2 Koriinto 2
2
1ꞌDeerka ani rubeyteey a gooche ma atin iamiit. Anihi toro bolokh atin ikeeno ma ꞌdoono. 2Iꞌdi tahe chirri an atin bolkhicho, ayyo addane ꞌdee ikahamaadicha, atin tuumman la a atin bolkhichee? 3Jeentetaase khadaabaas atin ikasoochiire, ꞌdee chaꞌan amiit atinhi kootte ikahamaadissaan toro ma ikooyissaan. An atin tuumman a atin kakhuufe, ꞌdee chaꞌan hamaado, atin tuumman laka a hamaaddaan. 4Maanti an khadaabaas atin isoochiire, a bolkhe, weyti mal igele toro la ilmohi buure khube. Atin bolkhin mee ꞌdoono, ꞌdooninti buurenye an atin ikhabo, iche atinhi garattaan ꞌdoona.
Eti uskeel yeele uskeel ikakut
5Chirri etoo bolokh keene, ani kalday mee ibolkhiche. Ma kokkorsadi la, us geeddoo ka atin tuummane atin bolkhiche. 6Sirbiti buurtiin eta gelisse, a yaakhta. 7Iꞌdaasenyi kola a atin imasse chaꞌatin etaas uskeelaas ikakuttaane, toro la uur khoboossaan uus ꞌdee oytinti buurenye us ooyo ka rubeye jebine. 8Maantaka a atin hawwaasde, taba etaas saggi rumanka atin usu iꞌdoontaan toro tusa. 9Khadaaba an atin isoochiire ka a atin kaja, ꞌdee usu atin wihi an yeela atin iidah tuumman yeessaan abda. 10Chaꞌatin etoo uskeel ikakutteen, an laka a ikakute. A mehe wihi an ikakute, chiꞌ rumanka wohoo lakakuto jireen a iroonotiinna, an Kiriisto ortiis ka wahaas a ikakute. 11Anna iꞌdane yeela uus ꞌdee Seytaan inno kahataatinee. Iꞌdi tahe inno luhti Seytaan tuumman weyti garanna.
Soorinti Kiriisto ka laꞌhelo
12Maanti an ilkerengeetti Tuurowa imiyye an Wori Haaggane Kiriisto miinsan an cheeke, Kamur jitoo a ifure. 13Iꞌdaasenyi jeenteti an eteenki koo Kiriisteenye Tiito layadeeh iꞌhelin u, weyti uur isuujowe. ꞌDeerka ꞌdooꞌd a Waakh atin bariisti iidahye, katabe, ilkerengeetti Makedooniya imiy.
14Iꞌdaasenyi Waakkhi chirrar tuumman girꞌdaanki soorin Kiriisto ka inno woyo kalaꞌd ilaabno. Waakh nah ka wor Kiriistoki lagarti iꞌdi uyuuggi haaggan u, meel tuummane kataaꞌhicha. 15Iꞌdi tahe jiroteen Waakh ka, a uyuug Kiriistoki haaggan. Uyuugga la ꞌdooꞌdi Waakh ribo ichoow ki baabaa kijiro ba goychooda kijira. 16ꞌDooꞌdi baabaa kijiro ka, nah a iꞌdi suusakki enenyet bakkicho. ꞌDooꞌdi Waakh ribo ka la, nah a iꞌdi uyuuggi jiro lakeelo. Ayyo la hila keley yabuuꞌd? 17A mehe nah iꞌdi ꞌdooꞌdi buurenye Yeedi Waakh cheeko ꞌdee chilimme kaꞌhelo mee. Iꞌdaasenyi nahi koo Kiriistee, a ergaanoti Waakh sooergate. Wori khollokkhan mee cheekno.
ទើបបានជ្រើសរើសហើយ៖
2 Koriinto 2: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.