MARKO 15
15
Jesu kuredwa imbiri ya Pilato
(Mat. 27.1-2, 11-14; Lk. 23.1-5; Joh. 18.28-38)
1Hata nakesho kio, wakohani wabaa, waghosi, walimu wa Sharia na wandu wa mwandu wose, wikabonya njama chia imweri, wikamfunya Jesu na kumghenja kwa Pilato. 2Pilato ukamkotia Jesu, “Welee, oho koko Mzuri wa Wayahudi?” Jesu ukatumbulia, “Ni oho kwaghamba.”
3Wakohani wabaa wikamshitakia Jesu kwa maza nyingi. 4Pilato ukamkotia indo ja kawi, “Welee, ndekughoragha ilagho jingi? Zighana iro maza nyingi wikushitakiagha naro.” 5Ela Jesu ndereghorieghe ilagho jingi sena anduangi, hata Pilato ukashinika.
Jesu kutanywa ubwagho
(Mat. 27.15-26; Lk. 23.13-25; Joh. 18.39–19.16)
6Ngelo ya Ndima ya Pasaka, Pilato orekoghe na mzango ghowifunguya mfungwa umweri uo ose wichaalomba. 7Aho, korekoghe na mfungwa umu uwangwagha Baraba, ufungilo andwamweri na awo werebonyereghe vilunganya, wikabwagha wandu. 8Nao izungu ja wandu wikakwanyika, wikazoya kumkotia Pilato uwibonyere sa iji mzango ghwake ghorekoghe. 9Pilato ukawikotia, “Mwakunde nimfunguye Mzuri wa Wayahudi?” 10Angu oremanyireghe kukaia wakohani wabaa wedemfunya tu kwa wundu ghwa iriso jawo.
11Nao wakohani wabaa wikajishingira izungu wilombe wifunguilo Baraba, wulalo ghwa Jesu. 12Pilato ukawikotia sena, “Welee, nim'bonye wada uo mumbangagha Mzuri wa Wayahudi?” 13Nawo wikatumbulia kwa lwaka lubaa, “Msulubishe!” 14Pilato ukawikotia, “Kwaki? Wabonya wuwiwi ghuao?” Ela awo wikachuria kughora kwa chwaka mbaa, “Msulubishe!”
15Niko Pilato, ukikunda kuwiboia wandu, ukawifunguya Baraba. Ela umeria kumkaba Jesu ukamfunya kwawo usulubisho.
Masikari kumseka Jesu
(Mat. 27.27-31; Joh. 19.2-3)
16Nao masikari wikamghenja Jesu wazenyi andenyi ya ngome iwangwagha praetoriumu, wikawikwanya masikari ghose aho. 17Wikamrusha Jesu nguwo ya zambarau, wikaluka na kirumbu cha minjwa, wikammbikiria chongonyi kwake. 18Nao wikazoya kumlamusa, “Kwawuka Mzuri wa Wayahudi!” 19Wikamkaba na mrangi chongonyi kwake, wikamchuya mada, wikamdungia ngokoro na kumghoghomia. 20Hata iji wameria kumseka, wikamrua ija nguwo ya zambarau, wikamrusha nguwo rake reni. Nao wikamfunya shighadi wipate kumsulubisha.
Jesu kusulubishwa
(Mat. 27.32-44; Lk. 23.26-43; Joh. 19.17-27)
21Chienyi, wikakwana na mundu umu wafuma mbuwenyi, uwangwagha Simoni mundu wa Kurene, ndee wa Alekizanda na Rufo. Wikamlazimisha umdukie Jesu msalaba ghwake.#War. 16.13 22Wikamghenja Jesu andu kuwangwgha Golgotha, (kutambua kwaro ni andu kwa Ngoma ya Chongo.) 23Aho, wikamneka divei iranganyiro na manemane, ela Jesu ukailegha. 24Niko wikamsulubisha, wikawaghiana nguwo rake kwa kurikabia kura, kula mundu uwusaki.#Zab. 22.18 25Erekoghe saa idadu nakesho iji weremsulubishagha. 26Na maandiko gha mashitakio ghake ghereandikiloghe: “MZURI WA WAYAHUDI.” 27Vitoi viwi veresulubishiroghe andwamweri nao, chimu chia ya mkonu ghwake ghwa kiwomi, na chimu chia ya mkonu ghwake ghwa kiwaka. [ 28Jikakatia jija iandiko jighambagha, “Oretaliloghe chiaimweri na wawiwi.”]#Isa. 53.12
29Wandu werekoghe wikiida aho, wikamsholia wikisughusa vongo vawo na kughamba, “Haya, oho kuinonagha Hekalu na kuiagha kwa matuku adadu,#Zab. 22.7; Zab. 109.25; Mk. 14.58; Joh. 2.19 30kukukire kumoni, kusee msalabenyi.” 31Huwo koni wakohani wabaa na walimu wa Sharia wikamseka wikighalusirana madedo weni na weni wikighamba, “Orewikirieghe wazima, ela ndedimagha kukukira uo moni anduangi. 32Kristo Mzuri wa Israeli, ndesee msalabenyi idana, nesi diwone dirumirie.” Na awo weresulubishiroghe andwamweri nao, wikamsholia wokoni.
Kufwa kwa Jesu
(Mat. 27.45-56; Lk. 23.44-49; Joh. 19.28-30)
33Na iji yavika saa irandadu, kukangia kira isanga jose hata saa ikenda. 34Nao saa ikenda, Jesu ukakema na lwaka lubaa, “Eloi, Eloi, lama sabakithani!” kutambua kwaro, “Mlungu wapo, Mlungu wapo, kwaki kwanisigha?”#Zab. 22.1 35Wandu wamu awa werekoghe kimusi ahoeni wikimsikira wikaghamba, “Olenyi, waawuyammbanga Elija!” 36Nao mundu umu ukaghenda na iseghe, ukaingira sponji siki, ukaifunga mdonyi ghwa mrangi, ukamjosera upate kunywa ukighamba, “Lekenyi dilangarie ngera Elija ucha kumsera msalabenyi.”#Zab. 69.21 37Aho Jesu ukakema na lwaka lubaa, ukameria moyo.
38Pazia ya Hekalu ikarashuka vibelele viwi kufuma aighu hata andonyi.#Kuf. 26.31-33 39Na uja m'baa wa masikari ukikaia kimusi ahoeni, iji wawona sa iji orekoghe ukimeria moyo, ukaghamba, “Ni loli mundu uhu orekoghe Mwana wa Mlungu!”
40Waka wamu werekoghe kakula wikizighana, na aghadi yawo werekoghe Maria Magdaleni, na Maria mae wawo Jakobo mtini, na Jose, na Salome.#Lk. 8.2-3 41Awa weremnughieghe Jesu iji orekoghe Galilaya, wikimdumikia. Korekoghe na waka wazima wengi wori awo werejokanyeghe nao cha Jerusalemu.
Kurikwa kwa Jesu
(Mat. 27.57-61; Lk. 23.50-56; Joh. 19.38-42)
42Erekoghe luma lwa kenyi, Ituku ja Kukutumbanya jikiriagha Sabato. 43Josefu wa muzi ghwa Arimatea, mundu wa Mwandu unekelo ishima, ukacha. Uo moni orekoghe ukighuwesera Wuzuri ghwa Mlungu, nao ukamghendia Pilato kwa wuwana, ukamlomba mumbi ghwa Jesu. 44Pilato ukashinika wei Jesu wameria kufwa, ukammbanga uja m'baa wa masikari, ukamkotia ngera wameria kufwa. 45Hata umeria kumanya kwa m'baa wa masikari kukaia Jesu wameria kufwa, ukamneka Josefu rusa uwuse mumbi ghwake. 46Aho Josefu ukaghua nguwo ya kitani, ukamsera, ukamrighiria na kumngira kaburinyi erekoteroghe ighonyi, nao ukabingilisha igho mnyangonyi ghwaro. 47Maria Magdaleni na Maria mae Jose, wikawona andu orewikiloghe.
ទើបបានជ្រើសរើសហើយ៖
MARKO 15: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
MARKO 15
15
Jesu kuredwa imbiri ya Pilato
(Mat. 27.1-2, 11-14; Lk. 23.1-5; Joh. 18.28-38)
1Hata nakesho kio, wakohani wabaa, waghosi, walimu wa Sharia na wandu wa mwandu wose, wikabonya njama chia imweri, wikamfunya Jesu na kumghenja kwa Pilato. 2Pilato ukamkotia Jesu, “Welee, oho koko Mzuri wa Wayahudi?” Jesu ukatumbulia, “Ni oho kwaghamba.”
3Wakohani wabaa wikamshitakia Jesu kwa maza nyingi. 4Pilato ukamkotia indo ja kawi, “Welee, ndekughoragha ilagho jingi? Zighana iro maza nyingi wikushitakiagha naro.” 5Ela Jesu ndereghorieghe ilagho jingi sena anduangi, hata Pilato ukashinika.
Jesu kutanywa ubwagho
(Mat. 27.15-26; Lk. 23.13-25; Joh. 18.39–19.16)
6Ngelo ya Ndima ya Pasaka, Pilato orekoghe na mzango ghowifunguya mfungwa umweri uo ose wichaalomba. 7Aho, korekoghe na mfungwa umu uwangwagha Baraba, ufungilo andwamweri na awo werebonyereghe vilunganya, wikabwagha wandu. 8Nao izungu ja wandu wikakwanyika, wikazoya kumkotia Pilato uwibonyere sa iji mzango ghwake ghorekoghe. 9Pilato ukawikotia, “Mwakunde nimfunguye Mzuri wa Wayahudi?” 10Angu oremanyireghe kukaia wakohani wabaa wedemfunya tu kwa wundu ghwa iriso jawo.
11Nao wakohani wabaa wikajishingira izungu wilombe wifunguilo Baraba, wulalo ghwa Jesu. 12Pilato ukawikotia sena, “Welee, nim'bonye wada uo mumbangagha Mzuri wa Wayahudi?” 13Nawo wikatumbulia kwa lwaka lubaa, “Msulubishe!” 14Pilato ukawikotia, “Kwaki? Wabonya wuwiwi ghuao?” Ela awo wikachuria kughora kwa chwaka mbaa, “Msulubishe!”
15Niko Pilato, ukikunda kuwiboia wandu, ukawifunguya Baraba. Ela umeria kumkaba Jesu ukamfunya kwawo usulubisho.
Masikari kumseka Jesu
(Mat. 27.27-31; Joh. 19.2-3)
16Nao masikari wikamghenja Jesu wazenyi andenyi ya ngome iwangwagha praetoriumu, wikawikwanya masikari ghose aho. 17Wikamrusha Jesu nguwo ya zambarau, wikaluka na kirumbu cha minjwa, wikammbikiria chongonyi kwake. 18Nao wikazoya kumlamusa, “Kwawuka Mzuri wa Wayahudi!” 19Wikamkaba na mrangi chongonyi kwake, wikamchuya mada, wikamdungia ngokoro na kumghoghomia. 20Hata iji wameria kumseka, wikamrua ija nguwo ya zambarau, wikamrusha nguwo rake reni. Nao wikamfunya shighadi wipate kumsulubisha.
Jesu kusulubishwa
(Mat. 27.32-44; Lk. 23.26-43; Joh. 19.17-27)
21Chienyi, wikakwana na mundu umu wafuma mbuwenyi, uwangwagha Simoni mundu wa Kurene, ndee wa Alekizanda na Rufo. Wikamlazimisha umdukie Jesu msalaba ghwake.#War. 16.13 22Wikamghenja Jesu andu kuwangwgha Golgotha, (kutambua kwaro ni andu kwa Ngoma ya Chongo.) 23Aho, wikamneka divei iranganyiro na manemane, ela Jesu ukailegha. 24Niko wikamsulubisha, wikawaghiana nguwo rake kwa kurikabia kura, kula mundu uwusaki.#Zab. 22.18 25Erekoghe saa idadu nakesho iji weremsulubishagha. 26Na maandiko gha mashitakio ghake ghereandikiloghe: “MZURI WA WAYAHUDI.” 27Vitoi viwi veresulubishiroghe andwamweri nao, chimu chia ya mkonu ghwake ghwa kiwomi, na chimu chia ya mkonu ghwake ghwa kiwaka. [ 28Jikakatia jija iandiko jighambagha, “Oretaliloghe chiaimweri na wawiwi.”]#Isa. 53.12
29Wandu werekoghe wikiida aho, wikamsholia wikisughusa vongo vawo na kughamba, “Haya, oho kuinonagha Hekalu na kuiagha kwa matuku adadu,#Zab. 22.7; Zab. 109.25; Mk. 14.58; Joh. 2.19 30kukukire kumoni, kusee msalabenyi.” 31Huwo koni wakohani wabaa na walimu wa Sharia wikamseka wikighalusirana madedo weni na weni wikighamba, “Orewikirieghe wazima, ela ndedimagha kukukira uo moni anduangi. 32Kristo Mzuri wa Israeli, ndesee msalabenyi idana, nesi diwone dirumirie.” Na awo weresulubishiroghe andwamweri nao, wikamsholia wokoni.
Kufwa kwa Jesu
(Mat. 27.45-56; Lk. 23.44-49; Joh. 19.28-30)
33Na iji yavika saa irandadu, kukangia kira isanga jose hata saa ikenda. 34Nao saa ikenda, Jesu ukakema na lwaka lubaa, “Eloi, Eloi, lama sabakithani!” kutambua kwaro, “Mlungu wapo, Mlungu wapo, kwaki kwanisigha?”#Zab. 22.1 35Wandu wamu awa werekoghe kimusi ahoeni wikimsikira wikaghamba, “Olenyi, waawuyammbanga Elija!” 36Nao mundu umu ukaghenda na iseghe, ukaingira sponji siki, ukaifunga mdonyi ghwa mrangi, ukamjosera upate kunywa ukighamba, “Lekenyi dilangarie ngera Elija ucha kumsera msalabenyi.”#Zab. 69.21 37Aho Jesu ukakema na lwaka lubaa, ukameria moyo.
38Pazia ya Hekalu ikarashuka vibelele viwi kufuma aighu hata andonyi.#Kuf. 26.31-33 39Na uja m'baa wa masikari ukikaia kimusi ahoeni, iji wawona sa iji orekoghe ukimeria moyo, ukaghamba, “Ni loli mundu uhu orekoghe Mwana wa Mlungu!”
40Waka wamu werekoghe kakula wikizighana, na aghadi yawo werekoghe Maria Magdaleni, na Maria mae wawo Jakobo mtini, na Jose, na Salome.#Lk. 8.2-3 41Awa weremnughieghe Jesu iji orekoghe Galilaya, wikimdumikia. Korekoghe na waka wazima wengi wori awo werejokanyeghe nao cha Jerusalemu.
Kurikwa kwa Jesu
(Mat. 27.57-61; Lk. 23.50-56; Joh. 19.38-42)
42Erekoghe luma lwa kenyi, Ituku ja Kukutumbanya jikiriagha Sabato. 43Josefu wa muzi ghwa Arimatea, mundu wa Mwandu unekelo ishima, ukacha. Uo moni orekoghe ukighuwesera Wuzuri ghwa Mlungu, nao ukamghendia Pilato kwa wuwana, ukamlomba mumbi ghwa Jesu. 44Pilato ukashinika wei Jesu wameria kufwa, ukammbanga uja m'baa wa masikari, ukamkotia ngera wameria kufwa. 45Hata umeria kumanya kwa m'baa wa masikari kukaia Jesu wameria kufwa, ukamneka Josefu rusa uwuse mumbi ghwake. 46Aho Josefu ukaghua nguwo ya kitani, ukamsera, ukamrighiria na kumngira kaburinyi erekoteroghe ighonyi, nao ukabingilisha igho mnyangonyi ghwaro. 47Maria Magdaleni na Maria mae Jose, wikawona andu orewikiloghe.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.