Забур 148
148
Чилелни цаварал Аллагьдин тариф авун
1Тариф ая Реббидин!
Реббидин тарифа цаварилай;
Кьакьанра тарифа Адан.
2Тарифа Адан, Адан вири малаикар;
тарифа Адан, Адан вири кьушунар.
3Тарифа Адан, рагъни варз;
тарифа Адан, нур гузвай гъетер.
4Тарифа Адан, цаварин цавар,
цаварилайни кьакьан тир ятар.
5Тариф авурай Реббидин тӀварцӀин,
вучиз лагьайтӀа Гьада вири халкьнава
Гьадан эмир яз.
6Ада вири тестикьнава даим яз,
ганва чӀуриз тежедай къайдаяр.
7Тарифа Реббидин чилелай,
гьуьлуьн пилияр, деринар вири,
8цӀайлапанни хар, живни циф,
Адан гаф кьилиз акъудзавай къати гар,
9дагъларни вири кӀунтӀар,
майвадин тарарни вири муьткверар,
10ничхирарни гьар жуьредин малар,
чурчуларни лувар квай къушар,
11чилин пачагьарни вири халкьар,
регьберарни чилин вири гьакимар,
12гадаярни рушар,
кьуьзуьбурни жегьилар –
13тариф ая Реббидин тӀварцӀин,
куьз лагьайтӀа са Гьадан тӀвар
хкажнава!
Адан баркалла чилерилайни,
цаварилайни кьакьан я.
14Ада Вичин халкьдин карч хкажнава,
баркалла Вичиз вафа хуьзвайбурун,
Исраилдин веледрин,
халкьдин Вичиз мукьва тир.
Тариф ая Реббидин!
ទើបបានជ្រើសរើសហើយ៖
Забур 148: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024