МатӀай 9
9
Фалужди янавайди сагъар хъувун
(Марк 2:1-12; ЛукӀа 5:18-26)
1Гьа чӀавуз Иса луьткведа аваз вирелай элячӀна Вичин шегьердиз хтана. 2Адан патав месел алаз фалужди янавайди гъана. Исади, абурун иман акурла, фалужди янавайдаз лагьана:
– ВикӀегь хьухь, чан хва! Ви гунагьрилай гъил къахчунва.
3Гьа и арада тавратдаррикай са бязибуру чпи чпик лагьана:
– Ада Аллагьдиз асивал ийизва.
4– Куьне вучиз куь рикӀера чӀуру фикирар твазва? – абурун фикирар акурла, лагьана Исади. – 5Вуч лугьун регьят я: «Ви гунагьрилай гъил къахчунва» лугьун регьят яни, я тахьайтӀа «Къарагъ, ахлад» лугьун? 6Амма Инсандин Хцихъ гунагьрилай гъил къахчудай ихтияр и дуьньядал авайди квез чир хьун патал, За фалужди янавайдаз лугьузва: «Къарагъ, жуван месни къахчуна кӀвализ ахлад».
7Ам къарагъна, вичин кӀвализ хъфена.
8Халкьдиз и кар акурла, кичӀе хьана ва инсанриз ихьтин алакьун ганвай Аллагьдиз шукурар авуна.
МатӀаякай Исадин тилмиз хьун
(Марк 2:13-17; ЛукӀа 5:27-32)
9Анай хъфидайла, Исадиз харж кӀватӀдай чкадал ацукьнавай МатӀай лугьудай са кас акуна.
– Зи гуьгъуьна аваз ша, – лагьана Исади.
МатӀай, къарагъна, Адан гуьгъуьна аваз фена.
10МатӀаян кӀвале Ада фу недайла, аниз харж кӀватӀдайбурни муькуь гунагькарар атана, Исадихъни Адан тилмизрихъ галаз ацукьна фу нез эгечӀна. 11Фарисейриз и кар акурла, абуру Адан тилмизривай хабар кьуна:
– Куь Муаллимди харж кӀватӀзавайбурухъни гунагькаррихъ галаз вучиз фу незва?
12И гафар ван хьайила, Исади абуруз лагьана:
– Жерягь сагъбуруз ваъ, начагъбуруз герек я. 13Алад, фена Каламда авай гафарин мана вуч ятӀа, гьадакай фикира: «Заз квевай кӀанзавайди къурбанд ваъ, регьим я»#Гьаши 6:6.. Зун гьахъ-михьи инсанриз ваъ, гунагькарриз зи патав эвериз атанвайди я.
Сив хуьникай
(Марк 2:18-22; ЛукӀа 5:33-38)
14Гьа чӀавуз Исадин патав Ягьядин тилмизар атана лагьана:
– Чнани фарисейрин тилмизри сивер гзаф хуьзва, бес Ви тилмизри вучиз хуьзвач?
15– Чам чпихъ галамай кьван гагьда мехъерин мугьманривай перишан яз акъвазиз жедани? – лагьана Исади. – Амма са чӀав атана, чпивай чам къакъудайла, абуру сив хуьда.
16Гьич садани цӀуру пекериз цӀийи парчадикай пине ядач, ягъайтӀа, цӀийида цӀуруди акъажна, тӀеквен авайдалайни чӀехи ийида. 17Гьич садани цӀийи чехир куьгьне целериз цадач. ЦайитӀа, чехирди цӀуру цел хъиткьинарда – вун чехирдикайни жеда, целерикайни. ЦӀийи чехир цӀийи целера цада. Гьа чӀавуз цӀийи чехирни сагъ амукьда, цӀуру целерни.
Гьакимдин рушал чан хкун
(Марк 5:22-43; ЛукӀа 8:41-56)
18И гафар Исади Ягьядин тилмизриз лугьудайла, Адан патав са гьаким атана.
– Зи руш гьа исятда кьенва, тавакъуйда, атана адал гъилер эциг, ам чандал хкведа, – Адаз икрам авуна, лагьана гьакимди.
19Исани тилмизар гьа касдин гуьгъуьна аваз фена.
20Ингье, цӀикьвед йисуз къеняй иви физ азиятдик квай папа, кьулухъай атана, Исадин парталдин ценек гъил кяна. 21А папа вичи вичик виликамаз кьетӀнавай:
– За Адан парталдик гъил кягъайтӀа, зун сагъ хъжеда.
22Элкъвена ам акур Исади лагьана:
– КӀевиз акъваз, чан руш! Ви иманди вун хиласна.
Гьа сятдилай а паб сагъ хъхьана.
23-24Исади, гьакимдин кӀвализ атана, кфилдал ясдин макьамар язавайбурни лугьунарзавайбур акурла, абуруз лагьана:
– ЭкъечӀ инай, руш кьенвач, ам ксанва.
Амма анал алай инсанар адал хъуьрена.
25КӀваляй инсанар акъудайла, Ада атана рушан гъил кьуна, рушни къарагъна. 26И кардикай ван гьанин вири чилерал чкӀана.
Кьве буьркьуьди сагъар хъувун
27Иса анай хкведайла, Адан гуьгъуьна кьве буьркьуьди гьатна.
– Давуд пачагьдин Хва! – гьарайзавай абуру. – Чаз регьим ая!
28Ам кӀвализ хтайла, буьркьуьбур Адал алкӀана. Исади абуруз лагьана:
– Залай куьн сагъар хъийиз алакьдайдахъ куьн агъунвани?
– Эхь, Агъа! – лагьана абуру.
29Гьанал Ада абурун вилерик гъил кяна, лагьана:
– Куьне Захъ иман ийизватӀа, куь рикӀе авай гьар са кар За кьилиз акъудда.
30Абурун вилер ахъа хьана.
– Килиг гьа, Зун вуж ятӀа, садазни чир тахьурай, – кӀевелай лагьана Исади.
31Амма абуру, анай экъечӀна, гьа чил тирвал Исадикай ван-сес туна.
Лал кас сагъарун
32Буьркьуьбур экъечӀдайла, Исадин патав жинерар квай са лал кас гъана. 33Адакай жинерар хкудайла, лалдай чӀал акъатна. Мягьтел хьайи халкьди лугьуз хьана:
– Ихьтин кар Исраилда садазни акурди туш.
34Амма фарисейри Исадикай лагьана:
– Жинерар хкуддай къуват Ада жинеррин кьилевайдавай къачузва.
Гвен гзаф я, гуьдайбур – тӀимил
35Гьа икӀ шегьеррани хуьрера къекъвез, Исади синагугра, чирвилер гуз, Цаварин Пачагьлугъдин вахт атанвайдакай Шад Хабар гуз, инсанрин тӀалар ва азарар сагъар хъийиз хьана. 36Гзаф халкь акурла, Адаз абурун язух атана. Абур, чубан авачиз, аман атӀанвай, кичӀ акатай хипер хьиз авай. 37Гьа чӀавуз Ада Вичин тилмизриз лагьана:
– Гвен бул я, гвен гуьдайбур – тӀимил. 38ГьакӀ хьайила, гвенин Иесидивай гвен гуьдайбур мад ракъурун тӀалаб ая!
ទើបបានជ្រើសរើសហើយ៖
МатӀай 9: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
