Roma 9
9
Meꞌ aꞌa tapeneꞌ weꞌ Tuhanin
1Niyaꞌ pe seddili batang bissāku si kaꞌam duk inin asal bennal. Gaꞌi ku magdustaꞌ peggeꞌ sukuꞌ pu si Isa Almasi ku. Kataꞌuhanku dem pikilanku teꞌed weꞌ bennal sōng pinaꞌinku inin duk kataꞌuhan isab inin weꞌ Niyawa Sutsihin, iye magbayaꞌ dem pikilankun. 2Iye inin batang pinaꞌinkun, weꞌ asal bohat teꞌed ateykun duk luwal ku suse manamal sabab meꞌ pagkasiku bangsa Israꞌilin peggeꞌ gaꞌi siye ngatu nuhut si Isa Almasi. 3Bang makajari siꞌ hadja, atasku pasapeꞌ amban Isa Almasi duk pī dem narkaꞌ ngagantiꞌan meꞌ bangsakun, meꞌ pagkasiku bangsa Israꞌilin, supaya hadja siye gaꞌi tapī si narkaꞌ. 4Ekka kahāpan pangurung Tuhanin si siye. Siye bangsa tapeneꞌ weꞌ Tuhanin hinangne meꞌ aꞌane. Duk hininang isab siye weꞌ ne meꞌ anakne. Pinakitehan weꞌ ne si siye sahayanen. Mimpiye ngajanjiꞌ Tuhanin si siye. Siye pangurunganne saraꞌnen. Tinoloꞌan siye weꞌ ne bang saꞌingge subey pamahadjede iyehin. Ekka sanggupne si siye weꞌ asal tabanganne siye. 5Siye meꞌ tubuꞌ kapapuꞌan kami mabangsahanin. Duk Isa Almasi tubuꞌde du isab peggeꞌ pagmanusiyaꞌnen, bangsa Israꞌil iye. Tuhanin, iye magbayaꞌ si kēmon-kēmonin, pataꞌ pinudji salama-lama. Amin.
6Dumaꞌin hep pinaꞌinkun weꞌ gaꞌi tumanan Tuhanin sanggupne si meꞌ bangsa Israꞌilin, saguwaꞌ iye pinaꞌinkun weꞌ dumaꞌin hep kēmon tubuꞌ Israꞌilin bennal meꞌ aꞌa Tuhanin. 7Duk dumaꞌin kēmon meꞌ tubuꞌ si Ibrahimin kaꞌēnan tubuꞌne teꞌed. Toꞌo inin peggeꞌ paꞌin Tuhanin hep pu Ibrahim, “Si meꞌ anaknun, luwal hadja tubuꞌ Isahakin kimmatanku meꞌ tubuꞌnun.” 8Bisan ne siye meꞌ tubuꞌ Ibrahim, dumaꞌin hātinen weꞌ kinimmatan siye weꞌ Tuhanin meꞌ anakne. Saguwaꞌ meꞌ tubuꞌ Ibrahimin, inanakan sa pananggup Tuhan si iyehin, siye miyaꞌan meꞌ tubuꞌne teꞌedin. 9Iye hep inin pananggup Tuhan pu Ibrahimin, paꞌinne, “Tahun dambuwaꞌ pitu ku balik duk andanun si Sara nganak du iyan lella.”
10Dumaꞌin hadja inin. Bang si Rebeka, niyaꞌ duwe anakne lella, si Esaw duk si Yakub. Dambuwaꞌ du samaden, si Isahak, papuꞌ kamihin. 11-12Gaꞌ pe meꞌ anakne kambal miyaꞌan inanakan, paꞌin Tuhanin pu Rebeka, “Salihin magbayaꞌ iyan si sakahin.” Pagpaꞌin Tuhan miyaꞌan, gaꞌ pe kapaghinangan hāp atawa laꞌat meꞌ kambalin peggeꞌ gaꞌ pe siye miyaꞌan inanakan. Saguwaꞌ andang ne dambuwaꞌin tapeneꞌ weꞌ Tuhanin supaya kataꞌuhan weꞌ amban bayaꞌne bang niyaꞌ tapeneꞌne. Dumaꞌin hangkan aꞌahin peneꞌ Tuhanin sabab meꞌ hinanganne mahāpin saguwaꞌ weꞌ bayaꞌ Tuhanin du. 13Pasal inin bakas tasulat dem kitab, paꞌin Tuhanin, “Si Yakub kinalasahankun, dumaꞌin si Esaw.”
14Manjari bang kuweꞌ iyan, kaw paꞌinbi weꞌ gaꞌi bentel Tuhanin. Dumaꞌin weꞌ gaꞌi bentel Tuhanin. 15Saguwaꞌ Tuhanin magbayaꞌin bang sine pineneꞌne hinangne meꞌ aꞌanen. Paꞌinne pu si Musa, “Aku magbayaꞌin bang sine kaꞌaseꞌankun. Aku magbayaꞌin bang sine kaluꞌuyanku ateyin.” 16Hangkan kataꞌuhante weꞌ dumaꞌin sabab bayaꞌte atawa pagtuyuꞌte maghinangan hāp hangkan kite kaꞌaseꞌan Tuhanin, saguwaꞌ weꞌ bayaꞌ Tuhanin maꞌaseꞌ iye si kite. 17Niyaꞌ isab inaka sabab sultan si lahat Misil awwalley. Tasulat dem kitab weꞌ paꞌin Tuhanin si sultanin, “Hinangte kew sultan magbayaꞌ tuꞌu si lahat inin supaya sabab kaꞌu tapakitehanku balakatkun duk supaya ngabantu ēnkun si tibuꞌukan dunya.” 18Hangkan takitete weꞌ Tuhanin maꞌaseꞌ si sasuku kabayaꞌanne kinaꞌaseꞌanin. Duk amban bayaꞌne isab pasagadanne meꞌ aꞌahin magtuwas kōk.
Tuhanin astel saguwaꞌ maꞌaseꞌ isab
19Kaw dambuwaꞌ kaꞌam magpaꞌin si aku, “Bang kuweꞌ iyan, weꞌey Tuhanin sallaꞌne meꞌ aꞌahin. Gaꞌ du niyaꞌ makasaggaꞌ kinabayaꞌannen.” 20Daꞌa iyan bissāhun. Sine kew weꞌ tajampanu Tuhanin bu manusiyaꞌ kew hadja? Makajari ke paliyukin magpaꞌin si aꞌa mangahinang iyehin, “Weꞌey ku hinangnu sa inin?” 21Kataꞌuhante weꞌ aꞌa maghinang paliyukin taga kapatut maghinang ine-ine kabayaꞌanne hininangin. Amban da kubbeng bulak ngahinang iye dambuwaꞌ pangisihan hāp manamal duk mahalgaꞌ duk dambuwaꞌ isab gaꞌi tantu hāp duk ginuna kahabaꞌ ellew.
22Damikkiyan isab Tuhanin makajari iye magbayaꞌ ine-ine batang hinangne si meꞌ manusiyaꞌin. Bisan Tuhanin astel si meꞌ aꞌa madusehanin duk batang leggane siye duk batang tapakitehanne balakatnen saguwaꞌ sandalanne dahuꞌ astelnen duk gaꞌi ne siye leggane bisan du siye pataꞌ ilegga. 23Hangkan sandalan Tuhanin astelnen supaya kataꞌuhan meꞌ manusiyaꞌin kēmon weꞌ gaꞌi takila-kila kahāpne si meꞌ aꞌa kaꞌaseꞌanne duk tapeneꞌne pinahadje si pasōnganin. 24Kite bi hep meꞌ tapeneꞌnen. Dumaꞌin hadja amban bangsa Yahudi kite bi, saguwaꞌ amban meꞌ bangsa dumaꞌin Yahudi du isab. 25Pinasulat hep weꞌ Tuhanin pu Nabi Hosea sabab inin. Paꞌinne,
“Meꞌ dumaꞌin aꞌaku tagnaꞌin, siye ne iyan inēnanku meꞌ aꞌakun. Bangsa manggaꞌi kinalasahankun, siye ne iyan inēnanku kinalasahankun.
26Duk laꞌi si lahat bakas pangakahanku siyehin weꞌ dumaꞌin siye meꞌ aꞌaku, laꞌi isab akahanku siye iyan weꞌ siye meꞌ anakku, aku Tuhan maꞌellumin.”
27Duk Nabi Isaya bakas nulat isab sabab meꞌ bangsa Israꞌilin. Paꞌinne, “Bisan pe bangsa Israꞌilin ekka manamal kuweꞌ umus si higad tahik gaꞌi taꞌitung, kuweꞌahat du hadja iyan malumuwas amban pangaleggahan Tuhan siyehin. 28Peggeꞌ bugtuꞌ weꞌ sōng legga Tuhanin du meꞌ aꞌa si dunyahin. Gaꞌi iye magdayan ngalegga siye.” 29Bakas pinaꞌal isab weꞌ Nabi Isaya awwalley sabab bangsa Israꞌilin, paꞌinne, “Bang Tuhanin, iye magbayaꞌ si kēmon manusiyaꞌin, gaꞌ kite bi miyaꞌan lebbihanne tubuꞌ, kuweꞌ siꞌ kite bi miyaꞌan meꞌ aꞌa si puweblo Sodom duk si puweblo Gomorahin, ubus ne kēmon matey.”
Bangsa Israꞌilin gaꞌi sandel pu Isa Almasi
30Manjari, ine paꞌinte sabab inin? Iye paꞌinte weꞌ meꞌ aꞌa dumaꞌin Yahudihin, gaꞌ siye ngapas weꞌ inampun duk kinimmatan siye bentel si pagmatahan Tuhanin. Saguwaꞌ siye ne inampun duk kinimmatan bentel weꞌ Tuhanin sabab sandelde pu si Isa Almasihin. 31Saguwaꞌ meꞌ bangsa Israꞌilin, maggeꞌes teꞌed siye nuhut saraꞌin supaya siye kinimmatan bentel weꞌ Tuhanin saguwaꞌ gaꞌ tatuhutde saraꞌin hangkan gaꞌ siye kinimmatan bentel weꞌ Tuhanin. 32Na, weꞌey sa miyaꞌan? Peggeꞌ meꞌ bangsa Israꞌilin ngandel si meꞌ hinangande mahāpin. Gaꞌi siye ngatu sandel pu si Isa Almasi supaya siye asal kinimmatan bentel weꞌ Tuhanin. Paꞌin kitabin weꞌ Isa Almasi dalil batu duk meꞌ bangsa Israꞌilin kuweꞌ sumampuk si batu miyaꞌan sabab gaꞌi siye ngatu sandel pu si Isa. 33Paꞌin Tuhanin hep dem kitab,
“Laꞌi si puweblo Siyon niyaꞌ bettadku batu kasumampukan meꞌ aꞌa malaꞌihin duk siye hebbaꞌ. Saguwaꞌ sasuku ngandel si batu inin, gaꞌi siye magsusun sabab sandelde si iyehin.”
ទើបបានជ្រើសរើសហើយ៖
Roma 9: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
