Markus 12
12
Dalilan sabab likus ubasin duk meꞌ tatungguꞌnen
(Mateo 21:33-46; Lukas 20:9-19)
1Manjari magusihat si Isa si siye magdalilan. “Niyaꞌ,” paꞌinne, “aꞌa maglikus bāhan ubas duk binirang weꞌ ne. Ilowangan weꞌ ne diyawaꞌ pagpeggaꞌan ubasin panawutan boheꞌ ubasin. Ngahinang isab iye payad langkew pamantew-mantewan likusin. Manjari pinatungguꞌan weꞌ ne likusnen si meꞌ aꞌa, pagbahagiꞌan uli tinanemnen. Ubus bu tahalaꞌ iye pī si lahat tala. 2Pagtaꞌabut pagbuwaꞌ ubasin, dinaꞌak weꞌ dapuꞌ likusin dambuwaꞌ daraꞌakanne pī si meꞌ aꞌa tatungguꞌnen, māku bahagiꞌne si meꞌ buwaꞌ ubasin. 3Saguwaꞌ siniggew iye weꞌ meꞌ tatungguꞌin duk pinapeddiꞌan weꞌ de. Pinapoleꞌ iye gaꞌ niyaꞌ taboꞌone. 4Ubus ngandaꞌak ne isab dapuꞌ likusin seddili daraꞌakanne pī si siye. Kinakal iye weꞌ de diyataꞌ kōkne duk pinaꞌiyaꞌ weꞌ de. 5Manjari ngandaꞌak ne isab iye seddili daraꞌakanne saguwaꞌ pinapatey weꞌ de. Ubus miyaꞌan, ekka pe sinduwe daraꞌakanne dinaꞌak weꞌ ne pī. Sinduwehin pinapeddiꞌan weꞌ de duk sinduwehin pinapatey. 6Na, dambuwaꞌ saꞌ matalebbi si dapuꞌ likusin dinaꞌak pī. Inin anakne lella kalasahanne teꞌed. Kakapusannen iye dinaꞌakne mapī si siyehin. Paꞌinne dem ateyne, ‘Bugtuꞌ pagaddatande anakkun.’ 7Saguwaꞌ pagkite meꞌ tatungguꞌ likusin anakne miyaꞌan, magisun siye. Paꞌinde, ‘Iye hep inin pinusakaꞌanin. Dayiꞌ kaꞌam, papateyte bi duk likus inin tepe si kite bi.’ 8Manjari siniggew iye weꞌ de, ubus bu pinapatey duk ilakasan weꞌ de pī si bukut birang likusin. 9Na,” paꞌin si Isa, “ine enteꞌ hinang dapuꞌ likus miyaꞌan si meꞌ tatungguꞌ likusnen? Hap pī iye duk papateyne siye duk patungguꞌanne likusnen si seddili.”
10Tinilew siye weꞌ si Isa, paꞌinne, “Gaꞌ ke bakas tabatsabi ayat inin tasulat dem kitab, pinaꞌin,
‘Batu tinayikutan weꞌ meꞌ pandey maghinang lumaꞌ batuhin, peggeꞌ kannalde gaꞌi taguna, kuweꞌitu iye ne miyaꞌan batu tamanan maniyaꞌ kagunahannen. 11Hinangan Tuhanin inin, duk landuꞌ teꞌed hāp!’ ”
12Manjari, meꞌ nakuraꞌ meꞌ Yahudi miyaꞌan batang ne siggewde si Isa, peggeꞌ tahātide weꞌ siye inandiganne si dalilan sabab likus miyaꞌan. Saguwaꞌ gaꞌ iye siggewde peggeꞌ talew siye si meꞌ aꞌa mabanesin. Hangkan inambanan iye weꞌ de duk tahalaꞌ ne siye.
Bang magbayed sukey ke si Sultan Nakuraꞌin atawa gaꞌi
(Mateo 22:15-22; Lukas 20:20-26)
13Niyaꞌ dinaꞌak weꞌ de meꞌ Pariseo duk meꞌ tindeg Sultan Herod pī pu si Isa nguhi-nguhi iye si meꞌ bissānen. 14Pagtekkade laꞌi pu si Isa, paꞌinde si iye, “Tuwan, kataꞌuhan kami weꞌ bennal hadja meꞌ binissānun duk gaꞌi kew suse bisan ine tapikil aꞌa si kaꞌuhin, bisan pe siye meꞌ aꞌa taga kapatut. Duk bennal meꞌ panoloꞌnu sabab meꞌ kabayaꞌan Tuhan hininang manusiyaꞌin. Akahanun kami,” paꞌinde, “patuhut ke si saraꞌte bi magbayed sukey si Sultan Nakuraꞌ bangsa Romahin atawa gaꞌi?”
15Saguwaꞌ kataꞌuhan si Isa pangakkalden. Paꞌinne si siye, “Weꞌey ku suleyanbi? Moꞌo kaꞌam pitu sīn tuwas duk tapayamanku.” 16Manjari binoꞌohan ne weꞌ de si Isa. Paꞌinne si siye, “Pattaꞌ sine teꞌ duk sulat sine si sīn inin?” Paꞌinde, “Pattaꞌ Sultan Nakuraꞌin duk sulatnen.” 17“Na,” paꞌin si Isa si siye, “pangurungun bi si Sultan Nakuraꞌin sukuꞌ si iyehin, duk pangurungun bi si Tuhan sukuꞌ si Tuhanin. (Hātinen, magbayed kaꞌam sukey duk pangurungun bi dibin dambūs-būs si Tuhan.)” Manjari ulaliꞌ teꞌed siye si iye.
Tilewde si Isa sabab kaꞌellum balik meꞌ pateyin
(Mateo 22:23-33; Lukas 20:27-40)
18Puwas miyaꞌan niyaꞌ pī pu si Isa meꞌ Sadduseo, meꞌ Yahudi gaꞌi kahagad weꞌ ellum balik meꞌ pateyin si ellew dambuli. Tinilew iye weꞌ de, paꞌinde, 19“Tuwan, niyaꞌ saraꞌ pangurung Musa kite bi weꞌ bang niyaꞌ lella bu matey iye gaꞌ niyaꞌ anakne, subey ne maganda salinen si balu miyaꞌan duk niyaꞌ tubuꞌ sakanen. 20Na manjari, niyaꞌ miyaꞌan pituꞌ lella magpungtinaꞌi. Sakahin maganda, manjari matey iye gaꞌ anakde. 21Mapasunuꞌin maganda si baluhin duk matey iye gaꞌ du isab niyaꞌ anakde. Damikkiyan du isab mapasunuꞌ si iyehin. 22Kapituꞌ magpungtinaꞌihin maggantiꞌ nganda baluhin duk matey siye gaꞌ niyaꞌ anakde ambanande. Si kakapusannen, matey isab dendehin. 23Na, Tuwan,” paꞌinde, “si ellew pagellum balik meꞌ pateyin, anda sine iye? Bu pituꞌ magpungtinaꞌihin makaꞌanda iye.”
24Sambungan si Isa siye, paꞌinne, “Salaꞌ kaꞌam. Hangkan kaꞌam salaꞌ, peggeꞌ gaꞌi tasabutbi tasulat dem kitabin duk gaꞌi isab kataꞌuhanbi balakat Tuhanin. 25Peggeꞌ bang ellum ne balik meꞌ pateyin,” paꞌin si Isa, “kuweꞌ ne siye meꞌ malaꞌikat si surgaꞌin. Gaꞌi ne siye maganda atawa magella. 26Na, pasal meꞌ aꞌa matey weꞌ pinakellum balik, gaꞌ ke bakas tabatsabi dem kitab Tawrat sabab poꞌon puhung makayatin? Tasulat laꞌi weꞌ missā Tuhanin pu si Musa. Paꞌin Tuhanin, ‘Aku Tuhan pagtuhanan disi Ibrahim duk si Isahak duk si Yakubin.’ 27Tuhanin Tuhan meꞌ maꞌellumin dumaꞌin Tuhan meꞌ pateyin. (Hātinen weꞌ bisan disi Ibrahim duk Isahak duk si Yakub tiggel ne matey, ellum siye laꞌi si surgaꞌ peggeꞌ inisbat pe weꞌ de Tuhanin.) Salaꞌ teꞌed kaꞌam si pamikilbin.”
Daꞌakan malangkewin
(Mateo 22:34-40; Lukas 10:25-28)
28Manjari niyaꞌ guru si saraꞌ āgama nengge-nengge laꞌi duk takalene pagpasuweyanden. Pagtapandogane weꞌ hāp panambung si Isa siyehin, patapit iye pī nilew si Isa. “Tuwan,” paꞌinne, “inggehin daꞌakan malangkew amban kēmonin?” 29Nambung si Isa, paꞌinne, “Daꞌakan malangkew amban kēmonin inin: ‘Meꞌ aꞌa bangsa Israꞌil, pakale kaꞌam. Tuhanin, Panuhutanten bi dambuwaꞌ-buwaꞌ iye Tuhanin. 30Subey kalasahannu Tuhanin, Panuhutannun, dambūs-būs ateynun duk pikilannun duk basagnun.’ Iye inin,” paꞌin si Isa, “daꞌakan malangkew amban kēmonin. 31Duk daꞌakan mapasunuꞌin inin: ‘Subey kalasahannu saweꞌnun kuweꞌ pangalasanu dinun.’ Gaꞌ niyaꞌ palangkew daꞌakan amban daꞌakan duwe inin.”
32Paꞌin guru saraꞌin pu si Isa, “Tumuꞌun iyan, Tuwan. Bennal binissānun weꞌ dambuwaꞌ-buwaꞌ du Tuhanin duk gaꞌ niyaꞌ seddili amban iye. 33Duk subey aꞌahin kalasahanne Tuhanin dambūs-būs ateynen duk pikilannen duk basagnen. Duk subey isab kalasahanne pagkasinen kuweꞌ pangalasane dinen. Bang tuhutne inin, hāp pe teꞌed inin amban magkuluban iye hayep ineggas atawa nōngan ine-ine si Tuhan.”
34Pagtapandoga si Isa weꞌ lalem pikilannen peggeꞌ patut teꞌed panambungnen, paꞌinne si iye, “Bang pasōngnu pamikilnu iyan, mura kew pagbayaꞌan Tuhanin.” Puwas miyaꞌan, gaꞌ ne niyaꞌ aꞌa makatawakkal nilew si Isa ine-ine.
Panilew sabab Almasihin
(Mateo 22:41-46; Lukas 20:41-44)
35Manjari, sābu si Isa magusihat dem langgal hadje, tilewne siye, paꞌinne, “Weꞌey meꞌ guru si saraꞌ āgamahin magpaꞌin weꞌ Almasihin tubuꞌ Sultan Daꞌud koꞌ? 36Bu si Daꞌud ne teꞌed mamissāhin sābu pagbayaꞌan iye weꞌ Niyawa Sutsihin, paꞌinne,
‘Missā Tuhanin si Panuhutankun.
Paꞌin Tuhanin, dayiꞌ kew, ningkoloꞌ kew tuꞌu si kanawananku, tuꞌu si paningkoloꞌan mabangsahanin.
Bettadku du meꞌ bantanun diyawaꞌ pat bettisnu.’
37Na, payamanun bi,” paꞌin si Isa, “bang si Daꞌud pangēnne Almasihin Panuhutanne, bugtuꞌ dumaꞌin hadja iye tubuꞌne saguwaꞌ langkew pe iye amban si Daꞌud.”
Meꞌ aꞌa mabanesin kēgan pakale si meꞌ usihat si Isahin.
Paghalliꞌanun bi meꞌ guru si saraꞌ āgamahin
(Mateo 23:1-36; Lukas 20:45-47)
38Manjari sābu magusihat pe si Isa, paꞌinne, “Paghalliꞌ-halliꞌanun bi meꞌ guru si saraꞌ āgamahin. Sinna siye lumengngan magsemmek tahaꞌ duk sinna siye sinalam si meꞌ tabuꞌan. 39Bang dem langgal, mabayaꞌ siye ningkoloꞌ si meꞌ paningkoloꞌan para si meꞌ aꞌa pinagaddatanin. Damikkiyan bang siye si meꞌ pagjamu-jamuhan, kabayaꞌanden ningkoloꞌ si meꞌ paningkoloꞌan mabangsahanin. 40Saguwaꞌ siye,” paꞌin si Isa, “sinigpitan weꞌ de meꞌ dende baluhin supaya taꞌeddoꞌde meꞌ lumaꞌden, duk magsambahayang siye patahaꞌ magmā-mā weꞌ aꞌa hāp siye. Bugtuꞌ hukuman hadje tasangkaden si ahilat.”
Sīn pangurung dende baluhin
(Lukas 21:1-4)
41Manjari ningkoloꞌ si Isa paharap si pangisi-ngisihan sīn dem langgal hadjehin. Pinayam-payaman weꞌ ne meꞌ aꞌahin ngalaboꞌ sīn dem pangisi-ngisihanin. Ekka meꞌ aꞌa dayahan ngalaboꞌ sīn ekka. 42Manjari niyaꞌ tekka pī dambuwaꞌ dende balu, miskin teꞌed. Ngalaboꞌ iye duwek kayuꞌ sīn peyat, kulang du halgaꞌnen. 43Manjari ilinganan weꞌ si Isa meꞌ tindegnen pī patapit si iye. Paꞌinne si siye, “Sabennal akahante kaꞌam, dende balu mamiskin inin, labi pe sīn talaboꞌnen amban kēmon siye meꞌ mangalaboꞌ sīnin. 44Peggeꞌ siye kēmon,” paꞌin si Isa, “ngurung siye amban alataꞌde maglabi-labihin. Saguwaꞌ dende inin, bisan iye miskin, pinangurung weꞌ ne kēmon sīnnen bisan diddaꞌ panabangne sukalnen.”
ទើបបានជ្រើសរើសហើយ៖
Markus 12: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.