Rooma 8
8
Jiroti Rubeyti Waakh dakhatti
1Maantaka ꞌdooꞌdi icho ichoow Yeesso Kiriisto ba wohoo kalday yahiin, Waakh icho ma hukkumo, sina la ma igoocho. 2Iꞌdi tahe runti gaan Rubeyti Waakh Yeesso Kiriisto ka jiro kikeenta, runtaas gaan la uskeeli omoot keeno a kaasoofurta. 3Wihi amurre Muusa yeelin iubaaꞌdan jeenteti wihi uurasseen goya kijiro uskeel imoono ꞌdarsicheen u, Waakh a yeele. Waakh weeliiski kaldaye sooerge, soorriyoti uskeel yitah. Weeliiska la iꞌdi weeli enenyet u sarti weeli enenyete uskeel lehe khabe. Waakh ꞌdeerka uskeeli weeli enenyet sartiis kijiro hukkume sina igooche, 4ꞌdee jiroteen ka wihi fiffissane amurretaas inno kaꞌdoonto tuum labuuhicha. A mehe wihi uurasseen goya kijiro uskeel imoono ichoow jiroteen ma israahaane, Rubeyti Waakh ichoow jiroteen a israahaan.
5ꞌDooꞌdi jiroticho ichoow wihi uurassicho goya kijiro uskeel imoono israahaan, wihi icho kamassaan a wahaas uurassicho goya kijiro uskeel imoono on. Iꞌdaasenyi ꞌdooꞌdi jiroticho ichoow Rubeyti Waakh israahaan, wihi icho kamassaan a wihi Rubeyti Waakh imoonto. 6Malassi ꞌdooꞌdi wihi uurassicho goya kijiro uskeel imoono dakhtaan, omoote ꞌhela. Iꞌdaasenyi mali Rubeyti Waakh dakhatti, jiro ichoow nebeye ꞌhela. 7A mehe malassi ꞌdooꞌdi wihi uurassicho goya kijiro uskeel imoono a chiiyti Waakh. Malassi iꞌdaase amurreti Waakh ma raahaane, toro la raahin ma yabuuꞌdiin. 8ꞌDooꞌdi wihi uurassicho goya kijiro uskeel imoono dakhtaan, koloo kalday laka Waákh ma kahamaadicho.
9Iꞌdaasenyi Rubeyti Waakh goytiinna fiddiita gone, ꞌdeerka wihi uurassiin goya kijiro uskeel imoono ma atin antaane, Rubeyti Waakhe atin anatta. Eti tuummane Rubey Kiriisto ikhabin koo Kiriisto mee gon. 10Kiriisto goytiinna kijira gone, chirri sartiin jeenteti uskeel u tamuut, jeenteti Waakh ꞌdooꞌdi fiffissan atin iekkaachuu, Rubeyti Waakh jiro a atin siissa. 11Toro la chirri rumanka Rubeyti Waakhe Yeesso omoot kasookihisse goytiin fiddiito, saggaas Waakh Kiriisto omoot ikasookahche, saggaase Rubeyta goytiin fiddiito ka, sartiinta tamuut jiro ikasoolaaba.
12Maantaka ꞌdooꞌd Kiriistokaaw, wihi rumanka Waakh inno kaꞌdoono, uus koloo kalday laka jiroteen ichoow wihi uurasseen goya kijiro uskeel imoono israahin. 13A mehe chaꞌat wihi uuraah goya kijiro uskeel imoono on raahto, rumanka a tamuut. Iꞌdaasenyi chaꞌat Rubeyti Munyee ka uskeeli uuraah imoono tagiis a jirta. 14Iꞌdi tahe ꞌdooꞌdi tuummane Rubeyti Waakh woyto, a nyaakhuti Waakh. 15Iꞌdi tahe Rubeyti Waakhe atin ꞌhesseen ti toro bowꞌdati burꞌdowto atin kayeesso mee. Atin Rubeyti Waakhe iꞌdi teyyanohi Waakh #8:15 Teyyanohi Waakh. Waha a geeddi iche nyaakhuti Waakh tahe. atin kayeesso iche ꞌhesseen. Inno la Rubeytaas ka Waakh a iooyna, “Aabba, Aabbahaanya!” inadeeh. 16Rubeyti Waakh ichoow rubeyoheen saggi inno rumanka nyaakhuti Waakh inahe a isleecheekaan. 17Inno a nyaakhutiissa gone, wihi Waakh nyaakhutiis siicho a muꞌdannahe. Toro wihi Waakh Kiriisto siicho laka a leeꞌhella. A mehe chirri rumanka inno sinati usu lakawaariche leegisanno, weynaanti usu laweynaacho laka a leegisanna gon.
Weynaanti Waakhe inno liisoobabbakkaahicho
18An wihi an kamalde a waha, sinayyohi toolla harrata ka inno khabno ichoow weynaanti buurenye Waakh ꞌdee inno isoobabbakkaahicho ma isiyeyno. 19Harrati goorat Waakh soouume tuumman maanti Waakh ꞌdooꞌdi rumanka nyaakhutiis yahe soobabbakaahicho weyti sugta. 20Iꞌdi tahe harrataas Waakh soouume ti suusahto iche lakayeele. Wahaas la wihi iche ꞌdoonto menye, a wihi Waakh gooche. Iꞌdaasenyi khajjeeli lakhabe kalla, 21harrataas Waakh soouume tuumman suusakki hide a lakasoofura, nyaakhuti Waakhe jiroti haaggane suusah hidin iubaaꞌdan ꞌhele ikhayta.
22Wihi inno garanni, harrati goorat Waakh soouume tuumman ichoowka uliba, iꞌdi wohoo chiisenye bolkhuu, weyti ooyta. 23Harrataas Waakh soouume kalday ma ooyto, innohi gurnaanki oraate Rubeyti Munyee khabno laka a ooyna. Geeddi inno ibeenki Waakh nyaakhutiis inno kayeelo toro la us sarteenti omoote hidde ribnaanki ꞌdaꞌddaboot ribo sugno, goyteen ka a ooyna. 24A mehe Waakh a inno ribe, khajjeeli wihi soosohti inno siiche. Iꞌdaasenyi chirri inno wihi inno berri khajjeello indoheen kaagarro, waha khajjeel mee gon. Etoo wihi us ꞌhele a khajjeela? 25Chirri inno wohoo inno iꞌhelin khajjeel kakhabno la, inno a garrahsanna, wahaas sugna.
26Toro Rubeyti Munyee laka ꞌdarriteen ka a inno gargaarta. Wihi tahe, inno saggi inno Waakh iwahanni ma garanni. Iꞌdaasenyi Rubeyti Munyee iche Waakh inno ihawwaassatta, wihi iche ooyto Waakh idowto la, wihi af ka idaahan layabuuꞌd mee. 27Waakkhi uurassi weeli enenyet fiiricho la, mali Rubeyti Munyee a garta, a mehe wihi Rubeyti Munyee ꞌdooꞌdi Waakh Waakh ihawwaassatti ichoow wihi Waakh ꞌdoono a israahaan.
Yeesso Kiriisto ka soorin a khabna
28Wihi inno garanni a mehe ya, walah tuumman ka Waakh ꞌdooꞌdi usu ꞌdoono wihi haaggan a iyeela. ꞌDooꞌdaas la a ki Waakh saggi us igooche iwahe. 29Iꞌdi tahe Waakh uumaccho on ka ꞌdooꞌdi kiise garte, toro la ꞌhor on ꞌdooꞌdaas saggi us iꞌdi Weeliis ikayeelo gooche. Ulla iꞌdane yeele, ꞌdee Weeliis ꞌdooꞌdi ittaawenye Kiriisto rummeeste goyaka teyyan yateeh. 30Toro la ꞌdooꞌdaas us ꞌhor saggi us iꞌdi weeliis ikayeelo gooche, wahe. ꞌDooꞌdaas us wahe la ꞌdooꞌdi fiffissan iekkaache. ꞌDooꞌdaas us ꞌdooꞌdi fiffissan iekkaache la, saggi us weynaantiis ileegismo iayyiche.
Yeesso Kiriisto ꞌdooninti Waakh inno ikhabo geeddiche inno tusa
31Haagga tuumman a khabna gone, ꞌdeerka mehe nidaahe? Chiꞌ Waakh ankeen jiro, ayyo inno tirrima? 32Waakh Weeliis laka ma inno karimmanne, soorriyoteenna yitah! Waakh Weeliis a inno siiche. Maantaka haaggiiski buure ka walah tuumman usu a inno leesiicha. 33Icho ayyo maanta ꞌdooꞌdi Waakh rubeytiis soobahsate uskeeloo kacheekta? Waakh rubeytiis ꞌdooꞌdaas ꞌdooꞌdi fiffissane iekkaache. 34Ayyo uskeel inno igoocha? Yeesso Kiriistohi yumuyye, wahaas ꞌdirihicho ka la omoot lakasookahche, toolla la anki dahanti miigeete Waakh jiro, Waakh a inno ihawwaasta.
35Mehe inno ichoow ꞌdooninti Kiriisto inno ꞌdoono seley inno bahcha? Sinati inno ꞌhello, ommos wihi miigenye inno kijirro, ommos sinayyohi inno loomhicho, ommos raarah, ommos miskiinnoon, ommos wohoo inno burꞌdoocho, ommos omoot, wohoo kaldaye inno ichoow ꞌdoonintiis ba seley inno bahcho ma jiraan! 36Iꞌdi liichiiruu,
“Nah jeentetaah u kol tuumman omoot on afiche raahna,
iꞌdi iiyti khalme liiwoyo, iche nah liiwoya.”#8:36 Sabuur 44:22.
37Mele gon! Chirri wahanyeyyoha tuumman inno isoobahaan laka, inno ꞌdooninti Kiriisto inno ꞌdoone ka, a ꞌdooꞌdi tuum soorin leh! 38An wihi an tissibo a mehe ya, walah jirtuu dakkhan ꞌdooninti Kiriisto inno ꞌdoono inno kagoocho mele. Omoot ommos jiro ommos herti Waakh ommos ginnayyo ma inno kagoochaan. Wihi toolla jiro ommos wihi sooyomboocho ommos miigti Seytaan laka ma inno kagoochaan. 39Wihi sereyta daayan sartiis kijiro ommos harrata iliche kijiro laka ma inno kagoochaan. Wihi Waakh soouume tuumman goyaka laka, wohoo kaldaye ꞌdooninti Waakh Yeesso Kiriistohi Kamureene ka inno ꞌdoono inno kagoon yabuuꞌd ma jiraan.
ទើបបានជ្រើសរើសហើយ៖
Rooma 8: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
