2 Koriinto 9
9
Wihi ꞌdooꞌd Kiriistoki ilkerengeetti weene Yeerusaleem liibaayiche
1Rumanka walah hila baaysihi ꞌdooꞌdi Waakh liiergo an atin isoochiiro liikaꞌdoono mele. 2Iꞌdi tahe saggi atin rumanka gargaar iꞌdoontaan a garda. Anna ꞌdooꞌdi boroofenhi Makedooniya ka bihin a atin kaguꞌdde, saggi atinhi boroofenhi Akhaaya kijirtaan baaysi ka guꞌhi kute itannabatteen cheeke. Uuriinkaas haaggan la buurche a kululaache ichoowka icho laka gargaar bihine ꞌdoonaan. 3Iꞌdaasenyi reera koo Kiriistee a atin isooerga, ꞌdee eylaji wihi aytaas miinsan ka an atin keeylajo uus wihi ilmarhaatteet eheynane, iꞌdi an ꞌdooꞌd iidah u, atin laka tannabattaan. 4Iꞌdi tahe chirri ꞌdooꞌdoo koo Kiriistee ili Makedooniya ka isooraahe atinhi itannaban atin sooeleele, jeenteti nah atin ikakhuufnuu atin ꞌdiiche nah laka lakhaanyo a nah khaatatta. 5Maantaka wihi an kamalde, reera koo Kiriisteenye hawwaasda orteenyo erga, ꞌdee baaysihiinki buurenye atin ayyisseen mujjummoossaane massissaan. Iꞌda ka baaysihi atin liihosso menye, wihi atin uuri haaggan ka soobihisseene yateehiin.
6Ayti an atin ikhabo talla. Eti ilmohoo rucchul taaꞌhicho, ullaka gurnaankoo rucchule ꞌhela. Eti ilmohi buure taaꞌhicho la ullaka gurnaanki buurenye ꞌhela. 7Ebba uus bolokh ka bihinne ommos liiholinne, ebba geeddi us uuriis ka gooche on a bahcho. A mehe Waakh eti uuri haaggan ka walah diibo iche ꞌdoona. 8Waakh la haaggiiski buure tuumman ka wihi atin ꞌdoontaan ꞌdirihicho laka atin siin a yabuuꞌde, ꞌdee walah tuumman ka ichoow kolal tuumman ka wihi atin ꞌdoontaan tuumman khabtaane, hili haaggan tuumman la buuhissaan. 9Iꞌdi liichiiruu,
“Us siimohiis a taaꞌhiche, uuri haaggan ka miskiino siiche.
Fissanoonkiis jirtuu a sooꞌhada.”#9:9 Sabuur 112:9.
10Waakkhi eti gos leh ilmohi lataaꞌhicho siicho, toro makaateti us yaham siicho, ilmo a atin siicha toro atin ikasookhaya, ꞌdee gurnaanki atin wihi fiffissan yeessaan kakhayma. 11Waakh walah tuumman ka a atin kamurroocha ꞌdee kol tuumman uuri haaggan ka ꞌdooꞌdi addan gargaartaane, ꞌdee wihi atin soobaayisseene nah diibno ka ꞌdooꞌd Waakh kalaꞌd ilaaba. 12A mehe hila ꞌdooꞌd lagargaaro atin gessaan ꞌdooꞌdi Waakh gargaar kalday ma gargaaro, iꞌdaasenyi kalaꞌddi buurenye Waakh liilaabo laka a dela. 13Hila saggi atin rumanka Kiriisto iraahtaane tuse. Wori Haaggane atin kakhuufteen ka, wahanyeyyohi Waakh a raahteen. Toro la wihi atin khabtaan icho ichoow ꞌdooꞌdi addan a leegisanteen. Jeenteti waha dakkhan u ꞌdooꞌd Waakh a koolicha. 14Jeenteti haaggi Waakhe buurenye us tuum atin siichuu la, icho weyti atin imoonaan geeddi icho Waakh atin isoowahaan. 15Waakh kalaꞌd ilaabno jeenteti siintiisti buurenye inno af ka wihiche cheekin iubaaꞌdan u.
ទើបបានជ្រើសរើសហើយ៖
2 Koriinto 9: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.