Roma 11
11
Maꞌaseꞌ Tuhanin si meꞌ aꞌa Israꞌilin
1Manjari magtilew ku: Tinayikutan ne ke weꞌ Tuhanin meꞌ aꞌa tapeneꞌne inin? Asal gaꞌ. Aku inin bangsa Israꞌil hep duk tubuꞌ Ibrahim duk tubuꞌ Benjamin. 2Gaꞌ tinayikutan weꞌ Tuhanin meꞌ aꞌa tapeneꞌne tagnaꞌ awwalley pe. Kataꞌuhanbi du bang ine pinaꞌin kitab sabab Nabi Eliyasin. Muhun hep iye si Tuhan sabab meꞌ hinangan meꞌ aꞌa Israꞌilin. 3Paꞌin Eliyas, “Tuhan, ubus ne pinapatey weꞌ de meꞌ nabinun. Ilarak weꞌ de meꞌ pagkuluban-kulubanan kami si kaꞌuhin. Luwal saꞌ aku nabi matalebbihin duk batang ku isab papateyde.” 4Ine sambung Tuhan si iyehin? Paꞌin Tuhanin si iye, “Niyaꞌ pe talebbi pituꞌ ngibu meꞌ aꞌaku duk siye inin gaꞌ bakas mahadje tuhan-tuhan inēnan Baꞌalin.” 5Damikkiyan isab kuweꞌitu niyaꞌ pe isab talebbi nuhut Tuhanin. Tapeneꞌ siye weꞌ ne peggeꞌ malasa iye duk maꞌaseꞌ iye si siye. 6Bang Tuhanin meneꞌ aꞌa, gaꞌi siye peneꞌne sabab meꞌ hinangande mahāpin saguwaꞌ peneꞌne siye peggeꞌ malasa iye duk maꞌaseꞌ iye si siye. Bang siꞌ miyaꞌan sabab hinangande mahāpin hangkan siye peneꞌne, dumaꞌin ne pameneꞌannen sabab lasanen duk aseꞌnen.
7Manjari, ine paꞌinte sabab inin? Magpiha meꞌ aꞌa Israꞌilin bang saꞌingge duk siye takimmat bentel weꞌ Tuhanin, saguwaꞌ gaꞌ takasuwaꞌde. Luwal hadja meꞌ tapeneꞌ weꞌ Tuhanin, meꞌ masandel pu si Isahin, mangasuwaꞌ iyehin. Bu meꞌ sinduwehin ngatuwas kōkden peggeꞌ gaꞌ siye pakale si Tuhan. 8Niyaꞌ paꞌin kitabin sabab meꞌ aꞌa matuwas kōkde inin. Paꞌin kitabin, “Pinababbal weꞌ Tuhanin pikilanden. Sampay kuweꞌitu kuweꞌ siye gaꞌi ngite bisan niyaꞌ matade, kuweꞌ siye gaꞌi kale bisan niyaꞌ tayingede.” 9Paꞌin si Daꞌud,
“Karayaw weꞌ sabab meꞌ kasinnahanden kuweꞌ siye tewwaꞌ leppas duk gaꞌi siye lumeppa; kuweꞌ siye laboꞌ dem lowang lalem duk gaꞌi siye lumuwas. Iye inin tumbas meꞌ hinanganden.
10Karayaw pinessekan mataden duk siye gaꞌi ngite. Karayaw siye tiniksaꞌ gaꞌ tamanan, kuweꞌ aꞌa kokkoꞌ weꞌ duwaꞌan diyataꞌ bukutnen.”
11Bang kuweꞌ miyaꞌan, ine ne kaꞌujudan meꞌ bangsa Yahudihin? Tayikutan Tuhanin ne ke teꞌed siye salama-lama peggeꞌ gaꞌi siye sandel pu si Isa Almasi? Gaꞌi du. Saguwaꞌ peggeꞌ tinayikutan weꞌ de Tuhanin, manjari tinimbul dahuꞌ weꞌ Tuhanin meꞌ dumaꞌin Yahudihin duk siye tapī si surgaꞌ supaya pagkite meꞌ Yahudihin inin, mabayaꞌ du siye nuhut Tuhanin kuweꞌ meꞌ bangsa dumaꞌin Yahudihin. 12Bang pagduse bangsa Yahudihin duk panayikut Tuhan siyehin moleꞌ si kahāpan meꞌ bangsa dumaꞌin Yahudihin, pasōng ne teꞌed ekka kahāpan tekka si meꞌ dumaꞌin Yahudihin bang meꞌ Yahudihin balik ne si Tuhan.
Timbul meꞌ aꞌa dumaꞌin Yahudihin
13Niyaꞌ bissāku si kaꞌam, meꞌ dumaꞌin Yahudihin. Aku inin kawakilan weꞌ Isa Almasi magmahalayak si meꞌ aꞌa dumaꞌin Yahudihin. Bang maggeꞌes ku magmahalayak si kaꞌam, 14kaw meꞌ pagkasiku Yahudi sinduwehin ibeg duk ujud mabayaꞌ du sandel pu Isa Almasi kuweꞌ kaꞌamin, supaya siye timbul duk tapī si surgaꞌ. 15Sabab panayikut Tuhan si bangsa Yahudihin, hināp ne weꞌ Tuhanin meꞌ bangsa dumaꞌin Yahudihin. Na, saꞌingge bang meꞌ Yahudihin tayimaꞌ Tuhanin ne balik? Asal hāp manamal. Kuweꞌ du siye bakas matey bu ellum balik.
16Magdalilan ku si kaꞌam sabab meꞌ Yahudihin. Addat kami Yahudihin, bang kami magaddun hinang pan, ngeddoꞌ kami da akup pangurung si Tuhan. Bang sukuꞌ si Tuhanin da akup miyaꞌan, hātinen sukuꞌ si iye isab kēmon addunin. Atawa dalilnen kayu. Bang sukuꞌ si Tuhan gamutin, sukuꞌ si Tuhan du isab meꞌ pangehin. 17Bangsa Israꞌilin kuweꞌ da bayuꞌ kayu tinanem duk inipat supaya magbuwaꞌ. Duk kaꞌam, meꞌ dumaꞌin Yahudihin, kuweꞌ kayu du isab kaꞌam, saguwaꞌ kayu tomoꞌ dihananne dem talun. Manjari meꞌ pange sinduwe amban kayu inipatin tinotoꞌ weꞌ Tuhanin, duk kaꞌam meꞌ pange amban kayu talunin pinasugpat pī si antag bakas panotoꞌanin. Manjari kuweꞌitu kabahagiꞌan ne kaꞌam meꞌ kahāpan sukuꞌ si meꞌ Yahudihin. 18Hangkan kaꞌam, meꞌ dumaꞌin Yahudihin, daꞌa teꞌed udjiꞌun bi meꞌ pange bakas tinotoꞌ miyaꞌan, hātinen meꞌ Yahudi manggaꞌi makahagadin. Gaꞌi kaꞌam kapagabbu peggeꞌ kaꞌam dalil pangehin bu siye dalil gamutin; duk dumaꞌin ellum gamutin sabab pangehin saguwaꞌ ellum pangehin sabab gamutin.
19Kaw paꞌinbi, “Toꞌo iyan, saguwaꞌ bakas tinotoꞌ du siye weꞌ Tuhanin duk kami, meꞌ dumaꞌin Yahudihin, tasugpat pī ngagantiꞌan siye.” 20Bennal iyan. Tinotoꞌ siye peggeꞌ gaꞌi siye sandel pu si Isa Almasi. Bu kaꞌam pinagantiꞌ si siye peggeꞌ sandel kaꞌam. Daꞌa kaꞌam maglangkew atey. Subey kaꞌam talew si Tuhan. 21Bang tinotoꞌ weꞌ Tuhanin meꞌ pange tagnaꞌin, hātinen meꞌ Yahudihin, daꞌa pikilun bi weꞌ gaꞌi isab kaꞌam totoꞌne. 22Tapandogate tuꞌu weꞌ Tuhanin maꞌaseꞌ si aꞌa saguwaꞌ ngalegga isab teꞌed iye. Asal leggane meꞌ manayikutan iyehin saguwaꞌ kaꞌam, maꞌaseꞌ iye si kaꞌam bang gaꞌi usaꞌ sandelbi pu si Isa Almasihin. Saguwaꞌ bang gaꞌi kaꞌam sandel, totoꞌne isab kaꞌam. 23Duk meꞌ Yahudi bakas tinayikutan Tuhanin, bang ne siye sandel pu si Isa Almasi, tayimaꞌ Tuhanin siye balik. Dalil meꞌ pangehin, pinasugpat siye balik pī si kayu bakas panotoꞌan siyehin, peggeꞌ tapasugpat Tuhanin siye balik. 24Kaꞌam meꞌ dumaꞌin Yahudihin, kuweꞌ kaꞌam dalil meꞌ pange kayu talun tinotoꞌin ubus bu pinasugpat pī si kayu inipatin, bisan du gaꞌi tantu hininang sa miyaꞌan. Meꞌ Yahudihin hep dalil kayu inipat miyaꞌan duk mura du pinasugpat balik weꞌ Tuhanin meꞌ pange bakas tinotoꞌanin pī si kayu bakas panotoꞌan siyehin.
Maꞌaseꞌ Tuhanin si meꞌ manusiyaꞌin kēmon
25Meꞌ kapungtinaꞌihanku masandel pu si Isa Almasihin, niyaꞌ akaku si kaꞌam supaya kaꞌam gaꞌi maglangkew atey duk magabbu weꞌ hāp kaꞌam amban meꞌ Yahudihin. Niyaꞌ toloꞌ bennal batang akaku si kaꞌam gaꞌ bakas kataꞌuhan ngeregseꞌ maꞌin. Iye inin inakakun. Toꞌo weꞌ kaꞌekkahan meꞌ aꞌa Israꞌilin gaꞌi ngatu kahagad saguwaꞌ akahante kaꞌam weꞌ gaꞌi pakahagadde inin gaꞌi du teteg. Bang jukup ne ekkahan meꞌ aꞌa dumaꞌin Yahudi manuhut Tuhanin, meke ne meꞌ Yahudihin kahagad duk balik ne siye si Tuhan. 26Manjari kēmon bangsa Israꞌilin kahagad du duk timbul duk tapī si surgaꞌ. Pinaꞌin dem kitab sabab inin, paꞌin Tuhanin,
“Pitu du iyan Manimbulin amban lahat Siyon. Ānanne iyan meꞌ hinangan malaꞌat hininang meꞌ tubuꞌ si Yakubin, hātinen meꞌ Yahudihin.
27Pagtekka ellew miyaꞌan, ānanku du kēmon duseden sa bakas pananggupku matuꞌuhin.”
28Meꞌ Yahudihin banta Tuhanin ne peggeꞌ gaꞌ kahagadde aka-aka mahāpin. Gaꞌ pakahagadde inin moleꞌ si kahāpanbi ne. Saguwaꞌ amban tagnaꞌ asal meꞌ Yahudihin hep tapeneꞌ weꞌ Tuhanin duk siye manjari meꞌ aꞌane. Duk kalasahan Tuhanin pe siye sabab sanggupne si meꞌ kapapuꞌanden. 29Peggeꞌ Tuhanin, bang niyaꞌ aꞌa tapeneꞌne duk iledjikiꞌan weꞌ ne, gaꞌi teꞌed pagpinda-pindane. 30Na, kaꞌam isab meꞌ dumaꞌin Yahudihin, matuꞌuhin gaꞌ kaꞌam nuhut Tuhanin. Saguwaꞌ kuweꞌitu kaꞌaseꞌan kaꞌam weꞌ Tuhanin peggeꞌ tayikutan meꞌ Yahudihin Tuhanin. 31Kuweꞌitu meꞌ Yahudihin gaꞌi tuhutde Tuhanin, duk kaꞌaseꞌan kaꞌam weꞌ Tuhanin, supaya si pasōngan kaꞌaseꞌan Tuhanin du isab siye. 32Hangkan hep pinakitehan weꞌ Tuhanin weꞌ kēmon manusiyaꞌin, Yahudi duk dumaꞌin Yahudi, saliꞌ-saliꞌ gaꞌi nuhut Tuhan supaya tapakitene aseꞌnen si siye kēmon.
Pataꞌ Tuhanin pinudji
33Asal gaꞌi teꞌed takila-kila aseꞌ Tuhan si kitehin bi kēmon. Lalem manamal kataꞌunen duk kataꞌuhanne kēmon. Gaꞌi tahātite pikilannen. Gaꞌi tahātite meꞌ hinangannen. 34Pinaꞌin dem kitab,
“Sine mangataꞌuhan pikilan Tuhanin? Sine mamanoloꞌan iyehin?
35Gaꞌi makajari weꞌ niyaꞌ pangurungte iye duk niyaꞌ utangne si kite.”
36Peggeꞌ Tuhanin magpapanjari kēmon-kēmonin. Iye magbayaꞌin duk kēmon pinapanjari weꞌ ne supaya iye tapudji. Pudjite bi Tuhanin gaꞌ tamanan. Amin.
ទើបបានជ្រើសរើសហើយ៖
Roma 11: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
