kolinto 2 3
3
soskuskunu to faeva esvʉta
1imzan'asi anga eepza 'e iachi? mimzan'asi maezo ta mocmo ci cou ho mofi no tposʉ hocieno mi'usnu muu ho m'eya tposʉ? 2na muu 'aeno tposʉ mia, isi tposi ta 'tohʉngʉmza, ho poa cohivneni no mocmo, poa engheni no mocmo. 3isi na'na husansana, isi iachia tposi to kilisto 'e tengami eni, imza psoecingha. 'e tengami eni o'aisis'a titheni no ongʉ ho tposi to fatu, maisi titheni no piepiya to 'auesiesi hamo ho tposi ta 'tohʉngʉ ta cou.
4ho imza yainca, maica ho imza ieni to kilisto ho mi'usnu to hamo ho yaa maicac'o ci singkoo. 5o'ate yainca na eni, maica ho mimza bie'ocʉ to kilisto ho yaa maica ci singkoo. iachi totontone ho hioa eni; 'e totontonemia mo i'mi to hamo. 6isi poa yaa totontone a'mi ho teyai soskuskunu ta faeva ci esvʉta; 'e esvʉta eni o'a i'o isi huyafi ci tposʉ ta hoolicu, ma esvʉta to seilei. 'e isi huyafi ci tposʉ ta hoolicu mo mahafo no mcoi, at'inghi 'e seilei la mofi to nsou.
7'e hoolicu isi tposi ta fatu ci tposʉ, ne oho epeaska. moso yuyafo 'o psoevohngʉ to hamo, i'omoso mahtiskou to sapci to moose ci tiskova mo e'vono ausuhcu afsi. mioc'o a'cʉ'cʉnʉ taso 'o tiskovasi, ac'ʉhʉ no o'aihe peelʉi teochʉmi to cou'isolaelu 'o moose. hoci mioeno meelʉ psoevohngʉ 'e te mahafo no mcoi ci hoolicu, 8namaeno na isi hioa no seilei na o'ante yaa meoino psoevohngʉ? 9hoci yaa psoevohngʉ 'ete topco no kuisi, 'omo evaho no uk'a kuisi ta cou ci hioa 'atesicueno hafneni no asuhcu meoisi ci psoevohngʉ! 10a'ʉmtʉsi, temza peelʉi yainca, ho mioeno yaa na'nohe taotofsi'i ci psoevohngʉ maitan'e, 'onia taotofsi'i ci psoevohngʉ ne noana'o 'amicueno ausuhcu afsi. 11'o micu ausuhcu afsi hoci panon'a psoevohngʉsi, 'ote no'auesiesi 'amo ahtuo'te yaa someoino psoevohngʉ.
12maica ho mimza yaa maica ci ta'usni, mimza yaa uk'a noc'ʉhi ci 'ʉteʉ. 13o'amimza mais'a 'o moose, tesi 'ahʉyan'a feʉ'sa to yʉteʉ 'o sapcisi, o'te poa aitneni to cou'isolaelu 'o psoevohngʉ ho tec'u ausuhcu afsi. 14at'inghi isi cu sngʉsnga 'o 'tohʉngʉhe. ac'ʉhʉ maitan'e, cono ho lahe engha 'o nia noana'o ci esvʉta, isic'on'a asngʉcva feʉ'sa ta mo totiski ci yʉteʉ. maica, mac'o yuecnguhu to kilisto 'e cou, 'e yʉteʉ eni niantec'u peelʉi eceofi. 15ac'ʉhʉ maitan'e, cono ho lahe engha 'o hoolicu to moose, 'o yʉteʉ mioc'on'a asngʉcʉ mʉfeʉ'sʉ ta 'tohʉngʉhe. 16at'inghi, aʉlʉ mais'a 'o isi engha to seiso: <ne micu miezuhu to nooe'oca 'o moose, 'o yʉteʉ to sapcisi isicu toveuca#<at'inghi...isicu toveuca> hocieno yainca <ho homna nate miezuhu to nooe'oca 'e cou, 'o yʉteʉ isicu toveuca>..> 17'e isi engha tan'e ci <nooe'oca> 'ai'oeno seilei. mo yonenu na piepiya to nooe'oca, na ic'o micu yaa ziu. 18teto acʉhʉ boemi no o'aisi feʉ'sa no yʉteʉ ci sapci ho psoevoveiya na psoevohngʉ to nooe'oca; i'omo i'mi to nooe'oca - i'o seilei - ci psoevohngʉ isi aezuha a'to, poa mi'u'usnu no mi'ausnasi na a'to ho poa yaa asuhcu tofsi'i ci psoevohngʉ.
ទើបបានជ្រើសរើសហើយ៖
kolinto 2 3: bsnfe
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The Bible Society in Taiwan © 台灣聖經公會版權所有 2014