Vibʼanoʼm inqʼa Apoostol 27
27
Uvaʼs taqʼax vet bʼen Paʼp tu mam tenam Rooma tuulbʼal Itaalia
1Yaʼne ijeqbʼa vet Feesto viyol tiʼ qok bʼen tuul vaarko viʼ maar tiʼ qubʼen vet tuulbʼal Itaalia. Tul oksal vet bʼen Paʼp tuchʼ jolt inqʼa pereexho tiqʼabʼ val viqʼesal sol uvaʼ Juulioich ibʼij. Tul Auguustaich ibʼij intanul oʼkʼalal (100) inqʼa sol uvaʼ nikich ibʼan Juulio iqʼesalil s-xoʼl. 2Yaʼne ok vet bʼen oʼ tuul val u vaarko uvaʼ een tzajnaʼqich tu tenam Adramiitio. Tul aʼ kʼaqich taʼn u vaarko uvaʼ nimal kuxh tenam tziʼ maar laʼich palka, inqʼa tenam uvaʼ at tuulbʼal Aasia. Yaʼne bʼen vet oʼ. Aʼich qumol Aristaarko, u niman tetz Jesuus, atz u aj tenam Tesaloonika, tuulbʼal Masedoonia.
3Echetz vet eqal, tul aqʼbʼ vet oʼ tu tenam Sidoon. Tul ibʼan Juulio, u qʼesal sol, bʼaʼnil te Paʼp tiʼ ikʼutxht Juulio uvaʼ at taanima Juulio tiʼ Paʼp. Tan ikuy Juulio ibʼen Paʼp soli tetz inqʼa niman tetz Jesuus tu tenam Sidoon. Opoonetz Paʼp tiʼ ijaqax bʼaʼnil te inqʼa niman tetz Jesuus, tiʼ uvaʼ laʼich kʼuulal Paʼp taʼn.
4Yaʼne el vet bʼen oʼ tu tenam Sidoon, tul ok txhan vet bʼen oʼ inpaqte viʼ maar. Tul ech qupal vet tiibʼa u txʼavaʼ Chiipre uvaʼ at okaʼp tuul u maar tiʼ qukolt qibʼ vatz u kaqiqʼ. Tan aʼl nikich tul vet u kaqiqʼ s-quvatz. 5Yaʼne ech qupal paʼl titziʼ u maar tuulbʼal Siliisia, atz tuulbʼal Panfiilia tetxhal qopoon tu tenam Miira tuulbʼal Liisia.
6Yaʼne tzitzi itxhokvat vet viqʼesal sol val u vaarko uvaʼ, aʼ kʼaqich tuulbʼal Itaalia taʼn. Aʼetz tzajnaʼqich u vaarko tu tenam Alejandriia. Yaʼne ok vet bʼen oʼ s-tuul. 7Tul sibʼal qʼij qubʼana. Tan qʼoon kuxh qopoon tu tenam Gniido, tiʼ uvaʼ tan, aʼl nikich tul u kaqiqʼ s-quvatz. Eletz vet bʼen oʼ tu tenam Gniido, tul ech qupal vet txala tuul u txʼavaʼ Kreeta uvaʼ at okaʼp tuul maar. Tan xoʼvebʼalichxh vet tul u kaqiqʼ s-qukʼatza. Echetz tetxhal kuxh ech qupal vet txala u tenam Salmoon. 8Tul ech qupal titziʼ u txʼavaʼ Kreeta. Aloq tzaʼlxh qupal tzitzi, tan aʼl nikich tul u kaqiqʼ s-quvatz. Yaʼne opoon vet oʼ tu tal tenam uvaʼ Bʼaʼnla Kʼulbʼal Tibʼ Vaarko ibʼij. Tul naq kuxh atich el u tenam uvaʼe kʼatz u nimla tenam Laseea.
9Poro sibʼal qʼij maʼtich tiqʼot vet u quxaoneʼ, atz, tiʼ uvaʼ xoʼvebʼalich vet u viʼ maar uvaʼ kʼaqich vet qaʼn, echetz s-tiʼile tal vet Paʼp uvaʼ laʼich kuxh kaj oʼ tzitzi, atz laʼ nalich pal tuulbʼal u txun txheʼv. Atz echetz talt Paʼpe, tiʼ uvaʼ tan, oktuuvreich veteʼ, maʼtich ipal vet paʼl u nimla qʼij xoʼl inqʼa tij imam Israeel uvaʼs nikich motx imaqt itxʼaʼon tiʼ inatxhax Tiuxh tetz u nimla qʼij Jaqbʼal Kuybʼal. Tul inatxhonsa Paʼp te inqʼa imol, inqʼa atich ok tu vaarko. 10Tul ech tal Paʼp te inqʼa aj etz vaarko s-eche: —Txa vinaq, nik inatxhp s-ve uvaʼ tzaʼl toq qupal viʼ u maar tu vaarko oq laʼ bʼen oʼ s-txheel. Tan toq tzʼeqonoq oʼ taʼn u mam kaqiqʼ; toq tzʼeqxoq inqʼa iqatz inqʼa iqʼomal taʼn u vaarko. Atz toq yanoq u vaarko. Tul echat kuxh oʼ paqte, tan avoqe kam laʼ qubʼana, —xeʼt Paʼp.
11Tul jit ech titzʼa u qʼesal sole. Tan aʼl talt u qʼesal sol uvaʼ nal laʼich motx ibʼen u vaarko. Tan ech nikich tale u qʼiʼol vaarko tuchʼ u aj etz vaarko. Jitetz ech uvaʼe tal Paʼp s-te. Tul aʼl yeʼ motx iqejt viyol Paʼp. 12Tul atich bʼiil viyanaʼsul tal uvaʼ txakatxhik u vaarko, u iqʼonich tetz Paʼp. Tan ipalebʼalichxh kaqiqʼ atila. Tul jitich ikʼulel uvaʼ laʼich atin u vaarko tzitzi jatvoʼq ichʼ tiʼ itxʼebʼex ipal u txun txheʼv. Echetz s-tiʼile sibʼal inqʼa xaol inqʼa atich ok tu vaarko motx alon uvaʼ laʼich motx ok bʼen paqte viʼ maar. Tan aʼ motx titzʼa uvaʼ bʼaʼn uvaʼ bʼiit kuxh laʼich motx ixaja tul laʼich opoon tu tenam Feniise tuulbʼal Kreeta. Tul bʼaʼnetz laʼich tatin ka u vaarko tzitzi. Tan kaʼpaqʼil nikich kʼulunk u kʼulbʼal vaarko. Paqʼil itziʼ aʼlich ijaʼeʼ; atz paqʼit itziʼ aʼlich ikuʼeʼ. Tul tzitzi laʼich motx itxʼebʼvat ipal iqʼiil u txun txheʼv uvaʼ motx tala. Tul bʼenaq veteʼ.
Uvaʼs tul val u mam kaqiqʼ jabʼal
13Yaʼne josqʼil kuxh ixeʼt vet val u kaqiqʼ iykabʼoq uvaʼ aʼlen nikich ijaʼul. Aʼetz motx titzʼa inqʼa qʼiʼol vaarko uvaʼ bʼaʼnich kuxhtuʼ, tan aʼl nikich ijaʼul u kaqiqʼ. Yaʼne tiqʼoaq vet jaʼul u txhʼitxhʼ, u txeybʼal ka tetz u vaarko tuul u maar. Tul xeʼt vet bʼen u vaarko xaon titziʼ eluʼl u txʼavaʼ Kreeta. 14Bʼiilichetz kuxh tel tzaan u vaarko, tul ul vet vaʼt u mam kaqiqʼ jabʼal uvaʼ aʼlen ikuʼl xoʼl inqʼa txʼavaʼ uvaʼ aʼl ijaʼeʼ. Tul ul vet vatz u vaarko. Tul aʼxh xoʼvebʼalla kaqiqʼ jabʼale uvaʼ yaʼtix ilixi. 15Tul tira bʼen vet u vaarko taʼn u mam kaqiqʼ jabʼal. Tul yeʼ oleʼv vet u qʼiʼol tetz tiʼ ixajsal bʼen u vaarko vatz u kaqiqʼ. Pet qutxʼaqmiaq kuxh veteʼ tal laʼich iqʼolik vet oʼ taʼn u mam kaqiqʼ jabʼal. 16Tul ok vet bʼen oʼ viʼ maar, tul qukol vet qibʼ tinuq u txʼavaʼ Klaauda vatz u mam kaqiqʼ jabʼal, u txʼavaʼ Klaauda uvaʼ at okaʼp tuul u maar. Tul tetxhalxh qubʼan yaʼl tiʼ qiqʼot jaʼul u tal vaarko uvaʼ qitzich bʼen txala tuul u nimla vaarko, tul qaqʼ jaʼul tuul u nimla vaarko.
17Maʼtichetz qiqʼot vet jaʼul u tal vaarko tuul u nimla vaarko, tul aʼ vet u iqvil qutxakunsa tiʼ ijekʼex u tuul u nimla vaarko. Yaʼne motx qeesa vet el u chelkin bʼuʼq tivatz u vaarko, echetz yeʼlich laʼ tiqʼol vete u vaarko taʼn u kaqiqʼ. Tan nikich ixoʼva inqʼa qʼiʼol tetz u vaarko vipaxit ok tibʼ u vaarko viʼ vimusanil u maar. Tul qutxʼaqmiaq kuxh veteʼ tal laʼich iqʼolik oʼ taʼn u mam kaqiqʼ jabʼal. 18Tul mij nikich iyaʼ u xoʼvebʼalla kaqiqʼ jabʼal, pet aʼ itiʼn u vaarko taʼne tuulbʼal vaʼl aqʼbʼal. Echetz vet s-eqal, tul xeʼtaq vet inqʼa qʼiʼol vaarko tiʼ ikʼonil ka inqʼa iqatz tu maar. 19Titoxvichetz vet qʼij, tul mij nikich iyaʼ u xoʼvebʼalla kaqiqʼ jabʼal. Tul motx kʼonil vet ka inqʼa kam xeʼ u maar, inqʼa nik itxakun te u vaarko. Tul ant oʼ motx kʼonin ka. Tul txhʼoʼlisal vet tiqatz u vaarko tzij. 20Tul tira yeʼ nikich iyaʼ u xoʼvebʼalla kaqiqʼ jabʼal. Tul sibʼal qʼij uvaʼ tira yeʼl qʼij nikich qil veteʼ. Tul jitoq txʼumil nikich qil vet s-aqʼbʼal. Tul oʼ yeʼ nikich itzʼan vet bʼeeq uvaʼ laʼich elaʼp oʼ tibʼaʼnil. Pet aʼ nikich qitzʼa vet qukameʼ.
21Tul sibʼalich vet qʼij qutxʼaʼoneʼ. Yaʼne txakp Paʼp. Tul ech tal Paʼp s-eche: —Txa, enima koqxhte u yol uvaʼ val sete. Tul yeʼl koq oʼ el tzaan oʼ tu tenam Kreeta, tul yeʼlebʼ oʼ qat pal oʼ tu kʼaxkʼo. Atz yeʼ qat tzʼeqon oʼ. 22Pet toq val sete: Yeʼ kuxh vet xoʼv ex, atz yeʼ txumun vet ex, tan yeʼxhabʼil invaʼq oʼ toq kamoq oʼ. Pet taʼn kuxh toq qutzʼeq u vaarko. 23Tan tuulbʼal u aqʼbʼal s-txheelaʼ qat vila uvaʼ at val viaanxel u quBʼaal Tiuxh sinkʼatza, u quBʼaal Tiuxh uvaʼ atoʼk in tiqʼabʼ, atz uvaʼ nik innatxhkʼuula.
24Tul ech qat tal u aanxel s-ve s-eche: «Paʼp, yeʼ kuxh xoʼv axh, tan tetxhal nik abʼen vatz u mam iqʼesal tu mam tenam Rooma. Tan seʼe tul yeʼl inqʼa xaol toq kamoq, inqʼa at sakʼatza tu vaarko,» chich s-ve. 25Echetz yeʼ xoʼv vet ex, tan nik inkʼuqbʼa inkʼuul tiʼ quBʼaal Tiuxh uvaʼ echxh toq ibʼan, eche uvaʼ qat ul tal u aanxel s-ve. 26Tul tetxhal kuxh bʼen taqʼ oʼ u vaarko t-invaʼq txʼavaʼ uvaʼ at okaʼp tuul u maar, —xeʼt Paʼp xoʼl inqʼa xaol uvaʼ atich ok tu vaarko.
27Aʼetzxh tel vet kajlaval aqʼbʼal uvaʼ nikich kuxh qutxʼaqmii tiqʼol vet u vaarko taʼn u xoʼvebʼalla kaqiqʼ jabʼal. Tul aʼ bʼak nikich palk vet oʼ tu maar uvaʼ Adriaatiko ibʼij. Aʼetzxh itxhaqʼaan vet aqʼbʼal, tul bʼen vet bʼiil te inqʼa qʼiʼol vaarko uvaʼ naqich vet kʼatz val u txʼavaʼ uvaʼ at okaʼp tuul u maar. 28Yaʼne taqʼaq vet bʼen val u pajbʼal xeʼ u maar. Tul tilaq veteʼ uvaʼ viinqitich jaj atich koʼp u txʼavaʼ. Ixaetz vet u vaarko inbʼiite, tul taqʼaq txhan vet bʼen u pajbʼal ikaʼpaq xeʼ u maar. Tul tilaq veteʼ uvaʼ oʼlavatich kuxh vet jaj atich koʼp u txʼavaʼ. 29Yaʼne motx taqʼ vet koʼp kajvaʼl txeybʼal ka tetz tiʼ iqul u vaarko xeʼ u maar, tan nikich motx ixoʼva ipaxit ok tibʼ u vaarko tiʼ u txʼavaʼ. Tul nalich koq kuxh isaqbʼeʼ nikich motx tal veteʼ.
30Yaʼne titzʼa vet inqʼa nikich taqʼonv tu vaarko itzʼeqtaq tibʼ. Tul xeʼtaq vet tiʼ taqʼax koʼp u tal vaarko tu maar inpaqte, tan aʼaqich isaʼ tok bʼen s-tuul. Tul nikich kuxh motx ibʼan vatz uvaʼ, eche aʼ inqʼa txeybʼal tetz u vaarko uvaʼ atoʼk s-vatz, nikich motx ibʼan ipal kuʼ tuul u maar.
31Yaʼne ech tal Paʼp te viqʼesal sol, atz te inqʼa sol s-eche: —Oqetz toq itzʼeq tibʼ u qʼiʼol tetz u vaarko tuchʼ inqʼa imol, tul kamchiletz vet etetz, —xeʼt Paʼp te inqʼa sol.
32Yaʼne nal kuxh itzokʼ vet inqʼa sol u iqvil, u txeyolich tetz u tal vaarko. Tul txhaqp vet bʼen u tal vaarko viʼ maar.
33Aʼetzxh saʼich isaqbʼ veteʼ, tul tal Paʼp qutxʼaʼoneʼ, jankʼal oʼ inqʼa atich ok oʼ tu vaarko. Tul ech tal Paʼp s-eche: —Kajlavax vet qʼij uvaʼ txʼebʼoʼm kuxh al oʼ tiʼ kam toq yaʼk oʼ s-qukaqaayil. Tul yeʼl oʼ nik qutxʼaʼoneʼ. 34Pet bʼanvaq bʼaʼnil, tul txʼaʼonoq oʼ. Tul at quyakʼil laʼ ibʼana, tan yeʼxhabʼil invaʼq oʼ toq kamoq oʼ, —xeʼt Paʼp s-quxoʼl.
35Yaʼetz kuxh vet Paʼp tiʼ talax u yol uvaʼe, tul tiqʼo tzaan Paʼp val u paan. Tul ech quvatz taqʼ Paʼp taʼntiuxh te quBʼaal Tiuxh s-tiʼ. Tul ipixh Paʼp u paan s-tuul. Tul itxʼaʼ vet Paʼp. 36Yaʼne kʼuqatxhaq vet qukʼuul taʼn u yol uvaʼ tal Paʼp. Tul xeʼtaq vet oʼ txʼaʼon paqte. 37Tul kaʼvaʼl sieen tuchʼ vaqlaval imutxʼ (276), oʼ inqʼa atich ok oʼ tuul u vaarko. 38Maʼtichetz iyaʼ vet qutxʼaʼoneʼ, tul motx kʼonil vet ka inqʼa triigo xeʼ u maar taʼn inqʼa qʼiʼol vaarko tiʼ itxhʼoʼlisal talal tiqatz u vaarko, tan aʼaqich isaʼ uvaʼ yeʼ laʼ pal kuʼ u vaarko jaqʼ u maar.
Uvaʼs ipax vet u vaarko
39Saqbʼetz veteʼ, tul til vet inqʼa qʼiʼol tetz vaarko val u txʼavaʼ. Poro yeʼ nikich motx ibʼen s-te talaq atich veteʼ. Pet taʼn kuxh nikich isaqi vet eluʼl vitziʼ u maar uvaʼ xoʼlamich taʼn txʼavaʼ tal uvaʼ atich musan uvaʼ txhaqʼaalaichxhtuʼ. Yaʼne iyolaq veteʼ uvaʼ tetxhal kuxh een laʼich bʼenk u vaarko txakeʼvoq viʼ u musan tixoʼl u txʼavaʼ oq laʼich itxʼol taqʼbʼ tzitzi. 40Yaʼne motx itzokʼaq vet el inqʼa ikʼaʼil kajvaʼl inqʼa txeybʼal tetz u vaarko tuul u maar. Tul motx taqʼ vet ka xeʼ u maar. Tul motx itzokʼeʼl inqʼa qitzbʼal tetz u qʼiʼbʼal vaarko, tiʼ uvaʼ laʼich motx utxh iqʼiʼtaq bʼen u vaarko. Yaʼne motx toksa vet jaʼ u bʼuʼq tivatz u vaarko inpaqte tiʼ ikʼulux u kaqiqʼ. Tul aʼ nikich ikʼaq vet u vaarko vitziʼ u txʼavaʼ tal uvaʼ atich inqʼa musan. 41Poro ech koqe, tan tira ex itxʼap bʼen tibʼ vijuʼ u vaarko xoʼl musan. Tul tira yeʼ tiʼn vet u vaarko. Tul il vet u tiʼ iqul u vaarko nikich ixeʼt eʼpoq taʼn vipumlut ok tibʼ u maar s-tiʼ.
42Yaʼne iyol vet inqʼa sol s-vatzaq iyatzʼax el inqʼa pereexho, tan aʼ nikich motx ixoʼva uvaʼ nuʼximal laʼich itzʼeqt tibʼ inqʼa pereexho.{*}#27.42 ¿Kametz s-tiʼil aʼ nikich titzʼa vet inqʼa sol iyatzʼax el inqʼa pereexho? Aʼetz s-tiʼil tan, oq jaʼl vaʼq pereexho nikich itzʼeqeʼl tibʼ, tul aʼ vet inqʼa sol nikich ikuʼebʼe. 43Poro yeʼ ikuy viqʼesal sol kam uvaʼ nikich titzʼa inqʼa sol, tan yeʼich isaʼ uvaʼ laʼich kameʼl Paʼp. Echetz jatvaʼl inqʼa nikich txʼolon nuʼx, tul bʼekʼex ipaleʼl s-bʼaxa tziʼeʼl u maar taʼn viqʼesal sol. 44Pet jolt inqʼa pereexho, inqʼa yeʼ nikich txʼolon nuʼx, tan aʼl motx ibʼanbʼe aqʼin tzeʼ tiʼ inuʼxaq elaʼpun tziʼ u maar. Atz at inqʼa, aʼ motx ibʼanbʼe inqʼa yalaq ipaʼxil u vaarko tiʼ inuʼxaq elaʼpun. Tul yeʼxhabʼil invaʼq kami.
ទើបបានជ្រើសរើសហើយ៖
Vibʼanoʼm inqʼa Apoostol 27: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
Vibʼanoʼm inqʼa Apoostol 27
27
Uvaʼs taqʼax vet bʼen Paʼp tu mam tenam Rooma tuulbʼal Itaalia
1Yaʼne ijeqbʼa vet Feesto viyol tiʼ qok bʼen tuul vaarko viʼ maar tiʼ qubʼen vet tuulbʼal Itaalia. Tul oksal vet bʼen Paʼp tuchʼ jolt inqʼa pereexho tiqʼabʼ val viqʼesal sol uvaʼ Juulioich ibʼij. Tul Auguustaich ibʼij intanul oʼkʼalal (100) inqʼa sol uvaʼ nikich ibʼan Juulio iqʼesalil s-xoʼl. 2Yaʼne ok vet bʼen oʼ tuul val u vaarko uvaʼ een tzajnaʼqich tu tenam Adramiitio. Tul aʼ kʼaqich taʼn u vaarko uvaʼ nimal kuxh tenam tziʼ maar laʼich palka, inqʼa tenam uvaʼ at tuulbʼal Aasia. Yaʼne bʼen vet oʼ. Aʼich qumol Aristaarko, u niman tetz Jesuus, atz u aj tenam Tesaloonika, tuulbʼal Masedoonia.
3Echetz vet eqal, tul aqʼbʼ vet oʼ tu tenam Sidoon. Tul ibʼan Juulio, u qʼesal sol, bʼaʼnil te Paʼp tiʼ ikʼutxht Juulio uvaʼ at taanima Juulio tiʼ Paʼp. Tan ikuy Juulio ibʼen Paʼp soli tetz inqʼa niman tetz Jesuus tu tenam Sidoon. Opoonetz Paʼp tiʼ ijaqax bʼaʼnil te inqʼa niman tetz Jesuus, tiʼ uvaʼ laʼich kʼuulal Paʼp taʼn.
4Yaʼne el vet bʼen oʼ tu tenam Sidoon, tul ok txhan vet bʼen oʼ inpaqte viʼ maar. Tul ech qupal vet tiibʼa u txʼavaʼ Chiipre uvaʼ at okaʼp tuul u maar tiʼ qukolt qibʼ vatz u kaqiqʼ. Tan aʼl nikich tul vet u kaqiqʼ s-quvatz. 5Yaʼne ech qupal paʼl titziʼ u maar tuulbʼal Siliisia, atz tuulbʼal Panfiilia tetxhal qopoon tu tenam Miira tuulbʼal Liisia.
6Yaʼne tzitzi itxhokvat vet viqʼesal sol val u vaarko uvaʼ, aʼ kʼaqich tuulbʼal Itaalia taʼn. Aʼetz tzajnaʼqich u vaarko tu tenam Alejandriia. Yaʼne ok vet bʼen oʼ s-tuul. 7Tul sibʼal qʼij qubʼana. Tan qʼoon kuxh qopoon tu tenam Gniido, tiʼ uvaʼ tan, aʼl nikich tul u kaqiqʼ s-quvatz. Eletz vet bʼen oʼ tu tenam Gniido, tul ech qupal vet txala tuul u txʼavaʼ Kreeta uvaʼ at okaʼp tuul maar. Tan xoʼvebʼalichxh vet tul u kaqiqʼ s-qukʼatza. Echetz tetxhal kuxh ech qupal vet txala u tenam Salmoon. 8Tul ech qupal titziʼ u txʼavaʼ Kreeta. Aloq tzaʼlxh qupal tzitzi, tan aʼl nikich tul u kaqiqʼ s-quvatz. Yaʼne opoon vet oʼ tu tal tenam uvaʼ Bʼaʼnla Kʼulbʼal Tibʼ Vaarko ibʼij. Tul naq kuxh atich el u tenam uvaʼe kʼatz u nimla tenam Laseea.
9Poro sibʼal qʼij maʼtich tiqʼot vet u quxaoneʼ, atz, tiʼ uvaʼ xoʼvebʼalich vet u viʼ maar uvaʼ kʼaqich vet qaʼn, echetz s-tiʼile tal vet Paʼp uvaʼ laʼich kuxh kaj oʼ tzitzi, atz laʼ nalich pal tuulbʼal u txun txheʼv. Atz echetz talt Paʼpe, tiʼ uvaʼ tan, oktuuvreich veteʼ, maʼtich ipal vet paʼl u nimla qʼij xoʼl inqʼa tij imam Israeel uvaʼs nikich motx imaqt itxʼaʼon tiʼ inatxhax Tiuxh tetz u nimla qʼij Jaqbʼal Kuybʼal. Tul inatxhonsa Paʼp te inqʼa imol, inqʼa atich ok tu vaarko. 10Tul ech tal Paʼp te inqʼa aj etz vaarko s-eche: —Txa vinaq, nik inatxhp s-ve uvaʼ tzaʼl toq qupal viʼ u maar tu vaarko oq laʼ bʼen oʼ s-txheel. Tan toq tzʼeqonoq oʼ taʼn u mam kaqiqʼ; toq tzʼeqxoq inqʼa iqatz inqʼa iqʼomal taʼn u vaarko. Atz toq yanoq u vaarko. Tul echat kuxh oʼ paqte, tan avoqe kam laʼ qubʼana, —xeʼt Paʼp.
11Tul jit ech titzʼa u qʼesal sole. Tan aʼl talt u qʼesal sol uvaʼ nal laʼich motx ibʼen u vaarko. Tan ech nikich tale u qʼiʼol vaarko tuchʼ u aj etz vaarko. Jitetz ech uvaʼe tal Paʼp s-te. Tul aʼl yeʼ motx iqejt viyol Paʼp. 12Tul atich bʼiil viyanaʼsul tal uvaʼ txakatxhik u vaarko, u iqʼonich tetz Paʼp. Tan ipalebʼalichxh kaqiqʼ atila. Tul jitich ikʼulel uvaʼ laʼich atin u vaarko tzitzi jatvoʼq ichʼ tiʼ itxʼebʼex ipal u txun txheʼv. Echetz s-tiʼile sibʼal inqʼa xaol inqʼa atich ok tu vaarko motx alon uvaʼ laʼich motx ok bʼen paqte viʼ maar. Tan aʼ motx titzʼa uvaʼ bʼaʼn uvaʼ bʼiit kuxh laʼich motx ixaja tul laʼich opoon tu tenam Feniise tuulbʼal Kreeta. Tul bʼaʼnetz laʼich tatin ka u vaarko tzitzi. Tan kaʼpaqʼil nikich kʼulunk u kʼulbʼal vaarko. Paqʼil itziʼ aʼlich ijaʼeʼ; atz paqʼit itziʼ aʼlich ikuʼeʼ. Tul tzitzi laʼich motx itxʼebʼvat ipal iqʼiil u txun txheʼv uvaʼ motx tala. Tul bʼenaq veteʼ.
Uvaʼs tul val u mam kaqiqʼ jabʼal
13Yaʼne josqʼil kuxh ixeʼt vet val u kaqiqʼ iykabʼoq uvaʼ aʼlen nikich ijaʼul. Aʼetz motx titzʼa inqʼa qʼiʼol vaarko uvaʼ bʼaʼnich kuxhtuʼ, tan aʼl nikich ijaʼul u kaqiqʼ. Yaʼne tiqʼoaq vet jaʼul u txhʼitxhʼ, u txeybʼal ka tetz u vaarko tuul u maar. Tul xeʼt vet bʼen u vaarko xaon titziʼ eluʼl u txʼavaʼ Kreeta. 14Bʼiilichetz kuxh tel tzaan u vaarko, tul ul vet vaʼt u mam kaqiqʼ jabʼal uvaʼ aʼlen ikuʼl xoʼl inqʼa txʼavaʼ uvaʼ aʼl ijaʼeʼ. Tul ul vet vatz u vaarko. Tul aʼxh xoʼvebʼalla kaqiqʼ jabʼale uvaʼ yaʼtix ilixi. 15Tul tira bʼen vet u vaarko taʼn u mam kaqiqʼ jabʼal. Tul yeʼ oleʼv vet u qʼiʼol tetz tiʼ ixajsal bʼen u vaarko vatz u kaqiqʼ. Pet qutxʼaqmiaq kuxh veteʼ tal laʼich iqʼolik vet oʼ taʼn u mam kaqiqʼ jabʼal. 16Tul ok vet bʼen oʼ viʼ maar, tul qukol vet qibʼ tinuq u txʼavaʼ Klaauda vatz u mam kaqiqʼ jabʼal, u txʼavaʼ Klaauda uvaʼ at okaʼp tuul u maar. Tul tetxhalxh qubʼan yaʼl tiʼ qiqʼot jaʼul u tal vaarko uvaʼ qitzich bʼen txala tuul u nimla vaarko, tul qaqʼ jaʼul tuul u nimla vaarko.
17Maʼtichetz qiqʼot vet jaʼul u tal vaarko tuul u nimla vaarko, tul aʼ vet u iqvil qutxakunsa tiʼ ijekʼex u tuul u nimla vaarko. Yaʼne motx qeesa vet el u chelkin bʼuʼq tivatz u vaarko, echetz yeʼlich laʼ tiqʼol vete u vaarko taʼn u kaqiqʼ. Tan nikich ixoʼva inqʼa qʼiʼol tetz u vaarko vipaxit ok tibʼ u vaarko viʼ vimusanil u maar. Tul qutxʼaqmiaq kuxh veteʼ tal laʼich iqʼolik oʼ taʼn u mam kaqiqʼ jabʼal. 18Tul mij nikich iyaʼ u xoʼvebʼalla kaqiqʼ jabʼal, pet aʼ itiʼn u vaarko taʼne tuulbʼal vaʼl aqʼbʼal. Echetz vet s-eqal, tul xeʼtaq vet inqʼa qʼiʼol vaarko tiʼ ikʼonil ka inqʼa iqatz tu maar. 19Titoxvichetz vet qʼij, tul mij nikich iyaʼ u xoʼvebʼalla kaqiqʼ jabʼal. Tul motx kʼonil vet ka inqʼa kam xeʼ u maar, inqʼa nik itxakun te u vaarko. Tul ant oʼ motx kʼonin ka. Tul txhʼoʼlisal vet tiqatz u vaarko tzij. 20Tul tira yeʼ nikich iyaʼ u xoʼvebʼalla kaqiqʼ jabʼal. Tul sibʼal qʼij uvaʼ tira yeʼl qʼij nikich qil veteʼ. Tul jitoq txʼumil nikich qil vet s-aqʼbʼal. Tul oʼ yeʼ nikich itzʼan vet bʼeeq uvaʼ laʼich elaʼp oʼ tibʼaʼnil. Pet aʼ nikich qitzʼa vet qukameʼ.
21Tul sibʼalich vet qʼij qutxʼaʼoneʼ. Yaʼne txakp Paʼp. Tul ech tal Paʼp s-eche: —Txa, enima koqxhte u yol uvaʼ val sete. Tul yeʼl koq oʼ el tzaan oʼ tu tenam Kreeta, tul yeʼlebʼ oʼ qat pal oʼ tu kʼaxkʼo. Atz yeʼ qat tzʼeqon oʼ. 22Pet toq val sete: Yeʼ kuxh vet xoʼv ex, atz yeʼ txumun vet ex, tan yeʼxhabʼil invaʼq oʼ toq kamoq oʼ. Pet taʼn kuxh toq qutzʼeq u vaarko. 23Tan tuulbʼal u aqʼbʼal s-txheelaʼ qat vila uvaʼ at val viaanxel u quBʼaal Tiuxh sinkʼatza, u quBʼaal Tiuxh uvaʼ atoʼk in tiqʼabʼ, atz uvaʼ nik innatxhkʼuula.
24Tul ech qat tal u aanxel s-ve s-eche: «Paʼp, yeʼ kuxh xoʼv axh, tan tetxhal nik abʼen vatz u mam iqʼesal tu mam tenam Rooma. Tan seʼe tul yeʼl inqʼa xaol toq kamoq, inqʼa at sakʼatza tu vaarko,» chich s-ve. 25Echetz yeʼ xoʼv vet ex, tan nik inkʼuqbʼa inkʼuul tiʼ quBʼaal Tiuxh uvaʼ echxh toq ibʼan, eche uvaʼ qat ul tal u aanxel s-ve. 26Tul tetxhal kuxh bʼen taqʼ oʼ u vaarko t-invaʼq txʼavaʼ uvaʼ at okaʼp tuul u maar, —xeʼt Paʼp xoʼl inqʼa xaol uvaʼ atich ok tu vaarko.
27Aʼetzxh tel vet kajlaval aqʼbʼal uvaʼ nikich kuxh qutxʼaqmii tiqʼol vet u vaarko taʼn u xoʼvebʼalla kaqiqʼ jabʼal. Tul aʼ bʼak nikich palk vet oʼ tu maar uvaʼ Adriaatiko ibʼij. Aʼetzxh itxhaqʼaan vet aqʼbʼal, tul bʼen vet bʼiil te inqʼa qʼiʼol vaarko uvaʼ naqich vet kʼatz val u txʼavaʼ uvaʼ at okaʼp tuul u maar. 28Yaʼne taqʼaq vet bʼen val u pajbʼal xeʼ u maar. Tul tilaq veteʼ uvaʼ viinqitich jaj atich koʼp u txʼavaʼ. Ixaetz vet u vaarko inbʼiite, tul taqʼaq txhan vet bʼen u pajbʼal ikaʼpaq xeʼ u maar. Tul tilaq veteʼ uvaʼ oʼlavatich kuxh vet jaj atich koʼp u txʼavaʼ. 29Yaʼne motx taqʼ vet koʼp kajvaʼl txeybʼal ka tetz tiʼ iqul u vaarko xeʼ u maar, tan nikich motx ixoʼva ipaxit ok tibʼ u vaarko tiʼ u txʼavaʼ. Tul nalich koq kuxh isaqbʼeʼ nikich motx tal veteʼ.
30Yaʼne titzʼa vet inqʼa nikich taqʼonv tu vaarko itzʼeqtaq tibʼ. Tul xeʼtaq vet tiʼ taqʼax koʼp u tal vaarko tu maar inpaqte, tan aʼaqich isaʼ tok bʼen s-tuul. Tul nikich kuxh motx ibʼan vatz uvaʼ, eche aʼ inqʼa txeybʼal tetz u vaarko uvaʼ atoʼk s-vatz, nikich motx ibʼan ipal kuʼ tuul u maar.
31Yaʼne ech tal Paʼp te viqʼesal sol, atz te inqʼa sol s-eche: —Oqetz toq itzʼeq tibʼ u qʼiʼol tetz u vaarko tuchʼ inqʼa imol, tul kamchiletz vet etetz, —xeʼt Paʼp te inqʼa sol.
32Yaʼne nal kuxh itzokʼ vet inqʼa sol u iqvil, u txeyolich tetz u tal vaarko. Tul txhaqp vet bʼen u tal vaarko viʼ maar.
33Aʼetzxh saʼich isaqbʼ veteʼ, tul tal Paʼp qutxʼaʼoneʼ, jankʼal oʼ inqʼa atich ok oʼ tu vaarko. Tul ech tal Paʼp s-eche: —Kajlavax vet qʼij uvaʼ txʼebʼoʼm kuxh al oʼ tiʼ kam toq yaʼk oʼ s-qukaqaayil. Tul yeʼl oʼ nik qutxʼaʼoneʼ. 34Pet bʼanvaq bʼaʼnil, tul txʼaʼonoq oʼ. Tul at quyakʼil laʼ ibʼana, tan yeʼxhabʼil invaʼq oʼ toq kamoq oʼ, —xeʼt Paʼp s-quxoʼl.
35Yaʼetz kuxh vet Paʼp tiʼ talax u yol uvaʼe, tul tiqʼo tzaan Paʼp val u paan. Tul ech quvatz taqʼ Paʼp taʼntiuxh te quBʼaal Tiuxh s-tiʼ. Tul ipixh Paʼp u paan s-tuul. Tul itxʼaʼ vet Paʼp. 36Yaʼne kʼuqatxhaq vet qukʼuul taʼn u yol uvaʼ tal Paʼp. Tul xeʼtaq vet oʼ txʼaʼon paqte. 37Tul kaʼvaʼl sieen tuchʼ vaqlaval imutxʼ (276), oʼ inqʼa atich ok oʼ tuul u vaarko. 38Maʼtichetz iyaʼ vet qutxʼaʼoneʼ, tul motx kʼonil vet ka inqʼa triigo xeʼ u maar taʼn inqʼa qʼiʼol vaarko tiʼ itxhʼoʼlisal talal tiqatz u vaarko, tan aʼaqich isaʼ uvaʼ yeʼ laʼ pal kuʼ u vaarko jaqʼ u maar.
Uvaʼs ipax vet u vaarko
39Saqbʼetz veteʼ, tul til vet inqʼa qʼiʼol tetz vaarko val u txʼavaʼ. Poro yeʼ nikich motx ibʼen s-te talaq atich veteʼ. Pet taʼn kuxh nikich isaqi vet eluʼl vitziʼ u maar uvaʼ xoʼlamich taʼn txʼavaʼ tal uvaʼ atich musan uvaʼ txhaqʼaalaichxhtuʼ. Yaʼne iyolaq veteʼ uvaʼ tetxhal kuxh een laʼich bʼenk u vaarko txakeʼvoq viʼ u musan tixoʼl u txʼavaʼ oq laʼich itxʼol taqʼbʼ tzitzi. 40Yaʼne motx itzokʼaq vet el inqʼa ikʼaʼil kajvaʼl inqʼa txeybʼal tetz u vaarko tuul u maar. Tul motx taqʼ vet ka xeʼ u maar. Tul motx itzokʼeʼl inqʼa qitzbʼal tetz u qʼiʼbʼal vaarko, tiʼ uvaʼ laʼich motx utxh iqʼiʼtaq bʼen u vaarko. Yaʼne motx toksa vet jaʼ u bʼuʼq tivatz u vaarko inpaqte tiʼ ikʼulux u kaqiqʼ. Tul aʼ nikich ikʼaq vet u vaarko vitziʼ u txʼavaʼ tal uvaʼ atich inqʼa musan. 41Poro ech koqe, tan tira ex itxʼap bʼen tibʼ vijuʼ u vaarko xoʼl musan. Tul tira yeʼ tiʼn vet u vaarko. Tul il vet u tiʼ iqul u vaarko nikich ixeʼt eʼpoq taʼn vipumlut ok tibʼ u maar s-tiʼ.
42Yaʼne iyol vet inqʼa sol s-vatzaq iyatzʼax el inqʼa pereexho, tan aʼ nikich motx ixoʼva uvaʼ nuʼximal laʼich itzʼeqt tibʼ inqʼa pereexho.{*}#27.42 ¿Kametz s-tiʼil aʼ nikich titzʼa vet inqʼa sol iyatzʼax el inqʼa pereexho? Aʼetz s-tiʼil tan, oq jaʼl vaʼq pereexho nikich itzʼeqeʼl tibʼ, tul aʼ vet inqʼa sol nikich ikuʼebʼe. 43Poro yeʼ ikuy viqʼesal sol kam uvaʼ nikich titzʼa inqʼa sol, tan yeʼich isaʼ uvaʼ laʼich kameʼl Paʼp. Echetz jatvaʼl inqʼa nikich txʼolon nuʼx, tul bʼekʼex ipaleʼl s-bʼaxa tziʼeʼl u maar taʼn viqʼesal sol. 44Pet jolt inqʼa pereexho, inqʼa yeʼ nikich txʼolon nuʼx, tan aʼl motx ibʼanbʼe aqʼin tzeʼ tiʼ inuʼxaq elaʼpun tziʼ u maar. Atz at inqʼa, aʼ motx ibʼanbʼe inqʼa yalaq ipaʼxil u vaarko tiʼ inuʼxaq elaʼpun. Tul yeʼxhabʼil invaʼq kami.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.