1 Kɔlìn 6
6
ÈsaꞋa à kètsìà bòt Mbɔ̧ɔ̧mà
1Wòt bɔ̂ wanyɨ vi e me yɔ̌, ghǎ ghɨ̀ ka bɔ mɨ̌ bòt Mbɔ̧ɔ̧mà, è nga nê abua bòt ngɔ̀ŋ yaa bɔɔ saꞋa wɔb à? 2Kò bɨ bakà ko laꞋ nê bòt Mbɔ̧ɔ̧mà aa li saꞋa bòt ngɔ̀ŋ yaa le è? Tè bɨ wu li saꞋa bòt ngɔ̀ŋ, ko bɨ bakà kuꞋu èbe bɨ̀a saꞋa mènəè tèchɨɨle la à? 3Tè bɨ bakà ko laꞋ nê baa li saꞋa bɔntu̧ Mbɔ̧ɔ̧mà? A wu e wu ale ko ba bɔ ndɨ bàa me ko mbà̧aã mènəè nàa ndzea bòt àli àgème la. 4Ale, bɨ bɔ mènəè a kètsìà wɨ̧ àghɨ yu a ghɨ̀ bɨ me nɨa nga a mbì bòt nàbȩ̂ bu bòt chɔsì àa ka ye awɔb mbɨ̀Ꞌɨ̀ àghɨ la wu ghà à? 5Bɨ bɔ ndɨ bɨ̀a bɔ àtsəa kɔꞋɔ la. BetsiꞋa bɨ̀ ka buŋ wòt èyì wemɔ̀Ꞌ a kètsìà wɨ̧ tàa saꞋa ànəê à kètsìà wòt bɔ̂ wanyɨ vi la. 6Wòt Mbɔ̧ɔ̧mà tsiꞋa nɨa wanyɨ vi nga a mbì bòt kà ko a Mbɔ̧ɔ̧mà bɔɔ saꞋa wɔb.
7Wòt Mbɔ̧ɔ̧mà nɨa wanyɨ vi nga a lob saꞋa ko a wua nyɨ̀Ꞌta nê bɨ̀a bòt Mbɔ̧ɔ̧mà bɨ kwen. Bɨ tsiꞋa te ghǎ a mbì bòt ngɔ̀ŋ yaa, a bɔ̀ŋ bɨ bi ndɔ̀Ꞌ. Bɨ wuê tsiꞋi naa wu bòt ko tsa bɔ̀ɔ nəèꞋà wɨ̧ la. 8Ka bɨ̀ambɔŋ aa ngɨa kàbɔ̀ŋ ane bòt, mè nɨa èghɨ bòt, tè ngɨ̀à fɔ̀ɔ̀la ane bɔnyɨ bɨ̧ bòt Mbɔ̧ɔ̧mà.
9Bɨ bakà ko laꞋ nê bòt mènəè kàbɔ̀ŋ è ka li bɔ àdziꞋ a kèfɔ̧̀ Mbɔ̧ɔ̧mà a? Bɨ̀ ka fɨ̀te awɨ̧ bɨ̀ambɔŋ. Bòt bu bɔ̀ɔ njɨ̀a ngò̧ò̧tètsə la, nè è bu bɔ̀ɔ nkùkta bènàmbəa la, nè è bu bɔ̀ɔ njɨ̀a àbȩ la, nè mbâ̧ tu tèa mpàꞋta te ko la, è ka li bɔ àdziꞋ a kèfɔ̧̀ Mbɔ̧ɔ̧mà a. 10Ka wuê bètsɔŋ nè bòt aghàbà, nè bòt bɔ̀ɔ nua mèlùꞋ mbea la, nè bòt bɔ̀ɔ ndaꞋa kàbɔ̀ŋ adù̧ tèlente bòt la, ndɔ̀Ꞌ nè bòt bu bɔ̀ɔ nɨa mètàŋ ntsɔa èghɨ bòt la è ka li bɔ àdziꞋ a kèfɔ̧̀ Mbɔ̧ɔ̧mà və mɨ̧̂ a. 11ÀbəèꞋ àyɨ̧ ako a li ngu a èlɨ ngaa, ka Yesò Klistò shùù àwɨ̧, ngɨ̀ bɨ tsiꞋi bòt Mbɔ̧ɔ̧mà; bɨ kùꞋu a mbì Mbɔ̧ɔ̧mà nkàà èlen Yesò Klistò Lefɨ̀Ꞌ nè Fo Tǎt wa Mbɔ̧ɔ̧mà.
Bɨ̀ nɨ ènyit yɨ̧ nguꞋta Mbɔ̧ɔ̧mà
12“Mbɨ̧ ko nàa kele am a màngɨa ghɨ la è ntsě.” A batè ngu ale ka è kà wuê àghɨ ègème àa ntɨ̀ŋa wòt la. “Mbɨ̧ ko nàa kele am a màngɨa àghɨ la è ntsě”, ka è nka wu bɨ̧ɨ̧ne àbùꞋ abua àghɨa ko. 13Bɨa shua nê, “Èghɨjɨ e wu abua èbêm, èbêm e mê ngu abua èghɨjɨ,” Ka Mbɔ̧ɔ̧mà bɔ̂ ngu ghɨ̀ èghɨ mbɔŋ ègème aa baka tsi ngu àghɨ. Bɨ̀ ka me nɨ mbɨ̧te ènyit tɨ̧ mpàꞋta àbɨ̧, ka bɨ̀ me nɨa nkùkta Tè Yesò. Wu Tè Yesò ka tà bɔ mbɨ̧̀ ènyit la. 14Mbɔ̧ɔ̧mà li njù̧ù̧me a Yesò, mè ngu nɨ mètàŋ mi e yu̧u̧me awa mɨ̧̂. 15Bɨ bakà ko laꞋ nê mbɨ̧te ènyit tɨ̧ wu èdziꞋi ènyit Yesò Klistò? Tè aa nè ngu nê maa nɨ àdziꞋa ènyit a Yesò e ghɨ̌ naa tsiꞋi àdziꞋa ènyit a ghȩ̀ȩ̀nè ghȩȩne? ChaꞋ, à ka mbê ngu ale. 16Bɨ bakà ko nê wòt tà nɔ̀ŋkè nè ghȩ̀ȩ̀nè ghȩȩne la tsiꞋi mbɨ̧̀ ènyit yemɔ̀Ꞌ bɔ̂ tò? Nkàà nê mbâ̧ nàa nɔ̀ŋkà nè àvi, a wu mbɨ̀Ꞌɨ̀ Àkata Mbɔ̧ɔ̧mà a shu la nê, “Bɔ̂ tò babe aa tsiꞋi mbɨ̧̀ ènyit yemɔ̀Ꞌ.” 17Ale, wòt tà tsəꞋne ne Tè Yesò la tsiꞋi àghɨ yeamɔꞋ bɔ̂ tò a èntɨ̧ɨ̧ vi.
18Wòt ka njɨ̀ àbȩ. Kàbɔ̀ŋ ègème wòt nàa ngɨ̀à la nàà kà baãaãte mbɨ̧̀ ènyit wòt, ka mànjɨa àbȩ nàà tsòkà mbɨ̧̀ ènyit wòt. 19Bɨ bakà ko nê mbɨ̧̀ ènyit yɨ̧ wu lob Fo Kèfə yu è dzə abua Mbɔ̧ɔ̧mà la à? Bɨ ntsě àtsəa yɨ̧. 20Tà li njù̧ù̧ awɨ̧ yu̧. Ale, bɨ̀ me nɨ mbɨ̧te ènyit tɨ̧ nɨa nkùkta Mbɔ̧ɔ̧mà.
ទើបបានជ្រើសរើសហើយ៖
1 Kɔlìn 6: mnf
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2006, Cameroon Association for Bible Translation and Literacy