Kuxh 11
11
Uvaʼs tokaʼp quBʼaal Jesuus tu tenam Jerusaleen
Tio 21.1-11; Luk 19.28-40; Xhun 12.12-19
1Bʼiitichetz kuxh taqʼbʼ Jesuus tuchʼ inqʼa nikich itxhus tibʼ s-kʼatza tu tenam Jerusaleen, tul aʼxh motx taqʼbʼ vet tu tal tenam Vetfajee, atz tu tal tenam Vetaania, atz vatz tzaan u vitz Inqʼa Oliivo.
Yaʼne itxhaq bʼen Jesuus kaʼvaʼl inqʼa nikich itxhus tibʼ s-kʼatza. 2Tul ech tal Jesuus s-te s-eche: —Bʼenoq ex, tul yekl ex tu tal tenam uvaʼ s-quvatz bʼen. Laʼetz aqʼbʼ ex, tul bʼen eleq val u bʼur, uvaʼ yaʼnxh txakunna, uvaʼ qitzel ka tzitzi, val uvaʼ yeʼxhabʼil invaʼxoʼq xaol jaʼ s-tiʼ. Echetz echiteʼ, tul laʼ etiqʼo tzaan. 3Oqetz jaʼl invaʼq xaol ech laʼ alon sete s-eche: «¿Kam s-tiʼil nik ebʼan s-eche?» oq chaq eʼl ex, tul ech laʼ etal s-eche: «Toq txakunsaloq txoo taʼn quBʼaal. Tul yek toq ul qaqʼ ka txoo inpaqte,» chaq ex, —xeʼt Jesuus.
4Bʼenetz vet inqʼa nikich itxhus tibʼ kʼatz Jesuus, tul ex ileq vet u bʼur, uvaʼ yaʼnichxh txakunna, qitzich ka vatz eluʼl vijubʼalil val u otzotz tziʼ bʼey. Tul ichitaq vet tzaan. 5Tul ech tal kaʼl u xaol uvaʼ atich tzitzi s-eche: —¿Kam s-tiʼil nik echit bʼen u bʼur? —xeʼtaqe.
6Yaʼne talaq vet u yol uvaʼ maʼtich talt bʼen Jesuus s-tiʼ. Tul kuyux vet itzaj u bʼur s-tiʼ.
7Tiqʼoaqetz vet tzaan u bʼur, tul ulaq taqʼ vet vatz Jesuus. Tul taqʼaq vet jaʼ inqʼa iqinkin txhas oksaʼm tiʼ u bʼur. Yaʼne jaʼ vet Jesuus s-tiʼ. 8Tul mamalaxh xaol eesan vet el inqʼa iqinkin bʼuʼq, uvaʼ txhasich ok s-tiʼ. Tul ilitʼaq vet kuʼ tibʼey Jesuus s-viqbʼal tiʼ toksal iqʼij Jesuus. Atz ataq xaol nikich ex tzokʼon tzaan qʼabʼaq tzeʼ t-vitz, eche xaq chʼiʼm. Tul nikichaq taqʼ kuʼ tibʼey Jesuus.
9Tul mam sichʼiʼm nikich motx ibʼan inqʼa xaol, jankʼalxh inqʼa bʼaxich vatz Jesuus, atz tuchʼ inqʼa txhʼuyich tzaan s-tiʼ. Tul ech nikich motx tal s-eche:
—¡Nik qoksa iqʼij!
¡At vibʼaʼnil quBʼaal Tiuxh tiibʼa
uvaʼ uy s-quxoʼl
tuchʼ vibʼij u quBʼaal Tiuxh!
10¡At vibʼaʼnil quBʼaal Tiuxh
tiʼ viqʼesalil uvaʼ toq ibʼan s-quxoʼl,
eche viqʼesalil
uvaʼ ibʼan u kʼuy qumam Daviid
s-naʼya!
Tul ¡taʼntiuxh te quBʼaal Tiuxh
uvaʼ sibʼ at jaʼp t-amlikaʼ!
—chichich isichʼin inqʼa xaol.#2 Samueel 7.26-29; Saalmo 118.26
11Okaʼpetz vet Jesuus tu tenam Jerusaleen, tul yekich vet ok tu nimla atibʼal tuulbʼal u tostiuxh. Tul motx kuxh til Jesuus jankʼal inqʼa nikich tutxh tuulbʼal u tostiuxh. Yaʼne bʼen vet Jesuus tuchʼ kabʼlaval inqʼa nikich itxhus tibʼ s-kʼatza tu tenam Vetaania, tan toqnaʼqich qʼeqxoq veteʼ.
Uvaʼs talt quBʼaal Jesuus itzaq val u tzeʼ, u iigo uvaʼ yeʼlich ivatz
Tio 21.18-19
12Echetz vet s-eqal, tul tzaj Jesuus tuchʼ inqʼa nikich itxhus tibʼ s-kʼatza tu tenam Vetaania. Tul kamyichxh vet Jesuus t-vaʼy. 13Tul til Jesuus viʼl u iigo s-naatxh uvaʼ oqxhich itxhaʼxal itzaj ixaq. Tul ex tiloʼk Jesuus. Tan aʼ titzʼa Jesuus uvaʼ atich ivatz. Aqʼbʼetz Jesuus kʼatz u iigo, tul yeʼlich bʼak ivatz. Pet taʼn kuxh ixaq atiche, tan jitich iqʼiil ivatzineʼ.
14Yaʼne ech tal Jesuus te u iigo s-eche: —¡Yeʼxhabʼil vet invaʼq laʼ itxhoqʼ tibʼ tiʼ avatz! —xeʼt Jesuus. Tul tabʼi inqʼa nikich itxhus tibʼ kʼatz Jesuus u yol.{*}#11.14 ¿Kam nik elkaʼp u yol tal quBʼaal Jesuus, tiʼ uvaʼ?: —¡Yeʼxhabʼil vet invaʼq laʼ itxhoqʼ tibʼ tiʼ avatz! —xeʼt quBʼaal Jesuus. Eche u tzeʼ u iigo, tan aʼ nik elkaʼpun tiʼ inqʼa tij imam Israeel. Pet vivatz u iigo, tan aʼ nik elkaʼpun uvaʼ, yeʼl vaʼq bʼaʼnil nikich ileq quBʼaal Tiuxh kʼatz inqʼa tij imam Israeel. Tan aʼ kuxh nikich motx ibʼaneʼ uvaʼ jitichxh tuchʼ taanima nikich motx inatxhkʼuulavat quBʼaal Tiuxh. Apokaliipsis 2.5 Atz aʼat nik elkaʼpun uvaʼ, yeʼl vet quBʼaal Tiuxh laʼ kʼuqeʼv ikʼuul tiʼ inqʼa tij imam Israeel. Tan jit aʼ nik motx ikʼutxheʼ uvaʼ taʼn u Itzʼlichla Tiuxh u quBʼaal Tiuxh. Echetz s-tiʼile teesa el quBʼaal Tiuxh kʼuqlebʼal ikʼuul s-tiʼ. Romaanos 9.32-33 Tul aʼ itxhok vet quBʼaal Tiuxh inqʼa apoostol, atz inqʼa niman tetz Jesuus, uvaʼ nuqxh laʼ tal tiʼ inatxhkʼuulal Tiuxh. Tan aʼ vet inqʼae, laʼ paxsan inqʼa bʼaʼnla txhaq yole tiʼ quBʼaal Jesuus.
Uvaʼs itilut eluʼl quBʼaal Jesuus inqʼa nikich ikʼayineʼ, atz inqʼa nikich iloqʼon tuulbʼal u tostiuxh
Tio 21.12-17; Luk 19.45-48; Xhun 2.13-22
15Aqʼbʼetz vet Jesuus tuchʼ inqʼa nikich itxhus tibʼ s-kʼatza tu tenam Jerusaleen inpaqte, tul pal vet ok Jesuus tu nimla atibʼal tuulbʼal u tostiuxh. Yaʼne xeʼt Jesuus tiʼ itilul eluʼl inqʼa nikich ikʼayineʼ, atz inqʼa nikich iloqʼon tuulbʼal u tostiuxh. Tul ivampu el Jesuus imeexha inqʼa nikich motx jalon puaq. Atz ivampu el Jesuus ixhiila inqʼa nikich motx kʼayin paraamuxh.{*}#11.15 ¿Kam s-tiʼil itilu eluʼl quBʼaal Jesuus inqʼa nikich ikʼayineʼ? Tiʼ uvaʼ tan, jitich kʼayibʼal u nimla atibʼal tuulbʼal u tostiuxh. Tul tal quBʼaal Jesuus uvaʼ jitichxh ikʼulel uvaʼ nikich ibʼan vet inqʼa xaol tiʼ ikʼayin tuul u nimla atibʼal tu tostiuxh. At vaʼt u yaabʼla txumbʼal til quBʼaal Jesuus uvaʼ nikich tutxh tuulbʼal u nimla atibʼal tu tostiuxh. Tan nikich ikuy vet inqʼa iqʼesal uqʼeʼybʼal tutxh subʼuʼm tu tostiuxh, jankʼal eche tiʼ ikʼayil inqʼa txoo uvaʼ nikich itzʼeʼsal ok vatz Tiuxh, eche inqʼa paraamuxh, karneʼl, tzentun tuchʼ vaʼk. Tan sibʼichxh vet ijaʼmil nikich motx tal inqʼa yakonal. Tan ataqich vet iyol inqʼa oksan yol tuchʼ inqʼa yakonal. Tul at vaʼt yaabʼla txumbʼal nikich ibʼan inqʼa nikich motx jalon puaq. Tan sibʼxh nikich motx itxʼak tiʼ ijalax inqʼa puaq. Tan aʼ nikich motx ibʼan inqʼa iqʼesal oksan yol vatz Tiuxh, uvaʼ tira yeʼ nikich motx ikʼul inqʼa puaq tetz Rooma, uvaʼ ‹denaarioich› ibʼij, atz uvaʼ ‹draakma,› chichich eʼli. Pet taʼnxh nikich motx ikʼul u puaq u ‹siiklo,› u tetzichxh inqʼa tij imam Israeel. Xaʼtetze tetxhal kuxh laʼich motx ijal inqʼa xaol inqʼa ipuaq tiʼ ipaloʼk, atz maq tiʼ iloqʼon tu nimla atibʼal tuulbʼal u tostiuxh. Echetz s-tiʼile tira lakp iviʼ quBʼaal Jesuus te vitxumbʼal inqʼa xaol, inqʼa nikich motx ikʼayin tu nimla atibʼal tuulbʼal u tostiuxh. Tan jitich aʼ nikich motx titzʼa inatxhax Tiuxh, pet aʼ kuxh vet eenich taanima tiʼ itxʼakax puaq. 16Tul yeʼ ikuy vet Jesuus ipaloʼk inqʼa xaol tuchʼaq inqʼa kamaq tetz tu nimla atibʼal tuulbʼal u tostiuxh.
17Yaʼne xeʼt Jesuus txhusun. Tul ech tal Jesuus s-eche: —¿Yeʼetz kol etootzaqle?, uvaʼ ech u yol tzʼibʼamal ka t-viyolbʼal quBʼaal Tiuxh s-eche:
«U votzotz,
tan aʼ itxaʼk s-natxhkʼuulabʼ vetz
taʼn inqʼa tenam s-kaqaayil
laʼ ibʼana,»
xeʼt quBʼaal Tiuxh.
Pet aʼetz ex, inqʼa elqʼom, tan ex qat aqʼon bʼen s-kolbʼal tibʼ elqʼom, —xeʼt Jesuus.#Isaiias 56.7; Jeremiias 7.11{*}#11.17 ¿Kam s-tiʼil tal quBʼaal Jesuus inqʼa xaol s-elqʼom inqʼa nikich ikʼayin tu tostiuxh? Aʼetz s-tiʼile, tan sibʼ nikich ijaq tiʼ invaʼq kam uvaʼ nikich ikʼayi. Tan jit taʼn koq nik tabʼi vijaʼmil u kam, pet sibʼ tel nik ipalsa s-tiʼ. Aʼetz vet uvaʼ elaqʼ nikich elkaʼp vete, tan nikich kuxh isubʼux tzaqatz xaol taʼn. Taletz quBʼaal Jesuus tiʼ vijulil elqʼom, tan aʼ tiqʼo tzaan quBʼaal Jesuus tiʼ viyol, tiʼ val u jul tal uvaʼ nikich ex ikʼonivat ka inqʼa elqʼom inqʼa kam nikich ex telqʼa. Tan ech nikich ibʼane inqʼa elqʼom tuulbʼal uvaʼs atich quBʼaal Jesuus vatz txʼavaʼ. Isaiias 56.7; Jeremiias 7.11
18Tabʼietz vet inqʼa iqʼesal xoʼl inqʼa tij imam Israeel kam uvaʼ ibʼan Jesuus, aʼe inqʼa oksan yol vatz Tiuxh, atz inqʼa nikich txhusun ibʼekʼbʼal inqʼa qumol s-tijaq imam Israeel. Tul xeʼtaq vet tiʼ itxhokox txumbʼal tiʼ iyatzʼax el Jesuus. Poro nikichaq ixoʼv te Jesuus, tiʼ uvaʼ aalatxh inqʼa xaol nikich ikaj taanima tiʼ vitxhusun Jesuus. 19Qʼeqxetz veteʼ, tul el vet bʼen Jesuus tu tenam Jerusaleen tuchʼ inqʼa nikich itxhus tibʼ s-kʼatza, tul yekichaq tu tal tenam Vetaania.
Uvaʼs itzaq u iigo uvaʼ yeʼlich ivatz
Tio 21.19-22
20Echetz vet s-eqal s-qʼalaʼm, tul pal Jesuus inpaqte kʼatz u iigo. Tul til vet inqʼa nikich itxhus tibʼ s-kʼatza uvaʼ tira maʼtich itzaq vet u iigo tuchʼ taqʼil. 21Uletz vet s-kʼuul Luʼ, tul ech tal Luʼ te Jesuus s-eche: —Txhusul qetz, saqi. Qat bʼak tzaqy u iigo, uvaʼ aal ka yol s-tiʼ s-evete, —xeʼt Luʼ te Jesuus.
22Tul ech tal Jesuus s-eche: —Kʼuqbʼavaqxh ekʼuul tiʼ quBʼaal Tiuxh tiʼ kam uvaʼ laʼ ejaq s-te. 23Tan nuqxh nik val sete: Jabʼilxh invaʼq ex uvaʼ ech laʼ etal te u vitz s-eche: «Elen el tzitza, tul een bʼenk axh xeʼ u maar,» chaq ex te u vitz, oqetz laʼ eqeja uvaʼ laʼxh elaʼpun kam uvaʼ laʼ etala, tul echxh laʼ ibʼane. 24Echetz nik valte sete, jankʼalxh uvaʼ laʼ etabʼi te quBʼaal Tiuxh uvaʼs laʼ enatxht quBʼaal Tiuxh, oqetz laʼ ekʼuqbʼa ekʼuul uvaʼ laʼ aqʼax sete, tul laʼxh ekʼula. 25Tuulbʼaletz uvaʼs laʼ enatxht quBʼaal Tiuxh, tul kamal laʼ ul sekʼuul uvaʼ bʼanel invaʼq yeʼbʼaʼn sete taʼn invaʼq emol. Tul laʼ ekuy ipaʼv. Echetz laʼ ikuy sotzsal vepaʼve taʼn u quBʼaal Tiuxh uvaʼ tu amlikaʼ. 26[Tan oq yeʼ laʼ ekuy ipaʼv inqʼa emol, tul yeʼlatetz vepaʼv laʼ ikuy sotzsa quBʼaal Tiuxh uvaʼ tu amlikaʼ,] —xeʼt Jesuus.
Uvaʼs yeʼ itxhabʼat vet inqʼa fariseeo itzaqʼbʼel quBʼaal Jesuus tiʼ inqʼa yol ijotxhʼi s-te
Tio 21.23-27; Luk 20.1-8
27Yaʼne aqʼbʼ Jesuus tuchʼ inqʼa nikich itxhus tibʼ s-kʼatza tu tenam Jerusaleen inpaqte. Sebʼtichetz ixaon Jesuus tu nimla atibʼal tuulbʼal u tostiuxh, tul aqʼbʼ inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa qumol s-tijaq imam Israeel, atz tuchʼ jolt inqʼa iqʼesal u tenam.
28Tul ech motx tal te Jesuus s-eche: —¿Tal qat tzajk vaviqleʼm aaʼn, tul nik abʼan inqʼa kam inqʼae? Atz ¿jaʼl qat alon see uvaʼ, aʼ vet axh, iqʼesal, tul nik abʼan inqʼa kam inqʼae? —xeʼtaq te Jesuus.
29Yaʼne ech tal Jesuus s-eche: —Ape. Toqatetz vabʼi val u yol sete s-bʼaxa. Oqetz toq etzaqʼbʼe u yol uvaʼ toq vabʼi sete, tul echatetz toq intzaqʼbʼete veyol, tiʼ jaʼl qat aqʼon viqleʼm tiʼ uvaʼ nik inbʼaneʼ. 30¿Jaʼletz aqʼon tiqleʼm naq u Xhun tiʼ taqʼax kuʼ inqʼa xaol xeʼ aʼ nik enatxheʼ? ¿Maq quBʼaal Tiuxh, uvaʼ tu amlikaʼ? Pet ¿maq xaol kuxhtuʼ? ¡Tzaqʼbʼetaqetz in! —xeʼt Jesuus.
31Yaʼne motx iyol vet inqʼa iqʼesal u tenam u yol s-vatzaq. Tul ech motx tal s-eche: —Oq toq qaleʼ uvaʼ: «QuBʼaal Tiuxh aqʼon tiqleʼm naq u Xhun,» chaq oʼ, tul: «¿Keʼchetz yeʼ eqejt naq bʼa?» toq tal naq s-qe. 32Pet oq ech toq qal s-eche: «Naq kuxhte inqʼa xaol aqʼon tiqleʼm naq u Xhun,» oq toq qaleʼ, tul yeʼ laʼ isaʼa, —xeʼt inqʼa iqʼesal s-vatzaq. Tan nikich motx ixoʼv inqʼa iqʼesal te u tenam. Tan jankʼalxh inqʼa xaol ootzaqinich tetz uvaʼ qʼexsanich tetz viyolbʼal quBʼaal Tiuxh Xhun.
33Yaʼne ech motx tal te Jesuus s-eche: —Yeʼ qootzaqle jabʼil aqʼon tiqleʼm Xhun, —xeʼtaqe.
Tul ech tal Jesuus s-eche: —Aʼatetz koq in laʼ alon sete jaʼl nik aqʼon viqleʼm tiʼ inqʼa nik inbʼaneʼ, —xeʼt Jesuus.{*}#11.33 ¿Kam s-tiʼile yeʼ tal quBʼaal Jesuus u tiqleʼm te inqʼa iqʼesal uqʼeʼybʼal? Tiʼ uvaʼ oq laʼich tal quBʼaal Jesuus uvaʼ quBʼaal Tiuxh txhaqon tzaan, tul yeʼlich laʼ inima inqʼa iqʼesal uqʼeʼybʼal. Tan alam aanimaich kuxh quBʼaal Jesuus s-vatz. Tan aʼ nikich motx titzʼa tiʼ quBʼaal Jesuus uvaʼ quBʼaal Jesuus yeʼ nikich niman u bʼekʼbʼal uvaʼ tal ka Moisees, tiʼ uvaʼ yeʼxhabʼil invaʼq laʼ kuxh tal tibʼ s-Tiuxh. Atz vaʼte uvaʼ, kʼuxh mamala kuxh laʼich tal quBʼaal Jesuus s-te, atz kʼuxh kam tel kuxh laʼich ikʼutxh quBʼaal Jesuus s-vatz, tan aʼaq yeʼlich laʼ niman. Eche uvaʼ nik tal quBʼaal Jesuus tu Luk 22.67-69. Echetz s-tiʼile yeʼ tal quBʼaal Jesuus, tan tiʼ inqʼa tialaq ikʼuul, atz tiʼ uvaʼ txhabʼamichaq kuxh vet tok tiviʼ kam inqʼa qeichaq taʼn.
ទើបបានជ្រើសរើសហើយ៖
Kuxh 11: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.