sitoo 12
12
elʉ tomo asuhcu man'i ci akuzkuzoa 'o kiokai
1asonʉ tuhcusi tan'e, isi akuzkuzoa to honte helote 'omo 'enepio ci sinto to kiokai. 2isi opcoza 'o ohaeva to yohane ci yakovu. 3isi cohivi ho ihe ʉm'ʉmnʉa to couyutaya homo maica 'e hi'hioasi, isi i'vaha tʉtpʉta 'o petelo. (ihe hioa nemo meetoasmoof'o na eni.) 4ne isicu tʉtpʉta 'o petelo, isi poekotva to poo'usna, poa noʉt'ʉcneni tomo sʉptʉ no taucunu ci heetai, 'omo cono taucunu mo sʉptʉ ci heetai. isi ta'koeva no tuyafa to helote ho tac'u ataveisi no meem'esa'o, yonto tehe toehunga aiti to botngonʉ ho yʉsvʉta. 5ko'koeno, ihe afnasa noyʉyʉci 'o petelo homo yonto poo'usna; at'inghi 'o maanat'ohaesa to kiokai ihe pnanfi ho mi'usnu to hamo ho 'inolineni.
yuyafo to poo'usna 'o petelo
6to yofnasi no auyusi ho tesi tuyafa to helote 'o petelo ho yʉsvʉta, 'o petelo mo notaico tomo yoso ci heetai ho oengʉtʉ, isi pomʉti tomo mehaeso ci ekʉka, panton'a heetai to yafana ci mo nomʉtʉ. 7akameosʉ, yaa cihi ci tensi to nooe'oca mo yac'ʉ to ic'o; yaa tiskova cimo psoe'ayumonʉ to poo'usna. isi t'oubobaki to tensi 'o ei'si to petelo ho poecʉ'va. yainca: <aupcio yʉc'ʉ!> 'o ekʉka mo osni i'mi to emucu to petelo ho supeohʉ. 8yainca to tensi 'o petelo: <smoeputu ta snoeputa, msaʉlʉlʉ ta sapiei.> cu maito e'esi 'o peteloho hioa. isi i'vaha yainca to tensi: <efkʉezeni si yʉsʉ no aoskopa, to'ofeihni a'o.> 9mo to'ofeihni 'o petelo ho yuyafo to poo'usna, at'inghi o'a isi cohivi 'o isi hioa to tensi zounana a'ʉmtʉ ci hi'hioa, ma'unano mo baito no mavolosi. 10ihe yupaezuma 'omo coni ho yusno noomʉta to heetai, atavei sʉc'ʉhʉ to tec'u emo'usnu to hosa ci phingi no meemeno, mo invonvo maavo 'o phingi. micu yuyafo, emocaefi tomo mehacni ci ceonʉ; akameosʉ, micu mongoi to petelo 'o tensi.
11ne mio, cu peihsasmome 'o petelo, cu yainca: <os'ocu cohivi ho zou a'ʉmtʉ na eni. isi skuna to nooe'oca 'o tensi, to'usni a'o ho momeesih'i to emucu to helote ho ito tehe topuhngeni a'o to couyutaya ci 'atutumzo.>
12isi husansana 'emo maica ci a'a'ausna, micu emo'usnu to emoo to maliya ci ino to yohane maluko; mo 'enepio 'omo noteuyunu to ic'o ho 'inoli. 13isi t'ototokʉi to petelo 'o phingi to yafana, panto cihi ci soskuskunu no mamespingi zou loota 'o ongkosi. isi talʉi hocu yuyafo. 14isi ta'hongi ho fihngau to petelo, mo angu kaebʉ, o'aisi ta'pangnʉ'va no paavi 'o phingi, cu toevovei ho eʉsvʉta tomo botngonʉ ho yainca mo yac'ʉ ta yafana 'o petelo. 15ihe yainca: <miko eʉngcʉ!> mo ehʉhʉyʉ 'o soskuskunu no mamespingi ho yainca 'a a'ʉmtʉ. ihecu yainca: <ahtuo'te tensisi.>
16ne mio, mo a'cʉ'cʉnʉ tmo'totokʉ to phingi 'o petelo. ihecu paavi 'o phingi, aiti ma a'ʉmtʉ 'o petelo, mo acʉhʉ na'no yamci. 17moc'o meuoloʉngʉ 'o petelo, poa amiocni. cu mi'usni ho eʉsvʉsvʉta isi yainenu to nooe'oca ho isi e'eafi to poo'usna. yaeza eutotaveiya 'omo noteuyunu ho poa eʉsvʉtneni to yakovu ho ito masisinto, micu mongoi ho emo'usnu to mocmo ci hpʉhpʉngʉ.
18ne micu tiskova, mo yu'eemo'ʉ 'o maheheetai, o'aihe cohivi na a'a'ausna to petelo. 19isi poa i'imneni to helote, at'inghi o'aihe ho'honga na emo'a'ausna to petelo; isi tuucocosi 'o moso pocengi ci heetai, mashʉyʉ ho opcoza 'o heetai.
ataveisi ta hioa tan'e, mo mongoi to yutaya 'o helote ho uhne kaisalia, aʉlʉ noomane ne'e.
mcoi 'o helote
20mo mi'usnu to yane tailo ho saitong 'o helote ho meoino ma'sʉsʉ'no, ko'ko micu epei tomo piyo ci taihio 'o yane'e ho baito to helote. ihe aueva ev'ov'ohi 'ola atuhcu aʉt'ʉcʉ to emoo to honte ci polasutu, atavei micu mi'usnu to helote ho noa eususeomʉ, maica ho la'so tata'e no i'mi to lasi aʉt'ʉca to honte ci hupa ho m'elʉ nontehe la 'oanʉ.
21tola afnasa esvʉta ci hie, mo sʉ'eʉsʉ to yʉsʉno honte 'o helote ho yusuhngu to ca'hʉsi, mi'usnu to yatatiskova ho aomotʉ'ʉ. 22mo moozoyʉ 'o yatatiskova ho mainca: <o'as'a fihngau no cou ta ceoa na eni, zou fihngau no hamo!> 23isi osnia patvovei to tensi to nooe'oca 'o helote, maica ho o'aisi ta'usna to hamo na psoevohngʉ. isi poa yo'eocneni to yoi hocu mcoi.
24'o e'e to hamo mo a'cʉ'cʉnʉ ausuhcu psoecocoyʉ ho yuayayokeo.
25ne ihecu aepʉnga to panapa ho saulo 'o ihe hioa, cu mongoi ne 'elusalemu ho yuovei#<cu mongoi ne 'elusalemu ho yuovei> panto piyo ci h'unasi ci tposʉ noana'o isi yainca <cu yuovei ne 'elusalemu>.; ihe engocha 'o yohane maluko ho nʉtheni.
ទើបបានជ្រើសរើសហើយ៖
sitoo 12: bsnfe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Society in Taiwan © 台灣聖經公會版權所有 2014
