Markus 6
6
Astel meꞌ aꞌa Nasaretin pu si Isa
(Mateo 13:53-58; Lukas 4:16-30)
1Tahalaꞌ si Isa duk pī iye si lahatne, si Nasaret. Nuhut iye isab meꞌ tindegnen. 2Manjari pagellew Sabtuꞌ, ellew liꞌi meꞌ Yahudihin, nagnaꞌ ne isab iye magusihat dem langgal. Ekka mapakale si iyehin ulaliꞌ. Paꞌinde, “Uy, antag pangeddoꞌanne pangadjiꞌne inin? Duk kataꞌu ine ne pangurung iye inin? Saꞌingge pangahinangne meꞌ hinangan balakat īꞌen? 3Takilalete bi hep aꞌa inin. Iye inin kalpentero, anak Mariyamin. Pungtinaꞌine hep disi Yakub duk si Joses duk si Judas duk si Simon. Duk meꞌ pungtinaꞌine dendehin tiyaꞌ du hep tuꞌu si lahatte bi.” Duk peddiꞌ ateyden pu si Isa. 4Hangkan paꞌin si Isa si siye, “Pagaddatan nabihin antag-antag. Saguwaꞌ bang si lahatne duk dem kaꞌusbahanne duk si lumaꞌne, gaꞌi iye pagaddatan.” 5Duk gaꞌ si Isa makahinang hinangan balakatan laꞌi, bukut hadja amban pamettadne meꞌ tanganne si meꞌ aꞌa saki bang piyanganin duk pinakoleꞌ siye weꞌ ne. 6Ulaliꞌ teꞌed iye bang weꞌey meꞌ aꞌa malaꞌihin gaꞌi kahagad si iye.
Pinalengngan weꞌ si Isa tindegne sampūꞌ duk duwehin
(Mateo 10:5-15; Lukas 9:1-6)
Manjari lumengngan si Isa ngalatag meꞌ kalumaꞌan si lahat miyaꞌan duk magusihat iye laꞌi. 7Manjari ilinganan weꞌ ne tindegne sampūꞌ duk duwehin pī si iye duk dinaꞌak siye weꞌ ne lumengngan duwangan-duwangan magmahalayak lapal Tuhanin. Inurungan isab siye weꞌ ne balakat maluwas meꞌ seyitan. 8Duk sinessaꞌan siye weꞌ ne subey siye gaꞌi magboꞌo ine-ine si palengngananden. Subey siye gaꞌi magboꞌo kinakan atawa puyuꞌ pangisi-ngisihan atawa pilak dem sabitande. Luwal hadja tungkud makajari boꞌode. 9Makajari siye magtehompaꞌ saguwaꞌ gaꞌi siye makajari magboꞌo badjuꞌ seddili amban si baranden. 10Duk paꞌin si Isa si siye, “Antag-antag kalumaꞌan katekkahanbi, bang kaꞌam dinaꞌak manaꞌik weꞌ aꞌa pī si lumaꞌne, daꞌa ne kaꞌam usaꞌ tiggelanbi laꞌi si lahat miyaꞌan. 11Duk bang niyaꞌ kalumaꞌan papīhanbi bu meꞌ aꞌahin gaꞌi ngaddatan kaꞌam, duk gaꞌi mabayaꞌ pakale si kaꞌam, tahalaꞌ kaꞌam amban kalumaꞌan miyaꞌan. Pagpaganun bi dahuꞌ leppug bettisbin, tandaꞌ weꞌ muwas ne kaꞌam si siye, ubus bu tahalaꞌ ne kaꞌam.” 12Manjari lumengngan ne siye magmahalayak weꞌ subey meꞌ aꞌahin pagsusunande meꞌ duseden duk lebbahande ne meꞌ hinangande malaꞌatin. 13Ekka meꞌ seyitan tapaluwas weꞌ de duk ekka aꞌa saki sinusutan weꞌ de isellan duk pinakoleꞌ weꞌ de.
Kamatey Yahiya magpandi-pandi aꞌahin
(Mateo 14:1-12; Lukas 9:7-9)
14Manjari takale weꞌ Sultan Herod sabab meꞌ hinangan balakat tahinang si Isahin peggeꞌ bawag ne hep ēn si Isahin. Magbissā-bissā meꞌ aꞌahin sabab si Isa. Niyaꞌ magpaꞌin, “Ellum ne balik Yahiya magpandi-pandi aꞌahin hangkan hep tahinangne meꞌ hinangan balakatan miyaꞌan.” 15Saguwaꞌ paꞌin sinduwehin isab, “Nabi Eliyas hatu miyaꞌan.” Duk niyaꞌ pe isab sinduwe magpaꞌin, “Nabi hep hatu iye miyaꞌan, kuweꞌ meꞌ nabi awwalley.” 16Saguwaꞌ pagkale si Herod inin, paꞌinne, “Si Yahiya miyaꞌan, bakas dinaꞌakku pinunggelanin. Ellum iye balik.” 17-19Peggeꞌ Sultan Herod hep mangandaꞌak niggew Yahiyahin duk dinaꞌak kinalabusu weꞌ ne. Kuweꞌ inin kahalanne miyaꞌan: Sultan Herod inin, inanda weꞌ ne ipalnen, Herodiyas, bu ellum pe salinen si Pilip, ella Herodiyasin. Manjari sakaliꞌ ne siye magdambuwaꞌ, inamāhan sultanin weꞌ Yahiya. Paꞌin Yahiya si iye, “Gaꞌi halal bang kew magdambuwaꞌ duk anda pungtinaꞌinun. Magduse kew.” Na, iye miyaꞌan sababnen hangkan binantahan weꞌ Herodiyas si Yahiya duk batang papateyne. Saguwaꞌ gaꞌi dinaꞌak weꞌ sultanin, 20peggeꞌ pagaddatan weꞌ Sultan Herod Yahiya. Kataꞌuhanne weꞌ Yahiya aꞌa bentel duk sutsi ateynen. Hangkan inelligan iye weꞌ sultanin duk inisi weꞌ ne dem kalabusu duk iye gaꞌi tapapatey. Mabayaꞌ pakale si Herod pu Yahiya magusihat, saguwaꞌ pagkalene iye, sasew dem pikilannen.
21Manjari dambuwaꞌ ellew katumanan du kinabayaꞌan Herodiyasin. Pagtekka ellew pangesseban panganak pu Sultan Herodin, ngahinang si Herod pagjamu-jamuhan para si meꞌ bagellal si pagsultanannen duk si meꞌ kapitan kasundaluhannen, duk si meꞌ aꞌa langkew si lahat Jalil miyaꞌan. 22Manjari paglaꞌi ne siye kēmon magtipun, padiyalem pī anak Herodiyas dendehin mansak. Na, kasulutan si Herod duk meꞌ bisitanen. Manjari paꞌin sultanin si budjangin, “Māku kew si aku. Ine-ine kabayaꞌannu, pangurungku kaꞌu.” 23Duk napa pe iye, paꞌinne, “Ine-ine pākunu si aku, asal pangurungku teꞌed kaꞌu, bisan pe dan tengaꞌ pangalataꞌkun.”
24Paluwas budjangin duk tinilew weꞌ ne saꞌinen, paꞌinne, “Inaꞌ, ine enteꞌ pākuku?” Nambung saꞌinen, “Pākuhun kōk si Yahiya magpandi-pandi aꞌahin.” 25Magtawus padiyalem balik budjangin magdayiꞌ-dayiꞌ pī si sultanin māku, paꞌinne, “Tuwan, iye inin pinākukun. Pangurungun aku duꞌun-duꞌun kōk Yahiya magpandi-pandi aꞌahin binettad diyataꞌ talam.” 26Magsusun teꞌed sultanin, saguwaꞌ gaꞌi iye bayaꞌ dapat si bissānen peggeꞌ bakas iye napa si panaꞌanan meꞌ bisitanen. 27Magtawus ne dinaꞌak weꞌ sultanin dambuwaꞌ sundalu amban meꞌ guwaldiyanen pī ngeddoꞌ kōk Yahiyahin. Manjari pī ne sundaluhin munggelan Yahiya dem kalabusu. 28Ubus binoꞌo weꞌ ne kōknen binettad diyataꞌ talam duk pinangurung ne weꞌ ne si budjangin. Manjari pinangurung isab weꞌ budjangin si saꞌinen.
29Pagkale meꞌ tindeg si Yahiyahin inin, pī siye ngeddoꞌ bangkeynen duk kinubul weꞌ de.
Pamakan si Isa meꞌ aꞌa lime ngibuhin
(Mateo 14:13-21; Lukas 9:10-17; Yahiya 6:1-14)
30Manjari meꞌ aꞌa bakas kawakilan weꞌ si Isahin magtipun ne balik pī si iye. Inaka-akahan weꞌ de si Isa kēmon meꞌ bakas tahinangden duk meꞌ pamanoloꞌden. Ekka hep aꞌa maggew-gantiꞌ pī si siye hangkan gaꞌi ne siye bisan makasaluꞌ mangan. 31Hangkan paꞌin si Isa si siye, “Sūng kite bi pī si lahat makagindew-gindew, kite-kite bi hadja duk kaꞌam kapahali-hali daddaliꞌ.” 32Manjari tahalaꞌ siye magbangkaꞌ pī si lahat makagindew-gindew, siye-siye hadja.
33Saguwaꞌ ekka aꞌa ngite siye patahalaꞌden duk makakilale siye. Manjari magubas meꞌ aꞌahin amban meꞌ kalumaꞌan hap pī duk dumehellu pe siye tekka amban disi Isa laꞌi si dambiyaꞌ lamew. 34Pagtakas si Isa, banes teꞌed aꞌa kitene duk maꞌaseꞌ iye si siye, peggeꞌ kuweꞌ siye meꞌ bili-bili gaꞌ niyaꞌ ngipat siye. Manjari ekka pamanoloꞌne siye.
35Pagkohap ne, pī meꞌ tindegnen si iye duk paꞌinde, “Lahat gaꞌi hep inin tantu papituhan aꞌa bu iyuꞌ ne kohap teꞌed. 36Daꞌakun meꞌ aꞌa inin pī si meꞌ aꞌa magtinanemin laꞌi si kalahatan diyataꞌ duk si meꞌ kalumaꞌan mapaliputin duk siye makabelli kinakande.” 37Saguwaꞌ paꞌin si Isa si siye, “Kaꞌam ne mamakan siyehin.” Paꞌinde si iye, “Na, inumey inin? Sa banes aꞌa iyan, subey tangdan aꞌa maghinang dem walum bulan pamelli panin pamakan siye iyan.” 38Tilew si Isa siye, paꞌinne, “Piyek kayuꞌ panbi lu? Pī koꞌ, payamanun bi.” Pagsakaliꞌ ne kataꞌuhande, paꞌinde, “Lime du panin duk duwe kenna.”
39Manjari dinaꞌak siye weꞌ si Isa ningkoloꞌ kēmon magtumpuk-tumpuk diyataꞌ balili. 40Hangkan ningkoloꞌ ne siye magtumpuk-tumpuk, niyaꞌ ne dahatus-dahatus duk niyaꞌ ne lime-limempūꞌ. 41Manjari ineddoꞌ weꞌ si Isa pan lime kayuꞌin duk kenna duwehin, bu mayam iye magdiyataꞌ langit magpasalamat si Tuhan. Ubus bu binahagiꞌ-bahagiꞌ weꞌ ne panin duk pinangurung weꞌ ne si meꞌ tindegnen dinaꞌak pangurung si meꞌ aꞌahin. Damikkiyan isab kenna duwehin binahagiꞌ-bahagiꞌ weꞌ ne si siye kēmon. 42Mangan siye kēmon duk esso siye. 43Pagubus siye mangan, tinipun weꞌ meꞌ tindeg si Isahin lukasde pan duk kennahin, sampūꞌ duk duwe bakaꞌ pennoꞌ. 44Ekkahan mamangan pan miyaꞌan, meꞌ lellahin hadja niyaꞌ lime ngibu.
Si Isa lumengngan diyataꞌ kuwit-kuwit lamew
(Mateo 14:22-33; Yahiya 6:15-21)
45Puwas miyaꞌan, magtawus dinaꞌak weꞌ si Isa meꞌ tindegnen pasakey dem bangkaꞌ. Pinadehellu siye weꞌ ne pī si dambiyaꞌ lamew si puweblo Betsaida, sābune pe mapoleꞌ meꞌ aꞌahin. 46Pagubus ne siye patahalaꞌne, pī iye diyataꞌ kūd missā si Tuhan. 47Pagsangem ne, laꞌi ne si tengngaꞌ lamew bangkaꞌin. Si Isa laꞌi pe diyataꞌ kūd dendangan. 48Kitene meꞌ tindegnen kahunitan teꞌed peggeꞌ pasumbal si siye baliyuhin. Pagdayiꞌ ellew ne, pī si Isa si siye lumengngan diyataꞌ kuwit-kuwit lamew. Sōng hadja siye labeyanne, 49saguwaꞌ takite meꞌ tindegnen iye lumengngan diyataꞌ kuwit-kuwit lamew duk kannalde weꞌ panyataꞌ iye. Magkilahap teꞌed siye. 50Peggeꞌ kēmon siye takitede iye duk kaꞌumagadan siye. Saguwaꞌ magtawus si Isa missā si siye duk paꞌinne, “Pahagetun bi ateybin. Aku hep ituꞌ. Daꞌa kaꞌam tinalew.” 51Manjari pasakey si Isa pī si siye magdem bangkaꞌ. Pagsakeyne, padeheng baliyuhin hangkan bengngangan teꞌed meꞌ tindeg si Isahin. 52Peggeꞌ bisan ne bakas takitede balakat si Isahin pamakanne aꞌa lime ngibuhin, gaꞌi pe teꞌed tasabutde bang ine hāti bakas takiteden.
Pinakoleꞌ meꞌ aꞌahin weꞌ si Isa laꞌi si Gennesaret
(Mateo 14:34-36)
53Pagsakaliꞌ ne siye lumipag, tekka siye si lahat Gennesaret duk padungguꞌ siye si tapiyan. 54Pagduwaꞌide amban bangkaꞌ, magtawus si Isa takilale weꞌ meꞌ aꞌahin. 55Manjari magubas meꞌ aꞌahin ngalatag kalahatan mapaliputin duk binoꞌo weꞌ de meꞌ aꞌa masakihin diyataꞌ tanggungande bisan antag pakakalehande palaꞌihan si Isahin. 56Antag-antag katekkahanne, si meꞌ kalumaꞌan ke, atawa si puweblo, atawa si lahat diyataꞌ, pinabāk weꞌ de meꞌ masakihin si meꞌ tabuꞌan duk pabuyuꞌ-buyuꞌ siye pu si Isa bang makajari antan meꞌ masakihin bisan hadja tuggu semmeknen. Na, kēmon makaꞌantan iyehin kawuliꞌan.
ទើបបានជ្រើសរើសហើយ៖
Markus 6: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.