Vibʼanoʼm inqʼa Apoostol 19
19
Uvaʼs ipaxsat Paʼp inqʼa bʼaʼnla txhaq yol tiʼ quBʼaal Jesuus tu tenam Eefeso, tul yekich txhej vet niman tetz Jesuus tzitzi
1Tuulbʼaletz uvaʼ atich Apoolos tu tenam Koriinto, tul nikich pal isoli Paʼp inqʼa talaq tenam tuulbʼal Galaasia, atz tuulbʼal Friijia uvaʼ aʼl ijaʼeʼ.
Yaʼne aqʼbʼ vet Paʼp tu tenam Eefeso. Tul til Paʼp jolol inqʼa xaol, inqʼa nikich tal tibʼ s-niman tetz Jesuus. 2Tul ech tal Paʼp s-te s-eche: —¿Ekʼul kol viTiuxhil Tiuxh uvaʼs etoksat etibʼ s-niman tetz Jesuus? —xeʼt Paʼp. Tul ech motx tal s-eche: —Yeʼle. Tan yeʼl inbʼeeq abʼimal qaʼn oq at iTiuxhil Tiuxh, —xeʼtaqe.
3Yaʼne ech tal Paʼp s-eche: —¿Jabʼisteetz enima bʼa, tul aqʼax kuʼ ex xeʼ aʼ? —xeʼt Paʼp.
Tul echaq tal s-eche: —Aʼ qunima u txhusuʼm uvaʼ tal Xhun. Echetz qukuʼe xeʼ aʼ, —xeʼtaqe.
4Tul ech tal Paʼp s-eche: —Nikichetz taqʼ kuʼ Xhun inqʼa xaol xeʼ aʼ tiʼ titzʼat tibʼ t-inqʼa ipaʼv vatz quBʼaal Tiuxh. Tul motx tal Xhun te inqʼa xaol uvaʼ tetxhal laʼich motx ikʼuqbʼa ikʼuul tiʼ val u Vinaq uvaʼ xamtel laʼich ul tiʼ Xhun. Aʼetze u quBʼaal Jesuus, —xeʼt Paʼp.
5Tabʼietz vet inqʼa xaol u yol uvaʼ motx tal Paʼp, tul motx aqʼaxaq vet kuʼ xeʼ aʼ tuchʼ ibʼij u quBʼaal Jesuus. 6Atz taqʼ vet jaʼ Paʼp iqʼabʼ tiviʼ inqʼa niman tetz Jesuus. Tul motx ikʼul vet viTiuxhil Tiuxh. Tul motx xeʼtaq vet yolon t-jolt yolbʼal. Tul motx tal vet inqʼa yol uvaʼ nikich tal viTiuxhil Tiuxh s-te.{*}#19.6 ¿Kam talax jolt inqʼa yolbʼal nik tal tu versiikulo uvaʼa? Aʼ talax uvaʼ nikich motx tal inqʼa yolbʼal uvaʼ tetz xaol vatz txʼavaʼ, atz jit txhuselich koq tibʼ s-tiʼ. Pet aʼ viTiuxhil Tiuxh nikich alon jaʼul titziʼ, tul nikich motx tal veteʼ. 7Tul kamal kabʼlaval vinaq ok s-niman tetz Jesuus.
8Tul nikich tex Paʼp xoʼl inqʼa tij imam Israeel tu kʼulbʼal ibʼ tu Eefeso tuulbʼal oxvaʼl ichʼ. Tul atichxh itial Paʼp tiʼ talax viyolbʼal quBʼaal Tiuxh. Tul nikich iyoj tibʼ Paʼp tuchʼ inqʼa tij imam Israeel tu kʼulbʼal ibʼ. Poro nikich ibʼixsa Paʼp tiviʼ inqʼa xaol kam talax vibʼant quBʼaal Tiuxh iqʼesalil t-taanima inqʼa niman tetz Jesuus. 9Pet atichetz jolol xaol uvaʼ itijbʼixsa ikʼuul. Tul yeʼ motx iqej u yol uvaʼ tal Paʼp. Tul ech ivatz inqʼa mamala xaol motx tal yaabʼla yol tiʼ inqʼa bʼaʼnla txhaq yol uvaʼ nikich itxhus Paʼp uvaʼ, ‹Bʼey Tetz Jesuus,› chichich eʼli.
Yaʼne teesa vet el tibʼ Paʼp tuchʼ inqʼa niman tetz Jesuus xoʼl inqʼa yeʼ motx niman. Tul yekich vet Paʼp tuchʼ inqʼa niman tetz Jesuus t-val u otzotz tal uvaʼ nikich txhusunk val u vinaq uvaʼ Tiraanoich ibʼij. Tul jun qʼij nikich iyolt Paʼp viyolbʼal quBʼaal Tiuxh tiʼ Jesuus tzitzi tuchʼ inqʼa niman tetz Jesuus. 10Tul kaʼvaʼl yaʼbʼ ibʼan Paʼp tzitzi tiʼ talax inqʼa bʼaʼnla txhaq yol tiʼ quBʼaal Jesuus. Echetz jankʼalxh inqʼa tij imam Israeel, atz inqʼa jit tij imam Israeel, inqʼa at tuulbʼal Aasia, motx tabʼi vet inqʼa bʼaʼnla txhaq yol tiʼ quBʼaal Jesuus.
11Tul mamala kaebʼal aanima nikich ibʼan Paʼp xoʼl inqʼa xaol taʼn quBʼaal Jesuus, inqʼa kaebʼal aanima uvaʼ yeʼtixich ilixi. 12Tan tuchʼ kuxh tiqʼol vaʼq vibʼuʼq Paʼp xeʼ invaʼq yaabʼ, tul yek nikich ibʼan inqʼa yaabʼ bʼaʼn. Atz kʼuxh kam kuxh vaʼtoʼq bʼuʼqil nikich tiqʼoleʼ uvaʼ tetz Paʼp, tul yek nikich ibʼan bʼaʼn inqʼa yaabʼ. Atz yekat nikich teleʼl inqʼa demoonio t-taanima inqʼa xaol.
13Atichetz jolol inqʼa tij imam Israeel, inqʼa talaq kuxh nikich palka, tul nikich motx tal tibʼ s-tukin el demoonio t-taanima inqʼa xaol. Tul til teleʼl demoonio taʼn Paʼp tuchʼ ibʼij quBʼaal Jesuus. Tul yekich titzʼa vet ibʼanaxeʼ uvaʼ laʼ ituki el demoonio. Tul xeʼtaq tiʼ iqʼiilal demoonio. Tul ech motx tal s-eche: —Tuchʼ ibʼij Jesuus uvaʼ nik ipaxsa Paʼp viyolbʼal, toq val sete: Eloq el ex kʼatz u xaol, —chichichaqe. 14Aʼetz uvaʼe, nikich ibʼan juqvaʼl inqʼa ikʼaol val u vinaq uvaʼ Eseevaich ibʼij, uvaʼ maʼtich teleʼl siqʼesal inqʼa oksan yol vatz Tiuxh xoʼl inqʼa tij imam Israeel.
15Yaʼne ech tal u demoonio te inqʼa ikʼaol Eseeva s-eche: —Vootzaql Jesuus, atz vootzaql Paʼp. Pet ex, tan yeʼ vootzaql ex, —xeʼt u demoonio. 16Tul yuqp u vinaq, uvaʼ atich ok demoonio t-taanima, tiibʼa inqʼa ikʼaol Eseeva. Tul motx yutxhʼux vet taʼn, tetxhal motx tel iqʼij s-juqvaʼl. Yaʼne itzʼeqaq vet eluʼl tibʼ tu otzotz. Tul yeʼlichaq vet toksaʼm, atz akʼonaʼqlichaq veteʼ uvaʼs telaq vet ul.
17Tul paxin vet itziulal u yol xoʼl jankʼal inqʼa xaol inqʼa jeqlich tu tenam Eefeso, kʼuxh tijaq imam Israeel, atz kʼuxh jit tijaq imam Israeel, inqʼa nikich yolbʼen u yolbʼal grieego. Tul motx xoʼvaq vet te u yol uvaʼ utxhi. Echetz toksal vet iqʼij quBʼaal Jesuuse taʼn inqʼa xaol.
18Tul mamala vet inqʼa xaol, inqʼa motx toksa tibʼ s-niman tetz Jesuus, ulaq ijaq vet ikuya tiʼ inqʼa ipaʼv. Tul ech ivatz inqʼa xaol motx tal veteʼ kam inqʼa paʼv nikich motx ibʼaneʼ. 19Atz echatxh ibʼan jolt inqʼae nikich iqʼianeʼ. Tan motx tiqʼo vet tzaan inqʼa tuʼ tetz qʼiabʼal, tul motx itzʼeʼsa veteʼ ech ivatz inqʼa xaol. Bʼanaxetz vet tiʼ vijaʼmil inqʼa uʼ, tul kamal lavoq toxkʼal mil (50,000) puaq uvaʼ plaataxhtuʼ ijaʼmilich inqʼa uʼ uvaʼ motx tzʼeʼi. 20Echetz aʼlxh nikich ipaxin vet inqʼa bʼaʼnla txhaq yol tiʼ quBʼaal Jesuus. Tul yeʼxhabʼil vet invaʼq oleʼv tiʼ imaqaxeʼ.
21Paletz vet ka inqʼa motx utxhi, tul ikʼaq vet tibʼ Paʼp tiʼ ibʼen tu tenam Jerusaleen. Poro bʼaxa laʼ nalich pal isoli Paʼp inqʼa niman tetz Jesuus t-inqʼa tenam tuulbʼal Masedoonia, atz tuulbʼal Akaaya. Tul ech tal Paʼp inpaqt s-eche: —Laʼetz el vet bʼen in tu tenam Jerusaleen, yaʼne tetxhal laʼ bʼen in tu mam tenam Rooma, —xeʼt Paʼp. 22Itxhaqetz vet bʼen Paʼp kaʼvaʼl inqʼa lotxhol tetz tuulbʼal Masedoonia, aʼe Timoteeo tuchʼ Eraasto. Tul kaj vet ka Paʼp inbʼiil t-inqʼa tenam, inqʼa at tuulbʼal Aasia.
Uvaʼs itxhoʼn te inqʼa txetolaq txhʼitxhʼ tu tenam Eefeso uvaʼ nimal xaol motx ok vet s-niman tetz Jesuus
23Tuulbʼaletz inqʼa qʼij uvaʼs nikich ipaxsat Paʼp inqʼa bʼaʼnla txhaq yol tiʼ u Bʼey Tetz Jesuus. Tul mam vavu ibʼ xeʼt tu tenam Eefeso tiʼ u yol uvaʼ ‹Bʼey Tetz Jesuus› chichich eʼli. 24Echetz ibʼante, tan atich val u vinaq uvaʼ Demeetrioich ibʼij. Tul nikich itxet Demeetrio txhʼitxhʼ uvaʼ plaataxhtuʼ. Tul nikich ibʼit talaq ivatzibʼal tostiuxh tuchʼ inqʼa imol, u tostiuxh uvaʼ nikich natxhkʼuulalik Diaana, aʼe val vitiuxh inqʼa Greesia tuchʼ inqʼa aj Rooma. Tul plaataxh nikich ibʼanbʼe Demeetrio s-tiʼ. Tul mam puaq nikich itxʼak tuchʼ inqʼa imol. 25Yaʼne imol vet Demeetrio inqʼa imol s-txetolaq txhʼitxhʼ. Tul ech tal s-xoʼl s-eche: —Ex inmol s-txetolaq txhʼitxhʼ, etootzaqle uvaʼ, aʼ u qaqʼon uvaʼ nik motx qubʼaneʼ nik aqʼon txʼijbʼal quqʼij. 26Tul nik etileʼ, atz nik etabʼi kam uvaʼ nik ibʼan Paʼp tzitza tu Eefeso. Tul jit taʼn kuxh nik ibʼokʼtzii Paʼp inqʼa xaol tzitza, pet nikat ibʼokʼtzii Paʼp inqʼa xaol uvaʼ at tuulbʼal jankʼal Aasia. Tan ech nik tal Paʼp s-eche: «Jit tiuxhe inqʼa aʼl nik ibʼitixeʼ,» chich Paʼp tiʼ inqʼa qutiuxh. Tul mamala vet xaol nik teesa Paʼp t-bʼey tuchʼ u yol uvaʼ nik taleʼ. 27Tul jit kuxh taʼn u txhokbʼal qupuaq toq kuʼoq ul, pet toqat eloq iqʼij u qutostiuxh tal uvaʼ nik qunatxhkʼuulavat u qunimla tiuxh Diaana. Atz toq kuʼoq vet ul u nimla tatineʼ. Tul ayaʼlxh inqʼa xaol, inqʼa jeqlel t-Aasia nik natxhkʼuulan. Tul jankʼal u tenam s-kaqaayil vatz txʼavaʼ nik natxhkʼuulan u qutiuxh, —xeʼt Demeetrio te inqʼa imol.
28Tabʼietz vet inqʼa txetol txhʼitxhʼ u yol uvaʼ tal Demeetrio, tul lakpaq vet iviʼ. Tul echaq motx tal vet isichʼin s-eche: —¡Nimla tiuxh Diaana, u qutiuxh, oʼ inqʼa aj tenam Eefeso! —xeʼtaq veteʼ.
29Tul tira sotz kuxh vet ikʼuul u tenam. Tul vaʼlxh motx tok vet tiʼ itxeyp Gaayo tuchʼ Aristaarko, kaʼvaʼl inqʼa aj Masedoonia, inqʼa txhʼuyelich tiʼ Paʼp tiʼ talax inqʼa bʼaʼnla txhaq yol tiʼ Jesuus. Tul juxumichxh ibʼen vet s-kaʼbʼil taʼn u tenam. Tul yekichaq vet tu atibʼal tetz kaʼyebʼal tal uvaʼ nik utxhk saatxh. 30Nikichetz isaʼ Paʼp ipaloʼk xoʼl inqʼa tenam tiʼ talax inuqul u yol. Poro yeʼ txhaqpul Paʼp taʼn inqʼa niman tetz Jesuus tiʼ iyolon xoʼl u tenam. 31Atichetz kaʼt inqʼa tamiʼk Paʼp, inqʼa atich ok siqʼesalil t-Aasia, tul taqʼ opoon val viyol te Paʼp, tiʼ uvaʼ yeʼl Paʼp laʼich bʼenoʼk tu kaʼyebʼal tetz saatxh.
32Tanuletz u xaol nikich isichʼin tiʼ talax invaʼl yol, tul tant u xaol vaʼten yol nikich motx taleʼ. Tan sotznaʼqich kuxh vet ikʼuul inqʼa xaol, tiʼ uvaʼ yeʼaq nikich motx ibʼen s-te kam s-tiʼil kʼulelaqich tibʼ. 33Aʼetz vet Alejaandro, uvaʼ iqʼesalich xoʼl inqʼa tij imam Israeel, kʼoʼpil ok taʼn inqʼa xaol tiʼ iyolon s-xoʼl. Echetz taqʼt vet jaʼ Alejaandro iqʼabʼe, tiʼ uvaʼ laʼich yaʼ isichʼin inqʼa xaol, tul laʼich yolon Alejaandro s-xoʼl tiʼ ikolt inqʼa tij imam Israeel vatz u yol.
34Tiletz vet u tenam uvaʼ tij imam Israeelich Alejaandro, uvaʼ yeʼ nikich niman Diaana, tul aʼlxh ixeʼtaq vet sichʼin. Tul ech nikich motx tal s-eche: —¡Nimla tiuxh Diaana, u qutiuxh, oʼ inqʼa aj tenam Eefeso! —chichich vet u tenam. Tul kamal kaʼvaʼl oora sichʼin u tenam tiʼ talax u yol uvaʼe.
35Yaʼne aʼ vet u aj tzʼibʼ yaʼsan isichʼin u tenam. Tul ech tal xoʼl u tenam s-eche: —Jankʼal ex qumol s-aj tenam Eefeso, abʼivaq: Jankʼalxh inqʼa tenam s-kaqaayil ootzaqin tetz uvaʼ, aʼ, oʼ xeen tetz u tostiuxh tal uvaʼ atil u qutiuxh Diaana, uvaʼ een tzajnaʼq t-amlikaʼ. Tan ivatzibʼal u qutiuxhe u Juupiter, tul aʼ uvaʼe txhaqon tzaan s-quxoʼl. 36Yeʼxhabʼiletz invaʼq laʼ alon uvaʼ: «Jitxh tiuxhe,» chaq koq eʼli. Pet yaʼoq sevatz, tan ebʼanch kuxh invaʼq yol uvaʼ yeʼnaq etitzʼat s-bʼaʼn. 37Atz qat kuxh etiqʼo tzaan inqʼa vinaq inqʼae. Tul yeʼl u qutostiuxh nik iyansa, atz yeʼl u qutiuxh Diaana nik motx teesa iqʼij. 38Pet oq at itxhʼaʼo Demeetrio, atz oq at itxhʼaʼo inqʼa imol Demeetrio s-txetol txhʼitxhʼ tuchʼ invaʼq xaol, tul bʼenoqaq ixotxh tibʼ s-vatzaq, vatz inqʼa iqʼesal uvaʼ oksamal taʼn viqʼesal t-Rooma, inqʼa iqatzimal taqʼax kuʼ yol tinuqul taʼn. 39Atzoq kam invaʼtoʼq nik exotxh etibʼ s-tiʼ, tul jikxh eyolt sevatzaq vatz inqʼa aqʼolaq kuʼ yol tinuqul. 40Tan bʼane vatz koq invaʼq aqʼol kuʼ yol tinuqul molel qibʼ setuchʼ s-txheelaʼ. Oqetz toq xotxhpoq oʼ tiʼ u vavu ibʼ uvaʼ nik qubʼaneʼ, tul tzaʼl u yol toq ibʼan s-qe. Tan kam koq saʼ qal veteʼ oq laʼ abʼil s-qe taʼn u mam iqʼesal, tan yeʼxhkam invaʼq s-tiʼil nik motx quvavuvat qibʼ, —xeʼt u aj tzʼibʼ. 41Taletz kuxh vet u aj tzʼibʼ u yol uvaʼe, tul ijatx vet tibʼ u tenam, inqʼa molich tibʼ.
ទើបបានជ្រើសរើសហើយ៖
Vibʼanoʼm inqʼa Apoostol 19: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
Vibʼanoʼm inqʼa Apoostol 19
19
Uvaʼs ipaxsat Paʼp inqʼa bʼaʼnla txhaq yol tiʼ quBʼaal Jesuus tu tenam Eefeso, tul yekich txhej vet niman tetz Jesuus tzitzi
1Tuulbʼaletz uvaʼ atich Apoolos tu tenam Koriinto, tul nikich pal isoli Paʼp inqʼa talaq tenam tuulbʼal Galaasia, atz tuulbʼal Friijia uvaʼ aʼl ijaʼeʼ.
Yaʼne aqʼbʼ vet Paʼp tu tenam Eefeso. Tul til Paʼp jolol inqʼa xaol, inqʼa nikich tal tibʼ s-niman tetz Jesuus. 2Tul ech tal Paʼp s-te s-eche: —¿Ekʼul kol viTiuxhil Tiuxh uvaʼs etoksat etibʼ s-niman tetz Jesuus? —xeʼt Paʼp. Tul ech motx tal s-eche: —Yeʼle. Tan yeʼl inbʼeeq abʼimal qaʼn oq at iTiuxhil Tiuxh, —xeʼtaqe.
3Yaʼne ech tal Paʼp s-eche: —¿Jabʼisteetz enima bʼa, tul aqʼax kuʼ ex xeʼ aʼ? —xeʼt Paʼp.
Tul echaq tal s-eche: —Aʼ qunima u txhusuʼm uvaʼ tal Xhun. Echetz qukuʼe xeʼ aʼ, —xeʼtaqe.
4Tul ech tal Paʼp s-eche: —Nikichetz taqʼ kuʼ Xhun inqʼa xaol xeʼ aʼ tiʼ titzʼat tibʼ t-inqʼa ipaʼv vatz quBʼaal Tiuxh. Tul motx tal Xhun te inqʼa xaol uvaʼ tetxhal laʼich motx ikʼuqbʼa ikʼuul tiʼ val u Vinaq uvaʼ xamtel laʼich ul tiʼ Xhun. Aʼetze u quBʼaal Jesuus, —xeʼt Paʼp.
5Tabʼietz vet inqʼa xaol u yol uvaʼ motx tal Paʼp, tul motx aqʼaxaq vet kuʼ xeʼ aʼ tuchʼ ibʼij u quBʼaal Jesuus. 6Atz taqʼ vet jaʼ Paʼp iqʼabʼ tiviʼ inqʼa niman tetz Jesuus. Tul motx ikʼul vet viTiuxhil Tiuxh. Tul motx xeʼtaq vet yolon t-jolt yolbʼal. Tul motx tal vet inqʼa yol uvaʼ nikich tal viTiuxhil Tiuxh s-te.{*}#19.6 ¿Kam talax jolt inqʼa yolbʼal nik tal tu versiikulo uvaʼa? Aʼ talax uvaʼ nikich motx tal inqʼa yolbʼal uvaʼ tetz xaol vatz txʼavaʼ, atz jit txhuselich koq tibʼ s-tiʼ. Pet aʼ viTiuxhil Tiuxh nikich alon jaʼul titziʼ, tul nikich motx tal veteʼ. 7Tul kamal kabʼlaval vinaq ok s-niman tetz Jesuus.
8Tul nikich tex Paʼp xoʼl inqʼa tij imam Israeel tu kʼulbʼal ibʼ tu Eefeso tuulbʼal oxvaʼl ichʼ. Tul atichxh itial Paʼp tiʼ talax viyolbʼal quBʼaal Tiuxh. Tul nikich iyoj tibʼ Paʼp tuchʼ inqʼa tij imam Israeel tu kʼulbʼal ibʼ. Poro nikich ibʼixsa Paʼp tiviʼ inqʼa xaol kam talax vibʼant quBʼaal Tiuxh iqʼesalil t-taanima inqʼa niman tetz Jesuus. 9Pet atichetz jolol xaol uvaʼ itijbʼixsa ikʼuul. Tul yeʼ motx iqej u yol uvaʼ tal Paʼp. Tul ech ivatz inqʼa mamala xaol motx tal yaabʼla yol tiʼ inqʼa bʼaʼnla txhaq yol uvaʼ nikich itxhus Paʼp uvaʼ, ‹Bʼey Tetz Jesuus,› chichich eʼli.
Yaʼne teesa vet el tibʼ Paʼp tuchʼ inqʼa niman tetz Jesuus xoʼl inqʼa yeʼ motx niman. Tul yekich vet Paʼp tuchʼ inqʼa niman tetz Jesuus t-val u otzotz tal uvaʼ nikich txhusunk val u vinaq uvaʼ Tiraanoich ibʼij. Tul jun qʼij nikich iyolt Paʼp viyolbʼal quBʼaal Tiuxh tiʼ Jesuus tzitzi tuchʼ inqʼa niman tetz Jesuus. 10Tul kaʼvaʼl yaʼbʼ ibʼan Paʼp tzitzi tiʼ talax inqʼa bʼaʼnla txhaq yol tiʼ quBʼaal Jesuus. Echetz jankʼalxh inqʼa tij imam Israeel, atz inqʼa jit tij imam Israeel, inqʼa at tuulbʼal Aasia, motx tabʼi vet inqʼa bʼaʼnla txhaq yol tiʼ quBʼaal Jesuus.
11Tul mamala kaebʼal aanima nikich ibʼan Paʼp xoʼl inqʼa xaol taʼn quBʼaal Jesuus, inqʼa kaebʼal aanima uvaʼ yeʼtixich ilixi. 12Tan tuchʼ kuxh tiqʼol vaʼq vibʼuʼq Paʼp xeʼ invaʼq yaabʼ, tul yek nikich ibʼan inqʼa yaabʼ bʼaʼn. Atz kʼuxh kam kuxh vaʼtoʼq bʼuʼqil nikich tiqʼoleʼ uvaʼ tetz Paʼp, tul yek nikich ibʼan bʼaʼn inqʼa yaabʼ. Atz yekat nikich teleʼl inqʼa demoonio t-taanima inqʼa xaol.
13Atichetz jolol inqʼa tij imam Israeel, inqʼa talaq kuxh nikich palka, tul nikich motx tal tibʼ s-tukin el demoonio t-taanima inqʼa xaol. Tul til teleʼl demoonio taʼn Paʼp tuchʼ ibʼij quBʼaal Jesuus. Tul yekich titzʼa vet ibʼanaxeʼ uvaʼ laʼ ituki el demoonio. Tul xeʼtaq tiʼ iqʼiilal demoonio. Tul ech motx tal s-eche: —Tuchʼ ibʼij Jesuus uvaʼ nik ipaxsa Paʼp viyolbʼal, toq val sete: Eloq el ex kʼatz u xaol, —chichichaqe. 14Aʼetz uvaʼe, nikich ibʼan juqvaʼl inqʼa ikʼaol val u vinaq uvaʼ Eseevaich ibʼij, uvaʼ maʼtich teleʼl siqʼesal inqʼa oksan yol vatz Tiuxh xoʼl inqʼa tij imam Israeel.
15Yaʼne ech tal u demoonio te inqʼa ikʼaol Eseeva s-eche: —Vootzaql Jesuus, atz vootzaql Paʼp. Pet ex, tan yeʼ vootzaql ex, —xeʼt u demoonio. 16Tul yuqp u vinaq, uvaʼ atich ok demoonio t-taanima, tiibʼa inqʼa ikʼaol Eseeva. Tul motx yutxhʼux vet taʼn, tetxhal motx tel iqʼij s-juqvaʼl. Yaʼne itzʼeqaq vet eluʼl tibʼ tu otzotz. Tul yeʼlichaq vet toksaʼm, atz akʼonaʼqlichaq veteʼ uvaʼs telaq vet ul.
17Tul paxin vet itziulal u yol xoʼl jankʼal inqʼa xaol inqʼa jeqlich tu tenam Eefeso, kʼuxh tijaq imam Israeel, atz kʼuxh jit tijaq imam Israeel, inqʼa nikich yolbʼen u yolbʼal grieego. Tul motx xoʼvaq vet te u yol uvaʼ utxhi. Echetz toksal vet iqʼij quBʼaal Jesuuse taʼn inqʼa xaol.
18Tul mamala vet inqʼa xaol, inqʼa motx toksa tibʼ s-niman tetz Jesuus, ulaq ijaq vet ikuya tiʼ inqʼa ipaʼv. Tul ech ivatz inqʼa xaol motx tal veteʼ kam inqʼa paʼv nikich motx ibʼaneʼ. 19Atz echatxh ibʼan jolt inqʼae nikich iqʼianeʼ. Tan motx tiqʼo vet tzaan inqʼa tuʼ tetz qʼiabʼal, tul motx itzʼeʼsa veteʼ ech ivatz inqʼa xaol. Bʼanaxetz vet tiʼ vijaʼmil inqʼa uʼ, tul kamal lavoq toxkʼal mil (50,000) puaq uvaʼ plaataxhtuʼ ijaʼmilich inqʼa uʼ uvaʼ motx tzʼeʼi. 20Echetz aʼlxh nikich ipaxin vet inqʼa bʼaʼnla txhaq yol tiʼ quBʼaal Jesuus. Tul yeʼxhabʼil vet invaʼq oleʼv tiʼ imaqaxeʼ.
21Paletz vet ka inqʼa motx utxhi, tul ikʼaq vet tibʼ Paʼp tiʼ ibʼen tu tenam Jerusaleen. Poro bʼaxa laʼ nalich pal isoli Paʼp inqʼa niman tetz Jesuus t-inqʼa tenam tuulbʼal Masedoonia, atz tuulbʼal Akaaya. Tul ech tal Paʼp inpaqt s-eche: —Laʼetz el vet bʼen in tu tenam Jerusaleen, yaʼne tetxhal laʼ bʼen in tu mam tenam Rooma, —xeʼt Paʼp. 22Itxhaqetz vet bʼen Paʼp kaʼvaʼl inqʼa lotxhol tetz tuulbʼal Masedoonia, aʼe Timoteeo tuchʼ Eraasto. Tul kaj vet ka Paʼp inbʼiil t-inqʼa tenam, inqʼa at tuulbʼal Aasia.
Uvaʼs itxhoʼn te inqʼa txetolaq txhʼitxhʼ tu tenam Eefeso uvaʼ nimal xaol motx ok vet s-niman tetz Jesuus
23Tuulbʼaletz inqʼa qʼij uvaʼs nikich ipaxsat Paʼp inqʼa bʼaʼnla txhaq yol tiʼ u Bʼey Tetz Jesuus. Tul mam vavu ibʼ xeʼt tu tenam Eefeso tiʼ u yol uvaʼ ‹Bʼey Tetz Jesuus› chichich eʼli. 24Echetz ibʼante, tan atich val u vinaq uvaʼ Demeetrioich ibʼij. Tul nikich itxet Demeetrio txhʼitxhʼ uvaʼ plaataxhtuʼ. Tul nikich ibʼit talaq ivatzibʼal tostiuxh tuchʼ inqʼa imol, u tostiuxh uvaʼ nikich natxhkʼuulalik Diaana, aʼe val vitiuxh inqʼa Greesia tuchʼ inqʼa aj Rooma. Tul plaataxh nikich ibʼanbʼe Demeetrio s-tiʼ. Tul mam puaq nikich itxʼak tuchʼ inqʼa imol. 25Yaʼne imol vet Demeetrio inqʼa imol s-txetolaq txhʼitxhʼ. Tul ech tal s-xoʼl s-eche: —Ex inmol s-txetolaq txhʼitxhʼ, etootzaqle uvaʼ, aʼ u qaqʼon uvaʼ nik motx qubʼaneʼ nik aqʼon txʼijbʼal quqʼij. 26Tul nik etileʼ, atz nik etabʼi kam uvaʼ nik ibʼan Paʼp tzitza tu Eefeso. Tul jit taʼn kuxh nik ibʼokʼtzii Paʼp inqʼa xaol tzitza, pet nikat ibʼokʼtzii Paʼp inqʼa xaol uvaʼ at tuulbʼal jankʼal Aasia. Tan ech nik tal Paʼp s-eche: «Jit tiuxhe inqʼa aʼl nik ibʼitixeʼ,» chich Paʼp tiʼ inqʼa qutiuxh. Tul mamala vet xaol nik teesa Paʼp t-bʼey tuchʼ u yol uvaʼ nik taleʼ. 27Tul jit kuxh taʼn u txhokbʼal qupuaq toq kuʼoq ul, pet toqat eloq iqʼij u qutostiuxh tal uvaʼ nik qunatxhkʼuulavat u qunimla tiuxh Diaana. Atz toq kuʼoq vet ul u nimla tatineʼ. Tul ayaʼlxh inqʼa xaol, inqʼa jeqlel t-Aasia nik natxhkʼuulan. Tul jankʼal u tenam s-kaqaayil vatz txʼavaʼ nik natxhkʼuulan u qutiuxh, —xeʼt Demeetrio te inqʼa imol.
28Tabʼietz vet inqʼa txetol txhʼitxhʼ u yol uvaʼ tal Demeetrio, tul lakpaq vet iviʼ. Tul echaq motx tal vet isichʼin s-eche: —¡Nimla tiuxh Diaana, u qutiuxh, oʼ inqʼa aj tenam Eefeso! —xeʼtaq veteʼ.
29Tul tira sotz kuxh vet ikʼuul u tenam. Tul vaʼlxh motx tok vet tiʼ itxeyp Gaayo tuchʼ Aristaarko, kaʼvaʼl inqʼa aj Masedoonia, inqʼa txhʼuyelich tiʼ Paʼp tiʼ talax inqʼa bʼaʼnla txhaq yol tiʼ Jesuus. Tul juxumichxh ibʼen vet s-kaʼbʼil taʼn u tenam. Tul yekichaq vet tu atibʼal tetz kaʼyebʼal tal uvaʼ nik utxhk saatxh. 30Nikichetz isaʼ Paʼp ipaloʼk xoʼl inqʼa tenam tiʼ talax inuqul u yol. Poro yeʼ txhaqpul Paʼp taʼn inqʼa niman tetz Jesuus tiʼ iyolon xoʼl u tenam. 31Atichetz kaʼt inqʼa tamiʼk Paʼp, inqʼa atich ok siqʼesalil t-Aasia, tul taqʼ opoon val viyol te Paʼp, tiʼ uvaʼ yeʼl Paʼp laʼich bʼenoʼk tu kaʼyebʼal tetz saatxh.
32Tanuletz u xaol nikich isichʼin tiʼ talax invaʼl yol, tul tant u xaol vaʼten yol nikich motx taleʼ. Tan sotznaʼqich kuxh vet ikʼuul inqʼa xaol, tiʼ uvaʼ yeʼaq nikich motx ibʼen s-te kam s-tiʼil kʼulelaqich tibʼ. 33Aʼetz vet Alejaandro, uvaʼ iqʼesalich xoʼl inqʼa tij imam Israeel, kʼoʼpil ok taʼn inqʼa xaol tiʼ iyolon s-xoʼl. Echetz taqʼt vet jaʼ Alejaandro iqʼabʼe, tiʼ uvaʼ laʼich yaʼ isichʼin inqʼa xaol, tul laʼich yolon Alejaandro s-xoʼl tiʼ ikolt inqʼa tij imam Israeel vatz u yol.
34Tiletz vet u tenam uvaʼ tij imam Israeelich Alejaandro, uvaʼ yeʼ nikich niman Diaana, tul aʼlxh ixeʼtaq vet sichʼin. Tul ech nikich motx tal s-eche: —¡Nimla tiuxh Diaana, u qutiuxh, oʼ inqʼa aj tenam Eefeso! —chichich vet u tenam. Tul kamal kaʼvaʼl oora sichʼin u tenam tiʼ talax u yol uvaʼe.
35Yaʼne aʼ vet u aj tzʼibʼ yaʼsan isichʼin u tenam. Tul ech tal xoʼl u tenam s-eche: —Jankʼal ex qumol s-aj tenam Eefeso, abʼivaq: Jankʼalxh inqʼa tenam s-kaqaayil ootzaqin tetz uvaʼ, aʼ, oʼ xeen tetz u tostiuxh tal uvaʼ atil u qutiuxh Diaana, uvaʼ een tzajnaʼq t-amlikaʼ. Tan ivatzibʼal u qutiuxhe u Juupiter, tul aʼ uvaʼe txhaqon tzaan s-quxoʼl. 36Yeʼxhabʼiletz invaʼq laʼ alon uvaʼ: «Jitxh tiuxhe,» chaq koq eʼli. Pet yaʼoq sevatz, tan ebʼanch kuxh invaʼq yol uvaʼ yeʼnaq etitzʼat s-bʼaʼn. 37Atz qat kuxh etiqʼo tzaan inqʼa vinaq inqʼae. Tul yeʼl u qutostiuxh nik iyansa, atz yeʼl u qutiuxh Diaana nik motx teesa iqʼij. 38Pet oq at itxhʼaʼo Demeetrio, atz oq at itxhʼaʼo inqʼa imol Demeetrio s-txetol txhʼitxhʼ tuchʼ invaʼq xaol, tul bʼenoqaq ixotxh tibʼ s-vatzaq, vatz inqʼa iqʼesal uvaʼ oksamal taʼn viqʼesal t-Rooma, inqʼa iqatzimal taqʼax kuʼ yol tinuqul taʼn. 39Atzoq kam invaʼtoʼq nik exotxh etibʼ s-tiʼ, tul jikxh eyolt sevatzaq vatz inqʼa aqʼolaq kuʼ yol tinuqul. 40Tan bʼane vatz koq invaʼq aqʼol kuʼ yol tinuqul molel qibʼ setuchʼ s-txheelaʼ. Oqetz toq xotxhpoq oʼ tiʼ u vavu ibʼ uvaʼ nik qubʼaneʼ, tul tzaʼl u yol toq ibʼan s-qe. Tan kam koq saʼ qal veteʼ oq laʼ abʼil s-qe taʼn u mam iqʼesal, tan yeʼxhkam invaʼq s-tiʼil nik motx quvavuvat qibʼ, —xeʼt u aj tzʼibʼ. 41Taletz kuxh vet u aj tzʼibʼ u yol uvaʼe, tul ijatx vet tibʼ u tenam, inqʼa molich tibʼ.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.