MAAKI 14
14
1Di daa kpalim la dabsa ayi ni Yakki-n‑Gaari Kyuu, kyuseaa ban diri bundiripaala maa - seesi an ka dabinni la. Ka gyeeŋŋu kpambaya ni zaaligu karimbadima maa daa boori sɔseaa ban nin zaŋŋi n‑sɔ'ai n‑gbaai Yisa n‑ku. 2Ni, “Ti di niŋi lala Kyuu maa zama sunsukkuni; tin mira ka niriba maa nin zabi.”
3Yisa mun daa bɛ la Bɛtani tinkpaŋŋa; u daa kpɛ la Saimoon yiri, ŋɔn daa nyɛ kunkɔŋŋa la. Ka ban daa ti dira, pɔ'asɔ daa mari turaali kɔlɔba n‑kpɛ na, turaali kpaam n‑daa la, ka bu mari la nyunya'asiri ka bu ligri zoaai pam. U daa ŋma kɔlɔba maa n‑kpaai kpaam maa n‑saari Yisa zugu. 4Ka ban daa bɛ bɛni maa seeba sufu daa yisigi, ka ba tɔ'asiri n‑tiri taaba, ni, “Bɔzugu ka u sa'am turaali wa? 5Ba yi da zaŋŋi bu n‑koosi, ligri pam naa n‑yi na ka lala ligri naa n‑toaai m‑puri n‑ti faradima!” Ka ba daa nyikki u lala. 6Ka Yisa yɛli ba, “Ya kyɛl u! Wula ka ya daamni u? U tum la din veela n‑ti ma. 7Ya kur nin mari faradima ya saani sahakam. Ya yi boori ya suŋŋi ba, ya nin nya soori. Amaa ya ku mari mani sahakam. 8Pɔ'a maa mun niŋi la hoo ŋɔn nyaŋŋi seem; u zaŋŋi turaali kpaam wa hoo ŋɔn daŋŋi n‑saari n niŋŋa n‑sɛ'asiri zaŋŋi n‑kyaŋŋi n kum sɔ'abu saha seem la. 9Yɛlimaŋni ka n yɛli ya, ni, ba yi ti mooli lahabasuŋŋu maa duniya wa lugri kam zaa, ba nin teaai pɔ'a wa yɛla n‑tɔ'asi n‑wulisi ŋɔn niŋi seem maa.”
10Ka Gyuudasi Isikariyɔti, ŋɔn daa nyɛ Yisa nyaandɔliba pii ni ayi maa yinni la, daa bakki n‑kyaŋŋi gyeeŋŋu kpambaya maa saani ni u ti figsi Yisa n‑ti ba. 11Ba sufu daa maaya ŋɔn daa yɛli ba lala yɛttɔ'a maa zugu, ka ba daa ti noori, ni, ba nin ti u ligri. Dizugu Gyuudasi daa piili m‑boori sɔsunseaa ŋɔn nin niŋi n‑zaŋŋi Yisa n‑ti ba.
12Kyuu maa dahinyinni, peesi kɔribu daari maa, ka Yisa nyaandɔliba daa boosi u, ni, “Yɛni ka i boori ni ti kyaŋŋi n‑kpɛ m‑maali Kyuu diibu siri n‑ti i?” 13Ka Yisa daa tum babayi, n‑yɛli ba, “Ya kpeem timpuuni. Ya yi ti kpeeri timpuuni maa, dɔsɔ nin paai ya na n‑ziiri koom. Yan dɔla u nyaaŋŋa 14n‑kyaŋŋi yiri seaa ŋɔn nin kpɛ la ni, ka kpɛ n‑yɛli yiri maa daana, ni, ya Karimba maa nin ti boosi u, ni, dukani ka ŋɔn ni u nyaandɔliba ya kpɛ n‑di ba Kyuu bundirigu? 15Ka u nin wulisi ya dutitaari gyirambisa zugu ka ba pun maali ka siri n‑zaali. Ya sɛ'asima bɛni ka guri ti.” 16Ka nyaandɔliba ayi maa daa yi n‑kyaŋŋi timpuuni, ka di daa niŋi ba hoo ŋɔn pun yɛli ba seem maa, ka ba daa sɛ'asi Kyuu maa siri. 17Zaanoori ŋɔn daa ti paai, Yisa ni u nyaandɔliba pii ni ayi maa daa paai na. 18Ka ban daa ti dira, Yisa daa yɛliya, “Yɛlimaŋni ka n yɛtti ya wa, ya yinni nin figsi ma n‑ti n dindaandima - ti ban la'am n‑diri wa yinni.” 19Ba sufu daa sa'amiya, ka ba daa boosiri u yinniyinni, “Mani, bee?” 20Ka u daa yɛli, “Di nyɛ la ya pii ni ayi wa yinni, man ni ŋɔn la'amni n‑sukkri laa yinni ni. 21Ninsaala Bii maa nin bakki n‑gaari hoo din pun sɔbi n‑zaali u zugu seem la. Amaa ŋɔn mun figsi Ninsaala Bii maa n‑kyɛ ka ba gbaai u - di tɔ n‑ti u! Ba yi daa kyɛ di daama dɔ'am, di naa n‑sɔa.”
22Tɔ; ka ban daa ti diri maa, u daa zaŋŋi diseebu m‑puusi Naawunni pɛ'abu ka ŋmaai n‑zaŋŋi n‑tisi ba ka yɛli, “Ya deaama; n ningbina nla.” 23Ka laa n‑zaŋŋi kɔbeaa m‑puusi Naawunni ka zaŋŋi n‑ti ba, ka ba zaa daa nyu ka puuni. 24U daa yɛli ba, “N ziim nla. N ziim wa nin ti yi na, ka di yiibu na nin kyɛ ka nangbanyinni zaalipaalli ti zaani, n‑tiri niriba pam. 25Yɛlimaŋni ka n yɛtti ya, n ku laa n‑nyu tiwala daam wa taabu yaasa, halli ni dindahinseaa man nin nyu di bumpaalli, Naawunni naam beesigu ni.”
26Ka ba daa yuum yuuma m‑pɛ'ari Naawunni. Ban daa yuum n‑naai maa, ba daa yi bɛni n‑kyaŋŋi nti paai Ɔlivii Zoori kpaŋŋa.
27Ka Yisa daa yɛli ba, “Ya zaa nin wurim ka kyɛ ma, vi zugu. Pa lala ka di daa sɔbi n‑dooli? - ni, ‘N nin ŋmɛ pɛgura maa ka peesi maa wurim.’ 28Amaa man yi ti doaai kum ni n nin daŋŋi ya tooni n‑kyaŋŋi Galilii tingbaŋŋu.” 29Ka Piita yɛli u, “Ba zaa yi ti wurim ka kyɛ i, vi zugu, man ku niŋi lala!” 30Ka Yisa yɛli u, “Yɛlimaŋni ka n yɛtti i wa, zuna yuŋŋu wa i mammaŋŋa nin kyiisi, ni, i zi ma; i nin ti yɛli lala napɔŋŋu buta pɔi, ka nɔroo naayi kum buyi.” 31Ka Piita labsi n‑yɛli ni nimmoaa, ni, “Halli di yi zaan kum ni, n ku kyiisi i.” Ka u taaba maa zaa gba daa yɛli lala.
32Ka ba daa kyaŋŋi m‑paai ya'aseelli ban boonni Gyɛtisamanni. Ka Yisa yɛli u nyaandɔliba maa, “Ya zinma kpa ka n kyaŋŋi n‑susi Naawunni ka kyɛ na.” 33U daa zaŋŋi la Piita ni Gyeemsi ni Gyɔni ka ba dɔli u, ka di daa mugsi u pam ka beerim daa gbaai u ka di daa wum u pam. Ka u daa yɛli ba, “Beerim din bɛ n sufu ni wa zoaaya pam, n‑ŋmanni din ya ku ma. Ya kpalimma kpa ka gura.” 34Sufusa'aŋŋu ni beerim daa gbaai u ka di daa wum u pam, ka u daa yɛli ba, “Beerim din bɛ n sufu ni wa zoaaya pam, n‑ŋmanni din ya ku ma. Ya kpalimma m‑bɛ kpa ka gura.” 35U daa kyaŋŋi tooni beela m‑paasi nti zaŋŋi u maŋŋa n‑gbaani tiŋŋa ka susiri n‑yɛtti, ni, di yi nin toaai, ni, namsigu wa ŋɔn gaari ka kyɛ u. 36Ka susi, ni, “Abba, m Ba, seelikam bu gaari i. Kyɛ ka namsigu kɔbeaa wa gaari ka kyɛ ma: di kyɛ ka n nyu di! Amaa di pa la man ŋɔn boori seem la, see nyin ŋɔn boori seem maa niŋma.” 37U daa labi na n‑nya, ka babata maa zaa daa gbisiri ni; ka u booli Piita, ni, “Saimoon, i gbisiri ni? I na'a ku toaai n‑gali goom halli saha beela?” 38Ka laa n‑yɛli ba zaa, ni, “Ya gura, ka susiri Naawunni ka lala nin kyɛ ka ba di zamsi ya halli ka ya ti lu. Ya sufu boori sakkri amaa ya ningbina ka yaa ka za'asiri ni.” 39Ka u daa laa m‑bakki n‑kyaŋŋi n‑laa n‑susiri lala yaasa. 40Ka ŋɔn daa laa n‑labi m‑paai na, ba daa gbisiri ni, dama ba nini daa mumni ni, dizugu ba daa bu mi ban ya labsi n‑yɛli u seem. 41Ŋɔn daa kyaŋŋi ka labi na napɔmbuta la, u daa yɛli ba, “Ya na kpalim n‑gbisiri ka vuusira?”. Ni, “Di sakkiya! Saha maa paaya. Ya nyama, ba pun yi n nyaaŋŋa ka figsi man Ninsaala Biiya n‑ti ala'akyi dima. 42Ya doaama ka ti kyaŋŋi! Minaafikka maa n kyɛnni na wa.”
43Ŋɔn daa na kur tɔ'asiri maa, Gyuudasi daa paai na, ŋɔn daa nyɛ u nyaandɔliba pii ni ayi la yinni yinni. Niriba pam daa dɔli u: ba daa yi la gyeeŋŋu kpambaya ni karimbadima ni kpamma saani na, ka ba daa mari ba takoobidima ni dɔya na. 44Minaafikka maa daa pun wulisi u nyaaŋŋa maa ŋɔn ya n‑niŋi seem n‑kyɛ ka ba baŋŋi Yisa, ni, “Man nin puusi sɔ suŋŋasuŋŋa la, ŋɔna nla. Ya gbaam u m‑mari suŋŋa n‑kyaŋŋi.” 45Ka dizugu Gyuudasi daa paai na nti kyaŋŋi yooma m‑paai Yisa saani, ka yɛli u, “N Karimba!” ka daa puusi u suŋŋasuŋŋa. 46Ka ba daa gbaai u kirikiri. 47Ka ban daa zɛ n‑tabi bɛni maa sɔ daa foaai u takoobi n‑kyɛ kpambaya bisɔ n‑ŋmaai u tubri m‑basi. 48Ka Yisa daa boosi ba, ni, “N nyɛ la ban zabra ka faari neema la sɔ, bee wula? - ka ya mari takoobidima ni dɔya wa n‑yi na ni ya gbaai ma dizugu? 49Beoo kam n daa yi bɛ la ya saani, n‑daa zintiri Gyeeŋŋu Yiri maa ni n‑wulisiri niriba, ka ya daa bu gbaai ma. Amaa see ka di siri niŋi hoo Naawunni Litaafi ŋɔn daa yɛli seem maa.” 50Ka ba zaa daa zɔ ka kyɛ u.
51Ka na'akyimbilisɔ n daa bɛ bɛni, u mun daa gɔbi kyinkyinni kɔkɔ n‑dɔli Yisa nyaaŋŋa. 52Ka ba daa gbaai bii wa, amaa u daa zɔ m‑bakki yɔri ka u kyinkyinni maa kpalim ba nuu ni.
53Ba daa mari Yisa n‑kyaŋŋi Gyeeŋŋu Toondaana saani, bɛni ka gyeeŋŋu kpambaya ni kpamma ni karimbadima maa zaa daa la'am na. 54Ka Piita daa sɔ'ai n‑dɔli Yisa nyaaŋŋa sa, halli nti kpɛ Toondaana maa dundɔŋŋu ni. U daa la'am la soogyadima maa saani n‑zi bɛni n‑wuusiri bugum. 55Kpamma maa, ni la'aŋŋu dima zaa, daa moori la ni ba nya sɛhara n‑galim Yisa ka ku u, amaa ba daa bu nya lala sɛhara. 56Sɛharadima pam daa yi na m‑ma'ai ziri, amaa a daa bu dɔli taaba. 57Ka baseeba daa doaai n‑naai noori ni ba ti ma'ai ziri anŋɔ taabu, ni ba ti kpeesi u yɛla ni, 58ni, “Ti daa wum ka u yɛli, ni, u nin sa'am Gyeeŋŋu Duseaa ninsaalidima ŋɔn mɛ maa, ka zaŋŋi daba ata m‑mɛ seaa niriba nuusi ŋɔn ku toaai m‑mɛa.” 59Ni di zaa ba sɛhara daa bu dɔli taaba deede. 60Di saha ka Gyeeŋŋu Toondaana maa daa doaai ba zaa tooni m‑boosi Yisa, ni, “I ka labsigu zaŋŋi n‑kyaŋŋi ban tiri yɛttɔ'aseesi m‑paari i wa?” 61Ka Yisa ŋɔn daa sina ka daa bu labsi n‑yɛli u seelli maa, Toondaana maa daa laa m‑boosi u n‑yɛli, “Nyini n nyɛ Masiiya ŋɔn ya fa ti m‑basi ka di naam la? Nyini n nyɛ Naawunni bii la?” 62Ka Yisa daa labsi, ni, “Mani nla; ka#:-
‘Ya nin nya Ninsaala Bii maa’
‘Ka u zi Naawunni Yaadaana maa nudirigu ya'ari’
‘Ka kyɛnni na ka saazugu sangbana gyiligi u.’ ”
63Ka Toondaana maa suuri daa yisigi, halli ka u daa toaai u mammaŋŋa sutura dizugu ka yɛli, “Ti bu laa m‑boori sɛharadima yaasa, bee bɔa? 64Ya bu wum ŋɔn tɔ'asiri yɛttɔ'aseesi an kyisiri wa? Ya teesi la wula?” Ka ba zaa daa yi Yisa nyaaŋŋa, ni, u niŋi taalli - taalli kan sumni la kuubu. 65Ba ninvugseeba daa piili n‑tusiri nantoori n‑saatiri Yisa, ka ba daa zaŋŋi bunni n‑vili u nini ka daa lɔbri u tampɛkka ka boosiri u, ni, “Nyin anabi wa, bugma m‑baŋŋi ŋɔn ŋmɛ i wa!” Ka soogyadima maa daa deaai u ka gba ŋmɛ u.
66Tɔ; di saha ka Piita daa na kpalim m‑bɛ tiŋni dundɔŋŋu maa puuni. Ka Gyeeŋŋu Toondaana yiri maa pɔ'asarisɔ daa kpɛ na 67n‑nya u ka u wuusiri bugum maa. Ka pɔ'asariga maa daa yɛli “Nyin gba yi bɛ la Yisa, Nazarɛti nira wa, saani!” 68Amaa u mun daa kyiisiya; ka daa yɛli, ni, “M bu mi! - M bu baŋŋi nyin tɔ'asiri yɛttɔ'aseesi wa gbinni!” Ka daa yi n‑kpɛ bunzɔŋŋu ni. Di saha maa ka nɔroo daa kum. 69Ka pɔ'asariga maa daa nya u bɛni ka daa laa m‑piili yaasa n‑yɛtti n‑tiri ban zɛ bɛni maa, ni, “Ŋɔnwa nyɛ la niriba wa yinni.” 70Ka Piita daa kyiisi yaasa. Din daa paasi beela, ban daa zɛ bɛni maa daa laa n‑yɛli Piita, ni, “I ku toaai n‑kyiisi, ni, i pa ba nyaandɔla, dama i gba yi la Galilii na.” 71Ka Piita daa piili m‑poori noori n‑yɛtti yɛlikyɔ'ama, ni, “M pɔya, ni, n yɛli la yɛlimaŋni. M bu mi dɔsɔ yan tɔ'asiri u yɛla maa!”
72Di saha maa ka nɔroo daa kum m‑paasi buyi, ka Piita teaai Yisa ŋɔn daa yɛli u seem la, ni, “I nin kyiisi ma napɔŋŋu buta pɔi, ka nɔroo naayi kum buyi.” Ka u daa zɔ n‑yi ka kumna.
ទើបបានជ្រើសរើសហើយ៖
MAAKI 14: maw
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2002, Wycliffe Bible Translators, Inc. All rights reserved.