Hilassi Ergaano 10
10
Korneeliyo Beetero waha
1Ilkerengeetti Kaaysareya ka, etoo Korneeliyo layadeehe koobbintoo iskareete, iskarti ꞌDeylaan layadeeh itoollo, a jire. 2Usu ichoow minkiis tuumman kol tuumman wihi Waakh kahamaadicho yeeleene, toro la Waakh a karooraan. Us ꞌdooꞌdi Yaꞌhuude miskiine weyti gargaare, toro kol tuumman Waakhe wahta. 3Maantooka geeddi sahaꞌd saagaassi maalimeet ka, fooltabchotoo arge. Fooltabcho ka wihi us mujjum arge, a herti Waakhe itimiyye, “Korneeliyo,” itidah.
4Korneeliyo iche roorro ka indo katoolliche, wihi us worsate, “A mehe Kamur?”
Herti Waakh wihi iche ilaabte, “Waakh weysihaah a daage, wihi at miskiino siisso la a arge, kaasooꞌhele. 5Toollaka ꞌdooꞌdoo ilkerengeetti Yooba ierege, etoo Siimon layadeehe magahiiskoo addan toro Beetero layadeeh a soowaho. 6Usu, Siimonhi ukto kaaho toro haaggicho beyti buure afiche yaal iche leefiddiya.”
7Chirri herti Waakhe kootte leeyyeedde katabte ka, Korneeliyo falfa lamma minkiis kajirto ichoow etoo iskareet soowahe. Et la a ki ullaka weyti Yeedi Waakh khuccho toro la Korneeliyo rubeytiis yaakhicho. 8Wihi yitah tuumman icheeke ilkerengeetti Yooba ierge.
Beetero fooltabcho arga
9Ibeenki kaas sooraaho geeddi sahaꞌd lihti maalimeete ꞌdooꞌdaas ilkerengeetti Yooba isoodowwaate ka, Beetero min sartiisti hafan ikore, Waakh wahte. 10Beetero weyti ankaye, wohoo us yaham ꞌdoone. Golol lakarchaayi fooltabcho arge. 11Sereyti bakkaahte arge, wohoo iꞌdi dafarti buurenye il isoosohti arge. Dafarta la laddad affarcho lasookhuccha il liisoowoya. 12Dafartaas wahanyeyyohi fil tuummane iche goya kajira. Bina ichoow hoola ichoow binahi uur il kajiito ichoow chimbirohi saraate fil tuummanenye kajira. 13Hooyoo la Beetero wihi us iyidah, “Beetero, kah wahanyeyyoha agiise aham.”
14Beetero wihi us ilaabe, “Kamur koloo kalday laka iꞌdaas mee! A mehe an injire wihi biꞌdire ommos wihi miꞌdab ieheynan ma umhan.”
15Hooyi Waakh koli lammaatteet usu leeyeede wihi us yidah, “Wihi Waakh munyaache wihi biꞌdire iikhaatin.”
16Waha kol seyyahe yitaaheene, chirraas on dafar goobi Waakh liilaabe.
Korneeliyo ꞌdooꞌdoo Beetero iergata
17Beetero wihi fooltabchota tahe kamalalaayi, ꞌdooꞌdi kootte Korneeliyo sooergate, inti min kajiro a abte, arite toolla. 18ꞌDooꞌd waheene, usu etoo marteenye Beetero layadeehe magahiis koo addan Siimon layadeeh inta fiddiyo worsateen.
19Beetero wihi fooltabcho tahe kamiyyaantaayi, Rubeyti Munyee wihi iche itidah, “Siimon, reeroo seyyahenye kisooyowte kalla. 20ꞌDeerka kahe, il ikhubo. Icho raahin akaroorin, iꞌdi tahe ani icho sooerge.”
21Beetero il ikhubte wihi us reer iyidah, “Eti atin sooyowatteen a ani. A iꞌdoh itimaateen?”
22Reer wihi us ilaabe, “Etoo Korneeliyo layadeehe koobbintoo iskareet itoollo kanimiy. Ulla a etoo fissane Waákh karooro, yaafti Yaꞌhuud tuumman la weyti inkaanyitto. Hertoo Waakhe munyeenye usu minkiis a kiwaho ꞌdee wora a daago itidah.” 23Beetero ꞌdeerka ꞌdooꞌd min goya iwahe martiiste.
Beetero min Korneeliyo irta
Ibeenki kaas sooraaho ka Beetero ꞌdooꞌd raahe. ꞌDooꞌdoo ilkerengeetti Yooba ka Kiriisto rummeeste laka Beetero raahe. 24Ibeenki kaas sooraaho ka, ilkerengeetti Kaaysareya sooeleeleen. Korneeliyo la icho suge, hiiyyiis ichoow aalassiiski us weyti ꞌdoono minkiis iwahe. 25Chirra Beetero min soogelo ka Korneeliyo Beetero or kasoodowe, inkaanyit ka ortiis ka jilbo il kaguꞌdde. 26Iꞌdaasenyi Beetero sookahche, “Sookah, annaka a weeli enenyet one!” iyidah.
27Beetero Korneeliyo leeyyeedaayi min gele. ꞌDooꞌdi ittaawe la intaas a kajira. 28Beetero la wihi us ꞌdooꞌdaas iyidah, “Weyti a garattaane amurreteen eti Yaꞌhuude yaafohi addan kachimmamo ommos minassicho gelo a buusantahe. Iꞌdaasenyi Waakh mehe ituse ya, an et an a biꞌdir ommos a suuj adeeh mele. 29ꞌDeerka chirri enenyet liisooꞌdiiche ka, ma jijjiitanne imiy. Anna mehe kiworsada ya, mehe iwahte?”
30Korneeliyo wihi us ilaabe, “Maan affar kutte, anihi sahaꞌd saagaassi maalimeete chirree minkeey goyaka Waakh wahdi iche dog laan on etoo gaaddi dakhane torrogoot khabo orteey sootolossate. 31Wihi us iyidah, ‘Korneeliyo, Waakh weysihaah a daage, toro wihi at miskiino siisso a arge. 32Toolla ilkerengeetti Yooba enenyet ierege, etoo Siimon layadeehe magahoo ka la Beetero layadeeh a soowaheen. Us minki etoo Siimon layadeeh ka a marti. Eta la ukto mujjummoocha, beyti buurenye afiche yaal.’ 33Anna ꞌdeerka chirraas on enenyet kisooerge, alla weyti gon haaggisse a timiyyee. Toollaka nah tuumman kalla Waakh ortiis tololla wihi Kamur dah kiyidah dagansanna.”
Beetero Korneeliyo ichoow minkiis ba Wori Haaggan icheeka
34Beetero la yeede wihi us yidah, “An kola saggi Waakh rumanka yaafo tuumman ekka iekkaacho a arge. 35Iꞌdaasenyi Waakh ꞌdooꞌdi il tuummane usu karooro wihi fissan yeelo a khaatta. 36Atin farniinki Waakh ꞌdooꞌdi Issiraayel isooerge a garattaan. Farniinka la Wori Haaggane cheeke, Yeesso Kiriisto ka innohi enenyete ichoow Waakh a isinebeyne. Yeesso Kiriisto la a Kamuri weeli enenyet tuumman. 37Wihi inkoo Yoohanahi Enenyet Baattissiyo wori baattissiyo cheeke boroofenhi Gaalilaaya lakasookhabte ichoowka ili Yaꞌhuud tuumman eleele yitah a garattaan. 38Saggi Waakh Yeessohi Naasaret Rubeyti Munyee ichoow miig isiiche a garattaan. Jeenteti Waakh ileejiruu us meel tuummane irte, wihi haaggan yeele, ꞌdooꞌdi Seytaan sina kawaaricho samaache.
39“Nah la wihi tuummane Yeesso ili ꞌdooꞌdi Yaꞌhuud ichoow ilkerengeetti weene Yeerusaleem ka yeele garticho a laabna. Yeesso massalaaba kakaaheene yigaaseen. 40Iꞌdaasenyi Waakh ibeenki seyyahnaatteet ka omoot kasookahche, enenyet tuse. 41ꞌDooꞌd tuumman mee usú arge, iꞌdaasenyi nahi goorat Waakh nah soobahsate woriis cheekno, usu leegolossanne on inkoo us sookahe agarre. 42Waakh la amure nah ibahche, ꞌdee Wori Haaggan ꞌdooꞌd icheekna, toro saggi us eti Waakh soobahsate ꞌdee ꞌdooꞌdi jiro ichoow ki tuume ba ihukkumo iyahe cheekna. 43ꞌDooꞌdi Waákh íyeyyeedo tuumman wihi usu miinsane icho cheekeen, eti Kiriisto rummeeste tuumman, usu ka uskeel a liikakuta.”
Rubeyti Munyee ꞌdooꞌdi yaafohi Yaꞌhuud ieheynan isooyagta
44Beetero yeyyeedaayi Rubeyti Munyee ꞌdooꞌdi dagansati tuumman isooyagte. 45ꞌDooꞌdi Yaꞌhuude Kiriisto rummeeste Beetero sooraahe la, Rubeyti Munyeenye yaafohi Yaꞌhuud ieheynan laka isooyagte weyti kagirmeeste. 46Iꞌdi tahe ꞌdooꞌdi yaafohi addan ichohi afi icho idaagin kaayyeedo toro Waakh saaꞌdo, iche daageen.
Beetero ꞌdeerka wihi us yidah, 47“ꞌDooꞌda iꞌdi goorat inno Rubeyti Munyee iꞌhelluu, icho laka Rubeyti Munyee a ꞌheleen. Etoo ichohi bicche ka labaattissiyo a tirta?” 48ꞌDeerka amur ibahche, magah Yeesso Kiriisto ka icho a labaattissiyo. Icho la Beeterohi geeddoo icho leefiddiyo daaheen.
ទើបបានជ្រើសរើសហើយ៖
Hilassi Ergaano 10: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.
