Hilassi Ergaano 15
15
Toli jaldaabti ilkerengeetti weene Yeerusaleem gesse
1ꞌDooꞌdoo ili Yaꞌhuudiya kasookhubte ilkerengeetti Antiyookhiya yimiyye wihi us ꞌdooꞌdi Kiriisto rummeeste abche, sammata iꞌdi amurre Muusa atin iabissuu atin liikhandiyin, Waakh ma atin ribo. 2Baawulo ichoow Barnaba jeenteti yeedaas u ꞌdooꞌdaas leejaakheen. ꞌDeerka jeentetaas u Baawulo ichoow Barnaba ichoow ꞌdooꞌdoo addane Kiriisto rummeeste lasoobahche, ꞌdee ilkerengeetti weene Yeerusaleem irtaane wihi ayta miinsan ka ergaano ichoow ewweenki urur Kiriisto woyo argaan. 3Urur Kiriisto icho ergate. Geedda icho ili Foniikiya ichoow ki Saamariya tabaan, saggi yaafohi Yaꞌhuud ieheynan Waakh ikakhuufeen cheekeen. Wora la ꞌdooꞌdi Kiriisto rummeeste tuumman weyti kahamaadiche. 4Chirri icho ilkerengeetti weene Yeerusaleem sooeleeleen ka, urur Kiriisto ichoow ergaano ichoow ewweenki urur Kiriisto woyo ba icho martiisteen. Baawulo ichoow Barnaba la wihi Waakh icho ka yeele tuumman icheekeen.
5ꞌDeerka ꞌdooꞌdoo Kiriisto rummeeste orey rabitti Farissaayo eheet la tolossate wihi us yidah, “Wihi massan, yaafohi Yaꞌhuud ieheynan a lakhandiya toro wihi lakaꞌdoono a ichohi amurre Muusa raaho.”
6Ergaano ichoow ewweenki urur Kiriisto woyo ba jeenteti aytuu tossateen. 7Inkoo icho geeddi deer hawwoocheen ka, Beetero tolossate, wihi us iyidah, “ꞌDooꞌd Kiriistokaaw, atin saggi goorat goytiin ka Waakh isoobahsate, yaafohi Yaꞌhuud ieheynan ani Wori Haaggan ikadaagaane ꞌdee icho Kiriisto irummeestaan a garattaan. 8Waakkhi uurassi enenyet garti Rubeyti Munyeenye us icho siiche ka saggaas us inno laka inno isiichuu saggi us icho ikhaatte a tuse. 9Inno ichoow icho la walah inno yeerarroocho mele, wihi tahe kakhuufnaanki icho Waakh kakhuufeen ka, Waakh uurassicho a dikhe. 10Toollaka a iꞌdoh Waakh kajme igelissaane, huleesi aacchinyeteen ommos inno iubaaꞌdan, abatti adah ikarartaan? 11Mele! Wihi inno rummeysanni a innohi haaggi buurenye inno imunneynane koo Yeessohi Kamureene ka inno laribe. Icho laka a iꞌdaas on.”
12Chirra Baawulo ichoow Barnaba wahanyeyyohi miigti Waakh tuso ichoow girmohi Waakh icho ka yaafohi Yaꞌhuud ieheynan iyeele cheekaan ka nabah isudeene, urur tuumman ba rukkuy gooche. 13Chirri icho yeyyeed massicheen ka, Yaakoobo sooyeede, wihi us yidah, “ꞌDooꞌd Kiriistokaaw idagansada. 14Siimonhi Beetero layadeeh saggi Waakh kolooraat ꞌdooninti us yaafohi Yaꞌhuud ieheynan iꞌdoono ituse, us gaasichokoo isoobahsate ꞌdooꞌdiis ikayeesse a inno isoodowdowe. 15Yeedi ꞌdooꞌdi Waákh íyeyyeedo yidah ichoow kan laka a israahaan. Wihi chiiran,
16“ ‘Waha ꞌdubicho ka a soonokhda,
min Dawuudki jejjebe disa.
Raasiis ka toro min disa,
toro icho toollicha.
17ꞌDee ꞌdooꞌdi addane harra tuumman,
ichoow yaafohi Yaꞌhuud ieheynane magaheey khabo Kamur yowtaan,
iche Kamuri waha yeelo,’ #15:17 Aamos 9:11-12.
18goorat archiiy waha ꞌdooꞌd idowdowe essa.
19“Maantaka wihi an gooche, uus inno yaafohi Yaꞌhuud ieheynane Waakh iurgiyo ꞌhowloon. 20Iꞌdaasenyi khadaab ichiirro ꞌdee gololi iyookkoyyo ka labiꞌdirrooche uumhana, toro la ꞌdooꞌdi isidisan uus isleeurꞌdine, naffi laluulliche uumhana, diig adamina inidaahe. 21A mehe uus goorat archiiy ilkerengeetohi wewween tuumman ka wihi amurre Muusa miinsan a lacheeke, toro la Seeri Lanaso tuumman ka minki weysiite Yaꞌhuud ka a lasooma.”
Khadaabi Jaldaabe yaafohi Yaꞌhuud ieheynane Kiriisto rummeeste ichiirte
22ꞌDeerka ergaano ichoow ewweenki urur Kiriisto woyo ichoow urur Kiriisto tuumman wihi icho goocheen, ꞌdooꞌdichokoo soobahchaane, ꞌdee Baawulo ichoow Barnaba kaꞌdaraane ilkerengeetti Antiyookhiya leeirtaan. Et lamma ꞌdooꞌdi Kiriisto rummeeste goyaka weynaan leh soobahcheen. ꞌDooꞌdaas la a Yuudahi Barsabba layadeeh ichoow Siila. 23Khadaaba leergeen. Khadaab la wahane kachiiran.
ꞌDooꞌdi khadaaba atin isoochiiro a nahi ergaanee ichoow ewweenki urur Kiriisto woyo iꞌdiin u Kiriisto rummeeste.
ꞌDooꞌdi nah isoochiirro la a atinhi yaafohi Yaꞌhuud ieheynane Kiriisto rummeysatteene ilkerengeetohi Antiyookhiya ichoow Siiriya ichoow Kiliikiya taalliin.
Nebeeheyte!
24Wihi nah daagne, ꞌdooꞌdoo ki intee a atin iyimiyye yeedicho ka atin malalicheene toro atin kaholloocheen. Iꞌdaasenyi nah ꞌdooꞌdaas amur ma siin. 25Nah la a tossanne ꞌdeerka ꞌdooꞌdoo farniin keeno atin ieregno nidah. Icho la a aalasseenyoki nah weyti ꞌdoonno, Barnaba ichoow Baawulo issooraahaan. 26Barnaba ichoow Baawulo la jeenteti hil Yeesso Kiriistohi Kamureene u jiroticho adahe gateen. 27Maantaka Yuuda ichoow Siila iche atin isooeregna, icho la waha nah soochiirre atin isoocheekaan. 28Waha on menye, nah ichoow Rubeyti Munyee ba uus nah huleesoo addan atin korin iche nidah. 29Gololi iyookkoyyohi waakkhakh lakayeessi liisoorriyooche uumhana, diig adamina, naffi laluulliche uumhana, ꞌdooꞌdi isidisan uus isleeurꞌdin. Chirri atin waha tuumman iskaholisseen wihi haaggane yeesseen.
A Waakh atin bariisti.
30ꞌDooꞌdi leergate irte, ichoowka ilkerengeetti Antiyookhiya ka urur Kiriisto tuumman ururiche, khadaab idiibe. 31Chirri ꞌdooꞌd khadaab soome ka weyti hamaadeen, jeenteti us uur imiigooche u. 32Yuuda ichoow Siila la icho rubeycho a ꞌdooꞌdi Waákh íyeyyeedo, wihi ittaawe ꞌdooꞌdi Kiriisto rummeeste icheekeene, uur miigoocheen. 33Inkoo icho geeddoo intaas fiddiyeen ka, ꞌdooꞌdi Kiriisto rummeeste icho nebey ꞌdiiche ꞌdooꞌdi goorat sooergate inokhteen.#15:33 Chiirnaanneti Yeedi Waakhe uumacchee gaasoo chiirnaanka a kakhayte. 34 “Iꞌdaasenyi Siila fiddihi us intaas fiddiyo gooche.” 35Iꞌdaasenyi Baawulo ichoow Barnaba geeddoo ilkerengeetti Antiyookhiya fiddiyeen. ꞌDooꞌdoo addane ittaawe khabaani Yeedi Kamur cheekeen.
Baawulo ichoow Barnaba ba iswaayaan
36Inkoo geeddoo lafiddiye ka Baawulo wihi us Barnaba iyidah, “Kaale a nokhanni ꞌdooꞌdi Kiriisto rummeeste ilkerengeetohi goorat inno Yeedi Kamur kacheekne kijiro tuumman a tabno, saggi icho ijiraan a sooagarro.” 37Barnaba ichohi Yoohanahi magahiiskoo Marko layadeeh khaatti, iche ꞌdoona. 38Iꞌdaasenyi Baawulo Marko weyti ꞌdiiꞌde. A mehe us icho ili Bambiiliya ka a katabe, icho hil ma kaleejirin. 39Lammache ba weyti isleeiriirte seley bahte. Barnaba Yoohanahi Marko layadeeh khaatte, anki kurti bicche dahcho kajirto Kuuburo layadeeh kooban igele. 40Iꞌdaasenyi Baawulo Siila soobahsate kahe. ꞌDooꞌdi Kiriisto rummeeste icho Waakh iwahe, dahanohi haaggi Kamure buure gesseen. 41Siiriya ichoow Kiliikiya tabe ururre Kiriisto uur miigooche.
ទើបបានជ្រើសរើសហើយ៖
Hilassi Ergaano 15: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
