МатӀай 17
17
Исадин къамат дегиш хьун
(Марк 9:2-13; ЛукӀа 9:28-36)
1Ругуд югъ алатайла, Петрудилай, Якьубалай ва адан стха Ягьядилай гъейри, мад касни галачиз, Иса кьакьан дагъдиз экъечӀна. 2Гьана абурун вилик Адан къамат дегиш хьана: Адан чини ракъини хьиз нур гана, Адан пекерни экв хьиз лацу хьана. 3Садлагьана тилмизриз Адахъ галаз суьгьбетар ийиз акъвазнавай Мусани Ильяс акуна. 4Гьа и арада Петруди Исадиз лагьана:
– Я Агъа! Вуч хъсан хьана чун инал алаз. Ваз кӀандатӀа, за инал пуд кума эцигин: сад – Ваз, сад – Мусадиз, садни – Ильясаз.
5Ада и гафар лугьузвай вахтунда абур экуь цифедик акатна, анай рахадай ван атана:
– Ам Зи рикӀ алай Хва я, Зи шадвал Гьадалди я. Адан чӀалаз килиг!
6И ван хьайи тилмизриз гзаф кичӀе хьана ва абур чинар кӀаникна чилел ярх хьана. 7Исади, абурун патав атана, абурук гъил кяна:
– КичӀе жемир, къарагъ! – лагьана Ада.
8Кьил хкажна килигайла, абуруз Исадилай гъейри касни акунач.
9Дагъдай эхвичӀзавайла, абуруз Исади эмирна:
– Инсандин Хцел кьейидалай кьулухъ чан хкведалди, акурдакай масадаз ихтилат мийир.
10Адан тилмизрини хабар кьуна:
– Вучиз тавратдарри Месигьдилай вилик Ильяс хтун лазим я лугьузва?
11– Гьахъ я, Ильяс пайгъамбарди Адалай вилик хтана, вири крар гуьнгуьна тун лазим я, – жаваб гана Ада. – 12Амма За квез лугьун хьи, ам хтунни авунай, амма инсанриз ам чир хьаначир. Адаз инсанри чпивай жедайвал писвал авуна. Гьадаз хьиз, инсанри Инсандин Хцизни азабар гуда.
13Гьа инлай, Иса Ильясакай рахазвайтӀани, Адан ихтилат Ягья пайгъамбардикай тирдан гъавурда тилмизар гьатнай.
Жин квай жегьил сагъар хъувун
(Марк 9:14-29; ЛукӀа 9:37-42)
14Иса халкьдин патав хтайла, Адан кьилив са инсан атана, метӀерал акъвазна.
15– Я Агъа! – лагьана ада. – Зи хциз регьим ая! Ам варз цӀийи хьайила чӀур жезва. Адаз гзаф азабар гузва, гагь ада цӀуз хкадарзава, гагь – вацӀуз. 16За ам Ви тилмизрин патав гъанай, амма абурувай ам сагъариз хьанач.
17– Эй иман гвачир, рекьяй акъатнавай несил! – жаваб яз лагьана Исади. – Гьикьван гагьда Зун квехъ галамукьрай? Гьикьван чӀавалди За куьн эхрай? Гъваш ам Зи патав!
18Исади жинжиз адай экъечӀун эмирна, амни аялдай экъечӀна. Аялни гьасятда сагъ хьана.
19Иса текдиз амайла, Адан патав тилмизар атана:
– А кар чалай вучиз алакьначир? – хабар кьуна абуру.
20-21– Куь иман зайиф тирвиляй – лагьана Ада. – За квез рикӀивай лугьузва: куь иман финдин твар кьван авайтӀа, квевай и пелез «Инлай анихъ хьухь» лагьана эмир гуз жедай, пелни анихъ жедай. Квехъ ахьтин иман аватӀа, квелай алакь тийидай гьич са карни жедач. Исади Вичин кьиникьикай кьвед лагьай гъилера лугьун
(Марк 9:30-32; ЛукӀа 9:43-45)
22Абур вири санал Галилейдиз хкведайла, Исади абуруз лагьана:
– И мукьвара Инсандин Хва инсанрин гъиле твада, 23Ам яна рекьида, амма пуд лагьай юкъуз Адал чан хкведа.
И гафар ван хьайила, адан тилмизар зурба хажалатдик акатна.
Аллагьдин КӀвализ гудай харж
24Исани тилмизар Кефернагьумдиз акъатайла, Петрудин патав Аллагьдин КӀвализ гудай харж кӀватӀдайбур атана, адавай хабар кьуна:
– Ви Муаллимди Аллагьдин КӀвализ гудай харж тир кьве драхма гузвачни мегер?
25«Гузва» лагьана, Петру кӀвализ гьахьна. Петрудин сивяй гаф акъатдалди, Исади адавай хабар кьуна:
– Ваз чиз, Симун, и дуьнья гъиле авайбуру харжар нивай къачузва? Ам абуру чпин веледривай къачузвани, я тахьайтӀа маса инсанривай?
26Петруди «Маса инсанривай» лагьана жаваб гана.
– АкӀ хьайила, абурун веледар харжуникай азад я, – лагьана Исади. – 27Амма, харж кӀватӀдайбуруз хъел татун патал, фена вириз кӀир вегь; сифте гьатай гъетрен сив ахъая, ваз анай кьуд драхма жагъида, вуна а пул тухвана, жуван паталайни Зи паталай абуруз це.
ទើបបានជ្រើសរើសហើយ៖
МатӀай 17: ЛезПК
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Институт перевода Библии, 2010-2024
