МатӀай 7
7
Масадан дуван авуникай
(ЛукӀа 6:37-38, 41-42)
1Куьне масадан дуван аквамир, Аллагьди куь дуванни аквадач. 2Куьне гьихьтин дуван ийизватӀа, Аллагьди куь дуванни гьакӀ ийида. Куьне гьихьтин уьлчмедалди алцумайтӀа, квезни гьахьтин уьлчмедалди алцумда. 3Жуван виле авай чукьван такваз, вучиз ваз ви стхадин виле авай кьал аквада? 4Я тахьайтӀа, вавай, жуван виле авай чукьван такваз, ви стхадиз, къала за ви виле авай кьал акъудда лугьуз жедани? 5Кьве чин алайди! Сифте жуван виле авай чукьван акъуд, ахпа ваз жуван стхадин виле авай кьал акъуддайвал аквада. 6КицӀерин вилик пак затӀар вегьимир, абуру, вал вегьена, вун кӀус-кӀус ийида. ВакӀарин вилик жуван гевгьерар гадармир. Абуру адаз кӀур гуда.
Мад гъилера дуьадикай
(ЛукӀа 11:9-13)
7ТӀалаба – квез гуда; къекъуьгъ – квез жагъида, рак гатут – квез ахъайда. 8Гьар ни тӀалабайтӀа, гьада къачуда, вуж къекъвейтӀа, гьадаз жагъида, ни рак гатайтӀа, гьадаз рак ахъайда. 9Хци фу це лагьайла, квекай гьич са бубадини фан чкадал адав къван вугудач. 10Хци гьуьлуьн гъед тӀалабайла, адан чкадал гъуьлягъ гудач. 11Куьн хьтин писбуру чпин аялриз хъсан савкьватар гуз хьайила, цавараллай Бубадивайни Вичивай тӀалабайдаз хъсан савкьватар гуз жедачни мегер?
12Гьа икӀ, инсанри куьн патал вуч авуна кӀанзаватӀа, куьнени гьабуруз гьахьтин крар ая. Къанундини пайгъамбарри гьа икӀ лугьузва.
МуьтӀуьгъ хьуникай
(ЛукӀа 6:43-44; 13:24-27)
13Фидайла гуьтӀуь варарай алад, гьяркьуь варарини гегьенш рекьи жегьеннемдиз тухуда. Гзафбур гьахьтин рекьяй физва. 14ГуьтӀуь варарини четин рекьи уьмуьрдихъ тухуда, а рехъ тӀимилбуруз жагъида.
15Куь патав хипер хьиз къвезвай тапан пайгъамбаррикай мукъаят хьухь, къеняй абур вагьши жанавурар я. 16Квез абур майвайрилай чир жеда. Мегер къвакъвадин вала ципицӀ гъидани? Къалгъандилай инжил атӀуз женни? 17Хъсан тарци хъсан майваяр гъида, чӀуру тарци – чӀуру майваяр. 18Хъсан тарцивай чӀуру майваяр гъиз жедач, пис тарцивайни – хъсан майваяр. 19Хъсан майваяр тегъизвай гьар гьи тар хьайитӀани атӀана цӀуз гадарда. 20ГьакӀ хьайила квез абур чпин майвайрилай чир жеда.
21Заз «Агъа, Ребби» лугьузвай кьванбур вири Цаварин Пачагьлугъдиз акъатдач, Аниз акъатдайди анжах Зи Бубадин къаст кьилиз акъудзавайди я. 22Къияматдин юкъуз гзафбуру Заз лугьуда: «Я Агъа, я Ребби, Аллагьдин гафар Ви ТӀварцӀелай инсанрал агакьарайди чун туширни? Ви ТӀварцӀелай жинерар хкудзавайбурни чун туширни? Гзаф аламатарни чна Ви ТӀварцӀелай авуначирни бес?»
23Ахпа За абуруз лугьуда: «Заз куьн гьич чидайбур туш. Алат Залай, куьне чӀуру крар гзаф авуна».
Мягькем ва гъуьргъуь хандакӀрикай
(ЛукӀа 6:47-49)
24Зи Гафариз яб гуз, абур кьилиз акъудзавайди, акьул авай, кӀвал эцигдайла, кӀвалин бине къванцел эцигай инсандиз ухшар я. 25Марф къвана, вацӀар алахьна, гарар акъатна. Вири гьа кӀвалихъ элкъвена, амма, бинеда чархунин къван ава лугьуз кӀвал чкӀанач. 26Амма зи гафариз яб гуз, абур кьилиз акъуд тийизвайди кӀвал хандакӀ авачиз, къумадал эцигнавай ахмакьдиз ухшар я. 27Марф къвана, вацӀар алахьна, гарар акъатна гьа кӀвалел ацалтна. КӀвал ацахьна, зурбадаказ чкӀана.
28 Исади Вичин гафар лагьана куьтягьайла, Адан чирвилери вири мягьтеларнай, 29вучиз лагьайтӀа Исади Вичин чирвилер абурун тавратдарри хьиз гузвачир. Ада Вичин чирвилер гъиле вири гьукум авайда хьиз инсанрал агакьарзавай.
ទើបបានជ្រើសរើសហើយ៖
МатӀай 7: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
