Vibʼanoʼm inqʼa Apoostol 16
16
Uvaʼs pal tiqʼot Paʼp Timoteeo s-tiʼ, tiʼ ipaxsal viyolbʼal quBʼaal Tiuxh tiʼ Jesuus tuulbʼal Aasia
1Xamteletz veteʼ, tul aqʼbʼ vet Paʼp tuchʼ Siilas tu tenam Deerve tiʼ tilix inqʼa niman tetz Jesuus tzitzi. Yaʼne bʼenaq vet tu tenam Liistra. Tul atich val u niman tetz Jesuus tzitzi uvaʼ Timoteeoich ibʼij. Tul tij imam Israeelich vitxutx, atz nimanich tetz Jesuus. Pet jitich tij imam Israeel vibʼaal Timoteeo. Tul aʼ nikich iyolbʼe u yolbʼal grieego. 2Tul aʼ nikich tal inqʼa niman tetz Jesuus tu tenam Liistra, atz tu tenam Ikoonio uvaʼ tira bʼaʼnichxh itxumbʼal Timoteeo. 3Titzʼaetz Paʼp uvaʼ laʼich bʼen Timoteeo s-tiʼ, poro bʼaʼn uvaʼ bʼaxich iqoleʼl Paʼp inbʼiil te vitxhiʼoʼl Timoteeo. Tan aʼich isaʼ Paʼp uvaʼ yeʼxhkam laʼich tal inqʼa tij imam Israeel, inqʼa jeqlich tzitzi. Tan tootzaqlich inqʼa tij imam Israeel uvaʼ jitich tij imam Israeel vibʼaal Timoteeo.
4Jununetz tenam nikich palk Paʼp tuchʼ Siilas, atz tuchʼ Timoteeo, tul nikichaq pal tal ka te inqʼa niman tetz Jesuus kam inqʼa yol uvaʼ motx ijeqbʼa inqʼa apoostol tuchʼ inqʼa iqʼon iviʼ tu tenam Jerusaleen. Tul laʼich motx inima. 5Echetz aʼlxh nikich taqʼax tel itial inqʼa niman tetz Jesuus tiʼ ikʼuqbʼataq ikʼuul tiʼ Jesuus. Tul jun qʼij nikich motx inaʼ tatxhul.
Uvaʼs taqʼbʼ Paʼp tu tenam Trooas, tul ikʼutxh quBʼaal Tiuxh val u vinaq aj Masedoonia te Paʼp s-aqʼbʼal
6Yaʼne pal paʼl Paʼp tuchʼ inqʼa imol tuulbʼal Galaasia, atz tuulbʼal Friijia. Tul ipaxsa Paʼp viyolbʼal quBʼaal Tiuxh tzitzi tiʼ Jesuus. Tul nikichat isaʼ Paʼp ipaxsal viyolbʼal quBʼaal Tiuxh t-Aasia, poro yeʼ ikuy viTiuxhil Tiuxh ipal Paʼp. 7Paletz kuxh paʼl Paʼp txala Aasia, tul aqʼbʼ vet Paʼp tinajqeʼlil Miisia. Poro yeʼl Paʼp bʼenoʼk tuulbʼal Miisia, tan maqaxat Paʼp taʼn viTiuxhil Tiuxh. Yaʼne aqʼbʼ vet Paʼp tuulbʼal Vitiinia. Tul kolich ipaxsa Paʼp viyolbʼal quBʼaal Tiuxh tzitzi tala, poro yeʼat ikuy viTiuxhil Tiuxh. 8Palaqetz kuxh vet paʼl tuulbʼal Miisia, tul yekichaq vet tu tenam Trooas.
9Atichetz vet Paʼp tu tenam Trooas, tul til Paʼp val u vatzikʼ taʼn quBʼaal Tiuxh. Til Paʼp uvaʼ txaklich val u vinaq aj Masedoonia vatz Paʼp. Tul ech tal u vinaq s-eche: —Bʼan bʼaʼnil s-qe, ulen tzitza t-Masedoonia. Tul pal alotxh oʼ, —xeʼt u vinaq te Paʼp t-vatzikʼ.{*}#16.9 Tuulbʼal u tenam Trooas, tul ex ikʼul vet tibʼ Luk tuchʼ Paʼp tzitzi. Tul imolich vet tibʼ Paʼp tuchʼ Luk, atz tuchʼ Siilas. Aʼetz vet Luke u tzʼibʼan tetz inqʼa yol inqʼaa. Echetz tuulbʼal u versiikulo laval nik xeʼtik vet Luk tiʼ talax u yol u ‹oʼ.›
10Tul bʼen vet s-qe uvaʼ quBʼaal Tiuxh saʼon oʼ tiʼ ipaxsal paʼl inqʼa bʼaʼnla txhaq yol tiʼ Jesuus tuulbʼal Masedoonia. Echetz yekich qubʼan vet qutxheʼ tiʼ qubʼen tuulbʼal Masedoonia.
Uvaʼs ipaxsat Paʼp viyolbʼal quBʼaal Tiuxh tu tenam Filiipos tuchʼ Siilas, tul motx qʼosoxi, atz aqʼaxaq jaʼ t-tzeʼ
11Eletz vet bʼen oʼ tu tenam Trooas tuul val u vaarko viʼ maar, tul aʼ kʼaqich qaʼn u tenam Samotraasia uvaʼ at okaʼp tuul u maar. Echetz vet eqal, tul bʼen vet oʼ tetxhal qaqʼbʼ tu tenam Neaapolis. 12Eletz vet bʼen oʼ tu tenam Neaapolis, tul yekich vet oʼ tu tenam Filiipos, uvaʼ nimla tenam tatin tiibʼa jolol tenam uvaʼ at tuulbʼal Masedoonia. Tan at intanul u tenam Filiipos uvaʼ, aʼ jeqlel jolol aj Rooma s-tuul. Tul qubʼanxh in jolol qʼij tzitzi.
13Tuulbʼaletz val u xeem qʼij saavado, tul bʼen vet el oʼ tiʼeʼl u tenam tziʼeʼl vijubʼalil. Tul yekich vet oʼ kʼatz val u xaomla aʼ tal uvaʼ nikich ikʼulvat tibʼ inqʼa tij imam Israeel tiʼ inatxhax Tiuxh. Kʼulichetz tibʼ jolol inqʼa ixoq tzitzi, tul kʼuqeʼv oʼ s-kʼatza. Tul xeʼt vet oʼ tiʼ talax viyolbʼal quBʼaal Tiuxh tiʼ Jesuus s-xoʼl.
14Atichetz val u ixoq uvaʼ Liidiaich ibʼij, jitich tij imam Israeel. Tul kʼayinich bʼaʼnla txhaq bʼuʼq uvaʼ kaq qʼeqqʼo ikaʼyeʼ. Tul aj Tiatiiraich u ixoq.{*}#16.14 Aʼ atich u tenam Tiatiira tuulbʼal Aasia Menoor. Tul tira txʼakelich ok taanima te quBʼaal Tiuxh. Poro sebʼtichetz tabʼit ixoq viyolbʼal quBʼaal Tiuxh uvaʼ nikich tal Paʼp tiʼ Jesuus. Tul quBʼaal Tiuxh oksan t-taanima u ixoq uvaʼ aʼxh laʼich tabʼie, atz aʼxh laʼich inima inuqul viyolbʼal quBʼaal Tiuxh. Tul ok vet u ixoq s-niman tetz Jesuus. 15Atz aqʼax vet kuʼ ixoq xeʼ aʼ tuchʼ jankʼal tatin t-totzotz. Tul ech tal ixoq s-qe s-eche: —Oq kʼuqlelxh vet inkʼuul tiʼ quBʼaal Jesuus nik etileʼ, tul koʼvaq s-viʼ. Tul ech kaj ex t-votzotz, —xeʼt s-qe. Tul tetxhalxh iyaʼlu ixoq qukaj t-totzotz.
16Paquletz uvaʼ aʼlich qubʼen tiʼ inatxhax Tiuxh, tul eluʼl val u chelem ixvaak t-qubʼey uvaʼ nikich ibʼanbʼel tiʼ qʼiaʼm taʼn demoonio. Tul mam puaq nikich ikʼul inqʼa bʼaal taqʼon u ixvaak tiʼ u qʼiaʼm uvaʼ nikich ibʼaneʼ.
17Yaʼne txhʼuyeʼv vet bʼen u chelem ixvaak s-qiʼ. Tul sichʼiʼmxh nikich ibʼan tiʼ iyoloneʼ. Tul ech nikich tal s-qiʼ s-eche: —¡Inqʼa vinaq inqʼae, tan niman tetz inuqul inqʼa bʼaʼnla txhaq yole tiʼ u quBʼaal Tiuxh uvaʼ sibʼ at jaʼp t-amlikaʼ! Tul ¡aʼ nik motx tal inuqul sete tiʼ echitp t-inqʼa paʼv! —chichich s-qiʼ.
18Tul ech kuxh nikich ibʼan u chelem ixvaake txhaqpaq. Tul pal vet ikʼuul Paʼp s-te. Yaʼne sutxhqʼ Paʼp tiʼ iqul. Tul ech tal Paʼp te u demoonio uvaʼ nikich bʼanbʼen u ixvaak s-eche: —Nik val see tuchʼ ibʼij quBʼaal JesuKriisto uvaʼ: ¡Elen el kʼatz u ixvaake! —xeʼt Paʼp. Tul el vet el u demoonio t-taanima u ixvaak tuulbʼal u qʼij uvaʼe.
19Tiletz vet inqʼa bʼaal taqʼon u ixvaak uvaʼ yeʼlich laʼ itxʼak vet puaq tiʼ u ixvaak, tul txeyex vet Paʼp tuchʼ Siilas taʼn. Tul iqʼol vet Paʼp tuchʼ Siilas vatz inqʼa iqʼesal u tenam, tal uvaʼ nikich aqʼaxik kuʼ yol tinuqul. 20Tul ech tal vet u bʼaal taqʼon u ixvaak te inqʼa aqʼolaq kuʼ yol tinuqul s-eche: —Qat qiqʼo tzaan kaʼvaʼl inqʼa tij imam Israeel sevatz, inqʼa nik yansan iviʼ u qutenam. 21Tan nik kuxh motx itxhus inqʼa txhusbʼal uvaʼ yeʼ nik ikuy u qubʼekʼbʼal qubʼantaʼ, oʼ inqʼa aj Rooma, —xeʼtaqe.
22Yaʼne motx ilak vet tibʼ inqʼa xaol tiʼ Paʼp, atz tiʼ Siilas. Tul ibʼekʼ vet inqʼa aqʼolaq kuʼ yol tinuqul teesal toksaʼm Paʼp tuchʼ Siilas. Atz ibʼekʼ vet iqʼosox tuchʼ tzeʼ. 23Bʼeenoxh iqʼosox Paʼp tuchʼ Siilas, tul yaʼne aqʼax vet jaʼ t-tzeʼ s-kaʼbʼil. Tul bʼekʼex vet te u xeen tzeʼ, uvaʼ bʼeenoxh laʼichaq ixeetaʼ. 24Tabʼietz vet u xeen tzeʼ u yol uvaʼ alax s-te, tul iqʼol vet Paʼp tuchʼ Siilas t-vaʼt u atibʼal uvaʼ tiyaʼtebʼal okaʼp u tzeʼ uvaʼ tatibʼalxh inqʼa pereexho uvaʼ niimxh ipaʼv. Tul bʼeeno ijekʼex vet ka toq Paʼp tuchʼ Siilas tixoʼl kaʼl u nimla tzeʼ uvaʼ txeybʼalxh tetz pereexho.
25Poro aʼetzxh itxhaqʼaan aqʼbʼal, tul nikich inatxhkʼuula Paʼp quBʼaal Tiuxh tuchʼ Siilas. Atz nikichaq ibʼitz tiʼ toksal iqʼij quBʼaal Tiuxh. Tul nikich kuxh tabʼi jolt inqʼa pereexho inqʼa bʼitz uvaʼ nikich tal Paʼp tuchʼ Siilas.
26Yaʼne yeʼ kuxh taqla ul val u mam kabʼnaano. Tul xeʼt vet ixeʼ u tzeʼ tilkabʼoq el taʼn u kabʼnaano. Atz yekichxh motx jaqp vet inqʼa ijubʼalil u tzeʼ. Tul chitp vet el inqʼa kadeena, inqʼa qitzbʼal tetz jankʼal inqʼa pereexho. 27Uletz vet ivatz u xeen tzeʼ, tul tila uvaʼ jaqlich vet inqʼa jubʼal. Tul tiqʼo vet jaʼul viespaada. Tul junt kuxh kol iyatzʼ vet el tibʼ tala. Tan aʼ titzʼa uvaʼ maʼtich itzʼeqt vet tibʼ inqʼa pereexho.
28Yaʼne jankʼalxh iyakʼil Paʼp sichʼini. Tul ech tal Paʼp s-eche: —¡Yeʼ kuxh ayatzʼeʼl eebʼ! ¡Il oʼ, at oʼ s-qukaqaayil! —xeʼt Paʼp.
29Tul tabʼi vet u xeen tzeʼ ixamal tiʼ itxiquleʼ. Tul qʼex ipaloʼk kʼatz Paʼp. Tul oqxhich itiʼn vet t-xoʼval. Tul qael ikuʼ vet vatz Paʼp, atz vatz Siilas.
30Yaʼne iqʼol vet eluʼl Paʼp tuchʼ Siilas taʼn u xeen tzeʼ. Tul ech tal vet te Paʼp, atz te Siilas s-eche: —Txa vinaq, ¿kam toq inbʼaneʼ, tul laʼ chitp in t-inqʼa paʼv? —xeʼte.
31Yaʼne ech tal Paʼp tuchʼ Siilas s-eche: —Taʼn kuxh toq qal see uvaʼ: Kʼuqbʼa akʼuul tiʼ kam uvaʼ qat ibʼan u quBʼaal Jesuus. Echetz toq achitpe t-inqʼa apaʼv tuchʼ jankʼal avatin tavotzotz, —xeʼt Paʼp te u xeen tzeʼ.
32-34Antetzxh tuulbʼal u aqʼbʼal uvaʼe, tul iqʼol vet Paʼp tuchʼ Siilas taʼn u xeen tzeʼ t-totzotz tiʼ itxʼajt inqʼa takʼoʼm Paʼp, atz inqʼa takʼoʼm Siilas. Yaʼne xeʼt vet Paʼp tuchʼ Siilas tiʼ talax viyolbʼal quBʼaal Tiuxh tiʼ Jesuus te u xeen tzeʼ, atz te jankʼal tatin t-totzotz. Tul motx inima veteʼ. Tul chiibʼiyichxh vet tuchʼ jankʼal tatin t-totzotz tiʼ u toksataq tibʼ s-niman tetz Jesuus. Tul aqʼax vet kuʼ u xeen tzeʼ xeʼ aʼ tuchʼ jankʼal tatin t-totzotz taʼn Paʼp, atz taʼn Siilas. Tul aqʼax vet itxʼix Paʼp tuchʼ Siilas taʼn u xeen tzeʼ.
35Saqbʼetz vet s-ech eqal, tul txhaqax vet bʼen kaʼl inqʼa pol taʼn inqʼa aqʼolaq kuʼ yol tinuqul, tiʼ uvaʼ ech laʼich bʼen tal te viqʼesal u xeen tzeʼ s-eche: —Txhaqpu el kaʼvaʼl inqʼa vinaq chi, tu tzeʼ, nik tal viqʼesal, —xeʼt taqʼbʼ inqʼa pol.
36Yaʼne taqʼ vet viqʼesal xeen tzeʼ tootzaqi Paʼp kame uvaʼ ex tal inqʼa pol uvaʼ txhaqax taʼn inqʼa iqʼesal aqʼolaq kuʼ yol tinuqul. Tul ech tal te Paʼp s-eche: —Qat ibʼekʼl tzaan naq inqʼa aqʼol kuʼ yol tinuqul uvaʼ laʼ intxhaqpu vet el ex. Echetz bʼenoq vet ex tibʼaʼnil, —xeʼt veteʼ.
37Yaʼne ech tal vet Paʼp te u xeen tzeʼ s-eche: —Yeʼ laʼ isaʼa uvaʼ jutximal vet laʼ qel t-tzeʼ taʼn inqʼa aqʼolaq kuʼ yol tinuqul. Pet laʼ nal motx ul s-quvatz. Tul aʼaq laʼ ul eesan el oʼ tu tzeʼ. Tan ech ivatz inqʼa xaol tul ibʼekʼ inqʼa aqʼolaq kuʼ yol tinuqul quqʼosox s-tzeʼ. Tul tira yeʼ tabʼi inuqul u yol s-qiʼ, maq at qupaʼv, atz maq yeʼl qupaʼv. Tul loqʼs kuxh motx taqʼ jaʼ oʼ t-tzeʼ. Atz antxh oʼ aj tenam Rooma, —xeʼt Paʼp.
38Yaʼne qʼaʼv vet inqʼa pol tiʼ talax u yol te inqʼa aqʼolaq kuʼ yol tinuqul. Tul yekichxh motx xoʼv vet inqʼa iqʼesal uvaʼs tabʼitaʼ uvaʼ aj Roomaich Paʼp tuchʼ Siilas. 39Yaʼne aqʼbʼ vet inqʼa aqʼol kuʼ yol tinuqul tu tzeʼ. Tul ibʼokʼtziiaq vet Paʼp tuchʼ Siilas. Tul yaʼne exaq ijaq vet bʼaʼnil s-te tiʼ telaq el tu tzeʼ. Tul eesalaq veteʼ. Atz motxat ijaq bʼaʼnil tiʼ teleʼl Paʼp tuchʼ Siilas tu tenam.
40Eletz vet el Paʼp tu tzeʼ tuchʼ Siilas, tul yekichaq vet t-totzotz Liidia. Tul ikʼulaq vet tibʼ tuchʼ inqʼa niman tetz Jesuus. Tul taqʼaq vet ka itial inqʼa niman tetz Jesuus tiʼ ikʼuqbʼataq tel ikʼuul tiʼ Jesuus. Tul bʼenaq vet t-invaʼt u tenam.
ទើបបានជ្រើសរើសហើយ៖
Vibʼanoʼm inqʼa Apoostol 16: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
