Markus 10
10
Magtoloꞌ si Isa sabab pagbutasin
(Mateo 19:1-12; Lukas 16:18)
1Manjari tahalaꞌ si Isa amban lahat Jalil duk hap pī iye si meꞌ kalahat-lahatan laꞌi si Yahudiya duk sampay si meꞌ kalahatan si lipag boheꞌ Jordan. Banes ne isab aꞌa patipun si iye laꞌi. Manjari tinoloꞌan siye weꞌ si Isa, sa hinangannen. 2Niyaꞌ meꞌ Pariseo patapit pī si iye duk panguhi-nguhide iye, tilewde iye, paꞌinde, “Dem saraꞌ, makajari ke bang aꞌahin timananne andanen?” 3Sambunganne siye, paꞌinne, “Ine teꞌ daꞌakan pangurung si Musa kaꞌamin?” 4Paꞌinde, “Pangandūsan si Musa lellahin milmahan sulat pagbutasan, ubus makajari ne timananne andanen.” 5“Bennal iyan,” paꞌin si Isa. “Saguwaꞌ hangkan sinulat weꞌ ne si kaꞌam pangandaꞌakan iyan, sabab gaꞌi kaꞌam ngatu nuhut toloꞌ. 6Saguwaꞌ kemuwe tagnaꞌ pamapanjari Tuhan kēmon-kēmonin, ‘pinapanjari weꞌ ne manusiyaꞌin lella duk dende,’ sa pinaꞌin dem kitabin. 7‘Hangkan tahalaꞌ lellahin amban saꞌi-samanen bu padambuwaꞌ iye si andanen, 8duk bakas duwehin magdambuwaꞌ baran ne.’ Manjari dumaꞌin ne siye duwe baran,” paꞌin si Isa, “saguwaꞌ dambuwaꞌ baran ne. 9Hangkan subey teꞌed gaꞌi pagbutas aꞌa bakas pinagdambuwaꞌ weꞌ Tuhanin.”
10Paglaꞌi ne balik meꞌ tindeg si Isahin dem lumaꞌ patennaꞌanden, tinilew isab weꞌ de si Isa sabab toloꞌne miyaꞌan. 11Sambunganne siye, paꞌinne, “Sine-sine nimanan andanen bu maganda seddili, magjina iye duk kapagduse iye si andane poꞌonin. 12Damikkiyan bang dendehin isab timananne ellanen bu magella iye seddili, magjina iye.”
Si Isa malasa si meꞌ mākanak dikiꞌ
(Mateo 19:13-15; Lukas 18:15-17)
13Niyaꞌ meꞌ aꞌa moꞌo meꞌ anakde pī pu si Isa supaya siye antananne. Saguwaꞌ pinagamāhan siye weꞌ meꞌ tindegnen. 14Pagkite si Isa inin, astel iye. “Ambat pitu si aku meꞌ mākanakin,” paꞌinne, “duk daꞌa siye saggaꞌun bi. Peggeꞌ aꞌa kuweꞌ rnākanakin ngatu du pinagbayaꞌan weꞌ Tuhanin. 15Sabennal akahante kaꞌam,” paꞌin si Isa, “bang pangandel aꞌa si Tuhanin dumaꞌin kuweꞌ pangandel mākanakin, na aꞌa iyan asal gaꞌi sumakup dem pagbayaꞌan Tuhanin.” 16Manjari pinippi weꞌ si Isa meꞌ mākanakin maggantiꞌ-gantiꞌ. Binettad weꞌ ne tangannen si siye duk māku-māku kahāpan iye si Tuhan para si siye.
Aꞌa dayahanin
(Mateo 19:16-30; Lukas 18:18-30)
17Manjari pagsōng lumengngan disi Isa hap kalahat-lahatan, niyaꞌ aꞌa magubas pī si iye duk nengge duk tuꞌutne magpadiyawaꞌ pu si Isa, paꞌinne, “Tuwan, aꞌa hāp kew. Ine subey hinangku duk ku pinasukuꞌan umul salama-lama?” 18Sambungan si Isa iye, paꞌinne, “Weꞌey paꞌinnu weꞌ hāp ku? Gaꞌ niyaꞌ hāp luwal Tuhanin dambuwaꞌ-buwaꞌ. 19Kataꞌuhannu du,” paꞌinne, “meꞌ pangandaꞌakan Tuhanin. ‘Daꞌa kew monoꞌ. Daꞌa kew magjina. Daꞌa kew nangkew. Daꞌa kew naksiꞌ gaꞌi bennal. Daꞌa kew ngaliba. Pagaddatanun saꞌi-samanun.’ ” 20“Na, Tuwan,” paꞌinne, “kēmon iyan tinuhut weꞌ ku kemuwe nakanak pe ku.” 21Sasang si Isa mayaman iye, kalasahanne iye. Paꞌin si Isa, “Niyaꞌ pe dambuwaꞌ gaꞌ tahinangnu. Pī kew, pabellihanun kēmon alataꞌnun bu pangurungun ulinen si meꞌ mamiskinin. Manjari niyaꞌ du iyan alataꞌnu laꞌi si surgaꞌ. Pagubus, balik kew pitu, nuhut kew aku.” 22Pagkalene bissā si Isa miyaꞌan, sengngel luwenen duk tahalaꞌ iye dukka, peggeꞌ ekka teꞌed alataꞌne.
23Manjani mayam si Isa paliput si meꞌ tindegnen duk paꞌinne si siye, “Asal hunit teꞌed meꞌ madayahanin ngatu pinagbayaꞌan weꞌ Tuhanin.” 24Ulaliꞌ teꞌed meꞌ tindegnen si bissāne miyaꞌan. Saguwaꞌ paꞌinne si siye balik, “Meꞌ pungtinaꞌi, asal hunit teꞌed aꞌahin ngatu pinagbayaꞌan weꞌ Tuhanin. 25Mura pe untaꞌin palabey si lowang dalum amban aꞌa dayahanin ngatu pinagbayaꞌan weꞌ Tuhanin.” 26Pagkalede bissāne miyaꞌan, ulaliꞌ teꞌed siye manamal duk paꞌinde si iye, “Na, sine ne tapī si surgaꞌin bang kuweꞌ iyan?” 27Manjari mayam si Isa si siye duk paꞌinne, “Bang manusiyaꞌ gaꞌi teꞌed makajari, saguwaꞌ bang Tuhanin, gaꞌ niyaꞌ hunit si iye. Tahinangne kēmon.”
28Manjari missā si Petros. “Payamanun kami inin,” paꞌinne. “Ubus ne ambanan kami kēmon-kēmonin duk nuhut ne kami kaꞌu.” 29“Aweꞌ,” paꞌin si Isa, “sabennal akahante kaꞌam, bang niyaꞌ aꞌa ngambanan lumaꞌnen atawa pungtinaꞌinen lella-dende, atawa saꞌi-samanen, atawa meꞌ anaknen, atawa bulaknen, bang ambananne meꞌ inin sabab lasane si akuhin duk supaya iye kapalumengngan moꞌo aka-aka mahāpin, 30asal tumbasan Tuhanin iye paꞌekka meꞌ lumaꞌ, duk meꞌ pungtinaꞌi lella-dende, meꞌ saꞌi, meꞌ anak, duk meꞌ bulak, tiggelanne tuꞌu si dunya. Saguwaꞌ makalabey isab iye kabinasahan bang iye nuhut aku. Saguwaꞌ bisan iye bininasa,” paꞌin si Isa, “inurungan du iye umul gaꞌ tamananne laꞌi si ahilat. 31Ekka meꞌ dumehellu kuweꞌituhin, dumambuli du si pasōngan duk ekka dumambuli kuweꞌituhin, dumehellu du si pasōngan.”
Kamintellune pinaꞌal weꞌ si Isa sabab kamateynen
(Mateo 20:17-19; Lukas 18:31-34)
32Manjari paglaꞌi si Isa duk meꞌ saweꞌnen si lān pataked tudju Awrusalam, lumengngan si Isa padehellu amban siye. Kebba-kebbahan meꞌ tindegnen duk meꞌ mapatuhut si iye si dambulihanin tinalew. Binoꞌo ne isab weꞌ si Isa patala-tala tindegne sampūꞌ duk duwehin duk inakahan siye weꞌ ne sabab sōng maꞌumantag si iyehin. 33“Pakale kaꞌam,” paꞌinne. “Kite bi inin pataked hap Awrusalam. Paglaꞌi ne kite bi, aku, Anak Manusiyaꞌin, sinōngan du pī si antanan meꞌ nakuraꞌ meꞌ imamin duk meꞌ guru si saraꞌ āgamahin. Manjari hukumande si akuhin weꞌ pinapatey ku. Ubus sōngande du ku isab pī si antanan meꞌ aꞌa dumaꞌin Yahudi. 34Duk meꞌ bangsa seddili inin, hinangde du ku dagey duk pagluraꞌande ku duk lubakande ku. Ubus bu papateyde ku. Saguwaꞌ puwas tellum bahangi, ellum du ku balik.”
Pināku si Yakub duk Yahiyahin
(Mateo 20:20-28)
35Manjari patapit pī pu si Isa si Yakub duk Yahiya, meꞌ anak Sebedehin. Paꞌinde si iye, “Tuwan, niyaꞌ batang pāku kami si kaꞌu hinangnu para si kami.” 36“Weꞌ ine kabayaꞌanbi hininangku para si kaꞌamin?” paꞌin si Isa. 37Nambung siye, paꞌinde, “Kabayaꞌan kamihin, bang ne kew ningkoloꞌ magbayaꞌ, patingkoloꞌnu kami si bihingnu, dambuwaꞌ si kanawanannu duk dambuwaꞌ si bibangannu.” 38Saguwaꞌ paꞌin si Isa si siye, “Gaꞌi kataꞌuhanbi bang ine pinākubi inin. Ngatu ke kaꞌam bininasa kuweꞌ sōng paminasa akuhin? Ngatu ke kaꞌam pinapatey kuweꞌ sōng pamapatey akuhin?” 39“Aweꞌ, ngatu kami,” paꞌinde. Manjari paꞌin si Isa si siye, “Asal bininasa du kaꞌam kuweꞌ sōng paminasa akuhin duk pinapatey du kaꞌam kuweꞌ pamapatey akuhin. 40Saguwaꞌ bang pagpatingkoloꞌ si kanawanankun atawa si bibangankun,” paꞌin si Isa, “dumaꞌin aku magbayaꞌin. Saguwaꞌ meꞌ paningkoloꞌan miyaꞌan sukuꞌ si meꞌ pinanyapan Tuhanin.”
41Manjari pagkale tindeg si Isa sampūꞌin sabab pināku si Yakub duk Yahiyahin, astel siye. 42Manjari ilinganan weꞌ si Isa meꞌ tindegnen kēmon. Paꞌinne si siye, “Kataꞌuhanbi addat meꞌ aꞌa si dunyahin. Meꞌ nakuraꞌ meꞌ kabangsahan seddilihin magmanda teꞌed si meꞌ aꞌahin, duk meꞌ aꞌa malangkewin magbayaꞌ teꞌed si meꞌ aꞌaden. 43Saguwaꞌ kaꞌam,” paꞌin si Isa, “subey gaꞌi magsa miyaꞌan. Sine-sine kaꞌam mabayaꞌ pinalangkew, subey iye daraꞌakanbi. 44Duk sine-sine kaꞌam asal mabayaꞌ manjari tamanan malangkewin, subey iye kuweꞌ banyagaꞌ nabangan saweꞌnen. 45Peggeꞌ bisan aku, Anak Manusiyaꞌin,” paꞌin si Isa, “dumaꞌin papituhankun makitabang si manusiyaꞌ saguwaꞌ nabang manusiyaꞌ. Duk pitu ku paglillaꞌku umulkun pangalekkat meꞌ aꞌa maꞌekkahin supaya siye gaꞌi ilegga sabab duseden.”
Kawuliꞌan weꞌ si Isa aꞌa pessekin
(Mateo 20:29-34; Lukas 18:35-43)
46Manjari tekka si Isa duk meꞌ tindegnen si puweblo Ariha. Pagtahalaꞌde billaꞌi, ekka teꞌed aꞌa nuhut siye. Na, niyaꞌ laꞌi ningkoloꞌ si higad lān palabeyanden aꞌa pessek magpāku-pāku sīn. Ēnnen si Bartimiyus, anak Timiyus. 47Pagkalene weꞌ si Isa, aꞌa Nasaretin hatiꞌ mapalabey miyaꞌan, ngalingan iye papales, paꞌinne, “O Isa, tubuꞌ Sultan Daꞌud, maꞌaseꞌ ne kew si aku.” 48Ekka ngamāhan iye, gaꞌi iye dinaꞌak magbukag. Saguwaꞌ namba ne papalesne paglingannen. “O tubuꞌ Sultan Daꞌud,” paꞌinne, “maꞌaseꞌ ne kew si aku.” 49Padeheng si Isa duk paꞌinne, “Lingananun bi iye.” Manjari ilinganan ne weꞌ de aꞌa mapessekin. Paꞌinde si iye, “Pahāpun ateynun. Kuwat kew, īꞌ kew linganan si Isa.” 50Magtawus inānan weꞌ ne mantanen bu ne pahulangkad duk patapit iye pī pu si Isa. 51Paꞌin si Isa si iye, “Ine kabayaꞌannu hinangku si kaꞌ u?” “Tuwan,” paꞌinne, “kabayaꞌankun makakite ne ku.” 52Paꞌin si Isa si iye, “Pī ne kew. Kawuliꞌan ne kew peggeꞌ sandel kew si aku.” Magtawus iye makakite duk nuhut ne iye si Isa lumengngan.
ទើបបានជ្រើសរើសហើយ៖
Markus 10: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.