1 Koriinto 15
15
Wori saggi Kiriisto omoot ikasookahe miinsan
1ꞌDooꞌd Kiriistokaaw, alleya giꞌde, Wori Haaggane an goorat atin icheeke, atin khaatatteene, atin mujjum katolossaan a atin kasooꞌhelcho. 2Wora Haaggan ka la chirri atin wihi an atin icheeke tuumman mujjum khucchissaan, a atin lariba. Chaꞌatin Wori Haaggan on menye wohoo addan rummeysatteen la, immarah on rummeysatteen gon.
3Iꞌdi tahe an wihi weyti khummane an ꞌhele iche atin isookucche. Kiriisto jeenteti uskeeleenna iyumuy saggi Chiirnaanneti Waakh liikachiiruu. 4Usu a lahawwaale, ibeenki seyyahnaatteet ka Waakh omoot kasookahche, saggi Chiirnaanneti Waakh liikachiiruu.#15:4 Sabuur 16:8-10, Mattaayo 12:40, Hilassi Ergaano 2:24-32. 5Ulla Beetero #15:5 Beetero. Magaha afi Giriig ka a Keefas.isoobahe yomboka toro ergaanoti tomon ichoow lammee isoobahe. 6Saahka toro ꞌdooꞌdi Kiriisto rummeeste kud chan ꞌdirihiise koloo kalday isoobahe. ꞌDooꞌda buurtiis uliba a jira, gaasoo laka a tuume. 7Yomboka Yaakoobo laka isoobahe, toro ergaano tuumman laka isoobahe. 8ꞌDaꞌddaboka ani isoobahe, chirri an iꞌdoo ka eti ibeenki ikamalin desse ahe laka.
9Ergaano tuumman goyaka ani ꞌdaran. Jeenteti an ururi Waakh weyti sina iomhichuu, anihi kootte ergaano liiyadeeh laka ma imalin.#15:9 Hilassi Ergaano 8:3.
10Iꞌdaasenyi haaggi Waakhe buure ka eti an ahe a ahe. Haaggiis la ki ilmarhaatteet mee. Iꞌdi tahe an ergaanoti addan tuumman ꞌdirihicheeda hol dowe. Waha la ani menye, iꞌdaasenyi Waakh on haaggiiskaas ka hil ikahaagsate. 11Maantaka ani ommos ergaanoti addan eheetteey ka ba, wora Waakh on cheekna, atin la wora on rummeysatteen.
Wori ꞌdooꞌdi omoot kasookaho miinsan
12Toolla wori nah atin icheekne, a ki saggi Waakh Kiriisto omoot ikasookahche miinsane, saggoh toro ꞌdooꞌd gaasoo goytiin ka Waakh ꞌdooꞌdi tuume omoot ma kasookahcho iessa? 13Chirri Waakh ꞌdooꞌdi tuume omoot ikasookahin, Waakh Kiriisto laka omoot ma kasookahin ba gon. 14Chirri Waakh Kiriisto omoot ikasookahin la, wori nah cheekno a ki ilmarhaatteete, kakhuufnaanki atin Kiriisto kakhuuftaan laka a ki ilmarhaatteet on gon. 15Waha ꞌdirihicho la, chirri Waakh ꞌdooꞌdi tuume isookahin, nah anki Waakh ka, garti beenaate goonne. Iꞌdi tahe garti nah goonne a tan, Waakh Kiriisto omoot a kasookahche nidah. Iꞌdaasenyi chirri Waakh rumanka ꞌdooꞌdi tuume isookahin, Waakh Kiriisto ma sookahin gon. 16A mehe chirri Waakh ꞌdooꞌdi tuume omoot ka isookahin, us Kiriisto laka omoot ma kasookahin ba gon. 17Chirri goorat Waakh Kiriisto omoot ikasookahin la, kakhuufnaanki atin Kiriisto kakhuuftaan a ki ilmarhaatteet gone, uliba laka uskeeli atin yeessaane atin anta. 18ꞌDeerka ꞌdooꞌdi Kiriisto rummeeste goorat tuume tuumman, jirtuu tuumman a baabe gon. 19Chirri inno jiroti harrata kalday on ka Kiriisto khajjeel kakhabno, weeli enenyet tuumman ꞌdirihiissa inno liisoonaha.
20Iꞌdaasenyi toolla wihi rummaat a mehe ya, Waakh Kiriisto omoot a kasookahche. Kiriisto a ꞌdoloohti oraate gurnaanki buure. Gurnaanka la a ꞌdooꞌdi tuume Waakh berri khuuf omoot kasookahcho. 21Iꞌdi tahe saggi enenyet jeenteti wihi etoo yeele ituumuu, saggaase toro jeenteti wihi etoo addan yeeluu Waakh omoot ka inno isookahcha. 22Iꞌdi tahe enenyet tuumman jeenteti usu ichoow Aadam ba wohoo kalday iyahiin u a tuuma. Iꞌdaasu laka, Waakh enenyet tuumman jeenteti icho ichoow Kiriisto ba wohoo kalday iyahiin u enenyet tuumman jiro a siicha. 23Iꞌdaasenyi Waakh ebba koliissa on sookahcha. Waakh kolooraat Kiriistohi ꞌdoloohti gurnaanki oraatenye sookahche, maanti Kiriisto soonokhti la, Waakh ꞌdooꞌdiis a sookahcha. 24Maanti waha kuteen ꞌdeerka harra ꞌdubiche yateeh. Inkoo Kiriisto karnatohi ginnayyoot tuumman ichoow wihi anto khabo tuumman ichoow wihi miig khabo tuumman baabiiche ka, dakh tuumman dahanti Waakkhi Aabbahiise gessa. 25A mehe wihi Waakh gooche, a Kiriistohi karnatenye walah dakhti ichoowka Waakh chiiytiis tuumman dahantiis gesso.#15:25 Sabuur 110:1. 26Chiiytanki ꞌdaꞌddaboote us baabiicho a omoot. 27Iꞌdi tahe “Waakh anto tuumman usu siiche.”#15:27 Sabuur 8:6. Yeeda, “Anto tuummane,” siiche yadeeh, a ꞌdowe, Waakkhi anto tuumman Kiriisto siiche rubeytiis goya ma kijiro. 28Maanti Waakh Kiriisto antohi walah tuumman siicho, Weeli Waakh rubeytiis antohi Waakhe iliis lagessa. Waakkha la a ki Kiriisto antohi walah tuumman siiche. Iꞌda ka Waakh walah tuumman tuume iweenyahe.
29Chirri Waakh ꞌdooꞌdi goorat tuume omoot ikasookahin, ꞌdooꞌdi iroonoti ꞌdooꞌdi tuume liibaattissiyo la mehe yeela? A iꞌdoh ꞌdooꞌda iroonoti ꞌdooꞌdi tuume liikabaattissiya? 30Nah la, chirri Waakh ꞌdooꞌdi tuume omoot ikasookahin, a iꞌdoh toro kol tuumman omoot ikajirra? 31ꞌDooꞌd Kiriistokaaw, weyti katirriinsada adeehe, an kol dakkhan omoote itoolla! Wihi an tissibo an bihin atin kaguꞌddo, inno ichoow Yeesso Kiriistohi Kamureene ba a wohoo kalday. 32Chirri an saggi weeli enenyet on ꞌdooꞌdi ilkerengeetti Efeesso ka iꞌdi binaat u isjahne an iꞌdaakka mehe yeela? Chirri Waakh enenyet omoot ikasookahin, a geeddi an iꞌdi enenyet essuu,
“Golossanni, farso laka danno,
iꞌdi tahe saahta a tuunna,” an adeeh on gon. #15:32 Isaaya 22:13.
33Uus ꞌdooꞌdi addan atin ekkeysan! Mammahta kasooꞌhela, “Wahalhi suuje eti sohoti haaggan khabo a kheeroochaan.” 34Waha mujjum kamalda, uskeeliin la ꞌdiicha. Weyti lakhaanyo menya maanta chirri an saggi gaasiinkoo uliba Waakh ma aban eldi?
Sarti omoot lakasookahche
35Iꞌdaasenyi etoo kolossoo mehe worsata ya, “Waakh ꞌdooꞌdi tuume saggoh omoot ikasookahcha? Sarti berri icho khabaan a too mehe?” 36ꞌDalammeey! Chaꞌat ilintoo il gelisse, ilintaas sammata iche koloo iumaatan ma bahto, geeyoo ma tateeh. 37Wihi at il gelisso, geeyi bahe weynaate menye, ilim on il gelisse, iꞌdi maanta ilinti ꞌdargaayye, ommos ilinti geeyoo addan. 38Iꞌdaasenyi Waakh on ilim ba saggi us iꞌdoono wohoo iꞌdi sareete gessa. Ilime ba la sarti leemujjume on gessa. 39Sarti wihi jiro khabo tuumman too kalday menye a yeerar, weeli enenyet sartoo yeerenye khaba, hoolahi lararti laka sartoo yeere khabaane, chimbiro laka sartoo yeere khabaane, bahag laka sartoo yeere khaba. 40Wihi harra kajiro laka sar a khabaane, wihi serey kajiro laka a iꞌdoo icho sar khabaan. Iꞌdaasenyi haaggi sarti wihi saraat ichoow haaggi sarti wihi harrata tuumman a yeyyeerar. 41Orrahe haaggiche a khabta, yeyyah laka haaggiis a khaba, bakkaalle laka haaggiche khabta. Bakkaalle ka laka bakkaal ba haaggiis a yeer on.
42Maanti Waakh ꞌdooꞌdi tuume omoot kasookahcho laka a iꞌda on. Sarti ladibo a ti suusahto, sarti omoot lakasookahcho la, a ti jirtuu isuusahin. 43Sarti ladibo a ti haag laaye, sarti omoot lakasookahcho la, a ti haaggan on. Sarti ladibo a ti ꞌdarane, sarti omoot lakasookahcho la, a ti miige. 44Maanti ladibo, a sarti weeli enenyet on. Maanti lasookahcho la, a sarti Rubeyti Munyee jiro siisso.
Chiꞌ sarti enenyet jirto, sarti Rubeyti Munyee jiro siisso laka a jirta gon. 45ꞌDeerka wihi chiiran, “Eti oraate Aadam layadeeh, eti noole eheet.”#15:45 Uumaccho 2:7. Iꞌdaasenyi, Aadamhi ꞌdaꞌddaboot a Rubeyti enenyet jiro siisso. 46Sarti Rubeyti Munyee enenyet siisso mee orey timiy. Iꞌdaasenyi sarti weeli enenyete harratane orey timiyye, ti addan sooraahte. 47Eti oraat harra on kayimiyye, ebeere lakasoouume. Eti lammaatteet la goobi Waakhe kayimiy. 48ꞌDooꞌdi harrata a iꞌdi eti ebeeri harra lakasoouume. ꞌDooꞌdi goobi Waakh la a iꞌdi eti goobi Waakh kayimiy. 49Saggi inno toolla iyookkoti eti harrata ikhabno, iꞌdaasu laka berri iyookkoti eti goobi Waakhe bihinna.
50ꞌDooꞌd Kiriistokaaw, wihi an atin icheeko kallaayo, sarti weeli enenyete jid ichoow diig khabto dakhi Waakh ma muꞌdan. Ommos wihi kheerowo inti berri walah ikakheerowin ma muꞌdan. 51Maantaka wohoo dagsane atin isoocheeka. Inno tuumman ma namuute, iꞌdaasenyi inno tuumman a inno luurgiyicha. 52Waha la koloo kalday on iꞌdi ankhad ichoow libiisihi ileet u yateehiin maanti arabi ꞌdaꞌddaboot laafuufo. Iꞌdi tahe maanti arab laafuufe, Waakh ꞌdooꞌdi tuume a sookahcha, icho la toro yombuu ma yamuutiine, Waakh inno tuumman la a inno urgiyicha. 53A mehe sarteenta tamuute suusahto ichehi luurgiyicho, ti iumaatane isuusahin lakayeelo laꞌdoona.
54Maanti wihi yamuute suusaho luurgiyiche wihi iumaatane isuusahin lakayeele, ꞌdeerka ayta Chiirnaanneti Waakh goya kijirto a labuuhicha, “Omoot a lakhorkhiche toro weyti lasooriche.”#15:54 Isaaya 25:8.
55“Omootoow soorinti at enenyet soorisso meete?
Omootoow miigtaahti orran at enenyet kabolkhisso meete?”#15:55 ꞌHoseeya 13:14.
56Omoote uskeele miigti iche enenyet kabolkhisso kaꞌhessa. Uskeel la amurreti Muusa chiire iche miig kaꞌhela. 57Iꞌdaasenyi Waakh kalaꞌd ilaabno. Us wihi Yeesso Kiriistohi Kamureene yeele ka, miigti inno uskeel ichoow omoot kasoorinno a inno siicha.
58Maantaka ꞌdooꞌd Kiriistoki an weyti ꞌdoono, mujjum tolossada, uus wohoo rucchul laka atin sesseehin. Kol dakkhan hili Kamur tuum haaggicha. Iꞌdi tahe saggi atin igarattaan u, hili atin Kamur ihaaggissaan ki ilmarhaatteet mee.
ទើបបានជ្រើសរើសហើយ៖
1 Koriinto 15: rel
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018, Wycliffe Bible Translators, Inc. All rights reserved.