Vibʼanoʼm inqʼa Apoostol 12
12
Uvaʼs iyatzʼax el Jakoovo tuchʼ uvaʼs ijaʼ Luʼ t-tzeʼ taʼn Eroodes Agriipa
1Tuulbʼaletz inqʼa qʼij uvaʼs nikich ipaxsal viyolbʼal quBʼaal Tiuxh, tul ibʼekʼ vet Eroodes, u mam iqʼesal, itxeyp jolol inqʼa niman tetz Jesuus tiʼ ikʼaxbʼisaleʼ. 2Tul ibʼekʼ vet Eroodes iyatzʼax el Jakoovo s-espaada, Jakoovo u tatzik Xhun.#Kuxh 1.19 3Tiletz vet Eroodes uvaʼ nikich ichiibʼ inqʼa iqʼesal xoʼl inqʼa tij imam Israeel tiʼ viyatzʼax el Jakoovo, tul ibʼekʼat vet Eroodes itxeyp Luʼ. Tul aʼ itxeyp Luʼ uvaʼs ibʼant viqʼiil u nimla qʼij tetz inqʼa tij imam Israeel, uvaʼs nik itxʼaʼp inqʼa paan uvaʼ yeʼl aqʼbʼal jaʼ tuul atoʼk. 4Txeypetz vet Luʼ, tul aqʼax vet jaʼ Luʼ t-tzeʼ. Tul kaj tanul sol oksal tiʼ ixeel Luʼ. Kajvaʼl sol atich tuul txhaq tanul. Tan aʼich titzʼabʼal Eroodes tiʼ Luʼ uvaʼ laʼich toksa tiqʼabʼ u tenam uvaʼ il kuxh u nimla qʼij Ipal Aanxel nikich ipal paʼl.#Eeksodo 12.1-27{*}#12.4 Aʼ u nimla qʼij Vipal Aanxel tzitza; aʼe u ‹Pesach› nik tal viyolbʼal quBʼaal Tiuxh uvaʼ tzʼibʼamal ka. Aʼ nik inimal viqʼiil uvaʼs ikolox inqʼa tij imam Israeel vatz Vipal Aanxel. Tan bʼaxich alax te inqʼa tij imam Israeel uvaʼ laʼich motx itziku ok bʼiitxhaqul ikaqal karneʼl tziʼaq totzotz, tul kʼuxh laʼich pal u aanxel, tan yeʼxhkam laʼich motx ibʼana. Antxhtuʼ. Tan paletz vet u aanxel tiʼ iyatzʼax inqʼa bʼaxa kʼaola, tul aʼ pal iyatzʼ inqʼa bʼaxa ikʼaol inqʼa aj Ejiipto. Pet yeʼl inqʼa bʼaxa ikʼaol inqʼa tij imam Israeel yatzʼax el, tan til u aanxel uvaʼ atich ok vikaqal inqʼa chelem karneʼl tziʼ totzotz inqʼa tij imam Israeel. Eeksodo 12.1-27; Leviitiko 23.4-8 5Bʼeenoxhichetz xeemal Luʼ tu tzeʼ taʼn inqʼa sol, tul aʼ inqʼa niman tetz Jesuus yeʼ nikich motx iyaʼ tiʼ inatxhax Tiuxh tiʼ Luʼ.
Uvaʼs teesal el Luʼ t-tzeʼ taʼn val viaanxel quBʼaal Tiuxh
6Echichetz qal oksal vet Luʼ tiqʼabʼ u tenam taʼn Eroodes, tul vatyich Luʼ xoʼl kaʼvaʼl sol. Atz qitzichat ok Luʼ tiʼ inqʼa sol tuchʼ kaʼvaʼl kadeena. Tul bʼeenoxh xeemalich vijubʼalil u tzeʼ taʼn kaʼt inqʼa sol. 7Tul yeʼ kuxh taqla aqʼbʼ val viaanxel quBʼaal Tiuxh kʼatz Luʼ. Tul yekichxh litzʼkabʼin val u xamal tuul u tzeʼ. Tul ex kanaxoq txala tuul Luʼ taʼn u aanxel. Tul ul vet ivatz Luʼ.
Tul ech tal u aanxel te Luʼ s-eche: —¡Nal alakpeʼ! —xeʼt u aanxel. Taʼnetzxh tal u aanxel u yol, tul txhaqpeʼl inqʼa kadeena tiʼ junun iqʼabʼ Luʼ. 8Tul ech tal u aanxel te Luʼ s-eche: —Bʼan avutxheʼ. Tul qitzoʼk vavoksaʼm seʼe. Atz qitz vachichʼ xaʼp, —xeʼt u aanxel. Tul ibʼan vet Luʼ kam uvaʼ tal u aanxel. Yaʼne echat tal u aanxel inpaqt te Luʼ s-eche: —Oksa bʼen vaqinkin oksaʼm seʼe. Tul txhʼuyeʼven s-viʼ, —xeʼte.
9Yaʼne txhʼuyeʼv vet eluʼl Luʼ tiʼ u aanxel. Poro yeʼ nikich ibʼen te Luʼ oq nuqxh uvaʼ nikich ibʼan u aanxel te Luʼ. Pet aʼ nikich titzʼa Luʼ uvaʼ vaʼq kuxh kam nikich ikʼutxhux te Luʼ. 10Paletz vet paʼl u aanxel tuchʼ Luʼ vatz inqʼa sol, inqʼa bʼaxa xeenal, poro tira yeʼ ilix Luʼ taʼn. Yaʼne palaq vet paʼl vatz inqʼa ikaʼv xeenal. Tul elaʼpaq vet vatz u nimla jubʼal, uvaʼ txhʼitxhʼichxhtuʼ uvaʼ nik telaʼp vet t-bʼey, tal uvaʼ nik palk vet inqʼa xaol. Tul jaqp kuxh vet u jubʼal s-junal. Elaqetz vet ul, tul xaonaq vet bʼen invaʼl qʼeʼtx bʼey. Tul ajtxh til Luʼ yeʼlich vet u aanxel s-kʼatza.
11Yaʼnetze ul vet titzʼabʼal Luʼ, tul ech tal vet Luʼ s-eche: —¡Qatetz bʼeny vet s-ve uvaʼ iaanxel bʼakxh quBʼaal Tiuxh uvaʼ qat itxhaq tzaan tiʼ veesal tiqʼabʼ Eroodes, atz tiʼ veesal vatz inqʼa yeʼbʼaʼn uvaʼ saʼ tulbʼe in inqʼa iqʼesal inqʼa inmol s-tijaq imam Israeel, —xeʼt vet Luʼ.
12Tiletz vet Luʼ uvaʼ jit vet t-tzeʼ atich kuʼ Luʼ, tul yekich vet Luʼ t-totzotz Mal, vitxutx Xhun; Xhun uvaʼ Kuxh, chichich eʼli. Mamalaetz xaol kʼulich vet tibʼ tu totzotz Mal tiʼ inatxhax Tiuxh tiʼ Luʼ.
13Yaʼne sikʼlen Luʼ vatz u jubʼal tetz viqʼanalil u otzotz. Tul eluʼl val u ixvaak, uvaʼ Roodeich ibʼij, tiʼ tabʼileʼ jaʼl uvaʼ nikich isikʼleneʼ. 14Tabʼietz vet u ixvaak viqul Luʼ, tul yekichxh chiibʼ u ixvaak. Poro yeʼ ijaq ka u ixvaak u jubʼal kʼuxh oqxhich ichiibʼ vete. Pet aʼl qʼex tok u ixvaak tiʼ talax te inqʼa kʼulich tibʼ tu otzotz, tiʼ uvaʼ atich vet Luʼ vatz jubʼal.
15Yaʼne ech tal vet inqʼa kʼulich tibʼ tu otzotz te u ixvaak s-eche: —¡Yannaʼqebʼ aviʼ! ¡Xaʼte kam kuxh nik aabʼi! —xeʼt eʼl u ixvaak.
—¡Yeʼle! ¡Nuqxhtuʼ! Atz ¡iqulxh Luʼ! —xeʼt u ixvaak inpaqte.
Yaʼne ech motx tal te u ixvaak s-eche: —Yeʼle. Jit Luʼe. Pet aʼ u aanxele uvaʼ nik xeen Luʼ, —xeʼtaqe.
16Poro aʼlxh nikich isichʼin Luʼ vatz u jubʼal tiʼ ijaqpoʼk. Elaqetz vet ul inqʼa niman tetz Jesuus tiʼ ijaqax u jubʼal, tul tilaq veteʼ uvaʼ Luʼiche. Tul tira motx kajaq vet taanima. 17Yaʼne ibʼan Luʼ val u etxhlal tuchʼ iqʼabʼ uvaʼ yeʼich laʼ motx tiʼni. Tul motx tal vet Luʼ inuqul te inqʼa niman tetz Jesuus uvaʼ kam tulbʼe quBʼaal Tiuxh teleʼl Luʼ t-tzeʼ. Yaʼne ech vaʼt u yol tal Luʼ s-eche: —Alvaq te Jakoovo, atz alvaq te inqʼa qumol, inqʼa niman tetz Jesuus, tiʼ uvaʼ kam qat tulbʼe quBʼaal Tiuxh veleʼl t-tzeʼ, —xeʼt Luʼ. Tul vaʼten vet yekich Luʼ.
18Saqbʼetz veteʼ, tul mam yol motx xeʼt vet xoʼl inqʼa sol, tiʼ uvaʼ keʼch teleʼl Luʼ t-tzeʼ. 19Yaʼne ibʼekʼ vet Eroodes itxhokox Luʼ. Poro yeʼ vet Luʼ txheji. Tul ijotxhʼi vet Eroodes itziʼ inqʼa sol, inqʼa xeenich tetz Luʼ. Atz ibʼekʼ vet Eroodes iyatzʼaxaq el.
Eletz vet inbʼiil s-qʼij ikam inqʼa sol, inqʼa xeen tzeʼ, tul el vet bʼen Eroodes tuulbʼal Judeea. Tul yekich vet Eroodes atinoq tu tenam Sesareea.
Uvaʼs ikam vet Eroodes
20Tuulbʼaletz inqʼa qʼij inqʼae, tul lakpinaʼqich iviʼ Eroodes, u mam iqʼesal, tiʼ inqʼa aj tenam Tiiro, atz tiʼ inqʼa aj tenam Sidoon. Yaʼne motx ibʼan vet kaʼvaʼl inqʼa tenam inqʼae eela iyol tiʼ ibʼokʼtziil Vlaasto, viqʼesal ilol kam tetz Eroodes. Tul aʼich Vlaasto laʼich bʼokʼtziin Eroodes tiʼ ikuyux ikʼayil tetxhbʼubʼal kaʼvaʼl inqʼa tenam inpaqte tuchʼ inqʼa xaol tuulbʼal Judeea. Tan nikich isaʼ inqʼa tenam uvaʼ bʼaʼn laʼich tatinaq s-vatzaq. Tul atich tiqʼabʼ Eroodes iqʼexsal paʼl etxhbʼubʼal xoʼl kaʼvaʼl inqʼa tenam inqʼae.
21Yaʼne opoon vet vaʼl qʼij uvaʼ laʼich ikʼul tibʼ Eroodes tuchʼ vitxhaq kaʼvaʼl inqʼa tenam inqʼae, tul aqʼbʼ vet Eroodes xoʼl kaʼvaʼl u tenam. Tul bʼeeno viqich tibʼ Eroodes, tul toksa vet bʼen Eroodes toksaʼm tetz mam iqʼesal. Tul yekich vet Eroodes kʼuqloq tu xhiila tetz mam iqʼesal. Tul xeʼt vet Eroodes yolon xoʼl u tenam.
22Taʼnetz kuxh tabʼi inqʼa tenam iyolon Eroodes, tul mam sichʼiʼm nikich motx ibʼan vet tiʼ toksal iqʼij Eroodes. Tul ech motx tal s-eche: —¡Jit kuxh vet iqul invaʼq vinaq uvaʼ nik iyoloneʼ! Pet ¡tiuxh vete uvaʼ nik iyoloneʼ! —xeʼt isichʼin inqʼa tenam.
23Iletz kuxh u yol nikich tal inqʼa tenam tiʼ toksal iqʼij Eroodes, tul yekich kʼaxbʼisal Eroodes taʼn val viaanxel quBʼaal Tiuxh, tiʼ uvaʼ jit aʼ quBʼaal Tiuxh oksal iqʼij taʼn Eroodes. Tan yekich txhej vet mamala kan t-tuul. Tul tzitzi ixeʼt vet val u txhoʼm s-kʼatza, tetxhal ikameʼ.{*}#12.23 Aʼ kamk Eroodes tu yaʼbʼ 44 m.t.J.
24Pet koq viyolbʼal quBʼaal Tiuxh, tan aʼl nikich iyakʼineʼ. Atz aʼl nikich inaʼ tatxhul inqʼa niman tetz Jesuus.
Uvaʼs iqʼaʼv Vernavee tuchʼ Saaulo inpaqte tu tenam Antiokiia
25Maʼtichetz ex taqʼt vet ka Vernavee tuchʼ Saaulo inqʼa puaq tetz lotxhbʼal te inqʼa iqʼon iviʼ xoʼl inqʼa niman tetz Jesuus tu tenam Jerusaleen, yaʼne qʼaʼv vet bʼen Vernavee tuchʼ Saaulo tu tenam Antiokiia inpaqte. Tul ant Xhun bʼen tiʼ Vernavee, atz tiʼ Saaulo, Xhun uvaʼ ‹Kuxh,› chichich eʼli.{*}#12.25 Tatinichetz tibʼ Vernavee tuchʼ Xhun, tan itxhʼojich Vernavee Xhun. Koloseenses 4.10
ទើបបានជ្រើសរើសហើយ៖
Vibʼanoʼm inqʼa Apoostol 12: ixlC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2016, Wycliffe Bible Translators, Inc. All rights reserved.
