Romaanos 5
5
Uvaʼs itxhusun Paʼp tiʼ kam vibʼaʼnil uvaʼ jit vet oʼ aj paʼvom vatz quBʼaal Tiuxh
1Echetz tiʼ u qukʼuqbʼat qukʼuul tiʼ quBʼaal JesuKriisto, tul jit vet oʼ aj paʼvom vatz quBʼaal Tiuxh. Echetz vet s-tiʼile at vet bʼaʼnil s-quxoʼl tuchʼ quBʼaal Tiuxh, tiʼ uvaʼ qat palk u quBʼaal JesuKriisto. 2Tul tiʼ uvaʼ qat palk quBʼaal JesuKriisto, atz tiʼ u qukʼuqbʼat qukʼuul s-tiʼ, tul ant vet oʼ at qokebʼal tiʼ vibʼaʼnil quBʼaal Tiuxh tiʼ ikuyt qupaʼv. Tul il oʼ txhabʼamal qatin t-vibʼaʼnil u quBʼaal Tiuxh. Echetz chiibʼoq oʼ, tan at vet vaʼl qutxʼebʼoʼm, tiʼ uvaʼ tetxhal bʼen atinoq oʼ kʼatz u quBʼaal Tiuxh tu nimla tatineʼ.
3Poro jitetz kuxh taʼn laʼ chiibʼik oʼ tiʼ u qutxʼebʼt qubʼen tu nimla tatin quBʼaal Tiuxh, pet chiibʼoqat oʼ kʼuxh nik qupal titzaʼlal tiʼ quqejt quBʼaal JesuKriisto. Tan qootzaqle, oq uvaʼ nik qupal t-invaʼq itzaʼlal, tul aʼl nik taqʼt vet qutial tiʼ ikʼuqeʼv qukʼuul tiʼ quBʼaal JesuKriisto.#2 Luʼ 1.6 4Oqetz tij vet oʼ kʼatz quBʼaal Tiuxh, tul kʼuxhetz laʼ ul itzaʼlal s-qiibʼa, tan laʼ koq oleʼv vet s-qiʼ. Pet aʼl ayaʼl qukʼuul nik qutxʼebʼt kam uvaʼ laʼ ibʼan u quBʼaal JesuKriisto s-quxoʼl. 5Tul bʼaʼn uvaʼ yeʼ laʼ qutanbʼa itxʼebʼex kam uvaʼ laʼ ibʼan u quBʼaal JesuKriisto s-quxoʼl, tan jit loqʼs koq kuxh nik qutxʼebʼeʼ. Pet qat ikʼutxh quBʼaal Tiuxh uvaʼ at taanima s-qiʼ, tiʼ taqʼt viTiuxhil tu qaanima.
6Tuulbʼaletz uvaʼ yeʼlaich qutxʼol vet qeleʼl tu paʼv s-qujunalil, tul kam vet quBʼaal JesuKriisto tiʼ inqʼa xaol, inqʼa yeʼ ootzaqin tetz quBʼaal Tiuxh. 7-8Pet aʼetz nik ikʼutxhvat u quBʼaal Tiuxh s-qe, tiʼ uvaʼ sibʼxh taanima s-qiʼ s-eche: Tan kʼuxhetz oʼichxh aj paʼvom, poro taqʼ tibʼ u quBʼaal JesuKriisto kamoq s-qiʼ. Kaʼlxh tzi laʼ txhej vaʼq xaol uvaʼ laʼ taqʼ tibʼ kamoq tiʼ invaʼq imol, kʼuxh jikxh vimol s-vatz. Atz maq keʼchoqxh laʼ itxʼolt invaʼq xaol taqʼt tibʼ kamoq tiʼ invaʼq vimol uvaʼ tira bʼaʼnxh itxumbʼal vimol s-te.
9Echetz vete uvaʼ s-txheel, tan aʼ vet u tel vikaqal quBʼaal JesuKriisto qat bʼanon uvaʼ jit vet oʼ aj paʼvom vatz quBʼaal Tiuxh. Oqetz qat oleʼv vikaqal, tiʼ uvaʼ jit vet oʼ aj paʼvom vatz quBʼaal Tiuxh, ¡aʼetz kol yeʼ laʼ oleʼvik vet quBʼaal JesuKriisto tiʼ qukolox vatz inqʼa kʼaxkʼo uvaʼ laʼ taqʼ quBʼaal Tiuxh! 10Kʼuxhetz nikich qutxhʼikʼuula u quBʼaal Tiuxh, pet aʼ vet vikamebʼal u quBʼaal JesuKriisto, viKʼaol quBʼaal Tiuxh, qat oleʼv tiʼ tok bʼaʼnil s-quxoʼl tuchʼ quBʼaal Tiuxh. Tiʼetz uvaʼ qat oleʼv u quBʼaal JesuKriisto tiʼ tok bʼaʼnil s-quxoʼl tuchʼ quBʼaal Tiuxh, ¡aʼetz kol yeʼ laʼ oleʼvik vet quBʼaal JesuKriisto tiʼ qukolox vatz u kʼaxbʼichil, tan itzʼeʼvnaʼq vet inpaqte tiʼ taqʼt qʼij qusaq uvaʼ yeʼl iyaʼebʼal imotxebʼal!
11Tul jitetz kuxh taʼne, pet nik quchiibʼ tuchʼ quBʼaal Tiuxh, tiʼ uvaʼ qat ibʼan u quBʼaal JesuKriisto. Taʼntiuxhetz te quBʼaal JesuKriisto, tiʼ uvaʼ qat oky vet u bʼaʼnil s-quxoʼl tuchʼ quBʼaal Tiuxh.
Uvaʼs itxhusun Paʼp, tiʼ uvaʼ kam jalbʼal tibʼ Adaan tuchʼ u quBʼaal Jesuus uvaʼs tul vatz txʼavaʼ
12Tan ech bʼanel taʼn s-eche: Vaʼl kuxh vinaqe paʼvini, aʼe Adaan. Tul tzitzi ixeʼt vet tzaan inqʼa xaol tiʼ ipaʼvin vatz u txʼavaʼ. Tul tiʼetz vet vipaʼvin inqʼa xaol, tul ul vet u kamchil s-tiibʼa. Echetz ikaj vete u kamchil tiibʼa jankʼal inqʼa xaol. Tan jankʼal vet inqʼa xaol pal ibʼoqo vet vipaʼvin Adaan. 13Yeʼnaqichetz aqʼel inqʼa bʼekʼbʼal, tul sebʼtich vet ipaʼvin inqʼa xaol vatz txʼavaʼ. Pet yeʼ toksa quBʼaal Tiuxh s-tuul vipaʼvin inqʼa xaol. 14Aʼetz xeʼtik vet tzaan ikam inqʼa xaol kʼatz Adaan, tetxhal tul kʼatz Moisees. Atz ulat vet u kamchil tiibʼa inqʼa xaol kʼuxh yeʼxhkam motx paʼvin tiʼ irinix invaʼq inqʼa bʼekʼbʼal, eche uvaʼ irint Adaan vibʼekʼbʼal quBʼaal Tiuxh. Tul antetz vet inqʼa xaol pal iqʼon kame uvaʼ ibʼan Adaan.
Echetz laʼich utxhi laʼ bʼanax eela Adaan tuchʼ vaʼt u Vinaq uvaʼ laʼich uli, aʼe u Kriisto.
15Pet jitoq nik ibʼan eela vibʼaʼnil quBʼaal Tiuxh tuchʼ vipalsan yolil Adaan uvaʼ pal iqʼon vet inqʼa xaol. Tan tiʼetz vipalsan yolil vaʼl vinaq, aʼe Adaan, tul ul vet u kamchil tiibʼa jankʼal inqʼa xaol, ¡aʼetz kol u kuybʼal uvaʼ oy kuxh qat taqʼt quBʼaal Tiuxh tiʼ vaʼt u Vinaq, aʼe u quBʼaal JesuKriisto, yeʼ laʼ oleʼv tiʼ ikuyux ipaʼv inqʼa xaol! Jitetz taʼn qat taqʼ quBʼaal Tiuxh u kuybʼal, pet tira ayaʼl ikʼuul qat taqʼ u oya te mamala xaol, tiʼ uvaʼ jit vet aj paʼvom vatz quBʼaal Tiuxh.
16Tul jitoq nik ibʼan eela u oya tetz quBʼaal Tiuxh tuchʼ vikantxhaqil inqʼa qat ex taqʼ vipaʼvin Adaan. Tiʼetz kuxh vipaʼvin Adaan, tul aʼ qat ex taqʼ vet vikuʼ yol tinuqul tiʼ jankʼal inqʼa xaol. Tul qat jaʼp vet u yol s-tiibʼa tiʼ ikʼaxbʼisaleʼ. Pet qatetz ul vet u oya tetz quBʼaal Tiuxh, tul jit vet aj paʼvom inqʼa xaol taʼn quBʼaal JesuKriisto, kʼuxh mamala paʼv qat ibʼan inqʼa xaol. 17Tan tiʼetz vipaʼvin vaʼl vinaq, aʼe Adaan, tul tetxhal kuxh laʼ kam vet jankʼal inqʼa xaol; aʼetz kol yeʼ laʼ bʼen ibʼanvat inqʼa xaol iqʼesalil tu qʼij saq uvaʼ yeʼl iyaʼebʼal imotxebʼal tiʼ kuxh vaʼt u Vinaq, aʼe u quBʼaal JesuKriisto. Aʼetz inqʼa xaole uvaʼ laʼ kʼulun vet inqʼa mam ibʼaʼnil tetz kuybʼal tiʼ vipaʼv, atz vaʼt u oya, aʼe, uvaʼ jit vet aj paʼvom inqʼa xaol vatz quBʼaal Tiuxh.
18Echetz tiʼ kuxh vaʼl vipaʼv Adaan, tul aqʼaxik vet jaʼp u yol tiibʼa jankʼal inqʼa xaol. Tul tiʼetz kuxh vaʼl u mam bʼaʼnil qat ibʼan u quBʼaal JesuKriisto, tul jankʼal vet inqʼa niman tetz Jesuus jit vet aj paʼvom vatz quBʼaal Tiuxh, atz at vet qʼij isaq uvaʼ yeʼl iyaʼebʼal imotxebʼal. 19Echetz tiʼ kuxh vipalsan yolil vaʼl vinaq, tul jankʼalxh vet inqʼa xaol motx ok vet s-aj paʼvom. Echetz tiʼat kuxh viniman vaʼl Vinaq, tul jit vet aj paʼvom mamala xaol laʼ ibʼan vatz quBʼaal Tiuxh.
20Taqʼetz vet quBʼaal Tiuxh inqʼa bʼekʼbʼal, tul aʼl iyakʼin vet inqʼa palsa yolil. Pet tiletz vet quBʼaal Tiuxh iyakʼin inqʼa paʼv, tul aʼletz ipal vet paʼl taqʼt quBʼaal Tiuxh vibʼaʼnil tiʼ ikuyux vipaʼv jankʼal inqʼa xaol. 21Kajetz vet ka u kamchil tiibʼa jankʼal inqʼa xaol taʼn u paʼv. Kametzxh ikaj vet u kamchil, tul echatetzxh ikaj vet ka u bʼaʼnile tiʼ ikuyux vipaʼv jankʼal inqʼa xaol. Tul jit vet aj paʼvom taʼn u quBʼaal JesuKriisto. Tul echatetzxh ikaj vet ka u bʼaʼnile s-tiibʼa taʼn JesuKriisto, u quBʼaal, tiʼ uvaʼ yeʼl iyaʼebʼal imotxebʼal qʼij isaq inqʼa xaol.
ទើបបានជ្រើសរើសហើយ៖
Romaanos 5: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
