Acts 9
9
Saul kaa chihchi taapweyimaat Jesus
1Saul maak wii eshkw ekun kaa ihtit e papaasechihaat aniyuu aweyuuh Utipeyihchikeu Jesus kaa taapweyimaayich e itaat che nipahaakanuyich. Chii nituwaapameu maak chisheayimiheuchimaauh, 2kaa nitutamuwaat chechii miikut masinahiikaniyuu chechii waapahtiyaat aniyuu kaa niikaanishkuwaayich Jewa ayimiheuchimaau anit Damascus kaa ihtaayich e wiihtaakuniyich anit e miyaakanuut chechii maakunaat iskweu kaye naapeu kaa taapweyimaayich Jesus, kaye kaau chechii chiiwehtahaat anite Jerusalemihch.
3Chii ituhteu maak anite Damascus, iskutak maak e ati peshuwaapahtahk, chiihtihtawii chii uhchi mista waashteyuu anit waaskaa e ihtaat kihchikiishikuhch e uhchi waashteyich. 4Chii pahchishinuu aschiihch, ekw kaa pehtawaat aweyuu e itikut, “Saul, Saul, chekwaan wehchi nanehkaachihiyin.”
5Ekw Saul kaa itwet, “Awen chiya kaa pechi ayimihiyin.” Ekw kaa itikut aniyuu aweyuu, “Eukw niya Jesus, an kaa nanehkaachihiit. 6Pisikuuh, che ituhteyin anite ihtaawinihch ekute che wiihtamaakuyin taan che ihtiyin.”
7Anichii maak naapeuch kaa wiichewaatwaau Saul chii chipihchikaapuuch ekaa mitun chistutwaau. Chii pehtaweuch aniyuu aweyuu mikw namui uhchi waapameuch. 8Ekw Saul kaa pisikuut, iskutak maak kaa tuuhkaapit, namui uhchii waapahtam. Ekw anichii naapeuch kaa sichinischehtahaatwaau e ituhtahaatwaau anite Damascusihch. 9Nishtu chiishikaau maak namui uhchii waapahtam, aniyuu maak ishpish namui uhchi miichisuu kaye namui uhchi minihkweu.
10Anite maak Damascus chii ihtaau naapeu e taapweyimaat Jesus, Ananias chii ishinihkaasuu. Chii waapahtiyaakanuu waapahtiiwewiniyuu, ekut maak kaa ayimihiikut Utipeyihchikeu e itikut, “Ananias.” Ekw kaa itaat, “Chekwaan Utipeyihchikeu.” 11Ekw kaa itikut Utipeyihchikeu, “Pisikuuh, che ituhteyin nete meskanuu kaa kuiskumuhch kaa ishinihkaatech. Ekut anit Judas uwaaskaahiikanimihch che kakwechihcheyimuyin e ihtaakwe naapeu Saul e ishinihkaasut anite Tarsus e uhchiit. Eukuu Saul mekwaach ayimihaau. 12Chii ishinam kaye e pechi piihcheyich naapeu Ananias e ishinihkaasuyich, e saaminikut miin kaau chechii waapahtahk.”
13Ekw Ananias kaa nishkweushihaat Utipeyihchikeuh e itaat, “Utipeyihchikeu, mihchetu iinuuch nichii wiihtamaakuch uyuu naapeu taan e ishpish nanehkaachihaat aniyuuh kaa taapwehtamitwaau anite Jerusalemihch kaa ihtaayitwaauh. 14Kaye maak chii pechi ituhteu Saul ute Damascus, e chii miikut kaa niikaanapiitwaau ayimiheuchimaauh chechii maakunaat misiwe aniyuu aweyuu kaa taapweyimikuwat.”
15Ekw Ananias kaa itikut Utipeyihchikeu, “Ituhte yaapach, wesh nichii wiyeyimaau Saul chechii pechi atushkuut, kaye chechii pechi chischeyihtaakuhiit anite Jewa iinuuh e ihtaayich kaye maak anite ekaa Jewa itiskaanesiyich iinuuh, kaye maak chisheuchimaauh e ihtaayich. 16Wesh niya nika waapahtiyaau taan che ishi nanehkaateyimut niya uhchi,” chii itikuu Utipeyihchikeu Ananias.
17Ananias maak chii ituhteu anite, kaa piihchet aniyuu waaskaahiikaniyuu anite kaa itishahwaakanuut. Iskutak maak wiyaapamaat aniyuu Saul, ekw kaa saaminaat e itaat, “Niichishaan Saul, Utipeyihchikeu Jesus nichii pechi itishahuukw, an kaa nachishkaask nete meskaanaahch mekwaach kaa pechi ituhteyin ute. Nichii pechi itishahuukw miin kaau chechii waapahtaman, kaye chechii saakaschineshkaask Kaa payehchisiyich Ahchaahkw.”
18Tiiwehch maak mwehch names uhakai e ishinaakuniyikwaauh chekwaayuu chii uhchi paahpahchishtiniyuuh anit uhchi Saul uschiishikuhch, ekut maak miin kaau kaa uhchi waapahtahk. Chii pisikuu ekw kaa siikahaahtuwaakanuut. 19Iskutak maak kaa chiishkwaa miichisut, ekw miin kaa ati maskuupimaatisiit. Weipishchiish chii wiichimeu Saul aniyuu chischinuhamuwaakanh anit Damascusihch kaa ihtaayitwaauh.
Saul kaa kacheskwet anite Damascus
20Tiiwehch maak chii ituhteu anite nanaahkuu Jewa ayimiheukamikuhch, e kacheskwet e itwet, “Jesus, eukw Chishemanituu Ukusisa.”
21Anichii kaa pehtawaatwaau, chii maamishkaateyihtamihiikuuch uyuu e itweyich ekw kaa ititutwaau, “Namui aa eukw uu naapeu kaa wanaachihaat aniyuu kaa taapweyimaayich Jesus anite Jerusalemihch kaa ihtaayich. Namui aa eukw uu wehchi pechi takushinit e wii pechi nituwaapamaat aniyuu kaa taapweyimaayich Jesus, chechii maakunaat kaye chechii ituhtahaat anite kaa niikaanapiitwaau ayimiheuchimaauh e ihtaayich.”
22Saul maak etituu chii cheshtinaashtaakuu aniyuu taan kaa ishi kacheskwet e aayimuumaat Jesus taapwe e aawiyich Christ aniyuu kaa wiyaapamaat Chishemanituu. Anichii maak Jewa iinuuch anit Damascus kaa ihtaatwaau chii wawaaneyihtamihiikuuch, namui mitun chekwaayuu uhchii ishi nishkweushiheuch. 23Iskutak maak mihchetu chiishikaau meyaaupayihkwaau ekw anichii Jewa iinuuch kaa nishtuwiitwaau, kaa wiyeyihtahkwaau che nipahaatwaau Saul. 24Mikw maak Saul chii chischeyihtamihaakanuu taan waa ihtuutawaakanuut. Eshikum chiishikaau kaye eshikum tipiskaau chii naanaakachihtaauch anite e uhchi piihchaanuuhch an ihtaawin, chechii nipahaatwaau iskutak takushiniyichen. 25Peyakwaau maak e tipiskaayich Saul uwiichewaakan chii wiichihiikuu chechii ushimut anit uhchi Damascusihch. E pakuneyaayich e yaaihtakaayich chii uhchi aashaapihchenaakanuu utipiiwatihch e piichishihk.
Saul kaau kaa ituhtet Jerusalemihch
26Saul maak kaau chii chiiweu anite Jerusalemihch. Ekw kaa wii papaawiichewaat aniyuu chischinuhamuwaakanh e nituweyimaat chechii taapwehtamiyich kaye wiya e taapweyimaayich Jesus. Mikw maak namui uhchi taapwehtamiyuu e taapweyimaayich Jesus, misiwe chii kushtikuu. 27Barnabas maak chii wiichiheu aniyuu Saul, kaa ituhtahaat anite aniyuu apastalh e ihtaayich. Kaa wiihtamuwaat taan kaa ishi nuukushiishtaakuyich Saul Utipeyihchikeu anite meskanaahch, kaye e chii ayimihiikuyich. Kaye chii wiihtamuweu taan kaa ishi kacheskweyich Saul anite Damascus Jesus e aayimuumaayich ekaa mitun uhchi kushtaachit. 28Ekut maak kaa ihtaat Saul anit aniyuu apastalh e ihtaayich. Misiwe kaa ituhtet anite Jerusalemihch e kacheskwet e aayimuumaat Utipeyihchikeu, ekaa kushtaachit. 29Chii ayimiheu kaye chii nanaaskuushiheu aniyuu Jewa iinuuh Greek kaa ishi ayimiitwaauh chechii taapweyimaayich Utipeyihchikeu Jesus mikw maak chii wii nipahiikuu. 30Iskutak maak anichii wiichishaanimaauch piyehtahkwaau uyuu, anite Caesarea kaa ishinihkaateyich ihtaawiniyuu chii ituhtaheuch aniyuu Saul, ekw anite Tarsus kaa ishinihkaateyich ihtaawiniyuu kaa itishahwaatwaau.
31Anichii maak umaamuuayimihaauch misiwe anite aniyuuh aschiih kaa ihtaatwaau Judea kaye Galilee ekw maak Samaria kaa ishinihkaateyikwaauh, weipishchiish namui uhchi nanehkaachihaakanuuch. Chii chisteyimeuch Utipeyihchikeu uchii iinuuch kaye wetaach chii ati yaaichikaapuuch kaye wetaach chii ati mihchetuuch wesh Kaa payehchisiyich Ahchaahkwa chii wiichihiikuuch.
Peter kaa maamishkaach ihtit anite Lyddahch kaye Joppahch
32Peter nanaahkuu ihtaawinihch chii papaaituhteu. Ekw maak peyakwaau e nituu chiiutamaat aniyuu kaa taapwehtamiitwaauh anite Lyddahch kaa ihtaayitwaauh, 33ekut kaa waapamaat naapeu Aeneas e ishinihkaasuyich, ekaa nisitusiyich, yaanaaneu pipun ekaa uhchi aamiyich unipewiniihch. 34Ekw Peter kaa itaat, “Aeneas, Jesus Christ chimiinuwaachihiikw, wanishkaa, che utinaman chitashpishimun.” Tiiwehch maak chii wanishkaau Aeneas. 35Misiwe maak iinuuh kaa tashiyich anit Lyddahch kaye Sharonihch chii waapamikuu e papaamuhtet, ekw maak kaa ati taapweyimaayich Utipeyihchikeuh.
Tabitha miin kaau kaa pimaatisiit
36Anite ihtaawinihch Joppa kaa ishinihkaatech chii ihtaau iskweu e taapweyimaat Jesus, Tabitha e chii ishinihkaasut, uu maak ishinihkaasuwin e itweshtamaataakanuuhch atihkw iinaanuu. Muush chii miyutuutamuweu aweyuu an iskweu kaye chii wiichiheu kaa chistimaatisiitwaau aweyuuh. 37Mekwaach maak Peter e ihtaat anit Lyddahch, chii mistaahkusuu an iskweu, chek maak chii nipuu. Wiiyuu maak chii chishtaapautaakanuuyuu, ekw ishpimiihtakuhch kaa ashtaakanuyich. 38Chii peshunaakun maak Joppa anite Lyddahch uhchi. Iskutak maak piyehtahkwaau anichii kaa taapweyimaatwaau Jesus e ihtaayich Peter anite Lyddahch, niishu naapeu chii itishahweuch anite chechii wiishaamaatwaau Peter tiiwehch chechii pechi takushiniyich. 39Peter kaa pisikuut, kaa wiichewaat aniyuu naapeuh. Iskutak maak tekushihkwaau nete, chii ituhtahaakanuu anite ishpimiihtakuhch anite e ihtakuniyich aniyuu miiyuuyuu. Chii ihtaauch anit iskweuch e peyakutwaau, chii maausikukaapuushtaweuch Peter e maatutwaau kaye e waapahtiyaatwaau pachuuyaanh kaye akuhpa e chii ushtamaakuwaakupanenich aniyaanaa iskweu Tabitha. 40Peter misiwe aweyuuh chii wiiwiitishiheu anit aniyuu nipeukamikuhch kaa ihtaayitwaauh, ekw kaa niipiskuupit e ayimihaat, ekw kaa kanawaahtahk aniyuu miiyuuyuu e itwet, “Tabitha, wanishkaa.” Chii aapaham maak uschiishikuh an iskweu, iskutak maak wiyaapamaat aniyuu Peter, chii uhchi asamitapuu. 41Peter maak chii shuwanischeyishtuweu kaa wiichihaat e wanishkaanisuyich. Ekw kaa wiishaamaat aniyuu kaa peyakuyich iskweuh kaye misiwe aniyuu kaa taapwehtamiitwaauh aweeyuuh, kaa waapahtiyaat miin e pimaatisiyich aniyuu Tabitha. 42Misiwe maak anit Joppahch chii mishihtepayuu tipaachimuwin uu kaa ispayihch. Mihchetu maak awenichii chii taapweyimeuch Utipeyihchikeu Jesus. 43Chineush maak chii ihtaau Peter anit Joppahch, aniyuu chii wiichimeu kaa chiishinicheyich Simon kaa ishinihkaasuyich.
ទើបបានជ្រើសរើសហើយ៖
Acts 9: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
Acts 9
9
Saul kaa chihchi taapweyimaat Jesus
1Saul maak wii eshkw ekun kaa ihtit e papaasechihaat aniyuu aweyuuh Utipeyihchikeu Jesus kaa taapweyimaayich e itaat che nipahaakanuyich. Chii nituwaapameu maak chisheayimiheuchimaauh, 2kaa nitutamuwaat chechii miikut masinahiikaniyuu chechii waapahtiyaat aniyuu kaa niikaanishkuwaayich Jewa ayimiheuchimaau anit Damascus kaa ihtaayich e wiihtaakuniyich anit e miyaakanuut chechii maakunaat iskweu kaye naapeu kaa taapweyimaayich Jesus, kaye kaau chechii chiiwehtahaat anite Jerusalemihch.
3Chii ituhteu maak anite Damascus, iskutak maak e ati peshuwaapahtahk, chiihtihtawii chii uhchi mista waashteyuu anit waaskaa e ihtaat kihchikiishikuhch e uhchi waashteyich. 4Chii pahchishinuu aschiihch, ekw kaa pehtawaat aweyuu e itikut, “Saul, Saul, chekwaan wehchi nanehkaachihiyin.”
5Ekw Saul kaa itwet, “Awen chiya kaa pechi ayimihiyin.” Ekw kaa itikut aniyuu aweyuu, “Eukw niya Jesus, an kaa nanehkaachihiit. 6Pisikuuh, che ituhteyin anite ihtaawinihch ekute che wiihtamaakuyin taan che ihtiyin.”
7Anichii maak naapeuch kaa wiichewaatwaau Saul chii chipihchikaapuuch ekaa mitun chistutwaau. Chii pehtaweuch aniyuu aweyuu mikw namui uhchi waapameuch. 8Ekw Saul kaa pisikuut, iskutak maak kaa tuuhkaapit, namui uhchii waapahtam. Ekw anichii naapeuch kaa sichinischehtahaatwaau e ituhtahaatwaau anite Damascusihch. 9Nishtu chiishikaau maak namui uhchii waapahtam, aniyuu maak ishpish namui uhchi miichisuu kaye namui uhchi minihkweu.
10Anite maak Damascus chii ihtaau naapeu e taapweyimaat Jesus, Ananias chii ishinihkaasuu. Chii waapahtiyaakanuu waapahtiiwewiniyuu, ekut maak kaa ayimihiikut Utipeyihchikeu e itikut, “Ananias.” Ekw kaa itaat, “Chekwaan Utipeyihchikeu.” 11Ekw kaa itikut Utipeyihchikeu, “Pisikuuh, che ituhteyin nete meskanuu kaa kuiskumuhch kaa ishinihkaatech. Ekut anit Judas uwaaskaahiikanimihch che kakwechihcheyimuyin e ihtaakwe naapeu Saul e ishinihkaasut anite Tarsus e uhchiit. Eukuu Saul mekwaach ayimihaau. 12Chii ishinam kaye e pechi piihcheyich naapeu Ananias e ishinihkaasuyich, e saaminikut miin kaau chechii waapahtahk.”
13Ekw Ananias kaa nishkweushihaat Utipeyihchikeuh e itaat, “Utipeyihchikeu, mihchetu iinuuch nichii wiihtamaakuch uyuu naapeu taan e ishpish nanehkaachihaat aniyuuh kaa taapwehtamitwaau anite Jerusalemihch kaa ihtaayitwaauh. 14Kaye maak chii pechi ituhteu Saul ute Damascus, e chii miikut kaa niikaanapiitwaau ayimiheuchimaauh chechii maakunaat misiwe aniyuu aweyuu kaa taapweyimikuwat.”
15Ekw Ananias kaa itikut Utipeyihchikeu, “Ituhte yaapach, wesh nichii wiyeyimaau Saul chechii pechi atushkuut, kaye chechii pechi chischeyihtaakuhiit anite Jewa iinuuh e ihtaayich kaye maak anite ekaa Jewa itiskaanesiyich iinuuh, kaye maak chisheuchimaauh e ihtaayich. 16Wesh niya nika waapahtiyaau taan che ishi nanehkaateyimut niya uhchi,” chii itikuu Utipeyihchikeu Ananias.
17Ananias maak chii ituhteu anite, kaa piihchet aniyuu waaskaahiikaniyuu anite kaa itishahwaakanuut. Iskutak maak wiyaapamaat aniyuu Saul, ekw kaa saaminaat e itaat, “Niichishaan Saul, Utipeyihchikeu Jesus nichii pechi itishahuukw, an kaa nachishkaask nete meskaanaahch mekwaach kaa pechi ituhteyin ute. Nichii pechi itishahuukw miin kaau chechii waapahtaman, kaye chechii saakaschineshkaask Kaa payehchisiyich Ahchaahkw.”
18Tiiwehch maak mwehch names uhakai e ishinaakuniyikwaauh chekwaayuu chii uhchi paahpahchishtiniyuuh anit uhchi Saul uschiishikuhch, ekut maak miin kaau kaa uhchi waapahtahk. Chii pisikuu ekw kaa siikahaahtuwaakanuut. 19Iskutak maak kaa chiishkwaa miichisut, ekw miin kaa ati maskuupimaatisiit. Weipishchiish chii wiichimeu Saul aniyuu chischinuhamuwaakanh anit Damascusihch kaa ihtaayitwaauh.
Saul kaa kacheskwet anite Damascus
20Tiiwehch maak chii ituhteu anite nanaahkuu Jewa ayimiheukamikuhch, e kacheskwet e itwet, “Jesus, eukw Chishemanituu Ukusisa.”
21Anichii kaa pehtawaatwaau, chii maamishkaateyihtamihiikuuch uyuu e itweyich ekw kaa ititutwaau, “Namui aa eukw uu naapeu kaa wanaachihaat aniyuu kaa taapweyimaayich Jesus anite Jerusalemihch kaa ihtaayich. Namui aa eukw uu wehchi pechi takushinit e wii pechi nituwaapamaat aniyuu kaa taapweyimaayich Jesus, chechii maakunaat kaye chechii ituhtahaat anite kaa niikaanapiitwaau ayimiheuchimaauh e ihtaayich.”
22Saul maak etituu chii cheshtinaashtaakuu aniyuu taan kaa ishi kacheskwet e aayimuumaat Jesus taapwe e aawiyich Christ aniyuu kaa wiyaapamaat Chishemanituu. Anichii maak Jewa iinuuch anit Damascus kaa ihtaatwaau chii wawaaneyihtamihiikuuch, namui mitun chekwaayuu uhchii ishi nishkweushiheuch. 23Iskutak maak mihchetu chiishikaau meyaaupayihkwaau ekw anichii Jewa iinuuch kaa nishtuwiitwaau, kaa wiyeyihtahkwaau che nipahaatwaau Saul. 24Mikw maak Saul chii chischeyihtamihaakanuu taan waa ihtuutawaakanuut. Eshikum chiishikaau kaye eshikum tipiskaau chii naanaakachihtaauch anite e uhchi piihchaanuuhch an ihtaawin, chechii nipahaatwaau iskutak takushiniyichen. 25Peyakwaau maak e tipiskaayich Saul uwiichewaakan chii wiichihiikuu chechii ushimut anit uhchi Damascusihch. E pakuneyaayich e yaaihtakaayich chii uhchi aashaapihchenaakanuu utipiiwatihch e piichishihk.
Saul kaau kaa ituhtet Jerusalemihch
26Saul maak kaau chii chiiweu anite Jerusalemihch. Ekw kaa wii papaawiichewaat aniyuu chischinuhamuwaakanh e nituweyimaat chechii taapwehtamiyich kaye wiya e taapweyimaayich Jesus. Mikw maak namui uhchi taapwehtamiyuu e taapweyimaayich Jesus, misiwe chii kushtikuu. 27Barnabas maak chii wiichiheu aniyuu Saul, kaa ituhtahaat anite aniyuu apastalh e ihtaayich. Kaa wiihtamuwaat taan kaa ishi nuukushiishtaakuyich Saul Utipeyihchikeu anite meskanaahch, kaye e chii ayimihiikuyich. Kaye chii wiihtamuweu taan kaa ishi kacheskweyich Saul anite Damascus Jesus e aayimuumaayich ekaa mitun uhchi kushtaachit. 28Ekut maak kaa ihtaat Saul anit aniyuu apastalh e ihtaayich. Misiwe kaa ituhtet anite Jerusalemihch e kacheskwet e aayimuumaat Utipeyihchikeu, ekaa kushtaachit. 29Chii ayimiheu kaye chii nanaaskuushiheu aniyuu Jewa iinuuh Greek kaa ishi ayimiitwaauh chechii taapweyimaayich Utipeyihchikeu Jesus mikw maak chii wii nipahiikuu. 30Iskutak maak anichii wiichishaanimaauch piyehtahkwaau uyuu, anite Caesarea kaa ishinihkaateyich ihtaawiniyuu chii ituhtaheuch aniyuu Saul, ekw anite Tarsus kaa ishinihkaateyich ihtaawiniyuu kaa itishahwaatwaau.
31Anichii maak umaamuuayimihaauch misiwe anite aniyuuh aschiih kaa ihtaatwaau Judea kaye Galilee ekw maak Samaria kaa ishinihkaateyikwaauh, weipishchiish namui uhchi nanehkaachihaakanuuch. Chii chisteyimeuch Utipeyihchikeu uchii iinuuch kaye wetaach chii ati yaaichikaapuuch kaye wetaach chii ati mihchetuuch wesh Kaa payehchisiyich Ahchaahkwa chii wiichihiikuuch.
Peter kaa maamishkaach ihtit anite Lyddahch kaye Joppahch
32Peter nanaahkuu ihtaawinihch chii papaaituhteu. Ekw maak peyakwaau e nituu chiiutamaat aniyuu kaa taapwehtamiitwaauh anite Lyddahch kaa ihtaayitwaauh, 33ekut kaa waapamaat naapeu Aeneas e ishinihkaasuyich, ekaa nisitusiyich, yaanaaneu pipun ekaa uhchi aamiyich unipewiniihch. 34Ekw Peter kaa itaat, “Aeneas, Jesus Christ chimiinuwaachihiikw, wanishkaa, che utinaman chitashpishimun.” Tiiwehch maak chii wanishkaau Aeneas. 35Misiwe maak iinuuh kaa tashiyich anit Lyddahch kaye Sharonihch chii waapamikuu e papaamuhtet, ekw maak kaa ati taapweyimaayich Utipeyihchikeuh.
Tabitha miin kaau kaa pimaatisiit
36Anite ihtaawinihch Joppa kaa ishinihkaatech chii ihtaau iskweu e taapweyimaat Jesus, Tabitha e chii ishinihkaasut, uu maak ishinihkaasuwin e itweshtamaataakanuuhch atihkw iinaanuu. Muush chii miyutuutamuweu aweyuu an iskweu kaye chii wiichiheu kaa chistimaatisiitwaau aweyuuh. 37Mekwaach maak Peter e ihtaat anit Lyddahch, chii mistaahkusuu an iskweu, chek maak chii nipuu. Wiiyuu maak chii chishtaapautaakanuuyuu, ekw ishpimiihtakuhch kaa ashtaakanuyich. 38Chii peshunaakun maak Joppa anite Lyddahch uhchi. Iskutak maak piyehtahkwaau anichii kaa taapweyimaatwaau Jesus e ihtaayich Peter anite Lyddahch, niishu naapeu chii itishahweuch anite chechii wiishaamaatwaau Peter tiiwehch chechii pechi takushiniyich. 39Peter kaa pisikuut, kaa wiichewaat aniyuu naapeuh. Iskutak maak tekushihkwaau nete, chii ituhtahaakanuu anite ishpimiihtakuhch anite e ihtakuniyich aniyuu miiyuuyuu. Chii ihtaauch anit iskweuch e peyakutwaau, chii maausikukaapuushtaweuch Peter e maatutwaau kaye e waapahtiyaatwaau pachuuyaanh kaye akuhpa e chii ushtamaakuwaakupanenich aniyaanaa iskweu Tabitha. 40Peter misiwe aweyuuh chii wiiwiitishiheu anit aniyuu nipeukamikuhch kaa ihtaayitwaauh, ekw kaa niipiskuupit e ayimihaat, ekw kaa kanawaahtahk aniyuu miiyuuyuu e itwet, “Tabitha, wanishkaa.” Chii aapaham maak uschiishikuh an iskweu, iskutak maak wiyaapamaat aniyuu Peter, chii uhchi asamitapuu. 41Peter maak chii shuwanischeyishtuweu kaa wiichihaat e wanishkaanisuyich. Ekw kaa wiishaamaat aniyuu kaa peyakuyich iskweuh kaye misiwe aniyuu kaa taapwehtamiitwaauh aweeyuuh, kaa waapahtiyaat miin e pimaatisiyich aniyuu Tabitha. 42Misiwe maak anit Joppahch chii mishihtepayuu tipaachimuwin uu kaa ispayihch. Mihchetu maak awenichii chii taapweyimeuch Utipeyihchikeu Jesus. 43Chineush maak chii ihtaau Peter anit Joppahch, aniyuu chii wiichimeu kaa chiishinicheyich Simon kaa ishinihkaasuyich.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.