Lukas 1
1
Sulat amban si Lukas para pu si Teopilus
1Ekka ne bakas nulat sabab meꞌ bakas malumabey diyalem kamihin, sabab Almasihin. 2Sinulat weꞌ de meꞌ bakas inaka si kamihin weꞌ meꞌ bakas mangite hininangne kemuwe tagnaꞌin, duk siye inin meꞌ aꞌa magmahalayak lapal Tuhanin. 3Na, aku isab kuweꞌitu, peggeꞌ bakas tapaliksaꞌku ne teꞌed kēmon malumabey miyaꞌan kemuwe tagnaꞌ, tapikilku isab manulat inin pinagturul-turul para si kaꞌu, Tuwan Teopilus, 4supaya kataꞌuhannu weꞌ kēmon bakas sinalsila si kaꞌuhin asal bennal teꞌed.
Pinaꞌal panganak pu si Yahiyahin
5Kuweꞌ inin tagnaꞌnen: Matuꞌuhin, masa si Herod pe sultan si lahat Yahudiyahin, niyaꞌ imam ēnnen Jakariya. Dambuwaꞌ iye meꞌ imam si grupu Imam Abiya ley. Andanen si Elisabet pangkatan meꞌ imam isab. 6Kaduwangan siye bentel si pagmatahan Tuhan. Tinuhut teꞌed weꞌ de kēmon saraꞌ duk pangandaꞌakan Tuhanin. Gaꞌ niyaꞌ panallaꞌan siye. 7Saguwaꞌ gaꞌ niyaꞌ anakde peggeꞌ gaꞌi anakan Elisabet duk masa miyaꞌan bahiꞌ ne teꞌed siye saliꞌ-saliꞌ.
8Manjari dambuwaꞌ ellew, pagantiꞌ ne magimam Jakariya duk grupunen si langgal mahadjehin. 9Sa addat meꞌ imamin magpuwaꞌan siye, duk Jakariya kapasukuꞌan manugtug kamanyanin dem bilik sutsi dem langgalin. Hangkan padiyalem iye pī si lumaꞌ Tuhanin. 10Meꞌ aꞌa mabanesin laꞌi si bukut ngampun-ngampun sasang panugtug kamanyanin. 11Manjari pabagala si iye dambuwaꞌ malaꞌikat Tuhanin nengge laꞌi si kanawanan antag panugtug-nugtugan kamanyanin. 12Pagkite Jakariya malaꞌikatin, takeddut iye duk paꞌasekan talew iye. 13Saguwaꞌ paꞌin malaꞌikatin si iye, “Daꞌa kew tinalew, Jakariya. Pinakale ne weꞌ Tuhanin pangampunnun. Andanun Elisabet nganak du weꞌ nu dambuwaꞌ lella duk ēnanun iye Yahiya. 14Asal sinna kew teꞌed iyan duk kēgan kew duk ekka isab aꞌa kēgan paginanakan ne iye, 15peggeꞌ bangsahan du iye iyan si pagmatahan Tuhan. Gaꞌi iye subey nginum ine-ine makalango. Kemuwe inanakan iye, andang ne iye paꞌasekan Niyawa Sutsihin. 16Duk ekka meꞌ aꞌa Israꞌil taboꞌone balik si Tuhan Panuhutanden. 17Si Yahiya anaknu inin, iye mapadehellu amban Panuhutanin. Pagbayaꞌan iye weꞌ Niyawa Sutsihin kuweꞌ Nabi Eliyas masaley, duk balakatan iye kuweꞌ balakat Nabi Eliyasin masaley. Sabab panoloꞌnen, maghāp balik meꞌ samahin duk meꞌ anakden. Duk meꞌ aꞌa manggaꞌi manuhut pangandaꞌakan Tuhanin, sabab meꞌ panoloꞌnen, pindahande du pikilanden duk bentel ne pamikilden. Ubus niyaꞌ ne meꞌ aꞌa memes bang tekka Panuhutanin.”
18Paꞌin Jakariya si malaꞌikatin, “Saꞌingge pakabugtuꞌku inin? Bahiꞌ ne ku duk andakun bahiꞌ ne du isab.” 19Nambung malaꞌikatin, paꞌinne, “Jibraꞌil ku inin. Aku inin luwal ku nengge si panaꞌanan Tuhanin. Dinaꞌak ku weꞌ Tuhanin pitu missā si kaꞌu ngakahan kaꞌu aka-aka mahāp inin. 20Payamanun be, peggeꞌ gaꞌ kahagadnu inakakun, ngaꞌumew kew iyan duk gaꞌi kew makabissā samantaꞌan gaꞌi tuman pinaꞌinku si kaꞌu inin. Saguwaꞌ kēmon bakas inakaku si kaꞌuhin asal tuman du bang taꞌabut ne waktunen.”
21Sābu miyaꞌan, meꞌ aꞌahin magagad pu si Jakariya duk ulaliꞌ siye bang weꞌey iye managhāꞌ tiggel laꞌi diyalem langgal. 22Pagpaguwaꞌne, gaꞌi iye taꞌu missā si siye hangkan kataꞌuhande weꞌ niyaꞌ bakas takitene pabagala si iye laꞌi dem langgal. Ninyas-ninyas hadja iye si siye peggeꞌ umew ne iye.
23Manjari pagjukup ne ellew pagimamnen laꞌi si langgal mahadjehin, balik ne iye hap lahatne. 24Gaꞌ du tiggel, betteng ne si Elisabet, andanen, duk dem limem bulan gaꞌ Elisabet paguwaꞌ-guwaꞌ. 25Paꞌinne, “Asal hāp Tuhanin si aku. Inānan ne weꞌ ne kaꞌiyaꞌanku si meꞌ aꞌahin peggeꞌ tiyaꞌ ne ku sōng anakan.”
Pinaꞌal panganak pu si Isahin
26Pagennem bulan ne betteng Elisabetin, dinaꞌak weꞌ Tuhanin malaꞌikat Jibraꞌil hap pī si dambuwaꞌ puweblo laꞌi si lahat Jalil inēnan Nasaret. 27Dinaꞌak iye pī si dambuwaꞌ budjang ēnnen si Mariyam. Si Mariyam inin magtunang duk dambuwaꞌ lella ēnnen si Yusup, tubuꞌ Sultan Daꞌud ley. 28Pagtekka malaꞌikatin laꞌi si palaꞌihan Mariyamin, paꞌinne si dendehin, “Assalamu alaikum. Tapeneꞌ kew weꞌ Tuhanin, Mariyam. Luꞌu si kaꞌu Tuhanin.”
29Pagkale Mariyam pinaꞌin malaꞌikatin, sasew teꞌed dem pikilannen duk pinikil-pikil weꞌ ne bang ine hāti pinaꞌinne si iye miyaꞌan. 30Manjari paꞌin malaꞌikatin si iye, “Daꞌa kew tinalew, Mariyam, peggeꞌ kasulutan teꞌed Tuhanin si kaꞌu. 31Sōng betteng kew iyan duk nganak kew lella. Ēnanun iye si Isa. 32Bangsahan teꞌed iye iyan duk inēnan du iye Anak Tuhan Tamanan Malangkewin. Duk pamanjari Tuhanin du iye sultan kuweꞌ papuꞌne Sultan Daꞌud ley. 33Duk magsultan du iye si meꞌ bangsa Israꞌilin salama-lama. Gaꞌ niyaꞌ tamanan pagsultannen.”
34Paꞌin Mariyam si malaꞌikatin, “Saꞌingge kajarine inin bu gaꞌ pe niyaꞌ ellaku?” 35Nambung malaꞌikatin, paꞌinne, “Patekka du piyu si kaꞌu Niyawa Sutsihin duk kalandungan du kew weꞌ balakat Tuhanin. Hangkan hep nakanak inanakannun sutsi duk inēnan iye Anak Tuhan. 36Payamanun be isab usbanun Elisabet. Betteng iye kuweꞌitu bisan ne iye bahiꞌ. Dende pinaꞌinde gaꞌi manganakin, kuweꞌitu ennem bulan ne bettengnen. 37Peggeꞌ bang si Tuhan gaꞌ niyaꞌ hunit.” 38Manjari paꞌin Mariyam, “Daraꞌakan Tuhanin ku inin. Maglillaꞌ ku si pinaꞌinnun.” Ubus tahalaꞌ ne amban iye malaꞌikatin.
Tinindew weꞌ Mariyam si Elisabet
39Gaꞌ tiggel puwas miyaꞌan, magmemes Mariyam duk magdayiꞌ-dayiꞌ iye hap pī si dambuwaꞌ lahat diyataꞌ laꞌi si Yahudiya. 40Pagtekkane laꞌi, hap pī iye si lumaꞌ Jakariya duk paꞌinne pu si Elisabet, “Assalamu alaikum.” 41Pagtakale Elisabet suwala Mariyamin, magtawus usaꞌ nakanakin dem bettengne duk pagbayaꞌan iye weꞌ Niyawa Sutsihin, 42duk missā iye papales pu si Mariyam, paꞌinne, “Gaꞌ niyaꞌ dende tuꞌu si dunya kuweꞌ kaꞌuhin kaꞌurungan kahāpan maglabi-labi weꞌ Tuhanin. Damikkiyan nakanak sōng inanakannun maglabi-labi isab kahāpan pangurung si iyehin. 43Weꞌey teꞌ ku pinahadje weꞌ saꞌi Panuhutankun, tiyaꞌ pitu nindew aku. 44Peggeꞌ pagtakaleku suwalanun, magtawus nakanak dem bettengkun usaꞌ manamal hawal kēgnen. 45Asal kēgan kew paꞌin manamal peggeꞌ kinahagad weꞌ nu weꞌ tumanan Tuhanin du pinaꞌinne si kaꞌuhin.”
Kalangan Mariyam pamudjine Tuhanin
46Manjari paꞌin Mariyam, “Asal pahadjeku teꞌed Tuhanin amban dem ateyku. 47Pinakēg ku teꞌed weꞌ Tuhan manimbul akuhin, 48peggeꞌ inasip ku weꞌ ne, daraꞌakanne madiyawaꞌin. Peggeꞌ amban kuweꞌitu inin, kēmon aꞌa magpangkat-mamangkatin ēnande du ku dende asal makēganin. 49Peggeꞌ Tuhan Mabalakatanin, hinangan makaꞌulaliꞌ hininangne si akuhin. Asal sutsi iye. 50Maꞌaseꞌ teꞌed iye si meꞌ magpangkat-pangkatan mahadje iyehin. 51Pakitehanne basagnen si meꞌ hinangannen, pagkanat-kanatne meꞌ malangkew ateynen. 52Ānanne meꞌ sultanin amban pagsultananden duk palangkewne meꞌ madiyawaꞌ ateynen. 53Duhulanne duk mahāpin meꞌ kasukalanin duk patahalaꞌne meꞌ madayahanin gaꞌ niyaꞌ taboꞌode. 54Tinabangan du weꞌ Tuhanin daraꞌakannen, bangsaten bi Israꞌil. Gaꞌ du takayipatne janjiꞌnen weꞌ kaꞌaseꞌanne kite bi. 55Peggeꞌ bakas nanggup iye si meꞌ kapapuꞌanten bi, pu si Ibrahim duk meꞌ tubuꞌnen, weꞌ kaꞌaseꞌanne du kite bi salama-lama.”
56Patennaꞌ Mariyam tellum bulan laꞌi pu si Elisabet, ubus hap lumaꞌ ne iye balik.
Panganak pu si Yahiyahin
57Manjari, taꞌabut ne ellew panganak Elisabetin duk nganak iye lella. 58Pagkale meꞌ saweꞌne magtapit lumaꞌin duk meꞌ kaꞌusbahannen weꞌ hāp teꞌed hinangan Tuhanin si iye, magkēg isab siye matuk si iye.
59Pagtaꞌabut ne nakanakin walum bahangi diyataꞌ kāpan, patipun siye pangislam nakanakin duk arak ēnande nakanakin Jakariya, sa ēn samanen. 60Saguwaꞌ paꞌin saꞌinen, “Daꞌa. Subey iye inēnan Yahiya.”
61“Weꞌey?” paꞌinde. “Gaꞌ hatiꞌ niyaꞌ bisan dambuwaꞌ meꞌ kaꞌusbahannun magēn iyan.” 62Manjari magsinyas siye si sama nakanakin bang ine kabayaꞌanne pangēn nakanakin.
63Ninyas isab Jakariya māku panulatan duk sinulatnen inin: “Ēnnen Yahiya.” Ulaliꞌ teꞌed siye kēmon. 64Manjari magtawus ne Jakariya makabissā duk pinudji weꞌ ne Tuhanin. 65Paꞌasekan talew kēmon saweꞌde magtapit lumaꞌin duk bawag maꞌumantag inin si meꞌ kalahat-lahatan diyataꞌ laꞌi si Yahudiya. 66Duk kēmon makakale inin, luwal pikil-pikilde duk paꞌinde, “Ine enteꞌ pangagantaꞌ Tuhan nakanak miyaꞌan?” Peggeꞌ pastiꞌ weꞌ balakat Tuhanin laꞌi si nakanak miyaꞌan.
Missā Jakariya sabab maꞌumantag si pasōnganin
67Manjari Jakariya, sama nakanakin, pinagbayaꞌan weꞌ Niyawa Sutsihin duk pasampayne lapal Tuhanin, paꞌinne, 68“Pudjite bi Tuhanin, iye Tuhan sinambahayang bangsate bi Israꞌilin, peggeꞌ taꞌessebne du kite bi meꞌ aꞌanen duk pinaluwas kite bi weꞌ ne. 69Papitune si kite bi dambuwaꞌ manimbulin, balakatan du iye duk tubuꞌ daraꞌakannen Sultan Daꞌud ley. 70Asal nanggup Tuhanin awwalley duk pinalataꞌ inin weꞌ meꞌ nabine masutsihin. 71Nanggup Tuhanin weꞌ asal paluwasne kite bi amban meꞌ bantaten bi duk amban antanan meꞌ mabunsi si kitehin bi. 72Paꞌinne weꞌ kaꞌaseꞌanne meꞌ kapapuꞌante bi ley duk tumananne du janjiꞌne masutsihin, 73iye janjiꞌ sinapahanne si papuꞌten bi Ibrahim. 74Ngajanjiꞌ hep iye weꞌ kite bi meꞌ tubuꞌ Ibrahimin, paluwasne du amban antanan meꞌ bantaten bi duk kite bi kapaghinang si Tuhan, gaꞌ niyaꞌ makatalew kite bi, 75supaya tiggelante bi maꞌellumin kapaghinang kite bi si Tuhan, sutsi pagateyten, duk bentel hinanganten.”
76Manjari missā Jakariya si anaknen, paꞌinne, “Kaꞌu Totoꞌ, inēnan du kew nabi Tuhan Tamanan Malangkewin. Peggeꞌ padehellu du kew amban Panuhutanin manyap lān palabeyannen. 77Kaꞌu iye mangakahan meꞌ aꞌanen supaya kataꞌuhande weꞌ bang inampun ne duseden, timbul du siye. 78Peggeꞌ Tuhanin maꞌaseꞌ teꞌed duk hāp. Papitune si kite bi dantaꞌ amban surgaꞌin. 79Sinag dantaꞌ inin si kēmon mapatennaꞌ dem lindemin, si meꞌ aꞌa matalew mamateyin, duk panduꞌanne kite bi pī si lān tudju kasanyanganin.”
80Manjari anak Jakariyahin nulig ne paꞌin duk magkasōng isab pamikilnen. Duk laꞌi iye patennaꞌ dem lahat makagindew-gindew samantaꞌan gaꞌ pe iye paguwaꞌ patampak si meꞌ aꞌa Israꞌilin.
ទើបបានជ្រើសរើសហើយ៖
Lukas 1: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
