Hinangan 27
27
Patulak si Paul hap Roma
1Sakaliꞌ pagsukatanden weꞌ patulak kami hap lahat Italiya, sinōngan ne weꞌ de si Paul duk meꞌ pilisu sinduwehin pī si antanan Juliyus, dambuwaꞌ meꞌ kapitan si kumpaniya meꞌ sundalu bangsa Roma inēnan “Kumpaniya Sultan Nakuraꞌin.” 2Pasakey kami si dambuwaꞌ kappal amban Adaramittu, tulaknen hap meꞌ kalahatan laꞌi si lahat Asiya. Manjari patulak ne kami. Nuhut kami isab si Aristarkus, aꞌa Makedoniya maglahat laꞌi si Tessalonika. 3Pagsasumuhin tekka kami laꞌi si Sidon. Hāp isab mātabat Juliyusin pu si Paul. Pinasagadan weꞌ ne si Paul pī nindew meꞌ bagayne si lahat Sidon miyaꞌan, supaya iye tatabangande ine-ine sukal si iye. 4Patulak kami amban Sidon, duk nusul kami pūꞌ Kiprusin paꞌellig-ellig peggeꞌ pasumbal baliyuhin. 5Ubus palabey kami tapit si lahat Kilikiya duk Pampiliya, manjari tekka kami si Mira, puweblo laꞌi si lahat Likiyas, duk duwaꞌi kami laꞌi. 6Niyaꞌ kappal takite kapitanin laꞌi amban puweblo Iskandal sōng patulak hap Italiya duk pinasakey kami weꞌ ne laꞌi.
7Lomboy teꞌed duk hunit lengngan kamihin bang piyem bahangi, sampay tekka kami tapit si puweblo Kinidus. Manjari peggeꞌ pales baliyu mapasumbalin, gaꞌi kami sumōng pī; hangkan padiyaꞌut kami tudju Tōng Salmone bu paꞌellig kami si dambiyaꞌ pūꞌ Kerete. 8Nusul-nusul higad kami duk bisan kami kahunitan ujud tekka kami si dungguꞌan inēnan bang si bissāte, ‘Meꞌ Dungguꞌan Hāp.’ Gaꞌi du miyaꞌan tala amban puweblo Laseya.
9Peggeꞌ tiggel-tiggel ne kami miyaꞌan si lān, siya-siya ne bang palanjal pe kami peggeꞌ baytu habagat ne. Sinessaꞌan meꞌ aꞌahin weꞌ si Paul, paꞌinne, 10“Meꞌ bagay, pandogahanku weꞌ tulakte bi amban inin asal siya-siya. Kaw kappalin duk duwaꞌanin lepas duk sampay umulin.” 11Saguwaꞌ kapitan meꞌ sundaluhin, kinahagad pe weꞌ ne pinaꞌin kapitan kappalin duk dapuꞌnen amban pinaꞌin si Paulin. 12Padungguꞌan miyaꞌan gaꞌi hāp padehengan bang baytu habagat hangkan kaꞌekkahanin mabayaꞌ ne patulak ngapas Penisiya duk pinalabey dahuꞌ habagatin laꞌi. Penisiya īꞌ dambuwaꞌ padungguꞌ-dungguꞌan laꞌi si pūꞌ Kerete gaꞌi tewwaꞌ baliyu.
Habagat si tengngaꞌ sellang
13Manjari, pagsakaliꞌ nihup sātanin gaꞌi du basag, kannal meꞌ aꞌahin hāp ne patulakan. Hangkan inonot ne weꞌ de padiyataꞌ gontengin duk patulak ne kami nusul-nusul pūꞌ Kerete miyaꞌan. 14Saguwaꞌ gaꞌ du tiggel, nihup ne baliyu mabasagin amban higad. 15Tewwaꞌ baliyu kappalin duk peggeꞌ gaꞌi sumampang kappalin si baliyu, pinasagadan ne hadja weꞌ kami kappalin boꞌo baliyuhin. 16Ujudnen umellig kami si dambiyaꞌ pūꞌ Kauda, pūꞌ dikiꞌ-dikiꞌ. Duk laꞌi, bisan kami kahunitan, tapahaget weꞌ kami buti bakas tinundan-tundanin. 17Pinasakat weꞌ de butihin diyataꞌ kappal ubus bu ileges weꞌ de baran kappalin duk ingket duk gaꞌi kepak. Ilebbes isab weꞌ de banugin peggeꞌ tinalew siye kaw sumanglad kappalin pī si tebbahan tapit laꞌi si Libiya. Duk pinasagadan ne weꞌ de kappalin boꞌo baliyu. 18Basag pe teꞌed badjuhin hangkan pagsasumuhin nagnaꞌ ilaboꞌ weꞌ de dem tahik meꞌ duwaꞌan kappalin. 19Katellum bahanginen, tinimanan weꞌ de sinduwe meꞌ kapanyapan kappalin ilaboꞌ magdem tahik. 20Duk bang piyem bahangi gaꞌ niyaꞌ takite kami mata ellew atawa poteꞌan. Duk gaꞌ paluggaꞌ baliyu mapalesin. Gaꞌ ne teꞌed kami ngase-ngase weꞌ timbul pe kami.
21Manjari, peggeꞌ tiggel-tiggel ne gaꞌ niyaꞌ meꞌ aꞌahin makaꞌakan, nengge si Paul si tengngaꞌde duk paꞌinne si siye, “Meꞌ bagay, bang pakalebi siꞌ ku miyaꞌan, gaꞌ siꞌ kite bi tumulak amban pūꞌ Kerete. Duk gaꞌi siꞌ kite bi magkatiksaꞌan duk kalepasan. 22Saguwaꞌ kuweꞌitu junjungku si kaꞌam, papagenun bi ateybin. Gaꞌ du kaꞌam iyan niyaꞌ magmula. Luwal hadja kappalin malepasin. 23Peggeꞌ dibuhiꞌ,” paꞌin si Paul, “niyaꞌ pabagala si aku dambuwaꞌ malaꞌikat amban Tuhan sinambahayangkun duk sukuꞌ si iye ku. 24Paꞌin malaꞌikatin si aku, ‘Daꞌa kew talew, Paul. Subey du kew humarap si Sultan Nakuraꞌin. Duk hawal kahāp Tuhan si kaꞌuhin, sampay meꞌ saweꞌnu si kappal inin ellum du.’ 25Hangkan meꞌ bagay,” paꞌin si Paul, “papagenun bi ateybin. Peggeꞌ ngandel ku si Tuhan weꞌ tuman du bakas pinaꞌin si aku miyaꞌan. 26Saguwaꞌ taboꞌo baliyu du kite bi sumanglad si dambuwaꞌ pūꞌ.”
27Kasampūꞌ duk ampat sangemnen kemuwe tagnaꞌ badju miyaꞌan, laꞌi pe kami taboꞌo-boꞌo weꞌ baliyuhin si diyaꞌut tahik Adariya. Pagsōng nengaꞌ bahangi ne, meꞌ maghinang si kappalin, talessa-lessade weꞌ tapit ne kami si higad. 28Hangkan matuntun siye ingket iningketan bohat si tuggune supaya kataꞌuhan bang saꞌingge laleman tahikin. Manjari lalemannen niyaꞌ duwempūꞌ deppe. Gaꞌ du tiggel, pinatuntun ne isab weꞌ de balik ingketin. Sampūꞌ saꞌ duk limen deppe lalemannen. 29Talew siye kaw sumanglad kappalin pī si kabatuhan, hangkan ngalaboꞌ siye ampat gonteng amban buliꞌ kappalin. Duk māku-māku siye si Tuhan karayaw mura ne ellew. 30Meꞌ aꞌa maghinang si kappalin sōng lahi amban kappal. Magmā-mā pī siye si mundaꞌ kappalin ngalaboꞌ meꞌ gonteng bu iluklusan weꞌ de ingket panowengan butihin duk pinatuntun weꞌ de pī si tahik. 31Saguwaꞌ paꞌin si Paul si kapitanin duk si meꞌ sundaluhin, “Bang tahalaꞌ meꞌ aꞌa iyan amban kappal, magmula kaꞌam.” 32Hangkan kinehet weꞌ meꞌ sundaluhin ingket butihin duk ne humanut.
33Pagsōng ellew ne, binuyuꞌ-buyuꞌ siye weꞌ si Paul kēmon dinaꞌak mangan. Paꞌinne, “Sampūꞌ ne duk ampat bahangi kuweꞌitu pagsusebin. Gaꞌ kaꞌam bakas mangan ine-ine. 34Hangkan junjungku si kaꞌam, mangan kaꞌam dahuꞌ duk kaꞌam makatatas. Peggeꞌ gaꞌ du kaꞌam iyan niyaꞌ magmula.” 35Ubus miyaꞌan bissāne, ngeddoꞌ si Paul pan duk magpasalamat iye si Tuhan si matahande kēmon. Ubus bu kinepak-kepak weꞌ ne panin bu mangan. 36Manjari ngahaget ne ateyden duk mangan isab siye kēmon. 37Niyaꞌ kami duwe hatus duk pitumpūꞌ duk ennem meꞌ aꞌa dem kappalin. 38Pagmakaꞌakan ne siye kēmon, duk esso ne, ilaboꞌ weꞌ de buwas tiriguhin dem tahik supaya ngalampung kappalin.
Magkaꞌat kappalin
39Pagellew ne, gaꞌ takilalede bang pūꞌ ine takitede matapit miyaꞌan, saguwaꞌ niyaꞌ takitede tahik paloꞌok taga umus si higad. Iye pikilanden, bang makajari, pasangladde kappalin laꞌi si umus miyaꞌan. 40Hangkan kinehet weꞌ de ingket meꞌ gontengin duk inambanan ne dem tahik. Ilekkahan isab weꞌ de ingket pamekkes bansān kappalin. Ubus bu pinatengge weꞌ de banug si mundaꞌin duk binoꞌo ne weꞌ baliyu kappalin tudju higad. 41Saguwaꞌ niyaꞌ talanggalde kababewan manjari sumanglad kappalin laꞌi. Mundaꞌ kappalin masumangladin duk gaꞌi ne umusaꞌ, saguwaꞌ buliꞌnen jadjag weꞌ basag goyakin.
42Pikilan meꞌ sundaluhin papateyde meꞌ pilisuhin kēmon, supaya gaꞌ niyaꞌ lumangi pī si higad paleppa. 43Saguwaꞌ kapitanin gaꞌi mabayaꞌ weꞌ niyaꞌ umantag pu si Paul. Hangkan pinages weꞌ ne meꞌ sundaluhin, gaꞌi dinaꞌak hininang tapikilde miyaꞌan. Bisan miyaꞌan, dinaꞌak pe weꞌ ne kēmon meꞌ mataꞌu mapalangihin patugpaꞌ dehellu duk palangi ne pī si higad. 44Meꞌ sinduwehin dinaꞌak paturul maggampalan diyataꞌ meꞌ papan-papan atawa meꞌ kayu mapolong amban kappalin. Kuweꞌ miyaꞌan katimbul kamihin kēmon pī si higad.
ទើបបានជ្រើសរើសហើយ៖
Hinangan 27: yakV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019, Wycliffe Bible Translators, Inc. All rights reserved.
