Hilassi Ergaano 18
18
Baawulo ilkerengeetti Koriinto ka Wori Haaggan cheeka
1Inkoo waha kuteen ka Baawulo ilkerengeetti Aaꞌden kabahe ilkerengeetti Koriinto irte. 2Intaas ka etoo Yaꞌhuude Akiila layadeehe ili Boontus kadesse ꞌhele. Ulla makhaabassiisti Birisiila layadeeh khabaayi, ili ꞌDeylaane kayimiy, a mehe karnati ilaase Kilaawudiyo layadeeh, iche eti Yaꞌhuude tuumman ilkerengeetti weene Rooma a kabaho yidah. Baawulo icho sooyeyin irte, 3jeenteti us iꞌdichuu eemayyo itolo khookhaani isikayowtuu la, icho geeddoo leefiddiye toro la hil leehaaggiche. 4Seeri Lanaso tuumman la minki weysiite Yaꞌhuude irte ꞌdooꞌdi Yaꞌhuud ichoow ꞌdooꞌdi Yaꞌhuud ieheynan, wori Waakh icheeke anki Waakh isoojiite.
5Maanti Siila ichoow Timooti ili Makedooniya kayimaateen ka, Baawulo Yeedi Waakhe us cheeko kalday miinsate, ꞌdooꞌdi Yaꞌhuud saggi Yeesso rumanka Ki Lasubhe iyahe icheeke. 6Iꞌdaasenyi chirri ꞌdooꞌdi Yaꞌhuud Baawulo tirrime icho usu leeabaarrameen ka, ebeeri darfohiis ijillaanjilliche saggi icho ikhufeen tuse. Wihi us iyidah, “Chirri atin baabaateen, atin on awtiin u isooya. Ani walah liiworsati mele. Uus toolla kakhabatti, an yaafohi Yaꞌhuud ieheynane iirda.”
7Baawulo ꞌdeerka minki weysiit kabahe, minki etoo Tiitiyo Yaasto layadeehe minkiis minki weysiit khuccho irte. Eta la a etoo weyti Waakh karooro. 8Eti Kiriisbo layadeehe minki weysiite Yaꞌhuud itoollo la, usu ichoow minkiis ba Kamur a rummeesteen. ꞌDooꞌdoo ittaawenye ilkerengeetti Koriinto kajiro Baawulo daage la, Kiriisto rummeeste, labaattissiye.
9Ibeenkooka Kamur Baawulo fooltabcho ka leeyyeede wihi us iyidah, “ꞌDooꞌda akaroorin, leeyeyyeede, waha at haaggisso la aꞌdiin. 10Wihi tahe an a kileejira. Et wohoo kiyeelo la mele, iꞌdi tahe ilkerengeetta ka ꞌdooꞌdi ittaawe a kaaya.” 11Ulla goycho guꞌhoo ichoow hay lih fiddiye Yeedi Waakh abche.
12Maanti Gaalliyo ili Akhaaya iweynaate ka, ꞌdooꞌdi Yaꞌhuud tuumman yimiyye Baawulo khabte, kootiin ortiis geecheen. 13Icho la wihi icho yidaaheen, “Eta jitoo amurre buusane ꞌdooꞌd Waakh kawahda idowa!”
14Chirri Baawulo yeedin leheet ka, Gaalliyo ꞌdooꞌdi Yaꞌhuud leeyeede, wihi us iyidah, “Chirri atinhi Yaꞌhuude kootte waha uskeeloo layeele tahe ommos wohoo suuje tahe, a geeddi an nabah atin isudo. 15Iꞌdaasenyi waha a iriir ichoow magahenye ichoow yeedassi amurretiinna one, atin on haaggicha. An wahanyeyyohi iꞌdaase ka enenyet hukkumin ma ꞌdoono.” 16Ulla ꞌdeerka kootiin goya ꞌdooꞌd kasoobahche. 17Geeddi icho isoobahin, icho tuumman eti minki weysiite Yaꞌhuud itoollo Soosteena layadeeh khabteene, kootiin ortiis ka jaheen. Iꞌdaasenyi Gaalliyo wahaas ma ibaalin ba.
Baawulo toro meelassi ittaawe irta
18Baawulo ilkerengeetti weene Koriinto ibeennetoo fiddiye. Saahka ꞌdooꞌdi Kiriisto rummeeste katabe, Akiila ichoow Birisiila khabaayi kooban ka boroofenhi Siiriya ikahe. Geeddi us kooban igelin, ilkerengeetti Kenkereeya ka matah lahaaꞌde, a mehe ibeenneti us Waakh idaatte a massatte. 19Chirri icho ilkerengeetti Efeesso yimaateen ka, Baawulo Birisiila ichoow Akiila intaas katabe. Baawulo minki weysiite Yaꞌhuud irte, ꞌdooꞌdi Yaꞌhuud leehawwooche. 20Chirri icho usuhi geeddoo leefiddiyo daaheen ka, fiddi ꞌdiiꞌde. 21Iꞌdaasenyi chirra us kaho ka, “Chirri Waakh ꞌdoono a atin isoonokhda,” iyidahye, kooban kore ilkerengeetti Efeesso kabahe. 22Chirri us ilkerengeetti Kaaysareya yimiy ka, kooban kasooyege ilkerengeetti weene Yeerusaleem irte urur Kiriisto bariitiche, ꞌdeerka ilkerengeetti Antiyookhiya ikhubte.
23Inkoo us geeddoo intaas fiddiye ka, irte ili Galaatiya ichoow ki Furiijiya tabe abatti faajjiye.
Aboollo ilkerengeetohi Efeesso ichoow Koriinto ka Wori Haaggan cheeka
24Etoo Yaꞌhuudenye ili Alekisaandariya kadesse Aboollo layadeeh la ilkerengeetti Efeesso yimiy. Ulla a etoo af ka miigenye weyti Chiirnaanneti Waakh laka garti. 25Usu jiti Kamur ka a lawaaniche, uuriis tuumman ka yeyyeede, wori Yeesso miinsan mujjum ꞌdooꞌd abche. Iꞌdaasenyi baattissiyoti us garti tuumman a baattissiyo Yoohana on. 26Ulla minki weysiite Yaꞌhuud ka ꞌdooꞌd roorro laan leeyyeede. Chirri Birisiila ichoow Akiila usu daageen ka, khaateene minkicho ka mujjum jiti Waakh idowdoween.
27Maanti Aboollo ili Akhaaya ikahin ꞌdoone ka, ꞌdooꞌdi Kiriisto rummeeste ilkerengeetti Efeesso kijiro usu uur miigooche, abattiti intaas kijirto khadaab ichiireene, ꞌdee etaas a martiisteen. Maanti us intaas eleele ꞌdooꞌdi haaggi Waakhe buurenye inno imunneynan ka Kiriisto rummeeste weyti gargaare. 28A mehe us chirri us ꞌdooꞌdi Yaꞌhuud enenyet tuumman ortiis ka leehawwoocho, af ka a kahataate, Chiirnaanneti Waakh ka, saggi Yeesso rumanka Ki Lasubhe iyahe tuse.
ទើបបានជ្រើសរើសហើយ៖
Hilassi Ergaano 18: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
