko apuyu pef'uhu to hoolicu. smuhnu ho tutva a'o!>
4i'omo bichipi ci cou isi yainca: <mainci aokoe'i ta taisaisi to hamo!>
5yainca to poolo: <ma'o'oahngʉ, o'a os'o cohivi ho taisaisi taini; yainca to seiso: <<'otela ekuzkuzo tola aʉt'ʉcʉ ta yatatiskova ci taicini.>> >
6isi honga to poolo 'e 'ayumona tamo botngonʉ ci cou panto cousatukai, ho coufalisai; cu yonta ngikai ho tmunoi mainca: <ma'o'oahngʉ, zou cihi ta coufalisai a'o, zou oko no coufalisai, ho mi'o yontan'e maitan'e ho noa tuucocosi mo acʉhʉ nomio ho mi'o mingeou no smoevovei 'o micu mcoi ci cou!>
7ne isicu pateafa 'e e'e eni, cu yupa toohcʉvho 'o cousatukai ho coufalisai, maezo boepaevai 'o mo botngonʉ. 8maica. 'o cousatukai o'a ihe taa'uzva na smoevovei, maezo o'amo tmaa'uzo no tensi ho moipiepiya, at'inghi i'e coufalisai ihe acʉha taa'uzva 'emo tuyu. 9mo ausuhcu tmunoi 'emo yangaevi, mo yac'ʉ 'omo piyo ci coufalisai ho lema'cohio seiso, mo 'aanana'o yu'hango ho yainca: <o'aimza honga hoci pano mo o'te emzo taini! mo asonʉ a'ʉmtʉ mi'usnu taini na tensi ho ina moipiepiya ho aomotʉ'ʉ!>
10micu ausuhcu teesnoi, isi sokoeva to eahafo hocihe ethʉthʉsi 'o poolo, isicu pashʉya 'o heetai ho uhto taico tamo botngonʉ ho ti'einga 'o poolo, hafa yʉmeʉmʉ to 'oyona heetai.
11to yofnasi, mo bichipi to poolo 'o nooe'oca, yainca: <teko 'ʉteʉ! mikocu yonta 'elusalemu ho 'akasineni a'o, totiski tako ahtuo'te maezo yone looma ho 'akasineni a'o.>
akoeva no 'a'usni 'o poolo
12taseonasi ne micu hucma, mo noteuyunu 'o couyutaya ho yu'tasvʉtʉ, esvʉtʉ ho yainca hoci o'te opcoza 'o poolo o'ate bonʉ ho mimo. 13i'o mo yu'tasvʉtʉ ci cou mo msʉptʉhʉ. 14mo nʉthʉ uhto saisicoo ho macocoolo, yainca: <mimzacu meoino esvʉtʉ: hoci o'te opcoza 'o poolo o'atemza ahtu bonʉ no macucuma! 15maitan'e, temu toehungu 'o ngikai ho mi'usnu to eahafo, hafa uhtan'e 'o poolo, metutusansani na hi'hioasi; tenamza ae'ayocʉ, auyusi ho o'a mocu te sʉc'ʉhʉ tan'e tenamza sʉfkʉti ho opcoza.>
16isi talʉi to pop'eoko to poolo na 'e ihe ta'koeva, cu yʉmeʉmʉ to 'oyona to heetai ho eʉsvʉta to poolo. 17isicu eyoho'a to poolo 'omo cihi ci ngungkang, mi'usni ho yainca: <tekon'a hafa 'e foinana eni ho baito to eahafo; panto tesi mi'usneni ho eʉsvʉta.> 18isicu hafa to ngungkang 'e foinana ho baito to eahafo, yainca: <isi eyoho'a to isi poekotva ci poolo a'o ho eutotaveiya, m'eya poa baito suu 'e foinana eni, pano tesi nana eʉsvʉta suu.>
19isi tiemuca to eahafo ho e'sase'vi, isi tuocosi: <pano teko 'ucia eʉsvʉta?>
20isi yut'inga: <'o couyutaya micu tohmʉskʉ, akoyu no mi'usnu suu ho m'eya e'usna to ngikai 'o poolo, metutusansani na lasi hi'hioa. 21teav'as'a teomneni, maica mo msʉptʉhʉ ci cou tehe akoeva no nothi. mo acʉhʉ esvʉtʉ, honci o'te opcoza 'o poolo o'ate bonʉ ho mimo. micu acʉhʉ ae'ayocʉ, cuc'o totea na teko hia yut'ingi.>
22isi eutotaveiya to eahafo: <teav'a eʉsvʉta no mocmo ho oskocu eʉsvʉta a'o 'e hi'hioa eni>, isicu popeovoveiya.
hafa uhto sootoku ci fuilisu 'o poolo
23'o eahafo micu eyoho'ʉ tomo yoso ci ngungkang, eutotaveiya ho yainca: <ayocʉ no te se'einva ci heetai no coeconʉ, mpʉtvʉhʉ ci heetai no 'uma, se'einva ci heetai no mengiu, e'ohʉ no ma'hisio no huomza hie no yofna ho emo'usnu ne kaisalia; 24a'vinano ayocneni no tesi sopaevi ci 'uma 'o poolo, poʉt'ʉca ho poa uhto sootoku ci fuilisu.> 25'o eahafo mion'a tmopsʉ to tposʉ, maica 'o e'ausnasi:
26<na a'o kolauti lisia te'o mofi ta tposʉ ho faeni suu koe'ia ci sootoku fuilisu ho tuayokeo: 27'o couyutaya ihe tʉtpʉta 'e cou eni, ntehecu opcoza. os'o aiti 'iyama mo yaa ongko no coulooma, cu mahafo to heetai usa ho to'usni. 28os'o 'ucia asansana na koa ihe ehpʉngneni, ko'ko os'o hafa uhto ngikaihe. 29os'o aiti uk'a ci isi nama meamzi cite koa opcoza ho koa poekotva ci kuisi; i'o ihe koa ehpʉngneni. mamoc'o meamzo no meolʉ to iachihe hoolicu. 30ataveisi pantomo mi'usnu a'o ho eʉsvʉta. ihe ta'koeva no opcoza to couyutaya, os'ocu osnia esvʉta no pa'i'usna suu, a'vinano poa uso suu 'omoso anana'o ehpʉngʉ ci cou ho mi'usnu suu ho ehpʉngʉ.>
31mo fiho to mashʉyʉ 'o heetai, hafa 'o poolo, pnanfi na feʉngna ho emo'usnu ne 'antipati. 32ne micu hucma, micu esvovei 'o heetai no coeconʉ, tiuska to heetai no 'uma ho poʉt'ʉca 'o poolo. 33ne micu sʉc'ʉhʉ ne kaisalia, faeni to sootoku 'o tposʉ, ho yaeza faeni 'o poolo. 34isi engha to sootoku 'o tposʉ, a'vinano tuocosi 'o poolo zou yanenu suu. cohivi ho mo ma'hi'usnu to cilicia ci cou, 35cu yainca: <totea ho tac'u esmi 'o moso ehpʉngʉ suu, ta'ucu tasucza na a'a'ausnasu.> isicu eutotaveiya ho poekotvan'a to emoo to helote 'o poolo.
ទើបបានជ្រើសរើសហើយ៖
sitoo 23: bsnfe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Society in Taiwan © 台灣聖經公會版權所有 2014
