Sam 32
32
Sam Kranzpnu-tq-nrade-li (32)
Nzawingr Mz Nzipqpxngr
Kzdq nzaongr drtwr kx yr Devet.
Naplzpxbzku Alwx Rgung Mz Yawe
1Doa kx nzipq mz alwx ngrde
Drtwrde elalz-zlwzm.
2Murde mz nzobqkr Yawe trvz-rbrpeu.
A' plzpxle alwx rdeng murde ma tqyc-kapq da kxtrka mz nabzde. #Rom 4:7-8
3Yawe, mzli kc tqpxtxpx-ngrne nzplzpx-krbo alwx rngeng bam,
Drtqnge satx zlwz mz nzetq-zvz-krde.
4X drtqnge tropx-pnzu mz nzayrplapx-krm ninge ngrlx x mz nrlckxbq.
X yangrngatxpex nzapu-krnge lxbi kcng tqngibr mz nepi.
5Pnzpe drtwrnge kx naplzpxbo alwx rngeng bam.
X mz nzplzpx-krboleng, trpnzngr kx yrlq-kapqbo bam.
Delc tqipqpe-ngrn ninge,
X katxpx-ngrbzme nzmrlepukr alwx rngeng amrlx.
6X nigr leplz nemqng nakrka'bzkr bam mzli ka.
Murde mzli kc nzkxpungr na-apune-ngrmle nrc kc tqoda,
Trtxpnzngr nzkrlz-krmlr nigr.
7Nim me rlakitrx x ayrbqpxq ninge mz da kxprtz.
Mzli lc tqxlrx nabz kxyrlvi kx nim nou nzrlapxngr.
Navz-nqblqku Natq Yawe
8Rpim Yawe kx, “Sa na-aelwa-ngrbo bam lrpzki kc nao-zliq,
Mz nzmailz-krnge nim.
9A' bzkq apuq hcsi kx narde mqngi,
Kx vz-nqblqle me pnz drtwr ncblo mz nqvi kcng tzpetrpz bade.”
10Kxdrka'-ngrng sa na-ayrplapxng mz alwx ngrdrng.
A' nigu kcng tqbrti drtwrgu Yawe sa namcku kx aodu-zvzle nigu.
11Nigu kxnztubqng na-angrlvz-ngrgu Yawe.
Na-abrtz-ngrgu nide.
ទើបបានជ្រើសរើសហើយ៖
Sam 32: ntu
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2008, Wycliffe Bible Translators, Inc. All rights reserved.