Marko 2
2
Yeesso etoo sare hanjaawte samaacha
(Mattaayo 9:1-8, Luuka 5:17-26)
1Inkoo ibeennetoo kutte, Yeesso ilkerengeetohi Kafarnaaꞌhum isoonokhte. ꞌDooꞌd saggi us goob iyimiy daage. 2ꞌDooꞌdi buure kulme, min goya inti lagelo lawaaye, min afafhiis ka laka meel lawaaye. Yeesso la Yeedi Waakhe ꞌdooꞌd icheeke. 3ꞌDooꞌdoo affare la, etoo khannane sar tuumman hanjaawte iche Yeesso ikeene. 4Jeenteti urur buur iyahuu saggi iche Yeesso ikageesso waayte. Min sartiis korte, inti Yeesso toollo sartiis alohoo doobbo kabihisse. Ilaali et kajiifo il iwoyte, ichoowka Yeesso ortiis tissil. 5Chirri Yeesso saggi ꞌdooꞌdaas usu ikakhuufo arge ka, wihi us etaas sare hanjaawte iyidah, “Inankaaw, uskeelaah a liikaakute.”
6Tagaammetoo amurre la intaase fiddiita. Wihi icho uuricho ka essaan, 7“Eta mehe iꞌdaas kayadeeh? Wahaas gaf menya? Ayyo addane enenyet uskeeliis ikakuta, Waakh on menye?”
8Chirraas on Yeesso uuriis ka wihi icho uuricho goyaka dowtaan garte, wihi us makhaaballetaas iyidah, “Mehede malassi iꞌdaase idowattaan? 9Mehe maanta ki addan kaꞌdabakhe, chirri an eta sare hanjaawte, ‘Uskeelaah a liikaakute,’ iadeeh a ommos usuhi an, ‘Kah ilaalaah okhso, soho,’ iadeeh? 10Iꞌdaasenyi saggi Ínam Aadam antohi us harrata ka enenyet uskeel ikakuto ikhabo a abattaan.” Wihi us eti sare hanjaawte iyidah, 11“Tolosso, ilaalaah okkhiche, goob iro!” 12Et tolossate, ilaal okhsate enenyet tuumman ꞌdeyꞌdoochaayi bahe. Icho tuumman la girmeesteene, Waakh koolicheene wihi icho yidaaheen, “Inno injire wihi iꞌdee ma argin.”
Wihit Laawi
(Mattaayo 9:9-13, Luuka 5:27-32)
13Yeesso toro beyti Gaalilaaya afiche irte, ururoo buure la intaas ka iyimiyye, ulla wori Waakh abche. 14Toro orey isohte, etoo Laawi #2:14 Laawi. Magahiiskoo addan a Mattaayo. layadeehe koo Alfaayee arge. Laawi meessi kooddi lakagoocho goya fiddiya. Yeesso, “Isooraahe, abattiteey ateeh,” Laawi iyidahye, Laawi la kahe usu raahe.
15Saahka Yeesso min Laawi kagolossataayi, ꞌdooꞌdoo kooddi goocho ittaawe ichoow ꞌdooꞌdoo ꞌdooꞌdi uskeel leh liiekkaacho ittaawe yimiyye, Yeesso ichoow abattitiis ba leegolossate. A mehe ꞌdooꞌdi buurenye usu sooraahe. 16Tagaammeti amurre iche laka Farissaayee la, Yeessohi ꞌdooꞌdi iꞌdaase leegolossati agarte. Wihi iche abatti Yeesso worsatte, “Yeesso a iꞌdoh ꞌdooꞌdi kooddi goocho ichoow ki uskeel leh ileegolossata?”
17Yeesso la chirri us wihi icho essaan daage ka wihi us iyidah, “ꞌDooꞌdi ilkitárri yowti ki feffeyyan menye, iꞌdaasenyi a ki khakkhannan. ꞌDooꞌdi an iimiyye an waho, ki ꞌdooꞌdi fiffissan isiekkaacho menye, iꞌdaasenyi a ki uskeel leh.”
Yeesso woroo husub enenyet abcha
(Mattaayo 9:14-17, Luuka 5:33-39)
18Maantoo abatti Yoohanahi Enenyet Baattissiyo ichoow Farissaayo af hiitaane jirte. ꞌDooꞌdoo la yimiyye, wihi us Yeesso worsate, “A iꞌdoh abatti Yoohana ichoow too Farissaayo af ihiitaane, abattitaah la af ihidan?”
19Yeesso wihi us ilaabe, “ꞌDooꞌdi mindischo yimiy af ma hiiti geeddi eti min disti intaas kijiro, menya? Geeddi eti min disti on leejiro af ma hiitaan. 20Iꞌdaasenyi maane a tamiit, ti ꞌdooꞌd eti min disti lakakhaato. Maantaase ꞌdee ꞌdooꞌd af hiita.”
21Yeesso la yeed orey iwoye, wihi us yidah, “Et goonankoo dafareete husub gaaddiisti raagane kharradde kadaddabo mele. Chirri us iꞌda yeele, goonankaas husub a isinyaama gaaddi raagan la kharradiche orey isohta geeddi oraat laka kuta. 22Ommolla et farsoti sabiibe husub urgohi uktoote raagan kachibo mele. Chirri iꞌda layeele farso urgo a fuurissa doossa, farso lawaaya urgo laka lawaaya. Iꞌdaasenyi farsoti sabiibe husub urgohi uktoote husub on lakachiba.”
Yeesso a Kamuri Seeri Lanaso
(Mattaayo 12:1-8, Luuka 6:1-5)
23Maalinkoo Seeri Lanasee Yeesso abattitiis khabaayi gosase goya raaha. Geedda icho ꞌdulaan, abattitiis ilmohoo ꞌdargaayye guratte. 24Farissaayo wihi iche Yeesso itidah, “Yey, abattitaah a iꞌdoh Seeri Lanaso ka wihi amurre ꞌdiiꞌddantahe iyeessa?”
25Yeesso wihi us ilaabe, “Atin injire wihi Dawuud yeele maanti usu ichoow ꞌdooꞌdi us khabe ba raarahteen Yeedi Waakh ka ma soomin a? 26Maanti Abiyaaꞌdar kuhaanihi weyti ween eheet, Dawuud uranti minki Waakhe gele, makaateti Waakh liibahche yuhuyye, toro reeri leejire laka wohoo siiche. Amurreti laraaho ka la kuhaaniyyo kaldaye makaatetaas yaham.”
27Yeesso ꞌdeerka wihi us ilaabe, “Seeri Lanaso iroonoti enenyete liiyeele, enenyet mee Seeri Lanaso liiyeele. 28ꞌDeerka Ínam Aadam a Kamuri Seeri Lanaso laka.”
ទើបបានជ្រើសរើសហើយ៖
Marko 2: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.