Rooma 3
3
Waakh a lakakhuufa
1Kamalda bal, yaafohi Yaꞌhuude Waakh soobahsate ꞌdeerka yaafohi Yaꞌhuud ieheynan saggoo a ikadeefaan? Toro la khandihaas Yaꞌhuud indigirtoo khabaayi? 2Rumanka Yaꞌhuudhi layahe indigirti buurenye khaba. Kolooraat wori Waakh yaafohi Yaꞌhuude dahan lagesse.
3Rumanka gaasichokoo Waakh ma kakhuufin. Jeenteti icho Waakh ikakhuufin u Waakh koloo kalday laka ayyintiis ma jebcho. 4Iꞌdaas mee! Chirri weeli enenyet tuumman been goocho laka, Waakh rume leeyahe. Iꞌdi liichiiruu,
“ꞌDee atihi Waakhe saggi at rum on ikaayyeeddo laarga,
toro la saggi at ꞌdooꞌdi wohoo kaacheekti isoorisso laarga.”#3:4 Sabuur 51:4.
5Iꞌdaasenyi chirri inno ꞌdooꞌdi khokkhollokkhan nahe waha la saggi Waakh tuum ifissanyahe ꞌdooꞌd rumanka tusaan, mehe nidaaheey? Waakh chuꞌus holiis inno tuso, a khollokkhayyahe nadeeh? Waha abda, an saggi ꞌdooꞌd gaasoo iyeyyeedo iche iyeyyeeda. 6Iꞌdaas mee! Waakh chuꞌus wihi fissan iraahin, sag us weeli enenyete harrata ihukkumo mele gon. 7Etoo kolossoo a geeddi us iꞌda yadeeh, “Chirri beenteey runti Waakh enenyet mujjum tusso ꞌdee koolohi Waakh buuraataan, Waakh a iꞌdoh ani uliba eti uskeel leh ikagoocha?” 8Chirri atin mali iꞌdaase raahtaan, a geeddi atin iꞌdi ꞌdooꞌdoo iabaaruu iꞌda tadeehiin on, “Alleya suujoon a yeello ꞌdee haag a yimaate!” ꞌDooꞌdi wihi iꞌdee essi, wihi imale a hukkunki lahukkumo, sina liigoocho.
Eti fissan ma jiro
9Maantaka nahi Yaꞌhuude mehe goonna? Innohi yaafohi Yaꞌhuud yaafohi Yaꞌhuud ieheynan a kadeefna? Iꞌdaaru laka ma kadeefno! Saggi an atin ituse u, weeli enenyet tuumman Yaꞌhuud ichoow ki Yaꞌhuud ieheynan ba, uskeele sam dese, woya. 10Iꞌdi liichiiruu,
“Eti fissan ma jiro,
koo kalday laka ma jiro.
11Etoo kaldache kharee ma jiro,
etoo kaldaye Waákh yowti ma jiro.
12Weeli enenyet tuumman Waakh adah a kakhabte,
usu tuumman la hili Waakh ka, tir a kabahe,
etoo kaldaye haag yeelo ma jiro.
Koo kalday laka ma jiro.”#3:12 Sabuur 14:1-3, 53:1-3.
13“Yeedi aficho kasoobaho omoote keena,
harrabbeticho la yeedi beenaat on yeyyeedda.”#3:13 Sabuur 5:9.
“Ayti furuurohicho leetamiit a iꞌdi hadaadohi toof.”#3:13 Sabuur 140:3.
14“Yeedicho tuumman falo ichoow bolokh on buuha.”#3:14 Sabuur 10:7.
15“Icho la diiggi icho khubaan a iꞌharꞌharaan.
16Meelbaaw icho irtaan ka walah on baabulaane, toro oytim keenaan.
17Icho la jiti nebey lakaꞌhelo ma gartaan.”#3:17 Isaaya 59:7-8.
18“Waakh ma karooraane, ommos ma inkaanyitaan.”#3:18 Sabuur 36:1.
19Toollaka wihi inno garanni a mehe ya, wihi amurre Muusa goya kachiiran tuumman ꞌdooꞌdi amurretaas anatti iche leeyyeedda. Waakh la iꞌdane yeela, ꞌdee enenyet tuumman wihi us laabti waaya toro la enenyet tuumman hukkuma, sina igoocha. 20Maantaka etoo kaldaye jeenteti us hili amurretaas ꞌdoonto iyeeluu Waakh ortiis ka eti fissan liiekkaacho ma jiro. Amurretaas ka saggi inno uskeel iyeelle on abanna.
Saggi Waakh weeli enenyet ortiis ka eti fissan iekkaacho
21Toollaka Waakh jiti us ꞌdooꞌdi fiffissan inno iekkaacho a soobabbakkaahiche. Jita la ki amurre laraaho menye, a jiti goorat archiiy Chiirnaanneti amurre Muusa ichoow ti ꞌdooꞌdi Waákh íyeyyeedo cheekte. 22Waakh kakhuufnaanki enenyet Yeesso Kiriisto kakhuufo ka iche enenyet eti ortiis ka fissan iekkaacha. Waha la eti tuummane Yeesso Kiriisto rummeesti ka a rum. Waakh enenyet seley ma sassaaho, 23iꞌdi tahe weeli enenyet tuumman uskeel a yeele, weynaanti Waakh kadeeraate. 24Iꞌdaasenyi Waakh jeenteti haaggiiski buurenye inno imunneynan u enenyet iꞌdaanu ꞌdooꞌdi ortiis ka fiffissan iekkaacha. Jiti us iꞌda kayeele la a ki us Yeesso Kiriisto ka inno gatte. 25Waakh Yeesso enenyet ortiis ka soorriyo kayeele, ꞌdee diig Kiriisto ka holiiski us inno ikhabe laaba. Chirri etoo saggi Yeesso soorriyoti Waakh iyahe kakhuufe, uskeeliis a liikakuta. Waakh la Yeesso soorriyo kayeele, saggi us iffissanyahe tusa. Waakh la iꞌdane yeele a mehe us a samacchaare, ꞌdooꞌdi orey uskeel yeele sirbi ma gelin. 26Toro la Waakh iꞌdane yeele saggi us weyꞌda laka ifissanyahe tusa. Iꞌdaas ka us a fissanyahe toro la eti tuummane Yeesso kakhuufe eti fissane iekkaacha.
27Kamalda bal, wihi inno keeylajno a khabna? Mele, wohoo rucchule inno keeylajno ma khabno! Jeenteti inno amurretoo iraahnuu eylajin a nabuuꞌd? Mele, a jeenteti inno Yeesso ikakhuufno on. 28A mehe chirri inno amurre Muusa raahno menye, chirri inno Yeesso kakhuufno kaldach on Waakh ꞌdooꞌdi fiffissan inno iekkaacha. 29Waakh a Waakkhi yaafohi Yaꞌhuud kaldach on a? Us Waakkhi yaafohi Yaꞌhuud ieheynan laka menya? Aa, a iꞌdaas on, 30iꞌdi tahe Waakh a koo kaldach one, jiti us weeli enenyet tuumman ꞌdooꞌdi fiffissan iekkaacho la a koo kaldach on. Waha la a chirri enenyet Kiriisto kakhuufo on, yaafohi Yaꞌhuude khandiiti eheetteey ichoow yaafohi Yaꞌhuud ieheynane ikhandiyan eheetteey ka ba. 31Maantaka chiꞌinno kakhuufnaanki Waakh lakakhuufo on khumummaanno, amurre Muusa ꞌdol nassil? Mele, iꞌdaas mee! Rumanka chiꞌinno Waakh kakhuufno kaldache amurretaas laka miigoonna.
ទើបបានជ្រើសរើសហើយ៖
Rooma 3: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
