Loos 2

2
Vajtswv Txoj Kev Txiavtxim
1Yogli ntawd, tus phoojywg, koj puas txiavtxim rau lwmtus thiab? Koj yuav nyiam yog leejtwg los xij, koj yeej zam tsis tau li. Rauqhov yog koj txiavtxim rau lwmtus tag, tiamsis koj ho ua tibyam nkaus li lawv ua thiab, ces yog koj teemtxim rau koj xwb. #Math 7:1; Lukas 6:37 2Peb paub tias thaum Vajtswv txiavtxim rau cov neeg uas ua tej ntawd Nws ua yog lawm. 3Tiamsis tus phoojywg, koj tseem ua kiag yam uas koj txiavtxim rau lwmtus vim lawv ua yam koj ua ntawd thiab! Koj xav tias koj yuav khiav dim Vajtswv txoj kev txiavtxim no lov? 4Lossis puas yog koj tuammom qhov uas Vajtswv ua siabdawb siabzoo, thiab ua siabloj siabntev rau koj? Koj puas paub tias qhov uas Vajtswv ua siabdawb siabzoo rau koj ntawd yog Nws xav kom koj tso koj tej kev txhaum tseg?
5Tiamsis koj muaj lub siab uas tawv ncauj thiab tsis kam tso koj tej kev txhaum tseg li, qhov ntawd yog koj rov teemtxim hnyav ntxiv rau koj rau Hnub uas Vajtswv yuav qhia txog Nws txoj kev npautaws thiab kev txiavtxim ncajncees. 6Rauqhov Vajtswv yuav muab nqizog rau txhua tus rawsli tes haujlwm uas nws tau ua los lawm. #Nnkauj 62:12; Paj 24:12 7Vajtswv yuav muab txojsia ntev dhawv mus ibtxhis rau cov neeg uas niajhnub ua zoo; nrhiav Vajtswv tus tshwjchim, nrhiav Nws txoj kev qhuas, thiab nrhiav txojsia uas tsis txawj tuag. 8Vajtswv yuav chim thiab npautaws rau cov neeg uas ua rawsli lawv lub siab nyiam, tsis nyiam qhov tseeb, tiamsis nyiam kev phem kev qias. 9Txhua tus neeg uas ua phem yuav raug kev txomnyem thiab nyuajsiab; cov Yudais yuav xub raug uantej, tomqab ntawd yog Lwm Haivneeg. 10Tiamsis Vajtswv yuav pub tshwjchim, yuav qhuas, thiab pub kev kajsiab rau txhua tus uas ua zoo; yuav xub pub rau cov Yudais uantej, tomqab ntawd yuav pub rau Lwm Haivneeg. 11Rauqhov Vajtswv yeej txiavtxim rau txhua tus ib yam nkaus. #2Kev 10:17
12Lwm Haivneeg uas tsis muaj Mauxes txoj Kevcai, thaum lawv ua txhaum, lawv raug puastsuaj tiamsis yuav tsis raug txiavtxim los ntawm txoj Kevcai. Cov Yudais muaj txoj Kevcai, thaum lawv ua txhaum, lawv yuav raug txiavtxim los ntawm txoj Kevcai ntawd. 13Rauqhov Vajtswv tsis suav hais tias tus neeg uas hnov txoj Kevcai yog tus uas ncajncees, tiamsis tus neeg uas ua lawv li txoj Kevcai thiaj yog tus neeg ncajncees. 14Lwm Haivneeg tsis muaj Mauxes txoj Kevcai, tiamsis thaum lawv lub siab qhia kom lawv ua ib yam dabtsi rawsli txoj Kevcai ntawd qhia, ces txawm yog lawv tsis muaj txoj Kevcai los lawv yeej paub tias muaj ib txoj kevcai tswj lawv lawm. 15Lawv tus cwjpwm yeej qhia tau hais tias lawv twb muab txoj Kevcai ntawd sau cia rau hauv lawv lub siab lawm. Lawv lub siab uas paub qhov phem qhov zoo yuav qhia tau hais tias yeej muaj tseeb li ntawd tiag, vim qeezaus lawv lub siab komtxim rau lawv, thiab qeezaus lawv lub siab kuj qhia hais tias lawv ua zoo lawm. 16Yogli ntawd, rawsli Txoj Moo Zoo uas kuv qhia, Hnub uas Vajtswv txiavtxim, Nws yuav kom Yexus Khetos txiavtxim rau tej uas neeg lub siab xav nraim nkoos.
Cov Neeg Yudais Thiab Txoj Kevcai
17Koj ne, koj suav hais tias koj yog neeg Yudais; koj ciasiab rau txoj Kevcai thiab koj khav hais tias koj nrog Vajtswv sib raugzoo. 18Koj paub tej uas Vajtswv xav kom koj ua, thiab koj paub qhov phem qhov zoo rauqhov koj twb tau kawm los ntawm txoj Kevcai lawm. 19Koj twb paub meej lawm hais tias koj yog ib tug uas coj cov digmuag kev, thiab yog lub teeb rau cov uas nyob hauv qhov tsausntuj, 20koj yog ib tug uas cobqhia cov ruam, thiab yog ib tug uas qhia cov menyuam yaus. Koj yeej paub meej tias txoj Kevcai ntawd yog qhov uas ua rau koj puvnpo tswvyim thiab qhov tseeb.
21Koj qhia lwmtus, ua licas koj tsis qhia koj tuskheej? Koj qhuabqhia hais tias, “Tsis txhob ua tubsab,” tiamsis koj puas ua tubsab? 22Koj hais tias, “Tsis txhob deev luag pojniam luag txiv,” tiamsis koj puas deev luag pojniam luag txiv? Koj ntxub tej mlom kawg li, tiamsis koj puas tseem mus nyiag tej khoom uas nyob hauv tej tuamtsev teev mlom ntawd? 23Koj khav hais tias koj muaj Vajtswv txoj Kevcai, tiamsis koj puas ua rau Vajtswv poob ntsejmuag los ntawm qhov uas koj hla Nws txoj Kevcai ntawd? 24Vajtswv Txojlus hais tias, “Twb yog vim nej cov neeg Yudais ntag, es Lwm Haivneeg thiajli thuam Vajtswv lub npe.” #Yaxaya 52:5
25Yog koj ua rawsli txoj Kevcai, mas qhov uas koj ua kevcai txiav ntawd thiajli muaj qabhau; tiamsis yog koj tsis ua rawsli txoj Kevcai, ces qhov uas koj ua kevcai txiav ntawd tsuas zoo ib yam li tus uas tsis tau ua kevcai txiav thiab xwb. 26Yog Lwm Haivneeg uas yeej tsis tau ua kevcai txiav li, tiamsis lawv ho coj rawsli txoj Kevcai, Vajtswv yuav tsis suav hais tias lawv twb ua kevcai txiav lawm no lov? 27Yogli ntawd, Lwm Haivneeg uas tsis ua kevcai txiav ntawm nqaijtawv li, tiamsis ho ua rawsli txoj kevcai qhia, lawv yuav txiavtxim rau nej cov uas twb muaj ntaub ntawv sau tseg cia thiab twb ua kevcai txiav lawm, vim nej tsis ua rawsli txoj Kevcai ntawd.
28Tus uas yog neeg Yudais tiag uas yeej ua kevcai txiav lawm yog tus zoo licas? Tus ntawd yog tus uas tsis lam ua kevcai txiav ntawm nqaijtawv xwb. 29Tus uas yog neeg Yudais tiag, yog tus neeg Yudais hauv lub siab lub ntsws, qhov ntawd, yog nws lub siab twb raug ua kevcai txiav los ntawm Vajtswv tus Ntsujplig lawm, tsis yog los ntawm txoj Kevcai. Tus neeg ntawd tsis yog tus uas neeg ntiajteb qhuas, tiamsis yog tus uas Vajtswv qhuas. #2Kev 30:6

ទើបបានជ្រើសរើសហើយ៖

Loos 2: MWW2022

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល