sitoo 19
19
yone 'epeso 'o poolo
1ne mon'a yone kolinto 'o 'apolo, mo covnʉ 'o poolo ho smaimsʉ'eonʉhe ta hpʉhpʉngʉ, esmi to 'epeso. yone'e, isi lʉa 'o piyo ci sinto, 2isi tuocosi: <homimu tmaa'uzo to nooe'oca, mimucu tiou to seilei?>
ihe yut'inga: <o'amocu omzala ahta talʉi na yaa seilei ci hi'hioa.>
3ivaha tuocosi to poolo: <mamimueno tiou no toonono no cuma?>
ihe yut'inga: <zou toonono to yohane.>
4yainca to poolo: <i'o toonono to yohane isi hioaneni to micu ma'vovei ci cou; isi eʉsvʉta to cou'isolaelu ho poa tmaa'uzo to tena ataveihe cmʉ'ho cimo cihi, 'ai'oeno iesu.>
5ihecu talʉi 'e e'e eni, cu boemi to ongko to nooe'oca iesu ho tiou to toonono. 6isi hoe'oci to poolo, cu ohpueho to feangohe 'o seilei. micu epiepiya, a'vinano epeaski to e'e to hamo. 7tateuyuna mo asonʉ maskʉ ueso ci cou.
8acngucnguhu tuyu no feohʉ, maito lasi hioa 'o poolo ho uhto kaitoo, e'ʉ'ʉteʉ eʉsvʉsvʉtʉ, mi'usnu to mocmo ho yupa eehcʉvho no hi'hioa to hpʉhpʉngʉ to hamo. poucufnu to cou ho poa tmaa'uzoa. 9to 'ayumonahe panto mo yameomʉ ho o'te mimho tmaa'uzo; yonto tuhcu tomo botngonʉ ho apa'to ekuzkuzo to e'e to nooe'oca. isicu hafa to poolo 'o sinto ho mongoi, huhucmasi#<huhucmasi> panto piyo ci h'unasi ci tposʉ noana'o isi yainca <huhucmasi ahoi to ma'hi maskʉ ucni ac'ʉhʉ to ma'hi sʉptʉ no ataveisi no cohzona>. yonto 'oyona tmopsʉ to tuilanu ho toʉsvʉsvʉtʉ. 10'emo maica ci hi'hioa mo topuska ho isi acngucnguha hioa, i'mi tan'e 'emo afu'u yonta 'aziasoo ci cou, 'upena 'o couyutaya ho couyafana. cu acʉhʉ tmac'ʉhʉ to e'e to nooe'oca.
oko to sukiua
11'o hamo isi ieni to poolo ho hioa 'o taunona'vʉ ci po'e; 12ac'ʉhʉ no panto mo mayo to ohsicu titha to poolo ci 'oyomuya hocieno o'te taf'u ho siya to feango tomo tma'congo, poa yov'o 'o tma'congo, maezo yuyafo 'omo cʉnghʉ to feangohe ci h'aokuv'o. 13pantola smaingongabo, meknuyu no meya hicu ci couyutaya, mo maezo mici titho to ongko to iesu ho hioa 'emo maica ci hi'hioa. ihe mi'usni 'o h'aokuv'o ho yainca: <te'o boemi to ongko to isi psoyaska to poolo ci iesu, pashʉi muu ho yuyafo.> 14i'emo himhohioa tan'e zou i'o mo pitu ci 'o'oko to sukiua ci saisicoo to yutaya.
15at'inghi isi yut'inga to h'aokuv'o: <imza honga 'o iesu. yaeza cohivi zou siya 'o poolo; at'inghi zou siya na muu?>
16i'o isi ti'eopi to h'aokuv'o ci cou isicu 'aanana'veni ho pohcingha ho skʉtpʉti. micu acʉhʉ alolongʉ, yaeza ethʉthʉsi 'o nia yʉsʉhe. hocu yuamaesih'i ho toekameosʉ to emoo. 17i'omo afu'u yone 'epeso ci couyutaya ho couyafana ihe tac'ʉhi 'e hi'hioa eni, acʉhʉ na'no ngoheʉngeʉ; 'o ongko to nooe'oca iesu ahoi tan'e cu h'unasa einva. 18mo 'enepio ci sinto ihecu ahoza epopayoa esansana na ohela hi'hioa ne noana'o. 19botngonʉ ci mosola peiseoyoifo ci cou ihe hafa 'o nia tposʉhe ho coe'eni, yonto ihe toehunga aiti ho hmoi. ihe tohtasvʉta na ntesi huphina ta tposʉ tan'e, nte asonʉ eimo no posi maskʉ ci peisu no nging. 20maicac'o, 'e e'e to nooe'oca cu angabo psoecocoyʉ ho meoino yuayayokeo.
'afeo'fu'u 'o 'epeso
21ataveisi ta hi'hioa tan'e, 'o poolo mo ma'koyu#<'o poolo mo ma'koyu> hocieno yainca <eʉsvʉti to seilei 'o poolo, ma'koyu>. no mine makitong ho 'akaiya, ho uhne 'elusalemu. isi yainca: <ho ta'ucu esmi ne'e, tena'u maezo aahtu uhne looma ho bobaito.> 22isicu skuna 'o mo yoso cila leto'usnu - temote ho 'ilatu - poa uhne makitong, iachin'a akameosʉ notavei ta 'aziasoo.
23tuhcusi tan'e, nomio to e'e to nooe'oca, mo yuyafo ne 'epeso 'omo meoino 'afeo'fu'u. 24pantola lemooyai nging ci cou zou timitho 'o ongkosi, la asonghoi mooyai tomo nging ci uaongko to vio no mamespingi ci 'atimi; 'emo maica ci yaezoya lahe toehunga meoino tasmizi to yupasʉ. 25isi eteuyuna to timitho 'ola yaahioa ho i'o mo totiski 'olahe hioa, mi'usni ho yainca: <maahaah'o. imu cohivi ho mito meelʉ yuyupasʉ mitoc'o acʉhʉ noe'ocʉ ta ito hioa maitan'e. 26maitan'e imucu tac'ʉhi, yaeza aiti 'e isi hi'hioa to poolo. isi yainca: <<'e isi teyai ta emucu ta cou ci hamo o'as'a hamo.>> 'e e'e eni isi nia'tecu acʉha poa tmaa'uzo 'e mo botngonʉ ci cou ta 'epeso ho i'e 'aziasoo. 27ho isi aiti 'e lato hioa isi sokoeva no teto ngoevi na kuici ongko. o'amo anou maica, ac'ʉhʉ ta vio to someoino hicu no mamespingi ci 'atimi tahela yaeza hupotfʉnga, 'ela asonghoza p'ohkui ho koe'ia ta 'aziasoo ho ita mauhpʉhpʉngʉ ci hicu no mamespingi. te maezo aapayo'ʉ na psoevohngʉsi!>
28ne ihecu talʉi tamo botngonʉ 'e e'e eni, cu kuici ma'sʉsʉ'no, tmuezonʉ mainca: <'e hicu ta cou'epeso ci 'atimi la sotaunona'vʉ!> 29micu meangabo ta hosa 'emo 'afeo'fu'u. ihecu tʉtpʉta to yu'papak'i 'o yoso cimo nʉthʉ 'o poolo ci yane coumakitong - kaiyo ho 'alitaku - toehungu toemʉemʉ to yoyasva. 30mo mici emo'usnu to tuhcu to botngonʉ 'o poolo, at'inghi o'aihe poa yʉmeʉmʉ to sinto. 31panto mon'a i'mi ne 'aziasoo ci matataicini, zou nanghia to poolo, maezo smuhnu ho potani 'o poolo, o'te 'ahʉyʉ mooyai sokoeva ho uhto yoyasva. 32tuhcusi tan'e, acʉhʉ 'e ihe yoni yu'eteuyunu mo ep'ʉcʉ ho yangaevi, panto mo moozoyʉ tan'e, moozoyʉ ne'e, botngonʉhe 'o o'amo mako bochio cuma na koahe yu'eteuyunu. 33'o couyutaya ihe posuhca 'o 'alisanta, panto mo mainca ntesi anana'va sviei 'e hi'hioa eni. mo meuoloʉngʉ 'o 'alisanta, te mici mi'usnu to botngonʉ ho ya'ei. 34at'inghi, ne ihecu honga ho couyutaya, micu toehungu moozoyʉ: <'o 'atimi ci hicu no mamespingi ta cou'epeso. mo sotaunona'vʉ!> homo maica ci hia moozoyʉ mo aʉlʉ yusno huomza hie.
35ataveisi, 'o letmotmopsʉ to hosa isi naoputa 'o botngonʉ. isi yainca: <'e cou'epeso, siya namo o'te bochio, 'e hosa ta 'epeso la noʉt'ʉci 'o vio to 'atimi ho i'o mo i'mi ne pepe ho tma'pueho ci cofkoya ci fatu? 36ho uk'a ci moeno peeco tamo maica ci hi'hioa, 'antemucueno amiocni, 'otes'a yaa peisloʉngʉ ci peipeis'ausna. 37ho imu hafa uhtan'e 'emo piyo ci cou, at'inghi, mihin'ieno meo'eoi no macucuma ta vio, maezo o'a mihin'i boevovoyo ta hicu no mamespingito. 38'e timitho ho i'o lahin'i toehungu yaahioa, hocihin'i 'ucia ehpʉngneni na siya, mioeno o'te yaa esvʉta ci hie ho i'o te tmalʉ no ehpʉngʉ ci taicini, 'atehin'ieno meelʉ yupteilʉ ho yupa esansano. 39hoci pano mocmo ci hi'hioa, te maezo meelʉ yonto ngikai ho eususeoma. 40mais'a 'e 'afeo'fu'u maitan'e, teeno ahtao'te eseita na temza anana'va sviei. 'emo maica ci 'afeo'fu'u maitan'e o'amo emzo, maezo o'a ito maka iachia asansana na a'ʉmtʉsi 'o'emamzʉ.> 41eepʉnga 'e e'esi, isicu poa apeaski 'o moso yu'eteuyunu.
ទើបបានជ្រើសរើសហើយ៖
sitoo 19: bsnfe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Society in Taiwan © 台灣聖經公會版權所有 2014
