2 Koriinto 12
12
Fooltabchoti Kamur Baawulo tuse
1Orey on isohda eylaja. Iꞌdaasenyi indigir iche khabto mele. Eheetteey laka inti an eylajeey ka eleelo a wahanyeyyohi Kamur ituse iꞌdi maanta fooltabchoyyo ichoow wihi Kamur isoobabbakkaahiche. 2An etoo usu ichoow Kiriisto wohoo kalday yahiine guꞌh tomon ichoow affar kutte goobi Waakh ka inti seeyyahnaatteet liikorche a garda. Sar kijiryeey ommos sar ma kijirineey ka ba an ma gardi, Waakh on garta. 3Eta a garda, iꞌdaasenyi sar kijiryeey ommos ma kijirineey ka ba Waakh on garta. 4Eta a lakhabte inti gosi Waakh lageeche, toro la yeedi lagane weeli enenyet af leekeenin ikamalin daage. 5Ani eti iꞌdaasenye keeylaja. Iꞌdaasenyi wihi ꞌdarriteey tuso kaldach on keeylaja menye, an awteey ma keeylajo. 6A mehe chaꞌan eylajin ꞌdoono laka, an ꞌdalam mee, iꞌdi tahe an wihi rummaat on cheeka. Toro la ꞌdooꞌd usuhi wihi us ikaargo ichoow wihi us ikadaago ka eti rumanka an ahe argo ꞌdoona. Iꞌdaasenyi chaꞌan eylajo ꞌdooꞌd etoo deefo iekkaacha, ꞌdeerka an ma eylajo.
7Jeenteti wahanyeyyohaas hahhaaggane Waakh itusuu la, sarteey goya kudakkoo lagesse us ꞌdee an weyti serey isgeenne. Kudakka la a ergattiti Seytaane ijahto. 8Kol seyyahe Kamur hawwaasde, waha ikabukkhi iidah. 9Iꞌdaasenyi mehe isoolaabe ya, “Haaggeeyki buure a kiyaakha. A mehe ꞌdarritaah ka miigteey tuum a lasoobabbakkaahiche.” Maantaka an ꞌdarriteey ka weyti hamaad ka eylaja, ꞌdee miig Kiriisto goyteey furatta. 10Chaꞌan indigir Kiriistuu ꞌdaranahe, ommos chirri ꞌdooꞌdoo ileeabaarramo, ommos chirri an sina ꞌhelo, ommos chiꞌ sina liiomhicho ommos walahbaaw miigenye an goya leeamiit ka laka, an a hamaada on. Iꞌdi tahe ꞌdarriteey ka, miig a khaba.
11An eti ꞌdalamenye iskayeele, iꞌdaasenyi atine iholissseen. Atine kootte incheenka haaggeey tuumman cheektaan. A mehe an walah an ahe mele. Eheetteey laka chiꞌ ergaanota a khukkhummantahe leessi liikeekkaacho, meel an icho kaankhanahe mele. 12Goytiin ka wihi eti ergaanee tuso iꞌdi maanta wahanyeyyohi miigti Waakh tuso ichoow girmo ichoow wihi ittaawenye weeli enenyet yeelin iubaaꞌdan garrahsihi buure ka a layeele. 13Haaggi kaldaye ururre Kiriistoti addan liiyeele atin la atin liikayeelin, a huleesi chilimme an atin ikorin. Khufa ikakuta!
14Toolla koli seyyahnaatteet a tannabde goytiinna emeet ꞌdoona. Hulees an atin korcho la mele. A mehe wihiin an ꞌdoono mele, iꞌdaasenyi atine atin ꞌdoona. Iꞌdi tahe nyaakhut mee ꞌdooꞌdi dele walah yahay igesso, iꞌdaasenyi ꞌdooꞌdi nyaakhut dele iche nyaakhut walah yahay igessa. 15Ani ꞌdeerka hamaad ka wihi an khabo tuumman ichoow awteey laka jeentetiin u a diiba. Iꞌdaasenyi geeddi ꞌdooninti an atin ꞌdoono kakhayanto, geeddaase ꞌdooninti atin iꞌdoontaan nuglaatta. 16Atin mehe garattaan ya, a rume hulees an atin korche mele, iꞌdaasenyi an khara ka a atin kakharaawe. 17Etoo an atin isooerge ka, an injire a atin kakharaawe? 18An Tiito a hawwaasde, toro etoo koo Kiriistee leesooerge. Tiito injire a atin kakharaawe? Lammateenyo rubeytoo kalday ma khabin a? Toro la dabatoo kalday ma raahin a?
19Chirraas tuumman kol nah ortiin ka isribno koogtahiin? Nah Waakh ortiis ka saggi ꞌdooꞌdi icho ichoow Kiriisto wohoo kalday yahiine iyeyyeena. Aalasseeyki an weyti ꞌdoono wihi nah yeello tuumman la a atin miigoochaan. 20Iꞌdi tahe maanti an goytiin amiit wihi an karooro, saggi kootte an iꞌdoono ma atin iꞌhelo, toro la saggi atin kootte iꞌdoontaan ma iꞌhessaan. Mehe karoora ya, waha tuumman goytiin ka a ꞌhela, jaakh ichoow inaaf ichoow holi buure ichoow wihi ebba wihi awtiis kalday on yowti ichoow ham ichoow meꞌdeꞌddeel ichoow rannyaat ichoow hugunꞌdarri. 21Jeenteti wahuu wihi an karooro maanti toro an atin iamiit Waakkheey ortiin ka a inuglaacha, an la jeenteti ꞌdooꞌdi buure uskeel iyeele uliba uskeelaas ikasoonokhan u a bolkha. Uskeelaas a wihi biꞌdire ichoow ꞌdooꞌdi isidisanne isleeurꞌdo ichoow sohoꞌddarriti icho yeeleen.
ទើបបានជ្រើសរើសហើយ៖
2 Koriinto 12: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.