МатӀай 23
23
Фарисейринни тавратдаррин чӀуру крар
(Марк 12:38-39; ЛукӀа 11:37-52; 20:45-47)
1Ахпа Исади халкьдихъ ва Вичин тилмизрихъ галаз ихтилатар ийиз хьана. 2Ада лагьана:
– Тавратдаррини фарисейри Мусадин Къанундиз баянар гудай ихтияр чпин гъиле кьунва. 3Абуру квез вуч лагьайтӀа, гьам кьилиз акъуд, амма абуру ийизвай крар куьне ийимир, абуру гафаралди лугьузва, краралди ийизвач. 4Абуру инсанрал ялиз тежедай пар эцигзава, амма чпи а пар кьун патал, абуру гьич тӀуб тупӀухъ гелядач. 5Абуру чпин крар анжах халкьдиз чпи са вуч ятӀани ийизвайди акурай лугьуз ийизва. Абуру пелер кутӀуннавай затӀариз килиг, абурун пекерал алай яргъи курквачӀриз килиг! 6Синагугра абур вилик чкаяр кьаз алахъда. 7Абуруз базардин майдандал инсанри чпиз гьуьрметдалди икрам авун, чпихъ галаз «Муаллим» лугьуз рахун кӀанда.
8Амма жуваз муаллим лугьуз тамир, квехъ авайди анжах са Муаллим я, куьнни вири сад садан стхаяр-вахар я. 9Куьне квекай садазни чилел буба лугьумир, квехъ авайди цавараллай анжах са Буба я. 10Гьич садазни квез регьбер лугьудай ихтияр гумир, квехъ авайди анжах са Регьбер я – Гьамни Месигь я. 11Куь арада авай виридалайни чӀехиди куь кьилел-кӀвачел элкъуьрай. 12Ни вичи вич вине кьуртӀа, гьам агъада жеда, ни вичи вич агъада кьуртӀа, гьам вине жеда.
13-14Гуж я квез хьанвайди, тавратдарарни фарисеяр, кьве чин алайбур! Куьне инсанриз Цаварин Пачагьлугъдиз фидай рак агална. Я куьн аниз гьахьзавач, я аниз физ кӀанзавайбур куьне ахъайзавач.
15Гуж я квез хьанвайди, тавратдарарни фарисеяр, кьве чин алайбур, куь диндал са кас кьванни гъун патал, куьн тефей гьуьлерни чилер амач. Ахьтинди квез жагъайла, куьне ам квелай кьве къат бетердаз элкъуьрда, ам квехъ галаз жегьеннемдин цӀуз аватда.
16Гуж я квез хьанвайди, буьркьуь регьберар! Куьне лугьузва: «Ни Аллагьдин КӀвалел кьин кьуртӀа, адавай кьин кьилиз акъуд тавуртӀани жеда, амма ни Аллагьдин КӀвалин къизилрал кьин кьуртӀа, ада вичин кьин кьилиз акъудун лазим я». 17Я буьркьуь ахмакьар! Вуч вине я, къизил яни, я тахьайтӀа а къизил пак авур Аллагьдин КӀвал?
18Куьне вуч лугьузватӀа мадни са мисал гъин: «Ни къурбангандал кьин кьазватӀа, адавай кьин кьилиз акъуд тавуртӀани жеда. Ни къурбангандал алай къурбанддал кьин кьуртӀа, гьада гьа кьин кьилиз акъудун лазим я». 19Эй буьркьуьбур! Вуч вине я, къурбанд яни, я тахьайтӀа ам пак ийизвай къурбанган? 20Ни къурбангандал кьин кьазватӀа, ада а къурбангандал вуч алатӀа, гьадални кьин кьазва. 21Ни Аллагьдин КӀвалел кьин кьазватӀа, ада тек са Аллагьдин КӀвалел ваъ, гьакӀни ана Уьмуьр Тухузвайдални кьин кьазва. 22Цаварал кьин кьазвайда Аллагьдин тахтунални адал Ацукьнавай Аллагьдал кьин кьазва.
23Гуж я квез хьанвайди, тавратдарарни фарисеяр, кьве чин алайбур! Куьне гьатта сала экъечӀзавай пурнийрин, шивитдин ва эферрин бегьердин цӀуд паюникай са пай Аллагьдиз акъудзава, амма Къанундин лап кьилин къайдайриз – адалатвилиз, регьимвилиз ва Аллагьдихъ иман авуниз – куьне гьич са ябни гузвач. Авуна кӀанзавай важиб авай кар гьа им я, амма муькуь крарни рикӀелай ракъурна виже къведач. 24Эй буьркьуь регьберар, куьне хъвазвай затӀ, ветӀ ква лугьуз, куьзда, амма деве туькьуьнда.
25Гуж я квез хьанвайди, тавратдарарни фарисеяр, кьве чин алайбур! Куьне къапарин винел пад михьзава, амма абурун къене куьне къанихвилелди чапхун авурди ава. 26Эй буьркьуь фарисей, къапунин кьве падни михьи жедайвал, сифте куьне адан къен пад михьа.
27Гуж я квез хьанвайди, тавратдарарни фарисеяр, кьве чин алайбур! Куьн винелай асуннавай сурариз ухшар я. Абур винелай гуьрчег яз аквада, амма абурун къен кьейибурун кӀарабрайни гьар жуьредин чиркерай ацӀана жеда. 28Винелай куьнни вири крар дуьздаказ ийизвайбур хьиз аквада, амма куь къенер жадувиливни чалкечирвилив ацӀанва.
29Гуж я квез хьанвайди, тавратдарарни фарисеяр, кьве чин алайбур! Куьне пайгъамбарриз гуьмбетар эцигзава, гьахъ-михьи ксарин сурар чӀагурзава#23:29 ЧӀагурун – иер авун.. 30Гьа са чӀавуз куьне лугьунни ийизва: «Чна чи бубайрин девирра уьмуьр тухузвайтӀа, абуру пайгъамбаррин ивияр экъичдайла, чун бубайрихъ галаз сад жедачир». 31Гьа идалди куьне куьн пайгъамбарар телеф авурбурун веледар я лагьана шагьидвал ийизва. 32Куь бубайри кьил кутур крар гила куьне акьалтӀар хъия. 33Иланар! Гъуьлягъдин къеняй акъатнавайбур! Квевай жегьеннемдин цӀукай катиз жеда жал? 34ГьакӀ хьайила За куь патав пайгъамбарар, арифдарар ва тавратдарар ракъурзава; абурукай са бязибур куьне рекьида, са бязибур хашуниз яда, муькуьбурни куь синагугра гатаз, са шегьердай муькуь шегьердиз чукурда. 35Нетижада, гьахъ-михьи Гьабилалай эгечӀна, Аллагьдин КӀвалинни къурбангандин арада кьейи Барахан хва Зекеридал къведалди са тахсирни квачиз яна кьейи вири гьахъ-михьи инсанрин кьисас квелай къахчуда. 36За квез рикӀивай лугьузва: вири пис крарай и несилдиз жаза гуда.
Иса Ярусалимдихъ шехьун
(ЛукӀа 13:34-35)
37Эй Ярусалим, Ярусалим! Пайгъамбарар гатадай шегьер! Аллагьди ракъурнавайбур къванцин хура твадай шегьер! Вечре вичин цицӀибар кӀватӀна лувак кутадайди хьиз, шумудра Зун ви аялар кӀватӀиз алахънай. Амма квез кӀан хьаначир. 38Килиг, «куь Аллагьдин КӀвал ичӀиз тунва»#Ермиягь 22:5.. 39Куьне «Реббидин ТӀварцӀелай Къвезвайдаз шукур хьурай»#Забур 117:26. лугьудай вахт къведалди, квез Зун ахквадач.
ទើបបានជ្រើសរើសហើយ៖
МатӀай 23: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
