Luke 5
5
Kaa mistapitahuyaatwaau anichii niishtam kaa wiyaapamaakanuutwaau chischinuhamuwaakanich
Matthew 4.18-22; Mark 1.16-20
1Peyakwaau Jesus mekwaach e niipuut yaayeu saakahiikanihch Gennesaret e ishinihkaateyich, mihchetu maak iinuu e maakushkaakut e nituhtamiyich Chishemanituu utayimuwiniyuu, 2Chii uhchi waapahtam niishu chiimaanh anit yaayeu, e chii nakatamiikupanen kaa nuutameseyich chechii nituu chishtaapuuyaayich utahiipiyuuh. 3Chii puusuu maak Jesus peyakw chiimaaniyuu, aniyuu Simon Peter kaa tipiyeusiyich. Kaa kakwechimaat Simon Peter chechii mushaauhamiyich apishiish. Ekw maak kaa waweyapit Jesus kaa chischinuhamaachet anit chiimaanihch uhchi.
4Iskutak maak kaa chiish ayimit Jesus chii iteu aniyuu Simon, “Mushaauhamukw anite e chiishkaayiwaach che pakashtawehekuch chitahiipiiwaauch.”
5Simon maak chii nishkweushiheu e itaat, “Chischinuhamaacheu, iskan tipiskaau nichii nuutamesenaan, namui maak nuuhchi pitahuyaanaan. Eyuwehch maak nika pakashtawehwaanaanich nitahiipiinaanich wesh ekun e iishiyaahch chechii ihtiyaahch.” 6Iskutak maak kaa pakashtawehwaatwaau utahiipiiwaau chii ati piikupayuuh utahiipiiwaauh kaa ishpish chii mista pitahuyaatwaau. 7Ekw kaa waashtenamuwaatwaau wiichinuutamesuu, kutachiyuu chiimaaniyuu kaa ihtaayich chechii pechi wiichihiikutwaau, ekw kaa pechi isichimeyich. Taapishkun maak aniyuuh chiimaan chii wii kushaapeuh kaa ishpish saakaschinetwaau namesach. 8Iskutak maak Simon Peter wiyaapahtahk e ispayiyich chii uchihchiihkunipayihuu uhchishkuu Jesus e ihtaayich, e itwet, “Nakasi, Utipeyihchikeu, wesh nimachaatisiin.”
9Chii kushkweyihtamihiikuuch Simon kaye aniyuu wiichinuutamesuu aniyuu kaa ishpish chii mistapitahuyaatwaau. 10Kaye aniyuu wiichinuutamesuu James ekw maak John, Zebedee ukusisa chii kushkweyihtamuch kaye wiyawaau. Jesus maak chii iteu aniyuu Simon, “Ekaawii sechisi. Wesh muyaam iinuuch e pitahuyaayekw eukun che ihtiyekw ekw.”
11Chii seschipitamuch maak uchiimaanuwaauh kaa nakatahkwaau misiwe chekwaayuu anit, ekw kaa wiichewaatwaau Jesus.
Kaa miinuwaachihaakanuut naapeu kaa aahkusit ushikaahch
Matthew 8.1-4; Mark 1.40-45
12Mekwaach maak Jesus e ihtaat anite peyakw aniyuu ihtaawiniyuu chii ihtaau naapeu anit umichiiwaaspinewiniyuu e maayaataniyich e ayaat misiwe e ispichishtit. Iskutak maak wiyaapamaat Jesus chii utihtipayihuu anite e ihtaayich, ekw naashch kaa nituweyimaat chechii wiichihiikut, e itaat, “Utipeyihchikeu, wii pechi wiichihiine chika chii ihtuuten chechii payehtisiyaan.” 13Jesus maak chii shuwanischeyuu kaa taahtinaat e itaat, “Chiwii wiichihiitin. Payehchisiih.” Tiiwehch maak chii miinuwaatisiyuu aniyuu kaa itaaspinet an naapeu. 14Jesus maak chii itashumeu e itaat, “Ekaawii wiihtamuu awen taan kaa ispayin. Maachiih, nituu nuukuhiisuu anuhchiish Jewa ayimiheuchimaau e ihtaat che waapamisk e chii miinuwaachihiikuyin. Kaye che pachishtinicheyin an chekwaan aniyaa Moses kaa itashuwet che pachishtinikaanuyich. Uu maak ihtiyine misiwe awen chika chischeyihtam taapwe tekash e chii payehchihiikuyin.”
15Chii mishihtepayuu maak Jesus e itaachimaakanuut. Mihchetu maak aweyuuh chii pechi nituwaapamikuu e wii nituhtaakut kaye e wii miinuwaachihiikusiyich. 16Chii ituhteu maak maan Jesus anite pakwaatiskamikaahch ekw kaa chii ayimihaat.
Kaa miinuwaachihaakanuut naapeu ekaa uhchii aahtinisut
Matthew 9.1-8; Mark 2.1-12
17Peyakwaau Jesus e chischinuhamaachet chii ihtaayuuh anit Pharisee kaye aniyuu kaa chiskutamaacheyich ayimihewin wiishuwewiniyuu. Uchii maak naapeuch misiwe ihtaawinihch chii uhtuhteuch, anite Galileehch kaye Judea aschiihch kaa ihtakuniyikwaauh kaye maak anite utenaahch Jerusalemihch chii uhtuhteuch. Jesus maak chii ayaau Chishemanituu ukaschihuwiniyuu chechii miinuwaachihiiwet. 18Mekwaach maak e chischinuhamaachet Jesus chii uhchi peshuweuch naapeuch wiitaapewaau ekaa nisitusiyich ashpishimuwinihch e pimishiniyich. Chii wii piihtakaheuch anit waaskaahiikanihch e chii wii pimishimaatwaau uhchishkuu Jesus e ihtaayich. 19Namui maak uhchii piihtakaheuch wesaa e chii mihchetinaanuyich piihtakamihch. Ekw maak kaa tahkuhtaahtawiihtahaatwaau aniyuu waaskaahiikaniyuu, kaa pukunepitahkwaau apihkwaaniyuu anite tahkuhch anite kaa uhchi pachishtaapihchenaatwaau aniyuu naapeu, anit tetaauch mekwesiin e ihtaanuyich, uhchishkuu Jesus e ihtaayich kaa pachishtinaatwaau. 20Iskutak maak Jesus wiyaapahtamuwaat utaapwehtamuwiniyuu aniyeyuuh naapeuh ekw kaa itaat aniyuu naapeu kaa pimishiniyich, “Niwiichewaakan, chiwepeyihtamaakun chimachihtwaawinh.”
21Ekw anichii Phariseech kaye anichii wiishuwewiniyuu kaa chiskutamaachetwaau kaa ati ayimitutamuwaatwaau uyuu kaa itweyich e ititutwaau. Paashtaamuu uu naapeu e itwet, “Chiwepeyihtamaakuun chimachihtwaawin. Namui awen chika chii wepeyihtamuweu aweyuu umachihtwaawiniyuu, mikw Chishemanituu.”
22Iskutak Jesus chescheyimaat e ishi ayimihiituyich chii iteu, “Chekwaan wehchi maamituneyihtamihiikuyekw an kaa itweyaan. 23Taan maak uste wiyehtiniyich chechii itaakanuut, ‘Chiwepeyihtamaakuun chimachihtwaawin,’ maak chechii itaakanuut, ‘Wanishkaa, ekw maak pimuhte.’ 24Chika waapahtiitinaawaau Iinuu Ukusisa taapwe wiya e ayaat tipeyihchichewiniyuu utah aschiihch chechii wepeyihtamaachet machihtwaawinh.” Ekw Jesus kaa itaat aniyuu naapeu ekaa uhchii nisitusiyich, “Pisikuuh, utinh chitashpishimuwin, che chiiweyin.”
25Tiiwehch maak chii pishikuu an naapeu mekwesiin anit e mihchetinaanuyich, kaa ati utinahk aniyeyuu utashpishimuwin ekw kaa ati chiiwet e maamihchimaat Chishemanituu. 26Misiwe maak anichii kaa waapahtahkwaau taan kaa ispayiyich chii miskaateyihtamihiikuuch kaye chii sechisuuch. Chii chishtaachimeuch Chishemanituu e itwetwaau, “Taapwe maamishkaach chit ishi waapahtenaanuu chekwaan anuhchiish e ispayihch.”
Levi kaa tipaachimaakanuut
Matthew 9.9-13; Mark 2.13-17
27Iskutak maak kaa chiishipayihch uu chii wiiwiyuu Jesus aniyuu waaskaahiikaniyuu ekw kaa chistuhtet. Chii waapameu maak naapeu e apiyich umasinahiicheukamikuwiihch, Levi e ishinihkaasuyich, kaa maamuushtinahk chisheuchimaau shuuliyaayuu e itaapatisiyich. Ekw Jesus kaa itaat, “Pechi papaawiicheu.” 28Kaa pisikuut Levi kaa nakatahk misiwe chekwaayuu kaa ishi ayaat ekw kaa papaawiichewaat Jesus.
29Paatimaa maak chii makushiheu Jesus anite uwaaskaahiikanimihch. Chii mihchetiyuu maak kutak kaa maamuushtinamiyich chisheuchimaau shuuliyaayuu e itaapatisitwaau kaye kutak aweyuu chii ihtaayuuh e chii wiichimiichisuumikutwaau. 30Ekw maak Phariseech kaye anichii wiishuwewiniyuu kaa chiskutamaachetwaau kaa ayimihaatwaau Jesus uchischinuhamuwaakaniyuuh e itaatwaau, “Chekwaan wehchi wiichimiichisuumekuch anichii kaa maamushtinahkwaau chisheuchimaau shuuliyaayuu kaa itaapatisitwaau kaye anichii kutakach umachihtwaauch.”
31Jesus maak chii nishkweushihiiweu e itwet, “Namui nituweyimeuch nituhkuiin anichii awenichii ekaa kaa aahkusitwaau, mikw anichii kaa aahkusitwaau eukunich netuweyimaatwaau nituhkuiin. 32Namui anichii kaa kuiskutaatisiitwaau wehchi takushiniyaan. Nichii takushin chechii nituumakwaau umachihtwaauch chechii kweskaatisiitwaau.”
Ekaa mesikum miichisunaanuuhch e aayimuutech
Matthew 9.14-17; Mark 2.18-22
33Phariseech maak chii iteuch Jesus, “Chekwaayuu wehchi mihchetwaau ihtuutamiyich John uchischinuhamuwaakan ekaa meshikum miichisuyich mikw chechii ayimihaayich. Kaye niyaan nichischinuhamuwaakanaanich eukw e ihtitwaau. Chii maak chichischinuhamuwaakanich namui ihtuuch.”
34Jesus maak chii itweu, “Muyaam e niipuunaanuuhch chika chii ihtuuch aa ekaa chechii miichisutwaau anichii kaa wiishaamaakanuutwaau e makushaanuyich. Namui naanituu. Michihpin e ihtaayich anit e ihtaatwaau aniyuu uschinaapewaan namui mechim kata uhchi iteyihtamuch ekaa chechii miichisutwaau. 35Iskutak maak utihchipayiche che pechi miskamaakanuutwaau uschinaapewaan ekw maak yaakw namui chika uhchi miichisuuch.”
36Ekw Jesus kaa wiihtamuwaat uyuu chiskutamaacheu tipaachimuwiniyuu e itaat, “Namui awen chipaa chii uhchi pahkwepitam e ushkaayich utakuhp chechii miishahahk weskach akuhpischiisiyuu. Wesh uyeyuu ihtuutahke, kata wanaachihtaau aniyuu kaa ushkaayich utakuhp. An maak kaa ushkach miishahiikan, namui kata uhchi nihiishkaachemakan anit weskach akuhpischiishihch. 37Namui kaye awen piihtaapuutaau e ushkaakamiyich shuuminaapuuyuu anite ishi e weskachuuniyich usakai puutaahch. Wesh anite ishi piihtaapuutaate iskutak maak ushihuumakaniyiche, mitun chika taatupayuu aniyuu usakai puutaayuu. Ekw maak namui kata uhchi ayaau shuuminaapuuyuu kaye maak aniyuu usakai puutaayuu namui shaash kata uhchi ishinaakuniyuu miin chechii aapataniyich. 38E ushkaakamiyich shuuminaapuuyuu anite e ushkaayikwaau usakai puutaahch chipaa ishi piihtaapuutaau. 39Awen shaash e chii kuchishtahk weskach shuuminaapuuyuu namui chika uhchi wii minihkweu e ushkaakamiyich shuuminaapuuyuu. Wesh aniyuu weskach shuuminaapuuyuu uste kata wiihchistam.”
ទើបបានជ្រើសរើសហើយ៖
Luke 5: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
