Roma 7
7
Magpahāti sabab saraꞌin
1Meꞌ kapungtinaꞌihanku masandel pu si Isa Almasihin, bugtuꞌ tahātibi sōng pinaꞌinku inin peggeꞌ kataꞌuhanbi saraꞌin. Saraꞌin taga kapatut hep si aꞌa tiggelan aꞌa miyaꞌan ellum. 2Saꞌupama bang dendehin magella, paꞌin saraꞌin weꞌ subey iye magdambuwaꞌ duk ellanen tiggelan ellanen ellum. Saguwaꞌ bang matey ne ellanen gaꞌ ne niyaꞌ kaput saraꞌ miyaꞌan si iye. 3Manjari, bang ellum pe ellanen bu padambuwaꞌ iye si lella seddili, magjina iye. Saguwaꞌ bang matey ne ellanen gaꞌ ne niyaꞌ kaput saraꞌin si iye, hangkan gaꞌi iye magjina bang iye magella balik peggeꞌ matey ne du ellanen.
4Meꞌ kapungtinaꞌihanku masandel pu si Isahin, kuweꞌ miyaꞌan du isab kaꞌam duk saraꞌ tasulat si Musahin. Gaꞌ ne niyaꞌ kaput saraꞌ miyaꞌan si kaꞌam peggeꞌ kuweꞌ ne kaꞌam bakas matey magtuhut duk si Isa kamateynen. Duk kuweꞌ magtuhut isab kaꞌam pinakellum duk si Isa pamakellum iye balikin duk kuweꞌitu sukuꞌ si iye ne kaꞌam supaya kaꞌam kapaghinangan hāp duk tapudji du Tuhanin. 5Matuꞌuhin masa iye pe tinuhutten bi disalite bi magdusehin, sakaliꞌ takalete saraꞌin masi du hinangte meꞌ malaꞌatin duk pasōng pe bayaꞌte magdusehin. Hangkan maghinang laꞌat kite bi bu kaꞌujudannen matey kite bi duk tapī dem narkaꞌ. 6Saguwaꞌ kuweꞌitu gaꞌ ne niyaꞌ kaput saraꞌin si kite bi peggeꞌ kuweꞌ bakas matey ne kite bi duk pinaluwas ne kite bi amban duse. Seddili ne panuhutte bi Tuhanin kuweꞌitu. Dumaꞌin ne kuweꞌ matuꞌuhin weꞌ subey hadja tatuhutte bi sasuku tasulat dem saraꞌin. Saguwaꞌ kuweꞌitu baꞌahuhan Niyawa Tuhanin ne ateyten bi duk tabanganne kite bi nuhut Tuhanin.
Saraꞌin duk dusehin
7Kaw kaꞌam magpaꞌin, “Na, bang kuweꞌ iyan, laꞌat hatiꞌ saraꞌin.” Gaꞌi. Gaꞌi laꞌat saraꞌin. Bang gaꞌ miyaꞌan niyaꞌ saraꞌ, gaꞌi pastiꞌ si kite bang ine dusehin. Saꞌupama bang gaꞌ miyaꞌan niyaꞌ saraꞌ magpaꞌin, “Daꞌa pagnapsuhanun alataꞌ saweꞌnun,” na, gaꞌ siꞌ kataꞌuhanku weꞌ magnapsuhin laꞌat. 8Pagsakaliꞌ kataꞌuhanku amban saraꞌin weꞌ gaꞌi hāp magnapsuhin, manjari usaꞌ disaliku magdusehin hangkan pasōng napsukun. Hāti pinaꞌinku inin, bang gaꞌ niyaꞌ saraꞌ, gaꞌi kataꞌuhante weꞌ magduse kite. 9Masa gaꞌ pe kataꞌuhanku saraꞌin, kannalku weꞌ hāp ku duk gaꞌ niyaꞌ duseku. Saguwaꞌ sakaliꞌ ne kataꞌuhanku saraꞌin, tahātiku ne weꞌ dusehan hatiꞌ ku duk magkasōng dusekun, 10duk tahātiku weꞌ sukuꞌkun matey duk tapī si narkaꞌ. Saraꞌin pinangurung weꞌ Tuhanin supaya bang tuhutte bi, urunganne kite bi umul gaꞌ tamananne si surgaꞌ. Saguwaꞌ bang si aku, peggeꞌ gaꞌi tatuhutku saraꞌin, sukuꞌkun matey duk ilegga weꞌ Tuhanin. 11Kuweꞌ hep ku kaꞌakkalan weꞌ dusehin peggeꞌ gaꞌi tatuhutku saraꞌ Tuhanin. Duk kaꞌujudanne iyan matey ku duk tapī ku si narkaꞌ.
12Manjari, saraꞌ pinangurung weꞌ Tuhanin gaꞌ niyaꞌ laꞌat-laꞌatne. Kēmon pangandaꞌakan saraꞌin amban Tuhan duk bentel duk hāp. 13Na, saraꞌ Tuhan mahāp inin, iye ke inin jānante matey duk tapī si narkaꞌ? Asal dumaꞌin. Saguwaꞌ duseten jānnen. Pinaguwaꞌ weꞌ saraꞌ mahāpin bang saꞌingge teꞌed kalaꞌat duseten duk duseten jānante matey duk tapī si narkaꞌ. Amban saraꞌ mahāp inin puꞌun ngapastiꞌ weꞌ dusehin asal laꞌat manamalan.
Niyaꞌ magdaꞌagan dem ateyte
14Kataꞌuhante weꞌ saraꞌin amban Tuhan. Saguwaꞌ aku inin manusiyaꞌ du hadja duk luwal ku magduse, hangkan kuweꞌ ku banyagaꞌ dusekun. 15Gaꞌi teꞌed tahātiku hatulankun. Peggeꞌ meꞌ mahāp kinabayaꞌanku hininangin, gaꞌi hinangku. Saguwaꞌ iye hininangkun malaꞌat manggaꞌi kinabayaꞌankun. 16Bang kabunsihanku meꞌ hinanganku malaꞌatin, hātinen kahagad ku weꞌ hāp saraꞌin. 17Hangkan hep bang ku maghinangan laꞌat, dumaꞌin amban pikilanku peggeꞌ bunsi ku si malaꞌat miyaꞌan. Saguwaꞌ duse diyalem ateykun, iye miyaꞌan manugnūgan akuhin. 18Kataꞌuhanku weꞌ manusiyaꞌ du hadja ku duk asal gaꞌ niyaꞌ hāp dem ateyku. Bisan du asal kabayaꞌankun maghinangan hāp saguwaꞌ gaꞌi kaꞌanggawtaꞌanku. 19Peggeꞌ gaꞌi hinangku mahāp kinabayaꞌanku hininangin. Saguwaꞌ iye hininangkun malaꞌat manggaꞌi kinabayaꞌankun. 20Manjari bang hinangku malaꞌat manggaꞌi kinabayaꞌanku hininangin, hātinen dumaꞌin ne amban pikilanku saguwaꞌ duse diyalem ateykun iye manugnūgan akuhin duk hinangku.
21Hangkan hep iye ne inin kuweꞌ addatkun. Bisan ku mabayaꞌ maghinangan hāp, kuweꞌ niyaꞌ nugnūgan aku maghinang laꞌat duk iye miyaꞌan hininangkun. 22Dem pikilanku asal sinna ku teꞌed nuhut saraꞌ Tuhanin. 23Saguwaꞌ niyaꞌ isab dem ateyku nugnūgan aku gaꞌi dinaꞌak tinuhut saraꞌ dinūsan pikilanku miyaꞌan. Asal kuweꞌ ku banyagaꞌ disaliku magdusehin hangkan gaꞌ dapatku. 24Asal sasew teꞌed dem pikilankun. Sine manabangan akuhin duk ne gaꞌi tatuhutku disaliku magdusehin. Bang gaꞌ niyaꞌ nabangan aku, sudda matey ku inin duk tapī ku si narkaꞌ. 25Saguwaꞌ magsukul ku teꞌed si Tuhan peggeꞌ tabangne ku sabab bakas tahinang Isa Almasi, Panuhutanten bi.
Na, iye ne miyaꞌan: bang gaꞌi kite tabang Tuhanin, duwe magdaꞌagan dem baranten. Bang kite hadja, pikilanten asal tuhutte saraꞌ Tuhanin. Saguwaꞌ disalite magdusehin nugnūgan kite dinaꞌak magduse.
ទើបបានជ្រើសរើសហើយ៖
Roma 7: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
