Acts 23
23
1Ekw Paul kuiskw kaa kanawaapamaat aniyuu kaa maamuupishtamiyich wiyaaskunichewiniyuu ekw kaa itaat, “Niichishaanitikw, kaa ishpish pechi atushkuuk Chishemanituu nicheshtinaahun muush kuiskw e chii ihtiyaan Chishemanituu e pimaatisiistuuk.” 2Ekw an chisheayimiheuchimaau Ananias kaa ishinihkaasut kaa itashumaat aniyuuh aweyuu peshuch Paul e ihtaayich kaa niipuyich chechii utaamitunehwaayich. 3Ekw Paul kaa itaat, “Chishemanituu chika utaamihkwehuukw, chiya kaa wii mamiyuunaakuhiisuyin mekwesiinuu. Chitapin utah chechii wiyaskuniyin wiishuwewinihch ishi, chiya maak niyaanitam ekaa nanihiihtaman an wiishuwewin e chii itashuweyin chechii utaamihkwehukuyaan eshkw maak ekaa kuiskw uhchi ishi wiyaaskunikuyaan,” chii iteu Paul aniyuu chisheayimiheuchimaau. 4Ekw anichii peshuch Paul e ihtaayich kaa niipuutwaau kaa itaatwaau aniyuu Paul, “Ewaa chipaa ishi ayimihaau an chisheayimiheuchimaau Chishemanituu kaa wiyaapamikut.” 5Paul kaa itwet, “Niichishaanitikw, atuch nipaa uhchii itaau uyuu chii chischeyimaauchipane e chisheayimiheuchimaaut wesh kiipaa taapwe ekun e itashtech Chishemanituu utayimuwinihch,
Ekaawii chika uhchi machi aayimuumaau awen e niikaanishkuwaat chitiiniim.”
6Iskutak maak neshitaunuwaat Paul taapishkun Sadduceeh ekw maak Pharisee e ihtaayich anit aniyuu e nishtuwiyich kaa maamuupishtamiyich wiyaaskunichewiniyuu, chii iteu e chishewet, “Niichishaanitikw, Pharisee niya, kaye aniyehkaanaanich nitaanischewaahkumaakanich Pharisee chii itapuuch. Eukw uu wehchi wiyaaskunikuyaan uu anuhchiish, e taapwehtamaan kaa nipitwaau kaau che wanishkaatwaau.” 7Iskutak maak uyuu kaa itwet Paul, anichii Phariseech ekw maak anichii Sadduceech chii chihchi machipayuuch, wesh taapaa peyakunihch uhchi ishi taapwehtamuch uyuu. 8Anichii Sadduceech namui taapwehtamuch che wanishkaayich aniyuu kaa nipiyich. Namui kaye taapwehtamuch enchil kaye ahchaahkwa e ihtaayich. Ekw maak wii anichii Phariseech misiwe ishi taapwehtamuch uyuu. 9Ekw wetaach kaa ati mista chishewetwaau e ayimihiitutwaau uchii Phariseech kaye Sadduceech e machipayitwaau. Ekw anichii kaa chiskutamaachetwaau wiishuwewiniyuu Pharisee kaa itapitwaau kaa pisikuutwaau ekw kaa itwetwaau, “Namui wii niyaan nimiskamuwaanaan chekwaayuu che uhchi waweshihaakanuut uu naapeu. Chek maa taapwe kaa ayimihiikuukwe ahchaahkwa maak enchil.”
10Chek maak aniyuu e ishpish mista machipayinaanuyich, an nitupayuuchimaau chii kushpaneyihtam chek chechii wiyesh ihtuutawaakanuyich Paul. Ekw kaa itaat aniyuu ushimaakanishiim chechii piihtakahaayich Paul anite aniyuu shimaakanishuukamikuhch. 11Aniyuu maak tepiskaayich, Utipeyihchikeu chii pechi niipuuyuuh anit Paul e itaat ekw kaa itikut, “Suuhk wii suuhchitehe, chichii aayimuumin utah Jerusalemihch, ekun maak che ihtiyin kaye anite Romehch.”
Jewa iinuuch kaa wiyeyihtahkwaau che nipahaatwaau Paul
12An maak miin wiyaapahch chii ihtaauch Jewa iinuuch e maamuu niskumutwaau kaye e maamuu taapwetwaau e itwetwaau cheshtinaash ekaa che uhchi miichisutwaau kaye ekaa mechim che minihkwetwaau chekwaayuu paatish chii nipahaatwaawenich Paul. 13Uste maak nemitanuu chii tashuuch uchii uyuu kaa itwetwaau. 14Ekw kaa nituwaapamaatwaau aniyuu kaa niikaanapiitwaau ayimiheuchimaauh kaye aniyuu kaa niikaanishkuwaayich aniyuuh iinuuh ekw kaa itaatwaau, “Utah uu e tashiyaahch nichii maamuu niskumunaan ekaa mitun che uhchi miichisuyaahch paatish chii nipahiichishte Paul. 15Chiyawaau ekw maak anichii kaa maamuupishtahkwaau wiyaaskunichewiniyuu, itashumaahkw aahch an nitupayuuchimaau chechii petwaataakw aniyuu Paul, mwehch miin e wii kakwechimekw chekwaayuu chipaa ihtuutawaawaau. Niyaan wii nika chii nipahaanaan Paul eshkw ekaa utah peshuwaakanuut.”
16Uyuu maak kaa itwetwaau uchii kaa wii nipahaatwaau Paul mwehch chii ihtaayikupanen kuuhpaanesha anit aniyuu kaa ihtaatwaau. Paul maak wiichishaaniskwem uyuu ukusiyuu. Kiipaa piyehtahk an naapesh uyuu e ishi aayimuumaakanuyich aniyuu uhkumis Paul. Kaa piihchet anite aniyuu shimaakanishuukamikuyuu anite kaa kanuweyimaakanuyich Paul, ekw kaa wiihtamuwaat taan kaa ishi pehtahk. 17Paul kaa wiishaamaat peyakw aniyuu kaa niikaanishkuwaayich shimaakanisha, ekw kaa itaat, “Ituhtahii aahch uu naapesh nete nitupayuuchimaau e ihtaayich. Ihtakuniyuu chekwaayuu waa wiihtamuwaat.” 18Ekw kiipaa an kaa niikaanishkuwaat shimaakanisha kaa ituhtahaat aniyuu naapesha anite nitupayuuchimaau e ihtaayich, ekw kaa itaat aniyuu nitupayuuchimaau, “An kaa maakunaakanuut Paul nichii itikw chechii peshiimach uyuu naapesh utah e ihtaaut, chekwaayuu chiwii itikuyuuh.” 19Ekw an nitupayuuchimaau kaa utinamuwaat aniyuu naapesha utihchiyuu, kaa ituhtahaat anite mikw wiyawaau chechii niishitwaau, ekw kaa itaat, “Chekwaan kaa wii pechi wiihtamuyin.” 20Ekw an naapesh kaa itwet, “Anichii kaa niikaanishkuwaatwaau Jewa iinuuh chika itikuch waapaniyiche chechii ituhtahiimekw Paul nete kaa maamuupishtamiitwaau wiyaaskunichewiniyuu e ihtaayitwaauh, mwehch miin chekwaayuu e wii ishi nituu chischeyimaatwaau chika ihtuuch. 21Ekaawii mikw taapwehtuuch. Uste nemitanuu itashuuch anichii e ihtakuniyich taanite kiyaashutwaau e ashuwaapamaatwaau che ishpish ituhtahaakanuyich anite wiyaaskunicheukamikuhch. Wesh chii naaspich taapweuch ekaa che uhchi miichisutwaau kaye ekaa che uhchi minihkwetwaau chekwaayuu paatish chii nipahaatwaawenich aniyuu Paul. Shaash maak ayeskuwiyuuch uyuu che ihtitwaau, mikw ashuwaapameuch che ishpish ituhtahaakanuyich nete.” 22Ekw an nitupayuuchimaau kaa itaat aniyuu naapesha, “Ekaawii awen wiihtamuu taan kaa ishi wiihtamuyin anuhchiish.” Ekw kaa chiiwetishihwaat aniyuu naapesha.
Paul kaa itishahwaakanuut anite Chisheuchimaau Felix e ihtaayich
23Ekw an nitupayuuchimaau kaa wiishaamaat niishu aniyuu kaa niikaanishkuwaayich ushimaakanishiim, ekw kaa itaat, “Ayeskuuhiich niishwaa mitaahtumitanuu shimaakanishach ekw maak niishwaashumitanuu anichii kaapalakaskweu kaa chii aapachihaatwaau e maasihchetwaau kaye maak niishwaa mitaahtumitanuu shimaakanishach muuhkumaan kaa maasihchewaachetwaau chechii ituhtetwaau Caesareahch. Anuhchiish maak uyuu che utaakushiyich peyakushteu ispayiyiche che chistuhtetwaau. 24Yaaitei uhtinimuwaakw Paul kaapalakaskweu chechii pimuhtahiikut. Ekw nete chisheuchimaau Felix e ihtaayich che ituhtahekw. Yaakwaau naanaakachihaahkw ekaa chechii wiyesh ihtuutaakut aweyuu.”
25Ekw an nitupayuuchimaau kaa masinahiichet e itashtaat, 26“Claudius Lysias niya, chii chisheuchimaau Felix chimasinahamaatin, 27Uu naapeu kaa itishahuuk e ihtaaut Jewa iinuuh chii maakunikuu, kaye chii wii nipahiikuu. Iskutak kaa wiihtamaakuyaan Rome e ishi masinaasut, ekw kaa nituu naatamuuk nitishimaakanishiim e chii wiicheumach. 28Nichii wii nituu chischeyihtamuwaan chekwaayuu aniyuu kaa ishi mamishimaatwaau, ekw kaa ituhtahiimach anite Jewa kaa maamuupishtamiyich wiyaaskunichewiniyuu e ihtaayich. 29Iskutak maak waahtamaakuyaan taan kaa ishi wiyaaskunaakanuut uu naapeu namui chekwaayuu uhchi ihtikupane chechii uhchi waweshihaakanuut maak chechii uhchi nipahaakanuut. Ekaa maamuyaam aihtuutahk Jewa wiishuwewinh ekun kaa ishi mamishimaakanuukupane. 30Chek kaa wiihtamaakuyaan e ihtaayich Jewa iinuuh e wii nipahiikut, ekw kaa iteyihtamaan chechii itishahuuk nete e ihtaayin. Ekw maak waa itakwaau anichii kaa itwetwaau ekaa nanihiihtamiyich wiishuwewiniyuu, chechii nituu wiihtamaaskwaau taan e ishi mamishimaatwaau. Che wiyeyihtaman maak taan che ihtuutuwaakanuut. Chiwaachiyemitin maak.”
31Ekun kiipaa kaa ihtitwaau anichii shimaakanishach aniyuu kaa itashumaakanuutwaau. Chii nituwaapameuch Paul aniyuu tepiskaayich, ekw kaa chistuhtahaatwaau. Anitipatris maak kaa ishinihkaateyich ihtaawiniyuu chii ishpish ituhtaheuch. 32Aniyuu maak wiyaapaniyich, chii chiiweuch anichii muhch kaa pimuhtetwaau shimaakanishach. Ekw anichii shimaakanishach kaapalakaskweu kaa aapachihaatwaau kaa wiichewaatwaau aniyuu Paul. 33Anite maak Caesareahch ekute kaa ituhtahaatwaau. Iskutak maak tekushihkwaau anit ekw kaa miyaatwaau aniyuu chisheuchimaau Felix aniyuu masinahiikaniyuu kaa aapachihaakanuutwaau chechii miyaatwaau. Paul kaye kaa pachishtinaatwaau anite Felix e ihtaayich. 34Ekw an chisheuchimaau kaa ayimihtaat aniyuu masinahiikaniyuu. Kaa chiishi ayimihtaat maak ekw kaa kakwechimaat aniyuu Paul taanite wehchiyich. Iskutak chescheyihtahk anite Cilicia e uhchiyich, 35chii iteu aniyuu Paul, “Iskutak takushihkwaawenich anichii kaa wii wiyaaskuniskwaau ekut yaakwaau che nituhtamaan taan waa ishi wiyaaskunikuwane.” Ekw kaa itashumaat ushimaakanishiim chechii naanaakachihaatwaau aniyuu Paul anite Herod uchisheuchimaaukamikuyich.
ទើបបានជ្រើសរើសហើយ៖
Acts 23: crjrNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
