Rooma 11
11
Waakh ꞌdooꞌdi Issiraayele usu kakhuufo isoonaha
1ꞌDeerka wihi an worsadi, Waakh ꞌdooꞌdiis a ꞌdiiꞌde? Mele, iꞌdaaru laka ma ꞌdiiꞌdin! Ani rubeyteey a ꞌdooꞌdi Issiraayele, hiiy Aburaahame kiimiyye, a yaaf Beenjameen. 2Waakh rumanka sag us ꞌdooꞌdiiski goorat usu on uumaccho ka garte iꞌdiiꞌde mele gon. Atin laka rumanka Chiirnaanneti Waakh goyaka maanti eti Waákh íyeyyeedo Eliiya layadeeh Waakh hawwaaste us yaafohi Issiraayel wihi ittaawe kacheekte a garattaan. Eliiya wihi us yidah a mehe ya, 3“Kamur icho ꞌdooꞌdaahki kiyeyyeedo a bakkicheene, chalagtaahti hoola lakasoorriyoocho laka jejjebcheen. Ani kalday on sooꞌhade, toro ani laka ogoose iꞌdoonaan.”#11:3 1 Karnato 19:10, 14. 4Kamalda bal, wihi Waakh Eliiya isoolaabe a mehe? “An mejeli alif teebeenye Baali waakkhi beenaate iwahan, iche isisooꞌhaache.”#11:4 1 Karnato 19:18. 5Toolla laka a iꞌdaas one, Waakh haaggiiski buurenye inno imunneynan ka, ꞌdooꞌdoo rucchule soobahsate, isisooꞌhaache. 6ꞌDooꞌda Waakh soobahsate jeenteti icho wohoo haaggan iyeeleen menye, a jeenteti haaggi Waakhe buure on. A mehe chirri Waakh wihi enenyet yeele yeyo, kootte ꞌdeerka iꞌdaakka haaggaas kola haaggi Waakhe buure mee gon.
7Mehe ꞌdeerka nidaahe? ꞌDooꞌdi Issiraayel wihi us weyti yowte ma ꞌheline, iꞌdaasenyi ꞌdooꞌdi Waakh soobahsate iche waha ꞌhele. ꞌDooꞌdi addane Waakh ikakhuufin Waakh matahenyeticho a dagahnooche. 8Iꞌdi liichiiruu,
“Waakh matahenyeticho saggoo icho ikamalanne iyeele,
indohicho saggoo icho walah ikaargin iyeele,
dogohicho la saggoo icho walah ikadaagin iyeele,
ichoowka maanta laka waha a iꞌda on.”#11:8 Deewutoronomi 29:4, Isaaya 29:10.
9Karnati Dawuud layadeeh wihi us yidah,
“Waakh ba ꞌdooꞌda gololi us yaham ka angey gessa, khabta.
Genney dagah halgo gela, sinati imasse taham.
10Genney indohicho ꞌduuꞌdamaane, icho il argiwwaayaan.
Toro la genney huleesicho dabarreticho jirtuu jebcha.”#11:10 Sabuur 69:22-23.
11Toro wihi an worsadi, ꞌdooꞌdi Issiraayel goorat a tarraantarrate ichoowka sookahin agaafte? Mele! Iꞌdaaru laka iꞌdaas mee. Jeenteti ꞌdooꞌdi Issiraayel Waakh idaagiwwaaye, iche Waakh ꞌdooꞌdi yaafohi Yaꞌhuud ieheynan iribe, ꞌdee ꞌdooꞌdi Issiraayel inaafi us ꞌdooꞌdi yaafohi Yaꞌhuud ieheynan us kiinaafo gesse. 12Iꞌdaasenyi jeenteti ꞌdooꞌdi Issiraayel Waakh idaagiwwaayuu ꞌdooꞌdi harra tuumman buuhi buure a ꞌhele. Toro la jeenteti icho buuhi Waakh iwaayeen u, ꞌdooꞌdi yaafohi Yaꞌhuud ieheynan kamurroonki rubeyeet a ꞌhele. ꞌDeerka maanti tiri ꞌdooꞌdi Issiraayel labuuhiche kamurroonkicho buuhoo geeddohenye keena!
Waakh ꞌdooꞌdi ilassi addan laka a riba
13An atinhi yaafohi Yaꞌhuud ieheynane atin leeyyeeda. An a ergaanoti yaafohi Yaꞌhuud ieheynane, toro la hila wohoo weyti khummane iekkaacha. 14An iꞌdane yeela a mehe anihi ꞌdooꞌdeey inaaf gesso khajjeela, ꞌdee saggoo an gaasichokoo iribo ꞌhola. 15Iꞌdi tahe maanti Waakh ꞌdooꞌdi Issiraayel ꞌdiiꞌde, iche ꞌdooꞌdi addane harrata ankiis keene. A haaggoo geeddohe maanti Waakh ꞌdooꞌdi Issiraayel khaatti? A iꞌdoo ꞌdooꞌdi goorat tuume omoot kasookaho! 16Chirri goonanki oraate makaate Waakh liibahche munya yahe, makaatetaas tuumman a munya gon. Toro la chirri hiiyyassi geey munya yahiin, liikhimohi geeyaas a munya gon.
17A iꞌdi liikhimohoo geeyi oolife gos goyaka bahe geeyaas lakasoojebche. Atinhi ꞌdooꞌdi ilassi addane iꞌdi liikhimohi geeyohi oolife yibaat u, a atin lasookhaate geeyi gos goya kabahe atin lakakabe. Maantaka atin laka subakki hiiyyassi geeyaas oolif kayamiit a ꞌhessaan. Geeyaas oolif la a iꞌdi ꞌdooꞌdi Issiraayel.#11:17 Geeyi oolife yibaat ma layaakhicho. Eti gos leh liikhintoo geeyaas oolife yibaate soojebcha, geeyi oolife gos goya kijiro kakaba. Jeenteti iche geeyi oolife layaakhicho liikakabuu, liikhintaas yibaat subakki buurenye ꞌhessa gurnaanki buure dessa. 18Toollaka atinhi liikhimohi geeyi oolife yibaate, ꞌdooꞌdi liikhimohi Waakh jebchee, sarcho iisgeenna. Chirri atin sarcho isgeessaan waha abda, atin alah hiiyyay menye a liikhimo on. A mehe hiiyyaye liikhimo goollicha. 19Iꞌdaasenyi, ꞌdeerka mehe tadeehiin ya, “Liikhimohaas goorat a lajebche, ꞌdee ani meel liiyeele.” 20A eysiisseen! Iꞌdaasenyi icho jeenteti liijebche, a jeenteti icho Waakh ikakhuufin. Atin la jeenteti atin geey ikakabantahiin, a jeenteti atin Waakh ikakhuufteen. Maantaka, taba giꞌde rannyaat akhabina, Waakh karoora. 21A mehe Waakh chirri goorat liikhimohi ꞌhor geey kijire iꞌdiin, atin laka ma atin ꞌdiicho gon.
22Mujjum saggi Waakh uur iꞌdabakhyahe us uskeel ikagarrahsan isiyeya. Waakh ꞌdooꞌdi uskeel kaassohti a hukkuma, sina igoocha. Atin la uuri ꞌdabakhenye atin tusa, chirri atin saggi us iꞌdoono isohattaan. Koli addan la, atin laka Waakh a atin jebcha, atin roga. 23ꞌDooꞌdi Issiraayel la chuꞌus uskeeliiski us Waakh ikakhuufin sooꞌdiiche, Waakh icho laka a inokhta, geey kakaba. Iꞌdi tahe Waakh geeyi us toro atin kakabo a yabuuꞌd. 24Atinhi ꞌdooꞌdi ilassi addane a iꞌdi liikhimohi geeyi oolife yibaat lakasoojebche, geeyi oolife gos goyaka il lagesse, lakakabe. Waha la a wihi ꞌhoolenye wihi layeelo mee. Iꞌdaasenyi ꞌdooꞌdi Issiraayel a iꞌdi geeya oolife gos goyaka il lagesse. Geeddoo meheenye ꞌdabakhtahe, chiꞌ liikhinti geeyaas geeyi leh on lakakabo.
Waakh ꞌdooꞌdi Issiraayel ichoow ꞌdooꞌdi ilassi addan isoonaha
25ꞌDooꞌd Kiriistokaaw, runtoo dagsane an atinhi abattaan ꞌdoono iche jirta, uus ꞌdee atin wihi atin tahiin ka weyti serey isgeenne. Waha la iꞌdicho a iꞌda, ꞌdooꞌdoo Issiraayel matahenyeticho a lamiigooche, iꞌdaasenyi ꞌdee maanti ꞌdooꞌdi yaafohi Yaꞌhuud ieheynan tiricho buuhsame, matahmiigtichotaas a massatta on. 26Waakh ꞌdeerka ꞌdooꞌdi Issiraayel tuumman a riba, iꞌdi liichiiruu,
“ꞌDoorribe Saayone kasoobaha.
Ulla nyaakhuti hiiy Yaakoobo kayimiy uskeelicho tuumman a kasoolaaba.
27Waha la a ayyinteeyti an icho igooche,
maanti an uskeelicho tuumman kabahcho.”#11:26, 27 Isaaya 59:20-21, 27:9.
28Jeenteti ꞌdooꞌdi Issiraayel Wori Haaggan iꞌdiiꞌduu, icho a chiiyti Waakh. Wahaas la atinhi ꞌdooꞌdi ilassi addan a atin irooyyahiin. Iꞌdaasenyi jeenteti Waakh ꞌdooꞌdi Issiraayel isoobahsatuu, Waakh weyti icho ꞌdoona. Waha la a jeenteti ayyinti us aacchinyeticho iayyiche. 29Iꞌdi tahe Waakh ꞌdooꞌdi us siintiis iꞌdaanu siicho ichoow ꞌdooꞌdi us waho ka maliis ma urgiyicho. 30Atinhi ꞌdooꞌdi ilassi addan goorat Waakh raahin a ꞌdiiꞌddeen. Toolla la ꞌdooꞌdi Issiraayel Waakh a raahiwwaaye gone, Waakh uur a atin isoonugleeste. 31Saggaas on u, ꞌdooꞌdi Issiraayel toolla Waakh raahin a ꞌdiiꞌda. Waakh uur a atin isoonugleeste gone, icho laka uur a inugleesta. 32Maantaka Waakh weeli enenyet tuumman ꞌdooꞌdi lahide usu raahin ꞌdiiꞌde kayeele. Ulla iꞌdane yeela, ꞌdee icho tuumman uur inugleesta.
Waakh usu saaꞌdo imaleen
33ꞌHay! Wihi Waakh garti ichoow kharati Waakh a too geeddohe? Enenna a buure!
Ayyo maanta wihi Waakh gooche ꞌdubicho bahcha? Ebba!
Toro la ayyo jitiis garta? Ebba!
34“Ayyo mali Kamur garta?
Ommos ayyo Waákh waanicha?”#11:34 Isaaya 40:13.
35“Ayyo injire Waakh wohoo siiche,
ꞌdee Waakkhi isooguto suga?”#11:35 Ayuub 41:11.
36A mehe Waakh a uumacchoti walah tuummane, usu on ka walah tuumman lasoouume toro la walah tuumman usu liisoouume.
Jirtuu tuumman usu a lakoolicho. Aamiin.
ទើបបានជ្រើសរើសហើយ៖
Rooma 11: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
