2 Kɔlìn 2
2
1Ale, e ndi nkwàꞋtè nê e nka tsi kɨꞋa mbɨ̀Ꞌɨ̀ ka è nkɨ̀Ꞌɨ̂ mèntɨ̧ɨ̧ mɨ̧ mè me ghò̧ò̧ne. 2E ngu anè ngɨ̀ mèntɨ̧ɨ̧ mɨ̧ me ghò̧ò̧ne, ngule èsi bòt bu bɔ mè ngɨ̀ èntɨ̧ɨ̧ am e me bɔ̀ la wu wà ba à? Wu wuê bɨ̀a wàà mâ ghɨ̂ mèntɨ̧ɨ̧ mɨ̧ me ghò̧ò̧nè la. 3E ndi ngua shɨa àkata ngaa a èlɨ mbɔŋ mbɨ̀Ꞌɨ̀ è ngɨa è nkɨ̀Ꞌɨ̂, bɨ̀a wu bɨ wuê è ghɨ̌ èntɨ̧ɨ̧ am aa me bɔ̀ la è ka ghɨ̂ èntɨ̧ɨ̧ am aa me ghò̧ò̧ne. Mâ lâ nko nê èntɨ̧ɨ̧ am e me bɔ̌ ko èntɨ̧ɨ̧ wɨ̧ bɨ̀agème aa me bɔ̌ mɨ̧̂. 4E ndi me shɨ àkata ngaa, a taꞋa saa am a èntɨ̧ɨ̧ am tè mèsi chu àghɨ am kwàꞋ ànyaꞋne. E ndi me shɨ è nka wua nkɨà mèntɨ̧ɨ̧ mɨ̧ naa me ghò̧ò̧ne. E ndi ngua nkɨà bɨa ko ndɨ màa ndâ nkɔ̀ŋkà àwɨ̧ la.
MàngwaꞋa kàbɔ̀ŋ wòt tà ghɨ̌ a kàbɔ̀ŋ la
5È wu nkûŋ nê wòt kǒ ghɨ a kàbɔ̀ŋ, ko tà bakà ghɨ̀ wuê abua am. Maà kà kɨ ŋwèèlè nyaŋ, ka tà li ngɨ̀ abua yɨ̧ bàgème. 6NgoꞋ yaa àbəèꞋ àyɨ̧ nyaŋ a ghɨ̂ èwuu wòt waa ye la è kuêꞋ. 7È wu ale, bɨ̀ tsiꞋi me kɨ ndɨ bɨ̀a waꞋa a kàbɔ̀ŋ tò ezǐ èntɨ̧ɨ̧ tò mbɨ̀Ꞌɨ̀ a saa tò nyaŋ tà màꞋà ànəê àgème a si la. 8Ale, mâ shu̧u̧ta wɨ̧ nê bɨ̀ ghɨa tà ko nê bɨ bela nkɔ̀ŋkà vi. 9E ndi me shɨ awɨ̧ ale ngua nkɨ enyɔ̀Ꞌtè àwɨ̧ eye nê kò bɨ bela ndzə am leꞋ. 10Bɨ waꞋa kàbɔ̀ŋ wòt ko maa waꞋa wùà mɨ̧̂. È wu nê mâ lèènè kàbɔ̀ŋ wòt, ko e ngɨ̀à a mbì Yesò Klistò, nkàà àwɨ̧. 11Bà ghɨ̀ ale, mbɨ̀Ꞌɨ̀ ka Satàn jɨ̀ mèntɨ̧ɨ̧ ma nkàà nê ba ko àŋɔꞋta tò.
Pɔ̂l kubte a lèghȩ̀ȩ̀nè vi a Tloas
12E ndi nkɨ̀Ꞌɨ̂ a Tloas etsɔ̀te Ntu̧ Ntsɔ̧̀ Yesò Klistò. E me kɨꞋɨ ale, Tè Yesò Klistò ghaꞋa èlu̧ abua am. 13Mbàte ngàꞋa ale ka èntɨ̧ɨ̧ am è ka nɔ̀ŋke a èbèm laã ntsɔ̧̀ nkàà nê e ndi è nka ye wanɔ̧ Tȩtɔ̀s abàꞋ və. Ale, e ndàꞋnè àwɔb ntsiꞋi ghà ne Màsèdonìà.
Etsě ane mètàŋ Yesò
14Ka mèngùꞋte wu abua Mbɔ̧ɔ̧mà. Tà gha ambo èlɨ̀ wu bà tsiꞋi àghɨ yeamɔꞋ nè Yesò Klistò la ntse a mbì la me ghaꞋa èlu̧ ba me nû a Satàn ntsèà. Tà ghɨ̂ ba wu mbɨ̀Ꞌɨ̀ mèwet àghaa ntsɔ̧̀ bàa ntsèà àdziꞋ àgème ngɨ̀à bòt e koa àghɨa Yesò Klistò wu yùà la. 15Baa anè ntsìꞋi mbɨ̀Ꞌɨ̀ mèwet àghaa ntsɔ̧̀ Yesò Klistò ŋa abua Mbɔ̧ɔ̧mà a kètsìà bòt pèma la nè èbe ndèma la. 16Abua bòt mpfəèꞋta la, àghaa yaa wu àghaa èvə àa bùŋè àwɔb la, è me wu abua bòt bu mpèma la, àghaa mbɔŋ wu àghaa àa ghɨ̌ bɔɔ peme la. Wòt wu tà kùꞋu ane àfàꞋ yaa la wu wàà? 17È me wu awa ko ba ntsě mbɨ̀Ꞌɨ̀ bòt ko bɔ̀ɔ ndàꞋà èngǎ̧ Mbɔ̧ɔ̧mà wuê ambo èkab la. Ka ndɨ̀ wu è wu Mbɔ̧ɔ̧mà ka tà tsàà àwa baa mè ngu a mbì tò la, baa ndàꞋà èngǎ̧ tò nè èntɨ̧ɨ̧ kèfə, mbɨ̀Ꞌɨ̀ bɔfàꞋ Yesò Klistò.
ទើបបានជ្រើសរើសហើយ៖
2 Kɔlìn 2: mnf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2006, Cameroon Association for Bible Translation and Literacy