Lûm 15
15
Me ghɨ̀ àghɨa àa bɔ̌ bòt tsa la
1Bàa wu bàa nkwèèla ane mèntɨ̧ɨ̧ ma mu bàa zi ane Yesò la, bàà me tɨŋe bɔnyɨ ba ane èdziꞋi bɔ̀ɔ njùa adù̧ la. Bàà ka me ghɨ̀ wuê àghɨa àa mbɔ̀ àwa la. 2Waa waa ane ya me ghɨ̀ àghɨa àa me bɔ̀ wanyɨ vi ntɨ̀ŋa tò, ngɨ̀à tà kwèèlâ la. 3Yesò Klistò li tà kà ghɨ̂ wuê àghɨa àa mbɔ̀ àvi la. A wu mbɨ̀Ꞌɨ̀ bɔ shɨ ànəa tò a èbem Àkata Mbɔ̧ɔ̧mà la nê, “Tèntsɔ̧̀ɔ̧̀mè tu bòt e li ntsɔ̧̀ɔ̧̀te àwê adù̧ la tê nɔ̀ŋke a ègwet laã.” 4Àghɨ àgème bɔ li shɨ a èbem Àkata Mbɔ̧ɔ̧mà àfɨꞋa mbì la a li ngua mànyɨꞋte awa, è me ghɨ̌ baa me kuule mèntɨ̧ɨ̧ ma, mè ndzìà mèntɨ̧ɨ̧ ma, mbɨ̀Ꞌɨ̀ baa me chɨ̀Ꞌɨ èghɨ bu ègème Mbɔ̧ɔ̧mà kàꞋà àwa la.
5Maà ntsàꞋta Mbɔ̧ɔ̧mà wu tàa ngɨ̀à baa kuula mèntɨ̧ɨ̧ ma, tà mè ndzìà mèntɨ̧ɨ̧ ma la nê, tà ghɨa bɨ̀ me tseke ane ètsəê wemɔꞋ nè bɔnyɨ bɨ̧, wuê ane èlɨ Yesò Klistò li ngua ntsèka la. 6À wu ale mbɨ̀Ꞌɨ̀ bɨa me wùꞋte a Mbɔ̧ɔ̧mà, Tǎt Yesò Klistò Lefɨ̀Ꞌ wa nè ètsəê wemɔꞋ.
Ntu̧ Ntsɔ̧̀ abua bòt kà wu Bèjuê
7Ale, bɨ̀ me baãaã bɔnyɨ bɨ̧ ntsɔ̧̀ wuê mbɨ̀Ꞌɨ̀ Yesò Klistò li mbà̧aã àwɨ̧ la, mbɨ̀Ꞌɨ̀ bòt aa me ŋa mèngùꞋte abua Mbɔ̧ɔ̧mà. 8Maà nkɨà bɨa ku̧u̧te nê Yesò Klistò li ntsìꞋi wɔ̀fàꞋ abua Bèjuê ale, nɨŋ nyɨ̀Ꞌte nê Mbɔ̧ɔ̧mà wu wòt nkûŋ ane àghɨa tà li nkàꞋ bètǎt nyaꞋ ba la. 9A li ngu ale mbɨ̀Ꞌɨ̀ bòt kà wu Bèjuê aa wùꞋte a Mbɔ̧ɔ̧mà mɨ̧̂ ane tèsȩ tu tà li mbɔ ane yɔb la. A wu mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê,
“Ale maa wuꞋtè àwê a kètsìà bòt kà wu Bèjuê,
e mèe kɔ̧ mètsəkù̧ ane èlen lê.”
10Bɔ mèe shu nê,
“Bòt kà wu Bèjuê,
bɨ̀ wùꞋte awɨ̧ bɨ bòt Mbɔ̧ɔ̧mà nɔ̂.”
11Mè nê,
“Bòt kà wu Bèjuê,
bɨ̀ wuꞋte a Mbɔ̧ɔ̧mà bɨ̀agème,
Bòt bàgème è mě ngùꞋtà tò.”
12Àsayà mè nê,
“Wòt bɔ̀ɔ bi atò àndǎ̧ Jesì la nàa li kɨꞋɨ,
wu wòt tàa li me baãaã bòt kà wu Bèjuê la.
Bɔ̀ɔ lâ me chɨ̀Ꞌɨ̀ tàa ghɨ̌ bɔ̀ɔ peme.”
13Maà ntsàꞋta Mbɔ̧ɔ̧mà wu tàa ngɨ̀à bòt e chɨ̀Ꞌà àghɨa tà kàꞋà la nê, tà ghɨa Fo Kèfə ghɨa mèntɨ̧ɨ̧ mɨ̧ mu bɨ zi ane tò la lu̧u̧ nê mèngùꞋte nè àlàŋkè.
Lə Pɔ̂l li shɨ mèngà̧ kèkweelè la
14Bɔnyɨ bɔ̧, mmɔ̌ mbɔŋ mâ lâ nko nê bɨ̀ambɔŋ e lu̧u̧ nê ntsɔ̧̀, mè ndâ nko àghɨa bɨ bɔ ndɨ bɨ̀a me ghɨ̀ la, mè ngu eko nyɨꞋte bɔnyɨ bɨ̧. 15Ka mâ nɨ àkweela èntɨ̧ɨ̧ è shɨ abua yɨ̧ enɨ ku̧u̧te awɨ̧ ane èghɨ ko, nkàà ntsɔ̧̀ Mbɔ̧ɔ̧mà wu 16tà nɨŋ ngɨ̀ e ntsiꞋi wafàꞋ Yesò Klistò la. Maà ntsɔ̀tà Ntu̧ Ntsɔ̧̀ Mbɔ̧ɔ̧mà abua bòt kà wu Bèjuê ale, àfàꞋ am a wu mbɨ̀Ꞌɨ̀ àfaꞋa ntsìà mèpɨ̧̀, e ghɨ̌ Mbɔ̧ɔ̧mà naa nɨ awɔb mbɨ̀Ꞌɨ̀ àghɨa èpɨ̧̀ a kuꞋ, nkàà ndɨ Fo Kèfə ghɨ awɔb ane bòt Mbɔ̧ɔ̧mà la.
17Ale, maà ngàꞋtà am ane àfàꞋ yu màa fàꞋà abua Mbɔ̧ɔ̧mà la, è wu àfaꞋa mâ fàꞋa ane mètàŋ Yesò Klistò la. 18Maa me laꞋà wuê ànəa àghɨa Yesò Klistò ètsè ane yaã ngɨ̀ mbɨ̀Ꞌɨ̀ maa ghɨ̌ bòt kà wu Bèjuê aa me zəa Mbɔ̧ɔ̧mà la. 19Mâ ghɨ̂ èlȩê e ghe la, nè mènəè ngɨŋa Fo Kèfə è ŋa mètàŋ e ngɨ̀ la. Ale, ebuꞋu a Jèlusalèm e ghǎ wua Èlikùm, mâ tsɔ̀te Ntu̧ Ntsɔ̧̀ Yesò Klistò a èdziꞋ ègème. 20Maà ntsɔ̀tà Ntu̧ Ntsɔ̧̀ mbɔŋ ale, nyɔ̀Ꞌtà ndzèa nê e mbakà tsɔ̀ta àdziꞋa wòt è laꞋa ànəa Yesò Klistò abot la, mbɨ̀Ꞌɨ̀ ka e ngua mbɔ̧̀a a ègwet àtetsia wòt kǒ tsa. 21Mbɨ̀Ꞌɨ̀ Àkata Mbɔ̧ɔ̧mà a shu la,
“Bòt bu bɔ̀ le kaꞋa laꞋà
ànəa tò abua yɔb la àa li ye,
bòt bu bɔ̀ le kaꞋa zə la e mè ngu zə e ko.”
Pɔ̂l taŋke e ghǎ a Luêm
22Eyaa wu àghɨa yu a kele am ngo̧ a ngò̧ a mànkɨꞋa e ye awɨ̧ la. 23Ka afɨ̀Ꞌ yaa mâ paa àfàꞋ am àbâ èlaꞋ ŋàa la, nè ndɨ̀ wu mâ taŋkè a mèngùꞋ a mèngùꞋ nê maa kɨꞋɨ ye awɨ̧ la, 24mâ mɨ̀ɨ̀tè nê maa kɨꞋɨ afɨ̀Ꞌ yaa. Maa tsě e ye awɨ̧ mbɨ̀Ꞌɨ̀ è ngu nga a Spen la. Maa nga kɨꞋɨ e wu baa nɨ̧̀ ba ane àfɨ̀Ꞌ à ko bɨa tɨŋe am ane lèghȩ̀ȩ̀nè am a mànga Spen. 25Ka la e ngua nga a Jèlusalèm àfɨ̀Ꞌ yaa nè èghɨ, eŋa abua bòt Mbɔ̧ɔ̧mà bu abàꞋ və la. 26Bòt Mbɔ̧ɔ̧mà bu a Màsèdonìà la, nè è bu a Akayà la e li ŋa èghɨ abua bòt ntseb bu ayɔɔ bòt Mbɔ̧ɔ̧mà bu a Jèlusalèm la nè mèngùꞋte. 27Bɔ li ngɨ̀ àyaa ane mènkɔ̀ŋke mɔb. Ane nkûŋ, bɔ bɔ ndɨ bɔ̀ɔ tɨŋe bòt ntseb bàa la. Bòt kà wu Bèjuê e jɨ àbȩ̂ èghɨ ntsɔ̧̀ bu Mbɔ̧ɔ̧mà ghɨ̂ abua Bèjuê la. Ale, bɔ bɔ ndɨ bɔ̀ɔ tɨŋe Bèjuê mɨ̧̂, nè èghɨ bu Mbɔ̧ɔ̧mà lɔ̀ɔ̀le àwɔb adù̧ la. 28Ale, àfɨꞋa mâ paa àfàꞋ yaa, ŋa èghɨ bu bɔ fete abua yɔb la, maa kɨꞋɨ ye awɨ̧ mbɨ̀Ꞌɨ̀ màa me tsèa ngà a Spen la. 29Mâ koê nê maa me kɨꞋɨ eye awɨ̧, e lu̧u̧ ne èghɨ ntsɔ̧̀ e edzəâ abua Yesò Klistò la.
30Bɔnyɨ bɔ̧, maà shù̧ù̧ta wɨ̧ ndɨ̀ wu bàa tsiꞋi àghɨ yeamɔꞋ ane Yesò Klistò Lefɨ̀Ꞌ wa la, mè nè ndɨ̀ wu Fo Mbɔ̧ɔ̧mà è ghɨ̂ baa me kɔ̀ŋkè àwa la nê bɨ̀ fɔte nê nà̧ me lâ ntsàꞋta Mbɔ̧ɔ̧mà ane yaã. 31Bɨ̀ me tsàꞋte atò nê tà ghɨa bòt bu a Jùdià bɔ̀ baka zi mèntɨ̧ɨ̧ mɔb ane Mbɔ̧ɔ̧mà la è ka ndzì àlɔꞋ ane yaã, me nè bòt Mbɔ̧ɔ̧mà bu a Jèlusalèm la è nɨ àghɨa e nɨa nga etɨŋe awɔb la nè mèngùꞋte. 32Ale, Mbɔ̧ɔ̧mà bɨ̧̀ɨ̧̀na, ko maa me kɨꞋɨ eye awɨ̧, e kɨꞋɨ ane mèngùꞋte, baa nɨ̧̀ ba e mě ndzì mèntɨ̧ɨ̧ ma. 33Maà ntsàꞋtà nê Mbɔ̧ɔ̧mà wu tàa ngɨ̀à bòt e bɔ àlàŋkè èntɨ̧ɨ̧ la wu nɨ̧̀ bɨ̀agème. Àmèn.
ទើបបានជ្រើសរើសហើយ៖
Lûm 15: mnf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2006, Cameroon Association for Bible Translation and Literacy
