ꠔꠃꠞꠣꠔ ১: ꠙꠄꠖꠣ ꠘꠣꠝꠣ 25
25
ꠛꠤꠛꠤ ꠇꠣꠔꠥꠞꠣꠞ ꠊꠞꠅ ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠅꠞ ꠈꠣꠘ꠆ꠖꠣꠘ
1ꠁꠛ꠆ꠞꠣꠢꠤꠝꠦ ꠇꠣꠔꠥꠞꠣ ꠘꠣꠝꠞ ꠀꠞꠅ ꠄꠇꠎꠘ ꠛꠦꠐꠤꠞꠦ ꠛꠤꠀ ꠇꠞꠍꠟꠣ। 2ꠔꠣꠘ ꠙꠦꠐꠅ ꠎꠤꠝ꠆ꠞꠘ, ꠎꠇꠡꠘ, ꠝꠖꠣꠘ, ꠝꠣꠖꠤꠀꠘ, ꠎꠤꠡꠛꠇ ꠀꠞ ꠡꠥꠢꠣꠞ ꠎꠘꠝ ꠅꠁꠍꠤꠟ। 3ꠡꠣꠛꠣ ꠀꠞ ꠖꠖꠣꠘ ꠅꠁꠟꠣ ꠎꠇꠡꠘꠞ ꠀꠅꠟꠣꠖ। ꠀꠡꠥꠞꠤ, ꠟꠐꠥꠡꠤ, ꠟꠤꠃꠝ꠆ꠝꠤ ꠅꠇꠟ ꠅꠁꠟꠣ ꠖꠖꠣꠘꠞ ꠀꠅꠟꠣꠖ। 4ꠝꠣꠖꠤꠀꠘꠞ ꠀꠅꠟꠣꠖ ꠅꠁꠟꠣ ꠅꠂꠚꠣ, ꠄꠚꠞ, ꠢꠘꠥꠇ, ꠅꠛꠤꠖ ꠀꠞ ꠁꠟꠖꠣꠄꠀ। ꠄꠞꠣ ꠢꠇꠟꠃ ꠇꠣꠔꠥꠞꠣꠞ ꠀꠅꠟꠣꠖ। 5ꠁꠛ꠆ꠞꠣꠢꠤꠝꠦ ꠔꠣꠘ ꠢꠇꠟꠔꠣ ꠁꠍꠢꠣꠇꠞꠦ ꠖꠤꠟꠣꠁꠟꠣ। 6ꠅꠁꠟꠦ ꠔꠣꠁꠘ ꠎꠤꠘ꠆ꠖꠣ ꠕꠣꠇꠔꠦꠃ, ꠔꠣꠘ ꠢꠦꠡꠞ ꠛꠤꠀꠞ ꠀꠅꠟꠣꠖ ꠅꠇꠟꠞꠦꠅ ꠀꠟꠉꠣ ꠀꠟꠉꠣ ꠖꠣꠘ ꠇꠞꠤꠀ, ꠄꠞꠣꠞꠦ ꠁꠍꠢꠣꠇꠞ ꠟꠉꠦ ꠘꠣ ꠞꠣꠈꠤꠀ ꠙꠥꠛꠦꠖꠤ, ꠙꠥꠛꠞ ꠖꠦꠡꠅ ꠙꠣꠑꠣꠁ ꠖꠤꠟꠣ।
ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠅꠞ ꠁꠘ꠆ꠔꠦꠇꠣꠟ ꠀꠞ ꠇꠄꠛꠞ
7ꠁꠛ꠆ꠞꠣꠢꠤꠝ ꠄꠇ-ꠡ ꠙꠌꠔ꠆ꠔꠁꠞ ꠛꠞꠍ ꠛꠣꠌꠤꠟꠣ, ꠀꠟ꠆ꠟꠣꠄ ꠔꠣꠘꠦ ꠅꠔꠖꠤꠘꠞ ꠢꠣꠄꠀꠔꠤ ꠖꠤꠍꠟꠣ। 8ꠔꠣꠁꠘ ꠝꠥꠞꠛ꠆ꠛꠤ ꠅꠁꠀ ꠙꠥꠞꠣꠙꠥꠞ ꠛꠥꠠꠣ ꠛꠄꠅꠡꠅ ꠁꠘ꠆ꠔꠦꠇꠣꠟ ꠇꠞꠟꠣ, ꠀꠞ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠤꠀ ꠀꠎꠤꠟꠣ। 9ꠢꠦꠡꠦ ꠔꠣꠘ ꠙꠥꠀ ꠁꠍꠝꠣꠁꠟ ꠀꠞ ꠁꠍꠢꠣꠇꠦ ꠝꠝ꠆ꠞꠤ ꠐꠣꠃꠘꠞ ꠙꠥꠛꠦꠖꠤ, ꠢꠤꠐ꠆ꠐꠤ ꠡꠥꠢꠞꠞ ꠙꠥꠀ ꠁꠚ꠆ꠞꠥꠘꠞ ꠎꠝꠤꠞ ꠝꠇꠙꠦꠟꠣ-ꠉꠥꠢꠣꠔ, ꠔꠣꠘꠞꠦ ꠖꠣꠚꠘ ꠇꠞꠟꠣ। 10ꠁ ꠎꠝꠤꠈꠣꠘ ꠔꠣꠁꠘ ꠢꠤꠐ꠆ꠐꠤ ꠅꠇꠟꠞ ꠉꠦꠍ ꠕꠘꠦ ꠟꠁꠍꠟꠣ। ꠅꠘꠅꠃ ꠔꠣꠘ ꠛꠤꠛꠤ ꠍꠣꠄꠞꠣꠞꠦ ꠀꠞ ꠔꠣꠘꠦ ꠖꠣꠚꠘ ꠇꠞꠣ ꠅꠁꠍꠦ। 11ꠁꠛ꠆ꠞꠣꠢꠤꠝꠞ ꠝꠃꠔꠞ ꠛꠣꠖꠦ ꠀꠟ꠆ꠟꠣꠄ ꠔꠣꠘ ꠙꠥꠀ ꠁꠍꠢꠣꠇꠞꠦ ꠛꠞꠇꠔ ꠘꠣꠎꠤꠟ ꠇꠞꠟꠣ। ꠔꠣꠁꠘ ꠛꠦꠞ-ꠟꠢꠄ-ꠞꠥꠁꠞ ꠉꠦꠍꠦ ꠞꠁꠔꠣ।
ꠢꠎꠞꠔ ꠁꠍꠝꠣꠁꠟ (ꠀ꠩) ꠅꠞ ꠁꠘ꠆ꠔꠦꠇꠣꠟ ꠀꠞ ꠈꠣꠘ꠆ꠖꠣꠘ
12ꠅꠃ ꠅꠁꠟ ꠁꠍꠝꠣꠁꠟꠞ ꠈꠣꠘ꠆ꠖꠣꠘꠞ ꠛꠄꠀꠘ। ꠛꠤꠛꠤ ꠍꠣꠄꠞꠣꠞ ꠛꠣꠘ꠆ꠖꠤ ꠝꠤꠡꠞꠤ ꠢꠣꠎꠦꠞꠣꠞ ꠙꠦꠐꠅ ꠁꠛ꠆ꠞꠣꠢꠤꠝꠞ ꠙꠥꠀ ꠁꠍꠝꠣꠁꠟꠞ ꠎꠘꠝ ꠅꠁꠍꠤꠟ। 13ꠅꠃ ꠅꠁꠟ ꠁꠍꠝꠣꠁꠟꠞ ꠀꠅꠟꠣꠖꠞ ꠘꠣꠝ ꠀꠞ ꠉꠥꠡ꠆ꠐꠤꠞ ꠛꠄꠀꠘ। ꠔꠣꠘ ꠛꠠ ꠙꠥꠀꠞ ꠘꠣꠝ ꠘꠣꠛꠣꠃꠔ, ꠛꠣꠖꠦ ꠇꠣꠄꠖꠣꠞ, ꠅꠖꠛꠦꠟ, ꠝꠤꠛꠍꠝ, 14ꠝꠤꠡꠝꠣ, ꠖꠥꠝꠣ, ꠝꠣꠍꠣ, 15ꠢꠖꠖ, ꠔꠦꠝꠣ, ꠎꠤꠐꠥꠞ, ꠘꠣꠚꠤꠡ ꠀꠞ ꠇꠦꠖꠝꠣ। 16ꠁꠍꠝꠣꠁꠟꠞ ꠅꠃ ꠛꠣꠞꠅꠎꠘ ꠙꠥꠀ ꠀꠍꠟꠣ ꠛꠣꠞꠅ ꠉꠥꠡ꠆ꠐꠤꠞ ꠡꠞ꠆ꠖꠣꠞ। ꠔꠣꠞꠣꠞ ꠘꠣꠝꠞ ꠟꠣꠈꠣꠘ ꠢꠤ ꠉꠣꠃ ꠀꠞ ꠔꠣꠝ꠆ꠛꠥ ꠛꠤꠍꠣꠁꠟ ꠎꠣꠉꠣꠞꠅ ꠅꠃ ꠘꠣꠝ ꠅꠁꠍꠤꠟ। 17ꠁꠍꠝꠣꠁꠟꠞ ꠢꠣꠄꠀꠔ ꠄꠇ-ꠡ ꠡꠣꠠꠔꠤꠡ ꠛꠞꠍ ꠀꠍꠤꠟ, ꠢꠦꠡꠦ ꠔꠣꠁꠘ ꠝꠣꠞꠣ ꠉꠦꠟꠣ ꠀꠞ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠦꠟꠣꠉꠤ। 18ꠢꠛꠤꠟꠣ ꠕꠘꠦ ꠀꠡꠤꠞꠤꠀꠞ ꠛꠣꠄ ꠝꠤꠡꠞꠞ ꠍꠣꠝꠘꠞ ꠡꠥꠞ ꠙꠞ꠆ꠎꠘ꠆ꠔ ꠔꠣꠘ ꠀꠅꠟꠣꠖ ꠅꠇꠟ ꠞꠁꠔꠣ। ꠁꠍꠝꠣꠁꠟꠦ ꠔꠣꠘ ꠢꠇꠟ ꠜꠣꠁꠀꠁꠘ꠆ꠔꠞ ꠉꠣꠟꠣꠛꠣꠄ ꠞꠅꠀꠞ ꠎꠣꠉꠣ ꠙꠣꠁꠟꠣ।
ꠢꠎꠞꠔ ꠁꠍꠢꠣꠇ (ꠀ꠩) ꠀꠞ ꠔꠣꠘ ꠜꠣꠁ ꠡꠦꠈ ꠁꠡ
19ꠅꠃ ꠅꠁꠟ ꠁꠛ꠆ꠞꠣꠢꠤꠝꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘ-ꠘꠣꠝꠣ। ꠁꠛ꠆ꠞꠣꠢꠤꠝꠞ ꠊꠞꠅ ꠁꠍꠢꠣꠇꠞ ꠎꠘꠝ ꠅꠁꠟ। 20ꠁꠍꠢꠣꠇꠦ ꠌꠣꠟ꠆ꠟꠤꠡ ꠛꠞꠍ ꠛꠄꠅꠡꠅ ꠔꠣꠘ ꠝꠣꠝꠥꠞ ꠊꠞꠞ ꠛꠁꠘ ꠞꠦꠛꠦꠇꠣꠞꠦ ꠀꠘꠣꠁꠀ ꠛꠤꠀ ꠇꠞꠟꠣ। ꠞꠦꠛꠦꠇꠣ ꠅꠁꠟꠣ ꠙꠖ꠆ꠖꠘ-ꠁꠞꠣꠝ ꠖꠦꠡꠞ ꠅꠞꠣꠝꠤ ꠛꠕꠥꠄꠟꠞ ꠙꠥꠠꠤ, ꠅꠞꠣꠝꠤ ꠟꠣꠛꠘꠞ ꠛꠁꠘ। 21ꠔꠣꠘ ꠛꠃ ꠘꠤꠀꠅꠟꠣꠖꠤ ꠀꠍꠟꠣ ꠉꠔꠤꠇꠦ, ꠁꠍꠢꠣꠇꠦ ꠝꠣꠛꠥꠖꠞ ꠉꠦꠍꠦ ꠖꠥꠀ ꠇꠞꠟꠣ। ꠝꠣꠛꠥꠖꠦ ꠔꠣꠘ ꠖꠥꠀ ꠇꠛꠥꠟ ꠇꠞꠟꠣ, ꠀꠞ ꠞꠦꠛꠦꠇꠣꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠟ। 22ꠛꠣꠖꠦ ꠙꠦꠐꠞ ꠜꠤꠔꠞꠦ ꠢꠥꠞꠥꠔ꠆ꠔꠣꠄ ꠟꠠꠣ-ꠌꠠꠣ ꠇꠞꠣꠔ ꠟꠣꠉꠟꠣ। ꠅꠃ ꠔꠣꠁꠘ ꠇꠁꠟꠣ, “ꠀꠝꠣꠞ ꠙꠦꠐꠅ ꠁꠟꠣ ꠟꠣꠉꠦꠞ ꠇꠦꠘꠦ?” ꠇꠣꠞꠘ ꠎꠣꠘꠣꠞ ꠟꠣꠉꠤ ꠔꠣꠁꠘ ꠝꠣꠛꠥꠖꠞ ꠉꠦꠍꠦ ꠖꠥꠀ ꠇꠞꠟꠣ। 23ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠔꠥꠝꠣꠞ ꠙꠦꠐꠅ ꠖꠥꠁꠐꠣ ꠎꠣꠔꠤ ꠀꠍꠦ, ꠙꠦꠐꠅ ꠕꠘꠦꠃ ꠔꠣꠞꠣ ꠖꠥꠁ ꠛꠋꠡ ꠅꠁꠀ ꠙꠄꠖꠣ ꠅꠁꠛꠣ। ꠄꠇ ꠛꠋꠡ ꠕꠘꠦ ꠀꠞꠇ ꠛꠋꠡ ꠡꠇ꠆ꠔꠤꠀꠟꠣ ꠅꠁꠛ, ꠀꠞ ꠛꠠꠉꠥꠄ ꠢꠥꠞꠥꠉꠥꠞ ꠈꠦꠎꠝꠔ ꠇꠞꠛ।” 24ꠢꠥꠞꠥꠔ꠆ꠔꠣ ꠙꠄꠖꠣꠞ ꠛꠣꠟꠣ ꠖꠦꠈꠂꠘ, ꠢꠣꠍꠣꠃ ꠔꠣꠘ ꠙꠦꠐꠅ ꠎꠥꠠꠞ ꠙꠥꠀ। 25ꠙꠄꠟꠣ ꠎꠣꠞ ꠎꠘꠝ ꠅꠁꠟ ꠢꠦ ꠟꠣꠟ ꠞꠋꠉꠞ ꠀꠞ ꠔꠣꠞ ꠡꠞꠤꠟꠅ ꠙꠡꠝꠤ ꠇꠣꠙꠠꠞ ꠟꠣꠈꠣꠘ ꠞꠥꠝꠣꠄ ꠜꠞꠣ। ꠔꠣꠞ ꠘꠣꠝ ꠞꠣꠈꠟꠣ ꠁꠡ [ꠝꠣꠘꠤ, ꠞꠥꠝꠣꠀꠟꠣ]। 26ꠛꠣꠖꠦ ꠁꠡʼꠞ ꠙꠣꠅꠞ ꠝꠥꠞꠣꠔ ꠗꠞꠤ ꠔꠣꠞ ꠜꠣꠁꠞ ꠎꠘꠝ ꠅꠁꠟ, ꠄꠞ ꠘꠣꠝ ꠞꠣꠈꠟꠣ ꠁꠀꠇꠥꠛ [ꠝꠣꠘꠤ, ꠙꠣꠅꠔ ꠗꠞꠞꠣ]। ꠁꠍꠢꠣꠇꠞ ꠡꠣꠁꠐ ꠛꠞꠍ ꠛꠄꠅꠡꠅ ꠄꠞꠣ ꠎꠥꠠꠦ ꠙꠄꠖꠣ ꠅꠁꠟꠣ।
27ꠅꠃ ꠙꠥꠀꠂꠘ ꠛꠠ ꠅꠀꠞ ꠛꠣꠖꠦ ꠁꠡ ꠈꠥꠛ ꠜꠣꠟꠣ ꠡꠤꠇꠣꠞꠤ ꠀꠞ ꠝꠞꠥꠜꠥꠝꠤꠔ ꠙꠣꠇꠣꠅꠞꠣ ꠅꠁꠟꠣ, ꠅꠁꠟꠦ ꠁꠀꠇꠥꠛ ꠀꠍꠟꠣ ꠘꠤꠞꠣꠁ-ꠎꠤꠞꠣꠁ, ꠔꠣꠁꠘ ꠔꠣꠝ꠆ꠛꠥꠔ ꠕꠣꠇꠔꠣ। 28ꠡꠤꠇꠣꠞꠞ ꠉꠥꠡ꠆ꠔ ꠝꠎꠣ ꠟꠣꠉꠔ ꠇꠞꠤ ꠁꠍꠢꠣꠇꠦ ꠁꠡʼꠞꠦ ꠝꠣꠄꠀ ꠇꠞꠔꠣ, ꠀꠞ ꠞꠦꠛꠦꠇꠣꠄ ꠁꠀꠇꠥꠛꠞꠦ ꠝꠣꠄꠀ ꠇꠞꠔꠣ।
29ꠄꠇꠖꠤꠘ ꠁꠀꠇꠥꠛꠦ ꠒꠣꠁꠟ ꠞꠣꠘ꠆ꠖꠤꠍꠂꠘ, ꠅꠃ ꠡꠝꠄ ꠔꠣꠘ ꠛꠠ ꠜꠣꠁ ꠁꠡ ꠝꠞꠥꠜꠥꠝꠤ ꠕꠣꠇꠤ ꠙꠦꠐꠞ ꠜꠥꠇꠦ ꠈꠥꠛ ꠇꠣꠔꠞ ꠅꠁꠀ ꠀꠁꠟꠣ, ꠀꠁꠀ ꠢꠥꠞꠥ ꠜꠣꠁ ꠁꠀꠇꠥꠛꠞꠦ ꠇꠁꠟꠣ, 30“ꠜꠣꠁꠞꠦ, ꠀꠝꠣꠞ ꠈꠥꠛ ꠜꠥꠇ ꠟꠣꠉꠍꠦ। ꠔꠦ ꠅꠃ ꠞꠋꠉꠤꠟ, ꠞꠋꠉꠤꠟ ꠅꠔꠣ ꠀꠝꠣꠞꠦ ꠙꠦꠐ ꠜꠞꠤ ꠈꠣꠁꠔꠦ ꠖꠦ।” ꠅꠃ ꠇꠕꠣꠞ ꠟꠣꠉꠤ ꠔꠣꠘ ꠌꠤꠠ ꠟꠣꠉꠟ ꠁꠖꠥꠝ [ꠝꠣꠘꠤ, ꠞꠋꠉꠤꠟ]। 31ꠁꠀꠇꠥꠛꠦ ꠇꠁꠟꠣ, “ꠔꠣꠁꠟꠦ ꠛꠠ ꠜꠣꠁ ꠅꠀꠞ ꠝꠣꠟꠤꠇꠣꠘꠣ, ꠔꠥꠝꠤ ꠀꠁꠎ ꠀꠝꠣꠞ ꠉꠦꠍꠦ ꠛꠦꠌꠤꠟꠣꠅ।” 32ꠁꠡꠦ ꠇꠁꠟꠣ, “ꠖꠦꠈꠅ, ꠀꠝꠣꠞ ꠎꠣꠘ ꠛꠣꠞ ꠅꠁꠎꠣꠞ, ꠀꠞ ꠛꠠ ꠜꠣꠁꠞ ꠝꠣꠟꠤꠇꠣꠘꠣꠖꠤ ꠀꠞ ꠇꠤꠔꠣ ꠇꠞꠔꠣꠝ?” 33ꠁꠀꠇꠥꠛꠦ ꠇꠁꠟꠣ, “ꠀꠉꠦ ꠔꠥꠝꠤ ꠀꠝꠣꠞ ꠉꠦꠍꠦ ꠇꠍꠝ ꠇꠞꠅ।” ꠅꠃ ꠁꠡꠦ ꠇꠍꠝ ꠇꠞꠤꠀ ꠛꠠ ꠜꠣꠁ ꠅꠀꠞ ꠝꠣꠟꠤꠇꠣꠘꠣ ꠁꠀꠇꠥꠛꠞ ꠉꠦꠍꠦ ꠛꠦꠌꠤꠟꠣꠁꠟꠣ। 34ꠛꠣꠖꠦ ꠁꠀꠇꠥꠛꠦ ꠁꠡʼꠞꠦ ꠒꠣꠁꠟ ꠀꠞ ꠞꠥꠐꠤ ꠈꠣꠁꠔꠦ ꠖꠤꠟꠣ। ꠈꠣꠅꠀ-ꠖꠣꠅꠀ ꠇꠞꠤꠀ ꠔꠣꠁꠘ ꠃꠑꠤꠀ ꠉꠦꠟꠣꠉꠤ। ꠅꠃ ꠟꠣꠈꠣꠘ ꠁꠡꠦ ꠛꠠ ꠙꠥꠀ ꠅꠀꠞ ꠇꠥꠘꠥ ꠖꠣꠝꠃ ꠞꠣꠈꠟꠣ ꠘꠣ।
ទើបបានជ្រើសរើសហើយ៖
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 25: sylN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Ahle Kitab Society. All rights reserved.