Mark 11
11
Jerusalemihch kaa piihchet Jesus e maamihchimaakanuut
Matthew 21.1-11; Luke 19.28-40; John 12.12-19
1Jesus ekw maak aniyuu uchischinuhamuwaakan anite Jerusalemihch chii wii ituhteuch. Iskutak e ati peshuwaapahtahkwaau chii utihtamuch aniyuuh ihtaawinh Bethany ekw maak Bethphage kaa ishinihkaateyikwaauh. Anite Olive wachiihch ekute kaa ihtakuhkwaauh uyuuh ihtaawinh. Ekut maak utah Jesus kaa niikaanitishihwaat niishu uchischinuhamuwaakanh e itaat, 2“Nete ituhtekw ane ihtaawin. Takushiniyekwe nete chika waapamaawaau uhkaanh muyaam kaapalakaskweu kaa ishinaakusit e chisikaapihkaasut ekaa wiiskaat eshkw uhchi tehtapiyich aweyuu uspiskunihch. Che aapihkunekw ekw che peshuwekw ute. 3Kakwechimikuyekwe awen chekwaayuu wehchi aapihkunamekw ekw che itekw, ‘Utipeyihchikeu nitaweyimeu.’ Tiiwehch maak chika pachishtinikuwaau chechii utinamekw.”
4Ekw kaa chistuhtetwaau kaa miskuwaatwaau aniyuuh uhkaan muyaam kaapalakaskweu kaa ishinaakusiyich anite meskanaahch. Wiiwiitimihch waaskaahiikaniyuu e chisikaapihkaasuyich. 5Aniyuu maak mekwaach e aapihkunaatwaau aniyuu uhkaan chii pechi naaniipuuyuu aweyuu e kanawaapamikutwaau ekw kaa itikutwaau, “Taan e ihtiyekw wehchi aapihkunekw an uhkaan muyaam kaapalakaskweu kaa ishinaakusit.” 6Ekw kaa itaatwaau aniyuu taan kaa itikutwaau Jesus che ishi nishkweushihtwaatwaau ekw kaa pachishtinikutwaau aniyuuh naapeuh chechii chistuhtahaatwaau aniyuuh uhkaan. 7Ekw anite Jesus kaa ihtaayich ekute kaa ituhtahaatwaau uyuu uhkaanh muyaam kaapalakaskweu kaa ishinaakusiyich, kaa tashwekashtaatwaau utakuhpiwaau anit uspiskuniihch aniyuu uhkaanh ekw Jesus kaa tehtapiwaat uspiskuniihch. 8Mihchetu maak awenichii anite meskanaahch chii ishi tashwekashtaauch utakuhpiwaau taanite che ati pimuhtahiikuyich Jesus aniyuuh uhkaanh muyaam kaapalakaskweu kaa ishinaakusiyich ekw kutakach niipisiyaahtikw chii naanaatwaanamuch ekw anit meskanaahch kaa ashtaatwaau. 9Anichii maak awenichii niikaanaanihch kaye anichii utaahch kaa pechi pimuhtetwaau chii tepweuch e itwetwaau,
“Chisteyihtaakusuu Chishemanituu. Shaweyihtaakusuu an kaa pechi itishahukut Utipeyihchikeu. 10Shaweyihtaakusuu an tepeyihchichet, an aniyaanaa chitaanische chimushuuminuu David e ihtaayich kaa uhchi aanische pimaatisiit. Maamihchimaataau Chishemanituu maauch kaa ispeyihtaakusit.”
11Iskutak maak Jesus tekushihk anit Jerusalemihch chii piihcheu aniyuu chisheayimiheukamikuyuu, misiwe anite waaskaa kaa aitaapit e kakanuwaapahtahk chekwaayuuh. Shaash maak chii ati utaakushiyuu ekw anite Bethanyihch kaa ituhtet aniyuuh kaa niishushaapuyich uchischinuhamuwaakanh e wiicheukut.
Jesus kaa aanuweyimaat mistikw
Matthew 21.18, 19
12Miin wiyaapaniyich mekwaach e pimuhtetwaau Bethanyihch e uhtuhtetwaau ekw kaa wii miichisut Jesus. 13Chii waapameu nete waahyuushiish e chimasuyich misishuuminaahtikw e niipisiiwiyich. Kaa naataat e wii nituu chischeyimaat e miinishuyikwen. Iskutak maak wetihtaat mikw niipisii chii waapahtam wesh taapaa eshkw uhchi utihchipayiniyuu anit kaa chii miinishuyich. 14Chii ayimiheu aniyuuh mistikw kaa itaat, “Ekun che ishinaakusiyin, namui miin wiiskaat chika uhchi nihtaauchinh miinisha anit e ihtaayin chechii miichitwaau awenich.” Chii pehtaakuu maak uchischinuhamuwaakanh uyuu kaa ishi ayimihaayich aniyuuh mistikw.
Jesus kaa wiiwiitishihwaat aweyuuh anite chisheayimiheukamikuhch
Matthew 21.12-17; Luke 19.45-48; John 2.13-22
15Iskutak Jerusalemihch tekushihkwaau ekw Jesus kaa piihchet anite chisheayimiheukamikuhch. Kaa ati waahwiiwiitishihwaat aniyuu ataawesuu kaye aniyuuh kaa utinaasuyitwaau anit piihtakamihch kaa ihtaayitwaauh. Chii kutapuwepinamuweu umiichisuunaahtikuyuuh aniyuuh shuuliyaayuu kaa miiskutuunaayich kaye ekun kaa ihtuutamuwaat utehtapuwiniyuuh aniyuuh umiimiiuuh kaa ataaweyitwaau. 16Chii nakaaneu kaye aweyuu chechii shaapuhtawehtataayich chekwaayuu anit chisheayimiheukamikuhch. 17Chii chiskutamaacheu maak, e itwet, “Namui aa itashteu Chishemanituu umasinahiikanihch,
Ayimiheukamikw kata ishinihkaateu niwaaskaahiikanim, anite misiwe awen e itiskaanesit chechii ayimihaat.
Chiyawaau maak muyaam chimutiskach uwaatakuwaauh ekun e ishinaakuhtaawekw Chishemanituu uwaaskaahiikanim.” 18Anichii maak kaa niikaanapitwaau ayimiheuchimaauch nesht anichii wiishuwewiniyuu kaa chischinuhamaachetwaau chii pehtamuch uyuu e chii itweyikupanenh. Aniyuu maak misiwe aweyuu e miskaashtamiyich taan kaa ishi chiskutamaacheyich Jesus chii sechisuuch uchii chisheayimiheuchimaauch kaye anichii masinahiichesuuch ekw kaa naanituu chischeyihtahkwaau taan chechii ihtitwaau chechii nipahaakanuyich Jesus. 19Iskutak maak wetaakusiyich Jesus ekw maak uchischinuhamuwaakanh chii nakatamuch aniyuu utenaayuu.
Taapwehtamuwin ekw maak ayimihchikewin
Matthew 21.20-22
20Wiipach miin wiyaapaniyich mekwaach e pimuhtetwaau meskanaahch chii waapameuch aniyuu misishuuminaahtikw mitun tekash e nipiyich, mechim aniyuuh utipiih e nipiimakaniyikwaau. 21Peter maak chii uhchi chischisuu aniyuu taan kaa ispayiyich ekw kaa itaat Jesus, “Chiskutamaachesuu, iitaapih maa. Uu misishuuminaahtikw kaa aanaweyimit mitun tekash paashuu.” 22Jesus chii iteu aniyuuh uchischinuhamuwaakanh, “Taapweyimaahkw Chishemanituu. 23Kuiskw chiwiihtamaatinaawaau, awen chechii itashuwaatamukwe uyuu wachiyuu, pihkuchiih ekw anite chihchikamiihch che ishiwepinisuyin, ekaa maak mitun aanuwehtahke chechii ispayiyich uyeyuu, mitun taapwehtahke aniyuu kaa itwet che ispayiyich, ekun che ihtuutamuwaakanuut taan kaa ishi nitaweyihtahk. 24Ekw maak e ititakuch, mikw taan che ishi nitutamaawekwe e ayimihaayekw, taapwehtamukw shaash e ayaayekw ekw maak che miikuyekw an kaa ishi nitutamaayekw. 25Kaye maak tahtwaau niipuuyine e ayimihaayin, wepeyihtamuu an awen kaa wanituutaask, ekw maak Kuuhtaawii kihchikiishikuhch kaa ihtaat kaye wiya che wepeyihtamaask chimachihtwaawinh. 26Ekaa wepeyihtamaacheyine namui kaye wiya kuuhtaawii kihchikiishikuhch kaa ihtaat chika uhchi wepeyihtamaakw chimachihtwaawinh.”
Jesus kaa kakwechimaakanuut aweyuuh kaa miikut chechii ihtit taan kaa ihtit
Matthew 21.23-27; Luke 20.1-8
27Miin kaau chii ituhteuch Jerusalemihch. E pimuhtet maak Jesus anite e ihtakuniyich aniyuu chisheayimiheukamikuyuu chii nituwaapamikuu aniyuuh kaa niikaanapitwaauh ayimiheuchimaauh kaye aniyuuh wiishuwewiniyuu kaa chischinuhamaacheyitwaauh kaye aniyuuh kaa niikaanishkuwaayich Jewa iinuuh, 28ekw kaa itikut, “Taan e ihtiyin uu. Awen kaa itashumisk chechii ihtuutaman uyuuh chekwaayuuh.” 29Jesus chii iteu, “Chika kakwechimitinaawaau chekwaan, che pechi nishkweushihiyekw ekw maak che wiihtamaatakuch taanite wehchipayihch uu tipeyihchichewin kaa ayaayaan chechii ihtuutamaan uyuuh. 30John maa kaa siikahaahtuwaat aweyuu, aweyuu kaa itashumikut chechii siikahaahtaachet, Chishemanituu aa maak naapeu. Wiihtamuukw maak.” 31Chii machipayuuch maak anit wiyawaau e itwetwaau, “Itweyihkwe, ‘Chishemanituu chii itikuu,’ chika itikunuu, ‘chekwaan maak wehchi ekaa uhchi taapwehtawekw.’ 32Chika itaanuu aa maak, ‘Naapeu kaa itikut.’ ” Chii wawaaneyihtamuch taan chechii ishi nishkweushihaatwaau e chii kushtaatwaau aniyuuh iinuuh anit kaa ihtaayich. Wesh misiwe chii taapwehtamiyuuh taapwe e chii uchischiwehiichesuyich aniyaanaa John. 33Ekw kaa itaatwaau Jesus, “Namui nichischeyimaanaan aweyuu kaa itashumikut John chechii siikahaahtuwaat aweyuuh.” Jesus chii iteu, “Kaye niya namui chika uhchi wiihtamaatinaawaau awen kaa pechi itashumit uu chechii ihtuutamaan.”
ទើបបានជ្រើសរើសហើយ៖
Mark 11: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.