Mark 5
5
Jesus kaa miinuwaachihaat naapeu machiahchaahkwa kaa piihchishkaakuyich
Matthew 8.28-34; Luke 8.26-39
1Chek chii misakaauch nete akaamihch, Gerasene kaa ishinihkaateyich aschiiyuu. 2Jesus maak kaa kapaat tiiwehch chii pechi nachishkaakuu naapeu machiahchaahkwa e piihchishkaakuyich chiipaischiihch e uhtuhteyich. 3Ekute anite chiipaischiihch kaa wiichiit uu naapeu. Namui shaash uhchii itaapihkaasuu aat upuuchishiyaapii e aapataniyikwaau e maahkupitaakanuut. 4Mihchetwaau chii maahkupitaakanuyichen utihchii upuuchishiyaapii e aapataniyikwaau kaye usit chii mamechimaapiskahiikanuyuuh. Yaapach maak chii pischipitam aniyuu upuuchishiyaapiyuu kaye chii piikuhtataau aniyuu piywaapiskwa usitihch kaa chikamuyikwaauh. Mitun chii ashpashiheu aweyuu e wii mamechiminikut. 5Esikum tipiskaau kaye esikum chiishikaau chii papaa ihtaau anite chiipaischiihch kaye wachiihch pisikw e nanuuhtaakusit nesht e mamaatisusut asiniih e aapachihaat.
6Waahyuushiish maak chii ihtaau kaa uhchi waapamaat Jesus. Iskutak maak wiyaapamaat ekun kaa ati pechi chihchipahtaat, kaa ati uchihchiihkunipayihut Jesus usitiihch, 7ekw kaa tepwet e chishewet e itwet, “Jesus, chiya kaa Ukusiitutaask Chishemanituu maauch kaa ispeyihtaakusit, taan waa ishiihkuyin. Chititin e pehtuut Chishemanituu, ekaawii nanehkaateyimuhiih.” 8Eukw uyuu kaa itwet wesh chii itikuu Jesus, “Chiya machiahchaahkw, maachiih wiiwiih anit an naapeu kaa piihchishkuwat.” 9Ekw Jesus kaa itaat, “Taan e ishinihkaasuyin.” Chii itikuu maak, “Kaa mihchetitwaau nitishinihkaasun, wesh naashch taapwe nimihchetinaan.” 10Ekw naashch kaa wii aayihkamihaat Jesus ekaa chechii itishahwaat aniyuu machiahchaahkwa anite wiiwiitamihch aniyuu aschiiyuu.
11Chii ihtaauch maak kuuhkuushach anit peshuch, e miichisutwaau anit aniyuu wachiyuu. 12Anichii maak machiahchaahkuch chii aayihkamiheuch Jesus e itaatwaau, “Anite pechi itishahunaan anichii kuuhkuushach e ihtaatwaau chechii piihchishkuuchihtwaau.” 13Ekun maak kaa ihtuutawaat Jesus aniyuu kaa itweyich. Anichii maak machiahchaahkuch, iskutak kaa wiiwiiskuwaatwaau aniyuu naapeu ekw aniyuu kuuhkuusha kaa aashuupiihchishkuwaatwaau. Ekw anichii kuuhkuushach kaa yaamitaauhchipahiitutwaau anite ishi saakahiikanihch, kaa nishtaapaawetwaau. Wiyesh maak niishwaau chishemitaahtumitanuu chii tashiichenich uchii kuuhkuushach.
14Anichii maak naapeuch kaa kanuweyimaatwaau uyuu kuuhkuusha chii ushimuuch kaa nituu waawiihtahkwaau anite ihtaawinihch kaye nihtaauchihchikan aschiihch uyuu kaa ispayihch. Chii ispahtaauch maak awenichii anite e wii waapahtahkwaau taan kaa ispayiyich. 15Iskutak wehtihtaatwaau Jesus chii waapameuch aniyuu naapeu mihchetu machiahchaahkwa kaa chii piihchishkaakuyich e apiyich anit e chii waaspisukupanen kaye e chiyaameyihtaakusiyich. Chii kushtaatuuch maak iskutak wiyaapamaatwaau uyuu naapeu. 16Chii tipaachimuuch anichii kaa waapahtahkwaau taan kaa ispayiyich aniyuu naapeu machiahchaahkwa kaa chii piihchishkaakuyich, kaye chii wiihtamuch taan kaa ispayiyich aniyuuh kuuhkuusha. 17Ekw kaa aayihkamihaatwaau Jesus chechii nakatamiyich aniyuu utaschiiwaau.
18Jesus maak e ati puusit utiyuu, an naapeu kaa chii piihchishkaakut machiahchaahkwa naashch chii wii wiicheweu Jesus. 19Namui maak uhchi pachishtinikuu Jesus chechii wiichewaat. Chii itikuu, “Maachiih chiiwe, nituwaapamach chiwiichewaakanich neshta chiwaahkumaakanich, che wiihtamuutwaau taan kaa ishi miyutuutamaask Chishemanituu, kaye taan kaa ishi chistimaacheyimisk.”
20Ekw an naapeu kaa chistuhtet misiwe kaa papaa ituhtet aniyuu aschiiyuu Mitaahtu Ihtaawinh kaa ishinihkaateyich e waawiihtahk taan kaa ihtuutamaakut Jesus. Misiwe maak aweyuuh kaa pehtaakut taan kaa ishi wiihtahk chii miskaashtamiyuuh.
Jairus utaanisa ekw maak an iskweu kaa taahtinamuwaat Jesus utakuhpiyuu
Matthew 9.18-26; Luke 8.40-56
21Ekw miin kaa aashuuhahk Jesus aniyuu saakahiikaniyuu. Iskutak maak mesikaat nete akaamihch chii mista mihchetiyuu aweyuu e pechi naasipetutaakut. 22Peyakw naapeu Jairus e ishinihkaasut chii pechi utisipayihuu Jesus usitiihch. Eukuu peyakw naapeu kaa niikaanishkahk ayimiheukamikuyuu. 23Chii nitutamuweu Jesus e itaat, “Shaash chekaat nipuu nitaanish. Chiwiishaamitin chechii pechi saaminat chechii miinuwaatisiit ekw maak namui kata uhchi nipuu.” 24Jesus maak chii wiicheweu uyuu naapeu.
Mihchetu aweyuu chii wiicheukuu e kakataaushkaakut e ishpish mihchetiyich. 25Chii ihtaau anit peyakw iskweu shaash niishushaap pipunh e chii itaaspinekupane e wanihtaat maan mihkuyuu. 26Aat e chii nituwaapamaat nanaahkuu nituhkuiin chechii wiichihiikut yaapach chii nanehkaateyimuhiikuu uyuu kaa itaaspinet. Chek maak chii mestinam misiwe ushuuliyaam e chiishiihkawaat uyuu nituhkuiin. Yaapach maak ekun kaa ihtit e wanihtaat maan mihkuyuu. Etituu kaye chii ati aahkusuu. 27Chii pehtamukupane taan kaa itaachimaakanuyich Jesus ekw aniyuu e pechi wiichihiiwet anit e mihchetinaanuyich chii wii peshuwaapameu Jesus e iteyihtahk, 28“Aat mikw taahtinamuche uchekwaanim nika chii miinawaatisiin.”
29Chii taahtinamuweu utakuhpiyuu ekw tiiwehch kaa chipihtashikuniyich umihkw. Kaye chii muushihtaau piihchiyuu taapwe e miinuwaachihaakanuut aniyuu kaa itaaspinet. 30Jesus maak tiiwehch chii chischeyihtam miinuwaachihiiweu suuhkaatisiiwiniyuu e chii wiiwiipayiniyich anit e ihtaat uhchi. Kaa kanawaapamaat misiwe aniyuu aweyuu ekw kaa itaat, “Awen kaa pechi taahtinahk nitakuhpiyuu.” 31Uchischinuhamuwaakanh maak chii itikuu, “Chiwaapamaauch e ishpish mihchetitwaau awenichii anit waaskaa e ihtaayin yaapach maak e itweyin awen kaa pechi taahtinit.”
32Ekw kaa aitaapit Jesus e naanituwaapamaat aniyuu aweyuu kaa taahtinikut. 33Ekw maak an iskweu e chischeyihtahk taan kaa ihtuutamuwaakanuut, chii pechi utisipayihuu Jesus e ihtaayich e nanamipayit e ishpish sechisit. Ekw kaa wiihtamuwaat wiya e chii taahtinaat. 34Ekw Jesus kaa itaat uyuu iskweu, “Nitaanish, chitaapwehtamuwin chimiinuwaachihiikuun. Maachiih maak chiyaameyihtamuwin ayaah. Wesh shaash taapwe chimiinuwaatisiin.”
35Mekwaach maak eshkw e ayimit Jesus chii uhchi takushiniyuu aweyuuh anite Jairus e ihtaayich e uhtuhteyitwaau chechii pechi wiihtamuwaatwaau Jairus shaash ekaa pimaatisiyich utaanisa. Chii iteuch maak ekaa iteyihtaakuniyich etituu chechii utamihaayich chiskutamaachesuu.
36Jesus maak namui uhchi aapatahtuweu uyuuh ekw kaa itaat aniyuu Jairus, “Ekaawii kushtaach, mikw taapwehta.” 37Ekw Jesus namui uhchi pachishtineu aweyuu chechii nuushuushkaakut mikw Peter, James ekw maak aniyuu wiichiiniyuu John. 38Iskutak wetihtamuwaatwaau Jairus wiichiyuu chii waapameuch aniyuu aweyuu anit kaa ihtaayich naashch e itihtaakusiitwaauh, e uhchikuwaapiitwaau kaye e taachikwemaatuyitwaau. 39Iskutak Jesus kaa piihchet aniyuu waaskaahiikaniyuu chii itweu, “Chekwaan wehch naashch itihtaakusiyekw. Chekwaan wehchi uhchikwaapiyekw. Taapaa nipuu uu ishkwesh mikw wesin nipaau.”
40Piskunuu mikw chii ushinaakuu uyuu kaa itaat. Ekw misiwe kaa wiiwiitishihwaat. Ekw an awaash ukaawii, kaye uhtaawii ekw maak aniyuu Jesus kaa wiishaamaat eukun mikw uyuu kaa pachishtinaat chechii piihcheyich anite e ihtaayich aniyuu awaasha. 41Kaa utinamuwaat utihchiyuu aniyuu awaasha, kaa itaat, “Talitha, koum.” Ishkwesh, “Wanishkaa chititin,” ishi itweshtamuwaataakanuu uu.
42Tiiwehch maak chii wanishkaau an ishkwesh kaa ati papaamuhtet. Wiyesh chii niishushaapuneshiiche uu ishkwesh. Misiwe maak anichii anit kaa ihtaatwaau naashch chii miskaateyihtamihiikuuch kaa waapahtahkwaau taan kaa ispayiyich. 43Jesus maak chii itashumeu ekaa chechii wiihtamuwaayich kutak aweyuu taan kaa ispayiyich. Ekw kaa itaat chechii miyaakanuyich aniyuu ishkwesha chekwaayuu chechii miichiyich.
ទើបបានជ្រើសរើសហើយ៖
Mark 5: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.