LUUKI 4
4
1Yisa daa ti ya yi Gyɔdin mɔ'ari n‑labi na la, ka Naawunni Sii Kasi pun paali u ni. 2Ka Sii maa daa zaŋŋi u n‑taasi yoo ni sa ni u ti niŋi dapisinaasi; ka Sintaani daa zamsi u. Di saha maa u daa bu di bunseela halli ka kɔm ti naayi wum u yoo maa ni. 3Ka Sintaani daa yɛli u, ni, “I yi siri nyɛ la Naawunni biiya, i ku kyɛ ka kugri wa leebi bundirigu?” 4Ka Yisa labsi n‑yɛli u, ni, “Di pun sɔbi n‑dɔya, ni, pa bundirigu kɔkɔ zugu ka ninsaala bɛ ni.” 5Di nyaaŋŋa ka Sintaani daa zaŋŋi u n‑kyaŋŋi n‑duusi saazugu n‑wulisi u duniya puuni tinsi zaasa yooma. 6Ka Sintaani yɛli u, ni, “I bu baŋŋi, ni, mani n su anŋɔ zaa fukumsi? Ka man boori sɔ nuu ni ka n ya n‑zaŋŋi a n‑niŋi. 7Dizugu i yi sakki n‑gbaani n‑gyeem ma Naawunni gyeeŋŋu, n nin zaŋŋi anŋɔ zaa ni a bunveela zaa fukumsi n‑ti i, ka a ti nyɛ i dina.” 8Ka Yisa labsi n‑yɛli u, “Di pun sɔbi n‑dɔya, ni#:-
‘Naawunni yinni kɔkɔ
N sumsi gbaanigu ni gyeeŋŋu.
Ka Ŋɔna n nyɛ ya Dugma.’ ”
9Ka Sintaani daa laa n‑zaŋŋi u n‑kyaŋŋi Gyɛrusalɛm timpuuni ka zaŋŋi u n‑du n‑tɔm Naawunni Gyeeŋŋu Yiri saazugu sa, ka Sintaani yɛli, “I yi siri nyɛ la Naawunni biiya, i ku zaŋŋi i maŋŋa m‑basi tiŋŋa? 10Di pun bu sɔbi n‑dɔya, ni, Naawunni nin kyɛ ka u malaakadima kyɛ na n‑guri i? 11Ka laa n‑sɔbi, ni, ‘I yi ya lu, ba nin teebi i saazugu ba nuusi ni ka i napɔŋŋu ku tuui kugri.’ ” 12Ka Yisa labsi n‑yɛli u, ni, ba yɛliya, ni, “I di zamsiri i Dugma Naawunni.” 13Ka Sintaani ŋɔn daa yi zamsi u n‑naai maa, u daa bakki ni ka kyɛ u saha beela.
14Tɔ; ka di nyaaŋŋa ka Sii Kasi kpeeŋŋu daa paali Yisa maa ni, ka u labi Galilii tingbaŋŋu ni na. Ka bɛni tinkpansi maa, ni an zɛ gyilagyila zaa, daa wum u lahabaari maa. 15U daa kpeeri ba la'aŋŋu duri ni n‑wulisiri ba, ka ba zaa daa tiri u gyirima u yɛttɔ'a zugu.
16Ka Yisa daa paai Nazarɛti - ban daa wubsi u tinseaa la nla - ka Vuusim Dabsiri daari daa ti paai, ka u daa kpɛ ba la'aŋŋu duu ni hoo u soori ŋɔn daa kur nyɛ seem. 17N‑kpɛ bɛni, ka u daa yisigi n‑zaani ka ba zaŋŋi Anabi Aizaaya bukku la n‑ti u na ni u karim. Ka u daa lakki bukku maa ni u karim n‑ti ba. Ŋɔn daa lakki ka maa, u daa bɔ ya'aseaa kan daa wulisi, ni#:-
18“Ti Dugma Sii maa bɛ man saani,
Dama Ŋɔna n yiisi ma ni m mooli
N‑wulisi u lahabasuŋŋu maa n‑ti faradima.
Ka laa n‑tum ma ban gbaasi seeba saani
Ni n ti yɛli ba, ni, ban nin yiisi ba m‑basi.
Ni n kyɛm zoomma gba saani
N‑yɛli ba, ni, ba nini nin neaai.
Ni, ban mugsiri seeba yaasa nin nya soori
Ni ba ti su ba mansi.
19Lala maa n ya wulisi,
Ni, ti Dugma sahasuŋŋu maa paaya.”
20Ŋɔn karim lala n‑naai maa, u daa labsi n‑kpabi bukku maa ka zaŋŋi ka n‑tisi ka laa n‑zini. Ka ban daa zi duu maa ni maa zaa kur bɛ la u gɔsibu ni. 21Ka u daa piili n‑yɛli ba, ni, “Zuna, yan da wumni yɛla wa sahanseaa la, yɛla maa da kur niŋni yɛlimaŋni.” 22Ka sɔkam zaa daa pɛ'ari u, ka ŋɔn zaŋŋi yɛm ni nya'asim n‑tɔ'asiri u yɛttɔ'a maa seem n daa niŋi ba alahazibu pam. Baseeba boosiri taaba, ni, “Pa Gyoosɛfi bii n‑kur ŋɔa?” 23Ka dizugu ŋɔn mun daa labsi n‑yɛli ba, “Man kur mi halli, ni, ya nin teaai ma nyɛsiseaa yɛla - kan yɛtti, ni, ‘Nyin tiimaraana wa, kur tibma i maŋŋa!’, ni, ‘Tin daa wum ka i tum seem Kapirinyum tiŋŋa ni la, see ka i tum lala i mammaŋŋa tiŋŋa wa puuni!’ ” 24Ka u daa laa n‑yɛli ba, “Yɛlimaŋni ka n yɛtti ya wa, anabi zaa maŋtoori timbiisi n nyɛ ban bu sakki n‑deaari u. 25Amaa yɛlimaŋni ka n ya yɛli ya, Izraɛli pukɔya daa zoaai pam Anabi Ilaygya saha la, wari ŋɔn daa zaani yuuma ata ni gɔya ayoobu ka kɔm lu. 26Amaa Naawunni daa bu tum Ilaygya ni u kyaŋŋi pukɔya wa sɔsɔ saani, amaa pukɔsɔ ŋɔn daa bɛ Zarifaati tiŋŋa saani ka u daa tum u - tiŋŋa wa n kur bɛ Saidoon tingbaŋŋu ni. 27Yaasa m‑paasi: Gyuudii tingbaŋŋu ka kɔnsi daa zoaai pam Anabi Ilayseaa saha la, amaa ba sɔsɔ daa bu nya tippu, amaa Na'aman sɔ ŋɔn daa nyɛ Siriiya nira la ka ba daa tibi.” 28Tɔ; ka ban daa wum u yɛttɔ'a wa la'aŋŋu duu maa ni, ba zaa sufu daa yisigi ni 29ka ba daa zaŋŋi u n‑yiisi ba tiŋŋa maa ni, m‑mari u halli ni zɔpiisi zugu ni ba daai u n‑lusi n‑ku u, 30amaa u daa dɔli ba sunsukkuni n‑yi n‑kyaŋŋi ka kyɛ ba.
31Tɔ; ka Yisa daa kyaŋŋi n‑sigi m‑paai Kapirinyum - Galilii tingbaŋŋu tinseaa n nyɛ ka. U daa paai m‑bɛ ni, ka daa la'amni ni Kapirinyum dima n‑wulisiri ba, Vuusim Dabsiri kam zaa. 32Di daa niŋi ba alahazibu pam ŋɔn daa tɔ'asiri yɛttɔ'amaŋa la zugu, ka u bu birisiri halli beela. 33Ka dɔsɔ daa bɛ la'aŋŋu duu maa ni ka arizimbeoo daa kur bɛ u ni. Ka u daa kaasi pampam, ni, 34“Aah! Yisa, nyin Nazarɛti doo wa! Wula ka i ya m‑mukki ti? I kyɛnni na ni i ti sa'am ti, bee? M mi nyin nyɛ sɔa: ni, i nyɛ la ŋɔn nyɛ bunkasikasi ka yi Naawunni saani na!” 35Amaa Yisa daa nyikki u ka yɛli, “Sina i vuuri ka yi na ka kyɛ u!” Ka arizimbeoo maa daa tɔ doo maa n‑lusi u tiŋŋa, ba zaa sunsukkuni, ka yi na ka kyɛ u, ka sɛseelli bu niŋi doo maa. 36Ka di daa yi gyɛri ba zaasa ka ba yi yɛtti taaba, ni, “Ka yɛligu bɔ nŋɔa? U kur zaŋŋi yaa n‑tɔ'asiri u yɛttɔ'amaŋni n‑yɛtti arizimbeeri, ni, ba yim na, ka ba siri yiiri na, fimm!” 37Ka ŋɔn daa niŋi seem maa daa mooli n‑gyili bɛni tinsi maa ni, ni a tinkpansi zaa.
38Ka u daa yi la'aŋŋu duu maa ni n‑kpɛ Saimoon yiri. Di saha maa Saimoon deemma ka waari daa mara, ka u dɔya n‑gyigra, ka ba daa tɔ'asi n‑ti Yisa m‑boosi u zaŋŋi n‑kyaŋŋi pɔ'a maa yɛla. 39Ka u daa kpɛ n‑zaani u saani ka tasi dooru maa ka di yi ka kyɛ pɔ'a maa ka u daa doaai yooma n‑yi na n‑tum n‑ti ba.
40Tɔ; ka wuntaŋŋa ŋɔn daa ti lura, ka niriba pam daa zi ba baaridima n‑kyɛ u saani na, ka u zaŋŋi u nuusi m‑pa sɔkam zaa zugu, ka tibi ba. 41Ka arizimbeeri daa yi na ka kyɛ niriba pam, ka kur tasiri n‑yɛtti, ni, “Nyini n nyɛ Naawunni bii la!”, amaa u daa nyikki ba ni, ka bu sakki ni ba tɔ'asiri lala, dama ba daa baŋŋiya, ni, ŋɔna n nyɛ Masiiya, Naawunni ŋɔn tum sɔ la.
42Tɔ; ka beoo ŋɔn daa ti neaai, u daa yi timpuuni n‑kpɛ moo ni. Ka ba zaa daa bɔ m‑bɔ nti nya u, ka susiri u n‑yɛnni, ni, u di laa n‑kyaŋŋi seela ka kyɛ ba; 43amaa u daa yɛli ba, “Di nyɛ la talasi ni m mooli Naawunni naam lahabasuŋŋu n‑gyili, ka tinseesi an kpalim la zaa gba wum: dizugu ka Naawunni tum ma na.” 44Ka u daa doaai n‑kyaŋŋi Gyuudii tingbaŋŋu ni nti kpɛ ba la'aŋŋu duri ni n‑yiisiri wa'azu.
ទើបបានជ្រើសរើសហើយ៖
LUUKI 4: maw
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2002, Wycliffe Bible Translators, Inc. All rights reserved.
LUUKI 4
4
1Yisa daa ti ya yi Gyɔdin mɔ'ari n‑labi na la, ka Naawunni Sii Kasi pun paali u ni. 2Ka Sii maa daa zaŋŋi u n‑taasi yoo ni sa ni u ti niŋi dapisinaasi; ka Sintaani daa zamsi u. Di saha maa u daa bu di bunseela halli ka kɔm ti naayi wum u yoo maa ni. 3Ka Sintaani daa yɛli u, ni, “I yi siri nyɛ la Naawunni biiya, i ku kyɛ ka kugri wa leebi bundirigu?” 4Ka Yisa labsi n‑yɛli u, ni, “Di pun sɔbi n‑dɔya, ni, pa bundirigu kɔkɔ zugu ka ninsaala bɛ ni.” 5Di nyaaŋŋa ka Sintaani daa zaŋŋi u n‑kyaŋŋi n‑duusi saazugu n‑wulisi u duniya puuni tinsi zaasa yooma. 6Ka Sintaani yɛli u, ni, “I bu baŋŋi, ni, mani n su anŋɔ zaa fukumsi? Ka man boori sɔ nuu ni ka n ya n‑zaŋŋi a n‑niŋi. 7Dizugu i yi sakki n‑gbaani n‑gyeem ma Naawunni gyeeŋŋu, n nin zaŋŋi anŋɔ zaa ni a bunveela zaa fukumsi n‑ti i, ka a ti nyɛ i dina.” 8Ka Yisa labsi n‑yɛli u, “Di pun sɔbi n‑dɔya, ni#:-
‘Naawunni yinni kɔkɔ
N sumsi gbaanigu ni gyeeŋŋu.
Ka Ŋɔna n nyɛ ya Dugma.’ ”
9Ka Sintaani daa laa n‑zaŋŋi u n‑kyaŋŋi Gyɛrusalɛm timpuuni ka zaŋŋi u n‑du n‑tɔm Naawunni Gyeeŋŋu Yiri saazugu sa, ka Sintaani yɛli, “I yi siri nyɛ la Naawunni biiya, i ku zaŋŋi i maŋŋa m‑basi tiŋŋa? 10Di pun bu sɔbi n‑dɔya, ni, Naawunni nin kyɛ ka u malaakadima kyɛ na n‑guri i? 11Ka laa n‑sɔbi, ni, ‘I yi ya lu, ba nin teebi i saazugu ba nuusi ni ka i napɔŋŋu ku tuui kugri.’ ” 12Ka Yisa labsi n‑yɛli u, ni, ba yɛliya, ni, “I di zamsiri i Dugma Naawunni.” 13Ka Sintaani ŋɔn daa yi zamsi u n‑naai maa, u daa bakki ni ka kyɛ u saha beela.
14Tɔ; ka di nyaaŋŋa ka Sii Kasi kpeeŋŋu daa paali Yisa maa ni, ka u labi Galilii tingbaŋŋu ni na. Ka bɛni tinkpansi maa, ni an zɛ gyilagyila zaa, daa wum u lahabaari maa. 15U daa kpeeri ba la'aŋŋu duri ni n‑wulisiri ba, ka ba zaa daa tiri u gyirima u yɛttɔ'a zugu.
16Ka Yisa daa paai Nazarɛti - ban daa wubsi u tinseaa la nla - ka Vuusim Dabsiri daari daa ti paai, ka u daa kpɛ ba la'aŋŋu duu ni hoo u soori ŋɔn daa kur nyɛ seem. 17N‑kpɛ bɛni, ka u daa yisigi n‑zaani ka ba zaŋŋi Anabi Aizaaya bukku la n‑ti u na ni u karim. Ka u daa lakki bukku maa ni u karim n‑ti ba. Ŋɔn daa lakki ka maa, u daa bɔ ya'aseaa kan daa wulisi, ni#:-
18“Ti Dugma Sii maa bɛ man saani,
Dama Ŋɔna n yiisi ma ni m mooli
N‑wulisi u lahabasuŋŋu maa n‑ti faradima.
Ka laa n‑tum ma ban gbaasi seeba saani
Ni n ti yɛli ba, ni, ban nin yiisi ba m‑basi.
Ni n kyɛm zoomma gba saani
N‑yɛli ba, ni, ba nini nin neaai.
Ni, ban mugsiri seeba yaasa nin nya soori
Ni ba ti su ba mansi.
19Lala maa n ya wulisi,
Ni, ti Dugma sahasuŋŋu maa paaya.”
20Ŋɔn karim lala n‑naai maa, u daa labsi n‑kpabi bukku maa ka zaŋŋi ka n‑tisi ka laa n‑zini. Ka ban daa zi duu maa ni maa zaa kur bɛ la u gɔsibu ni. 21Ka u daa piili n‑yɛli ba, ni, “Zuna, yan da wumni yɛla wa sahanseaa la, yɛla maa da kur niŋni yɛlimaŋni.” 22Ka sɔkam zaa daa pɛ'ari u, ka ŋɔn zaŋŋi yɛm ni nya'asim n‑tɔ'asiri u yɛttɔ'a maa seem n daa niŋi ba alahazibu pam. Baseeba boosiri taaba, ni, “Pa Gyoosɛfi bii n‑kur ŋɔa?” 23Ka dizugu ŋɔn mun daa labsi n‑yɛli ba, “Man kur mi halli, ni, ya nin teaai ma nyɛsiseaa yɛla - kan yɛtti, ni, ‘Nyin tiimaraana wa, kur tibma i maŋŋa!’, ni, ‘Tin daa wum ka i tum seem Kapirinyum tiŋŋa ni la, see ka i tum lala i mammaŋŋa tiŋŋa wa puuni!’ ” 24Ka u daa laa n‑yɛli ba, “Yɛlimaŋni ka n yɛtti ya wa, anabi zaa maŋtoori timbiisi n nyɛ ban bu sakki n‑deaari u. 25Amaa yɛlimaŋni ka n ya yɛli ya, Izraɛli pukɔya daa zoaai pam Anabi Ilaygya saha la, wari ŋɔn daa zaani yuuma ata ni gɔya ayoobu ka kɔm lu. 26Amaa Naawunni daa bu tum Ilaygya ni u kyaŋŋi pukɔya wa sɔsɔ saani, amaa pukɔsɔ ŋɔn daa bɛ Zarifaati tiŋŋa saani ka u daa tum u - tiŋŋa wa n kur bɛ Saidoon tingbaŋŋu ni. 27Yaasa m‑paasi: Gyuudii tingbaŋŋu ka kɔnsi daa zoaai pam Anabi Ilayseaa saha la, amaa ba sɔsɔ daa bu nya tippu, amaa Na'aman sɔ ŋɔn daa nyɛ Siriiya nira la ka ba daa tibi.” 28Tɔ; ka ban daa wum u yɛttɔ'a wa la'aŋŋu duu maa ni, ba zaa sufu daa yisigi ni 29ka ba daa zaŋŋi u n‑yiisi ba tiŋŋa maa ni, m‑mari u halli ni zɔpiisi zugu ni ba daai u n‑lusi n‑ku u, 30amaa u daa dɔli ba sunsukkuni n‑yi n‑kyaŋŋi ka kyɛ ba.
31Tɔ; ka Yisa daa kyaŋŋi n‑sigi m‑paai Kapirinyum - Galilii tingbaŋŋu tinseaa n nyɛ ka. U daa paai m‑bɛ ni, ka daa la'amni ni Kapirinyum dima n‑wulisiri ba, Vuusim Dabsiri kam zaa. 32Di daa niŋi ba alahazibu pam ŋɔn daa tɔ'asiri yɛttɔ'amaŋa la zugu, ka u bu birisiri halli beela. 33Ka dɔsɔ daa bɛ la'aŋŋu duu maa ni ka arizimbeoo daa kur bɛ u ni. Ka u daa kaasi pampam, ni, 34“Aah! Yisa, nyin Nazarɛti doo wa! Wula ka i ya m‑mukki ti? I kyɛnni na ni i ti sa'am ti, bee? M mi nyin nyɛ sɔa: ni, i nyɛ la ŋɔn nyɛ bunkasikasi ka yi Naawunni saani na!” 35Amaa Yisa daa nyikki u ka yɛli, “Sina i vuuri ka yi na ka kyɛ u!” Ka arizimbeoo maa daa tɔ doo maa n‑lusi u tiŋŋa, ba zaa sunsukkuni, ka yi na ka kyɛ u, ka sɛseelli bu niŋi doo maa. 36Ka di daa yi gyɛri ba zaasa ka ba yi yɛtti taaba, ni, “Ka yɛligu bɔ nŋɔa? U kur zaŋŋi yaa n‑tɔ'asiri u yɛttɔ'amaŋni n‑yɛtti arizimbeeri, ni, ba yim na, ka ba siri yiiri na, fimm!” 37Ka ŋɔn daa niŋi seem maa daa mooli n‑gyili bɛni tinsi maa ni, ni a tinkpansi zaa.
38Ka u daa yi la'aŋŋu duu maa ni n‑kpɛ Saimoon yiri. Di saha maa Saimoon deemma ka waari daa mara, ka u dɔya n‑gyigra, ka ba daa tɔ'asi n‑ti Yisa m‑boosi u zaŋŋi n‑kyaŋŋi pɔ'a maa yɛla. 39Ka u daa kpɛ n‑zaani u saani ka tasi dooru maa ka di yi ka kyɛ pɔ'a maa ka u daa doaai yooma n‑yi na n‑tum n‑ti ba.
40Tɔ; ka wuntaŋŋa ŋɔn daa ti lura, ka niriba pam daa zi ba baaridima n‑kyɛ u saani na, ka u zaŋŋi u nuusi m‑pa sɔkam zaa zugu, ka tibi ba. 41Ka arizimbeeri daa yi na ka kyɛ niriba pam, ka kur tasiri n‑yɛtti, ni, “Nyini n nyɛ Naawunni bii la!”, amaa u daa nyikki ba ni, ka bu sakki ni ba tɔ'asiri lala, dama ba daa baŋŋiya, ni, ŋɔna n nyɛ Masiiya, Naawunni ŋɔn tum sɔ la.
42Tɔ; ka beoo ŋɔn daa ti neaai, u daa yi timpuuni n‑kpɛ moo ni. Ka ba zaa daa bɔ m‑bɔ nti nya u, ka susiri u n‑yɛnni, ni, u di laa n‑kyaŋŋi seela ka kyɛ ba; 43amaa u daa yɛli ba, “Di nyɛ la talasi ni m mooli Naawunni naam lahabasuŋŋu n‑gyili, ka tinseesi an kpalim la zaa gba wum: dizugu ka Naawunni tum ma na.” 44Ka u daa doaai n‑kyaŋŋi Gyuudii tingbaŋŋu ni nti kpɛ ba la'aŋŋu duri ni n‑yiisiri wa'azu.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2002, Wycliffe Bible Translators, Inc. All rights reserved.