Марк 1
1
1‑нҗи бап
Яхя чүмдүриҗиниң вагзы
(Матта 3:1-12; Лука 3:1-18; Ёханна 1:19-28)
1Бу Худайың Оглы#1:1 Худайың Оглы – Көне Әхтде бу ат патышалар үчин уланылярды. Тәзе Әхтде болса бу ат Худай тарапындан сайланып-сечилен диймеги аңладяр. Сөзлүге серет. Иса Месих#1:1 Месих – еврейлер бу сөзи Худай тарапындан вада берлен Патыша бабатында уланярдылар. Сөзлүге серет. хакдакы Хош Хабарың башлангыҗыдыр. 2#Мал 3:1.Ишая пыгамбериң китабында#1:2 Ишая пыгамбериң китабында – кәбир голязмаларда Пыгамберлериң китабында. шейле язылан: «Өңүңден ёл тайярлар ялы, ине, Мен Өз векилими иберйәрин. 3#Иша 40:3. Чөлде бир сес гыгыряр: „Реббе ёл тайынлаң! Онуң ёдаларыны дүзләң!“ диййәр». 4Шунлукда, Яхя пейда болуп, чөлде адамлары сува чүмдүрйәрди. Ол адамлара гүнәлериниң багышланмагы үчин тоба эдип, сува чүмдүрилмеклерини вагыз эдйәрди. 5Тутуш Яхудыяның ве Иерусалимиң илаты онуң янына гелйәрди. Олар гүнәлери үчин тоба эдип, Яхя тарапындан Иордан дерясында сува чүмдүрилйәрдилер. 6Яхяның дүе йүңүнден эшиклери, билинде гайышдан гушагы барды. Ол чекиртге билен мейдан балыны иййәрди. 7Ол: «Менден соңра Гелҗек менден хас гүйчлүдир. Мен эглип, Онуң чарыгының багыны чөзмәге-де мынасып дәлдирин. 8Мен сизи сува чүмдүрйәрин, эмма Ол сизи Мукаддес Руха чүмдүрер» дийип вагыз эдйәрди.
Иса сува чүмдүрилйәр ве сыналяр
(Матта 3:13–4:11; Лука 3:21,22; 4:1-13)
9Шол гүнлерде Иса Җелиләниң Насыра шәхеринден Яхяның янына гелди. Яхя Оны Иордан дерясында чүмдүрди. 10Иса сувдан чыкып гелйәркә, асманың ярыланыны ве Мукаддес Рухуң кепдери гөрнүшде Өз үстүне инип гелйәнини гөрди. 11Шол вагт гөкден: «Сен Мениң сөвер Оглумсың, Мен Сенден көп разыдырын» диен оваз гелди. 12Мукаддес Рух Исаны дессине чөле ёллады. 13Иса чөлде кырк гүн болуп, шейтан тарапындан сынага салынды. Ол ябаны хайванларың арасында яшады, перишделер Оңа хызмат этдилер.
Иса илкинҗи шәгиртлерини чагыряр
(Матта 4:12-22; Лука 4:14,15; 5:1-11)
14Яхя туссаг эдиленден соңра, Иса Җелилә гелип, Худайың Хош Хабарыны#1:14 Худайың Хош Хабарыны – кәбир голязмаларда Худайың Шалыгы барадакы Хош Хабары. вагыз этди. 15Ол: «Вагт долды, Худайың Шалыгы голайлады. Тоба эдиң, Хош Хабара ынаның!» диййәрди.
16Иса Җелиле көлүниң кенарындан гечип барярка, көле тор ташлап дуран Симун билен онуң доганы Андрысы гөрди. Олар балыкчыдылар. 17Иса олара: «Мениң ызыма дүшүң, Мен сизи ынсан тутян балыкчылар эдейин» дийди. 18Олар хем шол вагтың өзүнде торларыны ташлап, Онуң ызына дүшдүлер. 19Бираз йөрәнлеринден соң, Иса Зебедейиң огуллары Якуп билен Ёханнаны гөрди. Олар гайыгың ичинде торларыны беҗерип отырдылар. 20Иса олары гөрен бадына чагырды. Олар хем какалары Зебедей билен гүнлүкчилери гайыкда галдырып, Исаның ызына дүшдүлер.
Иса арвах-җынлары ковяр, хассалары сагалдяр
(Лука 4:31-42; Матта 8:14-17)
21Олар Капернаума гелдилер. Сабат гүни Иса синагога барып, өвретмәге башлады. 22Онуң таглыматына хайран галдылар, себәби Иса адамлара Төврат мугаллымлары ялы дәл-де, эрк-ыгтыярлы бири ялы өвредйәрди. 23Шол вагт оларың синагогасында арвах-җын эелән бир адам барды. Ол: 24«Эй, насыралы Иса! Бизиң билен нәме ишиң бар? Бизи ёк этмәге гелдиңми? Мен Сениң кимдигиңи билйәрин, Сен Худайың Мукаддесисиң» дийип гыгырды. 25Иса арвах-җына кәйәп: «Сем бол! Бу адамдан чык!» дийип буйрук берди. 26Арвах-җын хем ол адамы сандыратды-да, багырып ондан чыкды. 27Хеммелер хайран галып, бири-бирлерине: «Бу нәме болдугы? Бу бир тәзе таглымат! Ол арвах-җынлара эрк-ыгтыяр билен буйрук берйәр, олар-да Оңа табын болярлар!» дийишдилер. 28Шейлеликде, Иса хакындакы хабар шобада Җелиләниң әхли этрабына яйрады.
29Олар синагогадан чыкып, Симун ве Андрысың өйүне гитдилер, Якуп билен Ёханна хем олар биленди. 30Симуның гайыненесини гыззырма тутуп ятандыгыны Иса хабар бердилер. 31Шонда Иса хассаның янына барды-да, оны элинден тутуп галдырды. Аялың гыззырмасы шобада айрылды ве ол мыхманлара хызмат этмәге башлады. 32Гүн батып, агшам дүшенде, әхли хассалары, арвах-җын эелән адамлары Онуң янына гетирдилер. 33Шәхериң әхли халкы гапының агзына йыгнанышыпды. 34Иса дүрли кеселе учран энчеме хассаны сагалтды, энчеме арвах-җыны ковуп чыкарды. Ол арвах-җынлара геплемәге ыгтыяр бермеди, себәби олар Онуң кимдигини билйәрдилер. 35Ир сәхер билен хениз даң атманка, Иса туруп, дашары чыкды. Бир чола ере барып, Худая дога этди. 36Симун билен янындакылар Оны гөзлемәге гитдилер. 37Оны тапанларында: «Хеммелер Сени гөзләп йөр» дийдилер. 38Иса олара: «Йөрүң, башга ере, голайдакы обалара гиделиң, Мен ол ерлерде-де вагыз этҗек, хут шонуң үчин хем гелдим» дийди.
39Шейлеликде, Иса оларың синагогаларында вагыз эдип, арвах-җынлары ковуп чыкарып, тутуш Җелиләниң ичине айланды.
Иса дери кеселлини сагалдяр
(Матта 8:1-4; Лука 5:12-16)
40Исаның янына дери кеселине ёлуган бир адам гелди. Ол дызына чөкүп, Оңа: «Эгер ислесең, мени бу кеселден тәмизләп билерсиң» дийип ялбарды. 41Исаның ол адама йүреги авады. Ол элини узатды-да, оңа дегрип: «Ислейәрин, тәмиз бол!» дийди. 42Бу адам шобада дери кеселинден сапланып, долы сагалды. 43-44Иса оны уграданда, оңа: «Әгә бол, муны хич киме айтмагын. Йөне гит-де, рухана гөрүн ве дери кеселинден сапланандыгыңы хеммелере субут эдер ялы, Мусаның буйран садакасыны бер» дийип, берк табшырык берди. 45Эмма ол адам гидип, болан затлары етишибилдигине гүррүң бермәге ве яйратмага башлады. Шонуң үчин Иса инди хич бир шәхере аркайын гирип билмән, олардан дашда, чола ерлерде болярды. Эмма хемме ерден Онуң янына адамлар гелйәрдилер.
ទើបបានជ្រើសរើសហើយ៖
Марк 1: TukCyr16
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Мукаддес Китап Терҗиме Институты, 2016