Mak 16

Yesò yù̧ù̧me

(Mat 28:1-8; Lk 24:1-12; Jn 20:1-10)

1Àliapfəèa Bèjuê yu a tsè, Màlià Màdàlin bɔ̂ Màlià nyɨ̌ Jimsì nè Sàlomè, e yu̧ èghɨbə #16:1 Bèjuê e li mbɔ̀ èghɨ ko bɔ̀ɔ nɨ̀a ndzɔ̀Ꞌɔ bèmpfəà bɔb mbɨ̀Ꞌɨ̀ bɔ yàŋè fì la. ntàŋke enɨ gha yɔꞋɔ àpfəꞋte a Yesò. 2È sàꞋà ngu kwàꞋ a ntɔtetsɔ̌Ꞌ ane àlia mbì ane nkàb, àfɨꞋa nyèm saꞋa la, bɔ ghà àtsəasì yu. 3Bɔ me ghȩ̀ȩ̀nà mbììta a kètsìà wɔb nê, “Wàa nàa etɨŋe wa epàa èti lu a ètsəê àtsəasì yu la à?”

4Ka bɔ me lɨ̀ŋke ndze nê bɔ bɨŋe taꞋà èti lu a ètsəê àtsəasì yu la tè ntsì. 5Ale, bɔ nyi a èbèm ndze wakèsà kǒ tà kwaã ndǐ kèfə ntsèke àbâ àbualu̧ la, ntàꞋa bɔa.

6Tà shu abua yɔb nê, “Bɨ̀ ka mbɔ̀a. Mâ ko nê bɨ kɨa Yesò wòt Nazàlet wu bɔ li ngù̧ù̧te tò a mbɨ̧̀ mbasa la. Tà te ntsě a si ŋàa, tà yu̧u̧mè. Bɨ̀ ye àdziꞋ yu bɔ li nɔŋe atò la. 7Bɨ̀ ghǎ àfɨ̀Ꞌ yaa shu abua bɔkatè tò bɔ̂ Pità ba nê, ‘Tà wu a mbì lɨ̧ ngà a Galìlî. Bɨa ye atò abàꞋ və wuê mbɨ̀Ꞌɨ̀ tà li shu awɨ̧ la.’ ”

8Ale, bɔ lɔ̀Ꞌ àtsəasì yu me luula ngà, ènyit yɔb e tsiꞋa mbènta bente, ka bɔ̀ ka shu wòt ànəê, nkàà nê bɔ li ngua mbɔ̀â. #16:8 Èkatè nyaꞋ nyaŋ e bakà bɔ mèngà̧ maa ane vèsè 9-20 la.

Yesò pùùla a mbì Màlià Màdàlin

(Mat 28:9-10; Jn 20:11-18)

9[Yesò li njù̧ù̧me a ntɔtetsɔ̌Ꞌ ane àlia mbì ane nkàb ale, mbɨ̀ sàꞋa a mbì Màlià Màdàlin wu tà lè lɔꞋ fəè fote kàbɔ̀ŋ tesà̧à̧mbe ane tò la. 10Màlià li ngà shu ànəê yaa abua bòt bu bɔ̀ le wua ngȩ̀ȩ̀nà nè Yesò la. Bɔ̀ li ngua shùà mèsi ndɨ̀à. 11Bɔ batè ndzə tà nê Yesò yu̧u̧mè, mè nê ye ye atò ale, ka bɔ̀ ka lem mbɨ̧̀ɨ̧̀ne ànəa mbɔŋ.

12Mbɨ̀Ꞌɨ̀ àyaa a tsè la, Yesò mè ntsìꞋi saꞋa a mbì bòt ko babe, bɔ̀ le wua nkuŋa atò la mɨ̧̂, ane èlɨ tsa àfɨꞋa bɔ̀ le wua nga àpfəè la. 13Bɔ kua akwèn ngà shu èbeko bu, ka bɔ̀ ka bɨ̧ɨ̧nè ànəa mbɔŋ.

14A li ngà me lìa, Yesò puula a mbì bɔkatè bi bu bɔ̀ le tsiꞋi èghem ntsɔ̀b wemɔ̀Ꞌ la àfɨꞋa bɔ̀ le wua njɨ̀a èghɨjɨ la. Tà li ŋȩ̀te awɔb ndɨ̀ wu bɔ li bɔ̀ ka wua mbɨ̧̀ɨ̧̀na nê betsiꞋa tà yu̧u̧mè la, mè nè ndɨ̀ bɔ li bɔ̀ kà bɨ̧ɨ̧nè ànəa bòt bu bɔ li ndzèa atò àfɨꞋa tà yu̧u̧me la.

15Tà li shu abua yɔb nê, “Bɨ̀ ghǎ a ngɔ̀ŋ ègème ntsɔ̀tè Ntu̧ Ntsɔ̧̀ abua waa waa. 16Wòt ègème tà bɨ̧ɨ̧ne Ntu̧ mbɔŋ tè bɔ zì atò a èdzî la, naa bɔ mèmpème. È wu wòt kà bɨ̧̀ɨ̧̀ne, ko aa li ebɨɨ a ŋut. 17Bòt bu bɔ bɨ̧ɨ̧ne la aa bɔ èlȩê baa: Bɔɔ nga me enɨ èlen laã fəèà fote kàbɔ̀ŋ, mè ndàꞋà èwuu ndɨ̧te ko tsa tsa. 18Wòt ane yɔb baãaã wuê nyà̧kàbɔ̀ŋ kò nù wuê èghɨbə kàbɔ̀ŋ leꞋ, àghɨ à ka ghɨa tò. Wòt bɨ̧̀ɨ̧̀ne èngǎ̧ am, nɔ̀ŋè èbu bi adù̧ wòt tàa ngò̧ò̧nà la, ko ŋut naa peme.”

Yesò kɔꞋ nga a ègwet

(Lk 24:50-53; Àf 1:9-11)

19Mbɨ̀Ꞌɨ̀ Yesò Lefɨ̀Ꞌ è paa a màndaꞋa abua yɔb la, Mbɔ̧ɔ̧mà bê nɨ̀a tò ngà a ègwet tà tseke àbâ àbualu̧ a tò. 20Bɔkatè Yesò e li ngà èdzìꞋ ègème ntsɔ̀te Ntu̧ Ntsɔ̧̀. Lefɨ̀Ꞌ me fàꞋa bɔ̂ tò ba, ngɨ̀à bɔ ghɨ̀à èghɨ àa nyɨ̀Ꞌta mètàŋ tò la, nɨa nyɨ̀Ꞌta nê èngà̧ wu bɔ làꞋà la wu nkûŋ.]

ទើបបានជ្រើសរើសហើយ៖

Mak 16: mnf

គំនូសចំណាំ

ចែករំលែក

ចម្លង